Catutthasikkhāpadaṃ
[494] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena kāṇamātā
upāsikā saddhā hoti pasannā . kāṇā gāmake aññatarassa
purisassa dinnā hoti . athakho kāṇā mātugharaṃ agamāsi kenacideva
karaṇīyena . athakho kāṇāya sāmiko kāṇāya santike dūtaṃ
pāhesi āgacchatu kāṇā icchāmi kāṇāya āgatanti . athakho
kāṇamātā upāsikā kismiṃ viya rittahatthaṃ gantunti pūvaṃ paci .
Pakke pūve aññataro piṇḍacāriko bhikkhu kāṇamātāya upāsikāya
nivesanaṃ pāvisi.
{494.1} Athakho kāṇamātā upāsikā tassa bhikkhuno pūvaṃ
dāpesi . so nikkhamitvā aññassa ācikkhi . tassāpi pūvaṃ
dāpesi . so nikkhamitvā aññassa ācikkhi . tassāpi pūvaṃ
dāpesi . yathāpaṭiyattaṃ pūvaṃ parikkhayaṃ agamāsi . dutiyampi kho
kāṇāya sāmiko kāṇāya santike dūtaṃ pāhesi āgacchatu kāṇā
icchāmi kāṇāya āgatanti . dutiyampi kho kāṇamātā upāsikā
kismiṃ viya rittahatthaṃ gantunti pūvaṃ paci . pakke pūve aññataro
piṇḍacāriko bhikkhu kāṇamātāya upāsikāya nivesanaṃ pāvisi .
Athakho kāṇamātā upāsikā tassa bhikkhuno pūvaṃ dāpesi .
So nikkhamitvā aññassa ācikkhi . tassāpi
Pūvaṃ dāpesi . so nikkhamitvā aññassa ācikkhi . tassāpi pūvaṃ
dāpesi . yathāpaṭiyattaṃ pūvaṃ parikkhayaṃ agamāsi . tatiyampi kho kāṇāya
sāmiko kāṇāya santike dūtaṃ pāhesi āgacchatu kāṇā icchāmi
kāṇāya āgataṃ sace kāṇā nāgamissati ahaṃ aññaṃ pajāpatiṃ
ānessāmīti . tatiyampi kho kāṇamātā upāsikā kismiṃ viya
rittahatthaṃ gantunti pūvaṃ paci . pakke pūve aññataro piṇḍacāriko
bhikkhu kāṇamātāya upāsikāya nivesanaṃ pāvisi . athakho kāṇamātā
upāsikā tassa bhikkhuno pūvaṃ dāpesi . so nikkhamitvā aññassa
ācikkhi . tassāpi pūvaṃ dāpesi . so nikkhamitvā aññassa ācikkhi.
Tassāpi pūvaṃ dāpesi . yathāpaṭiyattaṃ pūvaṃ parikkhayaṃ agamāsi . Athakho
kāṇāya sāmiko aññaṃ pajāpatiṃ ānesi.
{494.2} Assosi kho kāṇā tena kira purisena aññā pajāpati
ānītāti . sā rodantī aṭṭhāsi . athakho bhagavā pubbaṇhasamayaṃ
nivāsetvā pattacīvaramādāya yena kāṇamātāya upāsikāya nivesanaṃ
tenupasaṅkami upasaṅkamitvā paññatte āsane nisīdi . athakho
kāṇamātā upāsikā yena bhagavā tenupasaṅkami upasaṅkamitvā
bhagavantaṃ abhivādetvā ekamantaṃ nisīdi . ekamantaṃ nisinnaṃ
kho kāṇamātaraṃ upāsikaṃ bhagavā etadavoca kissāyaṃ kāṇā
rodatīti . athakho kāṇamātā upāsikā bhagavato etamatthaṃ
ārocesi . athakho bhagavā kāṇamātaraṃ upāsikaṃ dhammiyā
Kathāya sandassetvā samādapetvā samuttejetvā sampahaṃsetvā
uṭṭhāyāsanā pakkāmi.
