|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
19. Tissabuddhavamsavannana tattha pana siddhatthassa bhagavato aparabhage eko kappo buddhasunno ahosi. Ito dvanavutikappamatthake tisso, phussoti ekasmim kappe dve buddha nibbattimsu. Tattha tisso nama mahapuriso paramiyo puretva tusitapure nibbattitva tato cavitva khemakanagare janasandhassa 1- nama ranno aggamahesiya padumadalasadisanayanaya padumanamaya deviya kucchismim patisandhim gahetva dassanam masanam accayena anomuyyane matukucchito nikkhami. Sattavassasahassani agaram ajjhavasi. Tassa guhasela 2- narisaya 3- nisabha 4- namaka tayo pasada ahesum. Subhaddadevippamukhani tettimsa itthisahassani ahesum. So cattari nimittani disva subhaddadeviya putte anandakumare uppanne sonuttaram nama anuttaram turangavaramaruyha mahabhinikkhamanam nikkhamitva pabbaji. Tam manussanam koti anupabbaji. So tehi parivuto attha mase padhanacariyam caritva visakhapunnamaya viranigame virasetthissa dhitaya dinnam madhupayasam paribhunjitva salalavane divaviharam vitinametva sayanhasamaye vijitasangamakena nama yavapalena upanita attha tinamutthiyo gahetva asanabodhim upasankamitva cattalisahatthavitthatam tinasantharam santharitva tattha pallankam abhujitva saram marabalam vidhamitva adhigatasabbannutannano "anekajatisamsaram .pe. Tanhanam khayamajjhaga"ti udanam udanetva sattasattaham bodhisamipeyeva vitinametva yasavatinagare 5- brahmadevam udayanca dve rajaputte saparivare upanissayasampanne disva akasena gantva yasavatimigadaye 6- otaritva uyyanapalena rajaputte pakkosapetva tesam saparivaranam avisarina byapina @Footnote: 1 Si.,i.,Ma. saccasandhassa 2 Si.,i. guhasela... 3 Si.,i. narisa, Ma. nariya @4 Ma. usabha 5 Si.,i. hamsavatinagare 6 Si.,i. hamsavatimigadaye--------------------------------------------------------------------------------------------- page329.
Madhurena brahmassarena dasasahassilokadhatum vinnapentova dhammacakkam pavattesi, tada kotisatanam pathamo dhammabhisamayo ahosi. Tena vuttam:- [1] "siddhatthassa aparena asamo appatipuggalo anantasilo 1- amitayaso tisso lokagganayako. [2] Tamandhakaram vidhamitva obhasetva sadevakam anukampako mahaviro loke uppajji cakkhuma. [3] Tassapi atula iddhi atula silasamadhi ca 2- sabbattha paramim gantva dhammacakkam pavattayi. [4] So buddho dasasahassimhi vinnapesi giram sucim kotisatani abhisamimsu pathame dhammadesane"ti. Tattha sabbatthati sabbesu dhammesu param gantva. Dasasahassimhiti dasasahassiyam. Athaparena samayena tissena satthara saddhim pabbajitanam bhikkhunam koti mahapurisassa ganavasam pahaya bodhimulamupagamanasamaye annatra gata. Sa "tissena sammasambuddhena dhammacakkam pavattitan"ti sutva yasavatimigadayam agantva dasabalamabhivadetva tam parivaretva nisidi. Tesam bhagava dhammam desesi. Tada navutiya kotinam dutiyabhisamayo ahosi. Puna mahamangalasamagame 3- mangalapariyosane satthiya kotinam tatiyo abhisamayo ahosi. Tena vuttam:- [5] "dutiyo navutikotinam tatiyo satthikotiyo bandhanato pamocesi satte 4- naramaru tada"ti. @Footnote: 1 cha.Ma. anantatejo 2 cha.Ma. atulam silam samadhi ca @3 Ma. mangalasannipate 4 Si.,i.,Ma. sampatte--------------------------------------------------------------------------------------------- page330.
Tattha dutiyo navutikotinanti dutiyo abhisamayo ahosi navutikotipaninanti attho. Bandhanatoti bandhanato, dasahi samyojanehi parimocesiti attho. Idani parimocite satte sarupato dassento "naramaru"ti aha. Naramaruti naramare. Yasavatinagare kira antovassam pabbajitanam arahantanam satasahassehi parivuto pavaresi, so pathamo sannipato ahosi. Ubhato sujatassa sujatassa nama ranno narivahanakumaro narivahananagaram anuppatte bhagavati lokanathe saparivaro paccuggantva dasabalam sabhikkhusamgham nimantetva sattaham asadisadanam datva attano rajjam puttassa niyyatetva saparivaro sabbalokadhipatissa tissasammasambuddhassa santike ehibhikkhupabbajjaya pabbaji. Tassa kira sa pabbajja sabbadisasu pakata ahosi. Tasma tato tato agantva narivahanakumaram mahajano anupabbaji. Tada tathagato navutiya bhikkhusatasahassassa majjhagato patimokkham uddisi, so dutiyo sannipato ahosi. Puna khemavatinagare natisamagame buddhavamsadhammakatham sutva asitisatasahassani tassa santike pabbajitva arahattam papunimsu tehi parivuto sugato patimokkham uddisi, so tatiyo sannipato ahosi, tena vuttam:- [6] "sannipata tayo asum tissassa ca mahesino 2- khinasavanam vimalanam santacittana tadinam. [7] Khinasavasatasahassanam pathamo asi samagamo navutisatasahassanam dutiyo asi samagamo. [8] Asitisatasahassanam tatiyo asi samagamo khinasavanam vimalanam pupphitanam vimuttiya"ti @Footnote: 1 cha.Ma. tisse lokagganayake--------------------------------------------------------------------------------------------- page331.
