บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
Suttantapiṭake aṅguttaranikāyassa catuttho bhāgo -------- sattakanipāto namo tassa bhagavato arahato sammāsambuddhassa. Paṭhamapaṇṇāsako dhanavaggo paṭhamo [1] Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ . Bhagavā etadavoca sattahi bhikkhave dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca . katamehi sattahi idha bhikkhave bhikkhu lābhakāmo ca hoti sakkārakāmo ca [1]- anavaññattikāmo ca [1]- ahiriko ca [1]- anottappī ca pāpiccho ca micchādiṭṭhi ca imehi kho bhikkhave sattahi dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca . sattahi bhikkhave dhammehi samannāgato bhikkhu sabrahmacārīnaṃ piyo ca hoti manāpo @Footnote: 1 Ma. hoti. evamīdisesu ṭhānesupi. Ca garu ca bhāvanīyo ca . katamehi sattahi idha bhikkhave bhikkhu na lābhakāmo ca hoti na sakkārakāmo ca [1]- na anavaññattikāmo ca hirīmā ca ottappī ca appiccho ca sammādiṭṭhi ca imehi kho bhikkhave sattahi dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo cāti. [2] Sattahi bhikkhave dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca . katamehi sattahi idha bhikkhave bhikkhu lābhakāmo ca hoti sakkārakāmo ca anavaññattikāmo ca ahiriko ca anottappī ca issukī ca maccharī ca imehi kho bhikkhave sattahi dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca. {2.1} Sattahi bhikkhave dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo ca. Katamehi sattahi idha bhikkhave bhikkhu na lābhakāmo ca hoti na sakkārakāmo ca na anavaññattikāmo ca hirīmā ca ottappī ca anissukī ca amaccharī ca imehi kho bhikkhave sattahi dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo cāti. [3] Sattimāni bhikkhave balāni . katamāni satta saddhābalaṃ viriyabalaṃ hirībalaṃ ottappabalaṃ satibalaṃ samādhibalaṃ paññābalaṃ imāni kho bhikkhave satta balānīti. @Footnote: 1 Ma. hoti. evamīdisesu ṭhānesupi. Saddhābalaṃ viriyabalaṃ 1- hirī 2- ottappiyaṃ balaṃ satibalaṃ samādhibalaṃ 3- paññā ve sattamaṃ balaṃ etehi balavā bhikkhu sukhaṃ jīvati paṇḍito yoniso vicine dhammaṃ paññāyatthaṃ vipassati pajjotasseva nibbānaṃ vimokkho hoti cetasoti. [4] Sattimāni bhikkhave balāni . Katamāni satta saddhābalaṃ viriyabalaṃ hirībalaṃ ottappabalaṃ satibalaṃ samādhibalaṃ paññābalaṃ . katamañca bhikkhave saddhābalaṃ idha bhikkhave ariyasāvako saddho hoti saddahati tathāgatassa bodhiṃ itipi so bhagavā arahaṃ sammāsambuddho .pe. Satthā devamanussānaṃ buddho bhagavāti idaṃ vuccati bhikkhave saddhābalaṃ. {4.1} Katamañca bhikkhave viriyabalaṃ idha bhikkhave ariyasāvako āraddhaviriyo viharati akusalānaṃ dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo anikkhittadhuro kusalesu dhammesu idaṃ vuccati bhikkhave viriyabalaṃ. {4.2} Katamañca bhikkhave hirībalaṃ idha bhikkhave ariyasāvako hirīmā hoti hiriyati kāyaduccaritena vacīduccaritena manoduccaritena hiriyati pāpakānaṃ akusalānaṃ dhammānaṃ samāpattiyā idaṃ vuccati bhikkhave hirībalaṃ. {4.3} Katamañca bhikkhave ottappabalaṃ idha bhikkhave ariyasāvako ottappī hoti ottappati kāyaduccaritena vacīduccaritena manoduccaritena ottappati pāpakānaṃ akusalānaṃ dhammānaṃ samāpattiyā idaṃ vuccati bhikkhave ottappabalaṃ. {4.4} Katamañca bhikkhave satibalaṃ idha bhikkhave @Footnote: 1 Ma. vīriyañca. evamuparipi . 