[495] Tena kho pana samayena aññataro sattho rājagahā
paṭiyālokaṃ gantukāmo hoti . aññataro piṇḍacāriko bhikkhu
taṃ satthaṃ piṇḍāya pāvisi . aññataro upāsako tassa bhikkhuno
sattuṃ dāpesi . so nikkhamitvā aññassa ācikkhi . tassāpi
sattuṃ dāpesi . so nikkhamitvā aññassa ācikkhi . tassāpi
sattuṃ dāpesi . yathāpaṭiyattaṃ pātheyyaṃ parikkhayaṃ agamāsi .
Athakho so upāsako te manusse etadavoca ajjuṇho 1- ayyā
āgametha yathāpaṭiyattaṃ pātheyyaṃ ayyānaṃ dinnaṃ pātheyyaṃ
paṭiyādessāmīti . nāyya 2- sakkā āgametuṃ payāto satthoti
agamaṃsu . athakho tassa upāsakassa pātheyyaṃ paṭiyādetvā pacchā
gacchantassa corā acchindiṃsu . manussā ujjhāyanti khīyanti
vipācenti kathaṃ hi nāma samaṇā sakyaputtiyā na mattaṃ jānitvā
paṭiggahessanti ayaṃ imesaṃ datvā pacchā gacchanto corehi acchinnoti.
Assosuṃ kho bhikkhū tesaṃ manussānaṃ ujjhāyantānaṃ khīyantānaṃ
vipācentānaṃ . athakho te bhikkhū bhagavato etamatthaṃ ārocesuṃ .
Athakho bhagavā etasmiṃ nidāne etasmiṃ pakaraṇe dhammiṃ kathaṃ
katvā bhikkhū āmantesi tenahi bhikkhave bhikkhūnaṃ sikkhāpadaṃ
@Footnote: 1 Ma. ajjaṇho. evamuparipi . 2 Ma. Yu. nāyyo.
Paññāpessāmi dasa atthavase paṭicca saṅghasuṭṭhutāya saṅghaphāsutāya
.pe. vinayānuggahāya . evañca pana bhikkhave imaṃ sikkhāpadaṃ
uddiseyyātha
{495.1} bhikkhuṃ paneva kulaṃ upagataṃ pūvehi vā manthehi vā
abhihaṭṭhuṃ pavāreyya . ākaṅkhamānena bhikkhunā dvittipattapūrā
paṭiggahetabbā . tato ce uttariṃ 1- paṭiggaṇheyya pācittiyaṃ .
Dvittipattapūre paṭiggahetvā tato nīharitvā bhikkhūhi saddhiṃ
saṃvibhajitabbaṃ ayaṃ tattha sāmīcīti.
[496] Bhikkhuṃ paneva kulaṃ upagatanti kulaṃ nāma cattāri kulāni
khattiyakulaṃ brāhmaṇakulaṃ vessakulaṃ suddakulaṃ . upagatanti tattha
upagataṃ . pūvaṃ nāma yaṅkiñci pahiṇakatthāya 2- paṭiyattaṃ . manthaṃ
nāma yaṅkiñci pātheyyatthāya paṭiyattaṃ . abhihaṭṭhuṃ pavāreyyāti
yāvatakaṃ icchasi tāvatakaṃ gaṇhāhīti . ākaṅkhamānenāti
icchamānena . dvittipattapūrā paṭiggahetabbāti dvetayopattapūrā
paṭiggahetabbā . tato ce uttariṃ paṭiggaṇheyyāti taduttariṃ
paṭiggaṇhāti āpatti pācittiyassa . dvittipattapūre paṭiggahetvā
tato nikkhamantena bhikkhuṃ passitvā ācikkhitabbaṃ amutra mayā
dvittipattapūrā paṭiggahitā mā kho tattha paṭiggaṇhīti . sace
passitvā nācikkhati āpatti dukkaṭassa . sace ācikkhite
paṭiggaṇhāti āpatti dukkaṭassa.
@Footnote: 1 Ma. Yu. uttari . 2 Ma. paheṇakatthāya. evamuparipi . 3 Ma. Yu. tatuttari.
[497] Tato nīharitvā bhikkhūhi saddhiṃ saṃvibhajitabbanti paṭikkamanaṃ
nīharitvā saṃvibhajitabbaṃ . ayaṃ tattha sāmīcīti ayaṃ tattha anudhammatā .
Atirekadvittipattapūre 1- atirekasaññī paṭiggaṇhāti āpatti
pācittiyassa . atirekadvittipattapūre vematiko paṭiggaṇhāti
āpatti pācittiyassa . atirekadvittipattapūre ūnakasaññī
paṭiggaṇhāti āpatti pācittiyassa . ūnakadvittipattapūre
atirekasaññī āpatti dukkaṭassa . ūnakadvittipattapūre vematiko
āpatti dukkaṭassa. Ūnakadvittipattapūre ūnakasaññī anāpatti.
[498] Anāpatti dvittipattapūre paṭiggaṇhāti ūnakadvittipattapūre
paṭiggaṇhāti na pahiṇakatthāya na pātheyyatthāya paṭiyattaṃ denti
pahiṇakatthāya vā pātheyyatthāya vā paṭiyattasesakaṃ denti gamane
paṭippassaddhe denti ñātakānaṃ pavāritānaṃ aññassatthāya
attano dhanena ummattakassa ādikammikassāti.
Catutthasikkhāpadaṃ niṭṭhitaṃ.
---------
@Footnote: 1 Ma. atirekadvattipattapūre. evamīdisesu padesu.
Pañcamasikkhāpadaṃ
[499] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena aññataro
brāhmaṇo bhikkhū nimantetvā bhojesi . bhikkhū bhuttāvī pavāritā
ñātikulāni gantvā ekacce bhuñjiṃsu ekacce piṇḍapātaṃ
ādāya agamaṃsu . athakho so brāhmaṇo paṭivissake etadavoca
bhikkhū mayā ayyā santappitā etha tumhepi santappessāmīti .
Te evamāhaṃsu kiṃ tvaṃ ayya 1- amhe santappessasi yepi tayā
nimantitā tepi amhākaṃ gharāni āgantvā ekacce bhuñjiṃsu
ekacce piṇḍapātaṃ ādāya agamaṃsūti.
{499.1} Athakho so brāhmaṇo ujjhāyati khīyati vipāceti
kathaṃ hi nāma bhaddantā amhākaṃ ghare bhuñjitvā aññatra
bhuñjissanti na cāhaṃ paṭibalo yāvadatthaṃ dātunti .
Assosuṃ kho bhikkhū tassa brāhmaṇassa ujjhāyantassa
khīyantassa vipācentassa . ye te bhikkhū appicchā .pe. te
ujjhāyanti khīyanti vipācenti kathaṃ hi nāma bhikkhū bhuttāvī
pavāritā aññatra bhuñjissantīti .pe. saccaṃ kira bhikkhave bhikkhū
bhuttāvī pavāritā aññatra bhuñjantīti . saccaṃ bhagavāti .
Vigarahi buddho bhagavā kathaṃ hi nāma te bhikkhave moghapurisā
bhuttāvī pavāritā aññatra bhuñjissanti netaṃ bhikkhave
@Footnote: 1 Ma. ayyo.
Appasannānaṃ vā pasādāya pasannānaṃ vā bhiyyobhāvāya .pe.
Evañca pana bhikkhave imaṃ sikkhāpadaṃ uddiseyyātha
{499.2} yo pana bhikkhu bhuttāvī pavārito khādanīyaṃ vā bhojanīyaṃ
vā khādeyya vā bhuñjeyya vā pācittiyanti.
{499.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.