Tada amhakam bodhisatto yasavatinagare sujato nama raja hutva idam phitam janapadam anekakotidhanasannicayam anuragamupagatahadayanca parijanam tinanalamiva 1- pariccajitva jatiadisu samviggahadayo nikkhamitva tapasapabbajjam pabbajitva mahiddhiko mahanubhavo hutva "buddho loke uppanno"ti sutva pancavannaya pitiya phutthasariro hutva sapatisso tissam 2- bhagavantam upasankamitva vanditva cintesi "handaham mandaravaparicchattakadihi dibbakusumehi bhagavantam pujessami"ti atha so evam cintetva iddhiya saggalokam gantva cittalatavanam pavisitva padumaparicchattakamandaravadihi dibbakusumehi ratanamayam cankotakam gavutappamanam puretva gahetva gaganatalena agantva dibbehi surabhikusumehi bhagavantam pujesi. Ekanca manidandakam suvannamayakannikam padumaragamanimayapannam sugandhakesaracchattam viya padumacchattam bhagavato sirasi dharayanto catuparisamajjhe atthasi, atha bhagava nam "ito dvenavute kappe gotamo nama buddho bhavissati"ti byakasi, tena vuttam:- [9] "ahantena samayena sujato nama khattiyo mahabhogam chaddayitva pabbajim isipabbajam. [10] Mayi pabbajite sante uppajji lokanayako buddhoti saddam sutvana piti me upapajjatha. [11] Dibbam mandaravam puppham padumam parichattakam ubho hatthehi paggayha dhunamano upagamim. [12] Catuvannaparivutam tissam lokagganayakam tamaham puppham gahetva matthake dharayim jinam. @Footnote: 1 Si.,i. parijinnatinalavamiva 2 Si.,i. apagataissam tissam--------------------------------------------------------------------------------------------- page332.
[13] Sopi mam buddho byakasi janamajjhe nisidiya dvenavute ito kappe ayam buddho bhavissati. 1- Ahu kapilavhaya ramma nikkhamitva tathagato. 1- [14] Padhanam padahitvana .pe. dessama sammukha imam. [15] Tassapi vacanam sutva bhiyyo cittam pasadayim uttarim vatamadhitthasim dasaparamipuriya"ti. Tattha mayi pabbajiteti mayi pabbajitabhavam upagate. "mama pabbajitam santan"ti potthakesu likhanti, so pamadalekhoti veditabbo. Upapajjathati uppajjittha. Ubho hatthehiti ubhohi hatthehi. Paggayhati gahetvana. Dhunamanoti vakacirani vidhunamanova. Catuvannaparivutanti catuparisaparivutam, khattiyabrahmana- gahapatisamanaparivutanti attho. "catuvannehi parivutan"ti pathanti keci. Tassa pana bhagavato khemam nama nagaram ahosi. Janasandho nama khattiyo pita, paduma nama janika, brahmadevo ca udayo ca dve aggasavaka, samango 2- namupatthako, phussa ca sudatta ca dve aggasavika, asanarukkho bodhi, sariram satthihatthubbedham ahosi, vassasatasahassam ayu, subhadda nama aggamahesi, anando nama putto, turangayanena nikkhami. Tena vuttam:- [16] "khemakam nama nagaram janasandho nama khattiyo paduma nama janika tissassa ca mahesino. [21] Brahmadevo ca udayo ca ahesum aggasavaka samango 2- namupatthako tissassa ca mahesino. @Footnote: 1-1 cha.Ma. ime patha na dissanti 2 Si.,i. samaho, sumangalo abhi.A. 1/68--------------------------------------------------------------------------------------------- page333.
[22] Phussa ceva sudatta ca ahesum aggasavika bodhi tassa bhagavato asanoti pavuccati. [24] So buddho satthiratano ahu uccattane jino anupamo asadiso himava viya dissati. [25] Tassapi atulatejassa ayu asi anuttaro vassasatasahassani loke atthasi cakkhuma. [26] Uttamam pavaram settham anubhotva mahayasam jalitva aggikkhandhova nibbuto so sasavako. [27] Valahakova anilena suriyena viya ussavo andhakarova padipena nibbuto so sasavako"ti. Tattha uccattaneti uccabhavena. Himava viya dissatiti himavava padissati. Ayameva va patho. Yatha yojananam satanucco himava pancapabbato sudure thitanampi uccabhavena ca sommabhavena ca atiramaniyo hutva dissati, evam bhagavapi dissatiti attho. Anuttaroti natidigho natirasso. Ayu vassasatasahassanti attho. Uttamam pavaram setthanti annamannavevacanani. Ussavoti himabindu valahakaussavaandhakara viya anilasuriyadipehi aniccatanilasuriyadipehi 1- upadduto parinibbuto sasavako bhagavati attho. Tisso kira bhagava sunandavatinagare sunandarame parinibbayi. Sesametthagathasu pakatamevati. Tissabuddhavamsavannana nitthita. Nitthito sattarasamo buddhavamso. ------------- @Footnote: 1 Si.,i. ayam patho na dissatiThe Pali Atthakatha in Roman Book 51 page 328-333. http://84000.org/tipitaka/atthapali/read_rm.php?B=51&A=7273&modeTY=2&pagebreak=1 อรรถกถาบาลีอักษรไทย :- http://84000.org/tipitaka/atthapali/read_th.php?B=51&A=7273&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=33&i=198 เนื้อความพระไตรปิฎกฉบับหลวง :- http://84000.org/tipitaka/read/r.php?B=33&A=8092 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=33&A=10445 The Pali Tipitaka in Roman Character :- http://84000.org/tipitaka/read/roman_read.php?B=33&A=10445 Contents of The Tipitaka Volume 33 http://84000.org/tipitaka/read/?index_33
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]