2 Sī. Yu. hiri . 3 Ma. samādhi ca. evamuparipi. Ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā idaṃ vuccati bhikkhave satibalaṃ. {4.5} Katamañca bhikkhave samādhibalaṃ idha bhikkhave ariyasāvako vivicceva kāmehi .pe. catutthaṃ jhānaṃ upasampajja viharati idaṃ vuccati bhikkhave samādhibalaṃ. {4.6} Katamañca bhikkhave paññābalaṃ idha bhikkhave ariyasāvako paññavā hoti udayatthagāminiyā paññāya samannāgato ariyāya nibbedhikāya sammādukkhakkhayagāminiyā idaṃ vuccati bhikkhave paññābalaṃ. Imāni kho bhikkhave satta balānīti. Saddhābalaṃ viriyabalaṃ hirī ottappiyaṃ balaṃ satibalaṃ samādhibalaṃ paññā ve sattamaṃ balaṃ etehi balavā bhikkhu sukhaṃ jīvati paṇḍito yoniso vicine dhammaṃ paññāyatthaṃ vipassati pajjotasseva nibbānaṃ vimokkho hoti cetasoti. [5] Sattimāni bhikkhave dhanāni . katamāni satta saddhādhanaṃ sīladhanaṃ hirīdhanaṃ ottappadhanaṃ sutadhanaṃ cāgadhanaṃ paññādhanaṃ imāni kho bhikkhave satta dhanānīti. Saddhādhanaṃ sīladhanaṃ hirī ottappiyaṃ dhanaṃ sutadhanañca cāgo ca paññā ve sattamaṃ dhanaṃ yassa etā dhanā atthi itthiyā purisassa vā adaḷiddoti taṃ āhu amoghaṃ tassa jīvitaṃ. Tasmā saddhañca sīlañca pasādaṃ dhammadassanaṃ anuyuñjetha medhāvī saraṃ buddhānasāsananti. [6] Sattimāni bhikkhave dhanāni . katamāni satta saddhādhanaṃ sīladhanaṃ hirīdhanaṃ ottappadhanaṃ sutadhanaṃ cāgadhanaṃ paññādhanaṃ . katamañca bhikkhave saddhādhanaṃ idha bhikkhave ariyasāvako saddho hoti saddahati tathāgatassa bodhiṃ itipi so bhagavā arahaṃ sammāsambuddho .pe. Buddho bhagavāti idaṃ vuccati bhikkhave saddhādhanaṃ. {6.1} Katamañca bhikkhave sīladhanaṃ idha bhikkhave ariyasāvako pāṇātipātā paṭivirato hoti .pe. surāmerayamajjapamādaṭṭhānā paṭivirato hoti idaṃ vuccati bhikkhave sīladhanaṃ. {6.2} Katamañca bhikkhave hirīdhanaṃ idha bhikkhave ariyasāvako hirīmā hoti hiriyati kāyaduccaritena vacīduccaritena manoduccaritena hiriyati pāpakānaṃ akusalānaṃ dhammānaṃ samāpattiyā idaṃ vuccati bhikkhave hirīdhanaṃ. {6.3} Katamañca bhikkhave ottappadhanaṃ idha bhikkhave ariyasāvako ottappī hoti ottappati kāyaduccaritena vacīduccaritena manoduccaritena ottappati pāpakānaṃ akusalānaṃ dhammānaṃ samāpattiyā idaṃ vuccati bhikkhave ottappadhanaṃ. {6.4} Katamañca bhikkhave sutadhanaṃ idha bhikkhave ariyasāvako bahussuto hoti sutadharo sutasannicayo ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti tathārūpāssa dhammā bahussutā honti dhatā vacasā paricitā manasānupekkhitā Diṭṭhiyā suppaṭividdhā idaṃ vuccati bhikkhave sutadhanaṃ. {6.5} Katamañca bhikkhave cāgadhanaṃ idha bhikkhave ariyasāvako vigatamalamaccherena cetasā agāraṃ ajjhāvasati muttacāgo payatapāṇi vossaggarato yācayogo dānasaṃvibhāgarato idaṃ vuccati bhikkhave cāgadhanaṃ. {6.6} Katamañca bhikkhave paññādhanaṃ idha bhikkhave ariyasāvako paññavā hoti .pe. sammādukkhakkhayagāminiyā idaṃ vuccati bhikkhave paññādhanaṃ. Imāni kho bhikkhave satta dhanānīti. Saddhādhanaṃ sīladhanaṃ hirī ottappiyaṃ dhanaṃ sutadhanañca cāgo ca paññā ve sattamaṃ dhanaṃ yassa etā dhanā atthi itthiyā purisassa vā adaḷiddoti taṃ āhu amoghaṃ tassa jīvitaṃ. Tasmā saddhañca sīlañca pasādaṃ dhammadassanaṃ anuyuñjetha medhāvī saraṃ buddhānasāsananti. [7] Atha kho uggo rājamahāmatto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho uggo rājamahāmatto bhagavantaṃ etadavoca acchariyaṃ bhante abbhutaṃ bhante yāva aḍḍhocāyaṃ bhante migāro rohaṇeyyo yāva mahaddhano yāva mahābhogoti . kiñca 1- aḍḍho panugga migāro rohaṇeyyo kiñca mahaddhano kiñca mahābhogoti . sataṃ bhante sahassāni 2- hiraññassa ko pana vādo rūpiyassāti . atthi kho etaṃ ugga dhanaṃ netaṃ natthīti @Footnote: 1 Ma. kīva . 2 Sī. sahassānaṃ. Ma. satasahassānaṃ. Vadāmi tañca kho etaṃ ugga dhanaṃ sādhāraṇaṃ agginā udakena rājūhi corehi appiyehi dāyādehi . satta kho imāni ugga dhanāni asādhāraṇāni agginā udakena rājūhi corehi appiyehi dāyādehi. Katamāni satta saddhādhanaṃ sīladhanaṃ hirīdhanaṃ ottappadhanaṃ sutadhanaṃ cāgadhanaṃ paññādhanaṃ imāni kho ugga satta dhanāni asādhāraṇāni agginā udakena rājūhi corehi appiyehi dāyādehīti. Saddhādhanaṃ sīladhanaṃ hirī ottappiyaṃ dhanaṃ sutadhanañca cāgo ca paññā ve sattamaṃ dhanaṃ yassa etā dhanā atthi itthiyā purisassa vā sa ve mahaddhano loke ajeyyo devamānuse. Tasmā saddhañca sīlañca pasādaṃ dhammadassanaṃ anuyuñjetha medhāvī saraṃ buddhānasāsananti. [8] Sattimāni bhikkhave saññojanāni . katamāni satta anunayasaññojanaṃ paṭighasaññojanaṃ diṭṭhisaññojanaṃ vicikicchāsaññojanaṃ mānasaññojanaṃ bhavarāgasaññojanaṃ avijjāsaññojanaṃ imāni kho bhikkhave satta saññojanānīti. [9] Sattannaṃ bhikkhave saññojanānaṃ pahānāya samucchedāya brahmacariyaṃ vussati . katamesaṃ sattannaṃ anunayasaññojanassa pahānāya samucchedāya brahmacariyaṃ vussati paṭighasaññojanassa .pe. diṭṭhisaññojanassa vicikicchāsaññojanassa mānasaññojanassa bhavarāgasaññojanassa Avijjāsaññojanassa pahānāya samucchedāya brahmacariyaṃ vussati imesaṃ kho bhikkhave sattannaṃ saññojanānaṃ pahānāya samucchedāya brahmacariyaṃ vussati . yato kho bhikkhave bhikkhuno anunayasaññojanaṃ pahīnaṃ hoti ucchinnamūlaṃ tālāvatthukataṃ anabhāvaṃ kataṃ āyatiṃ anuppādadhammaṃ paṭighasaññojanaṃ .pe. diṭṭhisaññojanaṃ vicikicchāsaññojanaṃ mānasaññojanaṃ bhavarāgasaññojanaṃ avijjāsaññojanaṃ pahīnaṃ hoti ucchinnamūlaṃ tālāvatthukataṃ anabhāvaṃ kataṃ āyatiṃ anuppādadhammaṃ ayaṃ vuccati bhikkhave bhikkhu acchejji 1- taṇhaṃ vivattayi saññojanaṃ sammāmānābhisamayā antamakāsi dukkhassāti.The Pali Tipitaka in Roman Character Volume 23 page 1-8. https://84000.org/tipitaka/read/roman_item.php?book=23&item=1&items=9 Classified by [Item Number] :- http://84000.org/tipitaka/read/roman_item.php?book=23&item=1&items=9&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=23&item=1&items=9 Compare with The Royal Version of Thai Tipitaka :- https://84000.org/tipitaka/read/byitem.php?book=23&item=1&items=9 Study Atthakatha :- https://84000.org/tipitaka/attha/attha.php?b=23&i=1 Contents of The Tipitaka Volume 23 https://84000.org/tipitaka/read/?index_23 https://84000.org/tipitaka/english/?index_23
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]