[500] Tena kho pana samayena bhikkhū gilānānaṃ bhikkhūnaṃ paṇīte
piṇḍapāte nīharanti . gilānā na cittarūpaṃ bhuñjanti . tāni bhikkhū
chaḍḍenti . assosi kho bhagavā uccāsaddaṃ mahāsaddaṃ kākoravasaddaṃ
sutvāna āyasmantaṃ ānandaṃ āmantesi kinnu kho so ānanda
uccāsaddo mahāsaddo kākoravasaddoti . athakho āyasmā
ānando bhagavato etamatthaṃ ārocesi . bhuñjeyyuṃ panānanda bhikkhū
gilānātirittanti . na bhuñjeyyuṃ bhagavāti . athakho bhagavā etasmiṃ
nidāne etasmiṃ pakaraṇe dhammiṃ kathaṃ katvā bhikkhū āmantesi
anujānāmi bhikkhave gilānassa ca agilānassa ca atirittaṃ bhuñjituṃ
evañca pana bhikkhave atirittaṃ kātabbaṃ alametaṃ sabbanti .
Evañca pana bhikkhave imaṃ sikkhāpadaṃ uddiseyyātha
{500.1} yo pana bhikkhu bhuttāvī pavārito anatirittaṃ khādanīyaṃ
vā bhojanīyaṃ khādeyya vā bhuñjeyya vā pācittiyanti.
[501] Yo panāti yo yādiso .pe. Bhikkhūti .pe. Ayaṃ imasmiṃ
atthe adhippeto bhikkhūti . bhuttāvī nāma pañcannaṃ
Bhojanānaṃ aññataraṃ bhojanaṃ antamaso kusaggenapi bhuttaṃ hoti .
Pavārito nāma asanaṃ paññāyati bhojanaṃ paññāyati hatthapāse
ṭhito abhiharati paṭikkhepo paññāyati . anatirittaṃ nāma
akappiyakataṃ hoti appaṭiggahitakataṃ hoti anuccāritakataṃ hoti
ahatthapāse kataṃ hoti abhuttāvinā kataṃ hoti bhuttāvinā [1]-
pavāritena āsanā vuṭṭhitena kataṃ hoti alametaṃ sabbanti avuttaṃ
hoti na gilānātirittaṃ hoti etaṃ anatirittaṃ nāma . atirittaṃ
nāma kappiyakataṃ hoti paṭiggahitakataṃ hoti uccāritakataṃ hoti
hatthapāse kataṃ hoti bhuttāvinā kataṃ hoti bhuttāvinā pavāritena
āsanā avuṭṭhitena kataṃ hoti alametaṃ sabbanti vuttaṃ hoti
gilānātirittaṃ hoti etaṃ atirittaṃ nāma . khādanīyaṃ nāma pañca
bhojanāni yāmakālikaṃ sattāhakālikaṃ yāvajīvikaṃ ṭhapetvā avasesaṃ
khādanīyaṃ nāma . bhojanīyaṃ nāma pañca bhojanāni odano kummāso
sattu maccho maṃsaṃ . khādissāmi bhuñjissāmīti paṭiggaṇhāti āpatti
dukkaṭassa. Ajjhohāre ajjhohāre āpatti pācittiyassa.
The Pali Tipitaka in Roman Character Volume 2 page 322-329.
https://84000.org/tipitaka/read/roman_item.php?book=2&item=494&items=8
Classified by [Item Number] :-
http://84000.org/tipitaka/read/roman_item.php?book=2&item=494&items=8&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=2&item=494&items=8
Compare with The Royal Version of Thai Tipitaka :-
https://84000.org/tipitaka/read/byitem.php?book=2&item=494&items=8
Study Atthakatha :-
https://84000.org/tipitaka/attha/attha.php?b=2&i=494
Contents of The Tipitaka Volume 2
https://84000.org/tipitaka/read/?index_2
https://84000.org/tipitaka/english/?index_2
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
