[580] 141 Tayo ca bhikkhave assakhaluṅke desessāmi tayo ca
purisakhaluṅke taṃ suṇātha sādhukaṃ manasikarotha bhāsissāmīti . evaṃ
bhanteti kho te bhikkhū bhagavato paccassosuṃ . Bhagavā etadavoca katame
ca bhikkhave tayo assakhaluṅkā idha bhikkhave ekacco assakhaluṅko
javasampanno hoti na vaṇṇasampanno na ārohapariṇāhasampanno
idha pana bhikkhave ekacco assakhaluṅko javasampanno ca hoti
vaṇṇasampanno ca na ārohapariṇāhasampanno idha pana bhikkhave
ekacco assakhaluṅko javasampanno ca hoti vaṇṇasampanno ca
ārohapariṇāhasampanno ca
{580.1} ime kho bhikkhave tayo assakhaluṅkā katame ca bhikkhave
tayo purisakhaluṅkā idha bhikkhave ekacco purisakhaluṅko javasampanno
hoti na vaṇṇasampanno na ārohapariṇāhasampanno idha pana
bhikkhave ekacco purisakhaluṅko javasampanno ca hoti vaṇṇasampanno
ca na ārohapariṇāhasampanno idha pana bhikkhave ekacco
Purisakhaluṅko javasampanno ca hoti vaṇṇasampanno ca
ārohapariṇāhasampanno ca kathañca bhikkhave purisakhaluṅko
javasampanno hoti na vaṇṇasampanno na ārohapariṇāhasampanno
idha bhikkhave bhikkhu idaṃ dukkhanti yathābhūtaṃ pajānāti .pe. ayaṃ
dukkhanirodhagāminī paṭipadāti yathābhūtaṃ pajānāti idamassa javasmiṃ
vadāmi abhidhamme kho pana abhivinaye pañhaṃ puṭṭho saṃsādeti no
vissajjeti idamassa na vaṇṇasmiṃ vadāmi na kho pana lābhī hoti
cīvarapiṇḍapātasenāsanagilānapaccayabhesajjaparikkhārānaṃ idamassa
na ārohapariṇāhasmiṃ vadāmi evaṃ kho bhikkhave purisakhaluṅko
javasampanno hoti na vaṇṇasampanno na ārohapariṇāhasampanno
{580.2} kathañca bhikkhave purisakhaluṅko javasampanno ca hoti
vaṇṇasampanno ca na ārohapariṇāhasampanno idha bhikkhave bhikkhu
idaṃ dukkhanti yathābhūtaṃ pajānāti .pe. ayaṃ dukkhanirodhagāminī
paṭipadāti yathābhūtaṃ pajānāti idamassa javasmiṃ vadāmi abhidhamme
kho pana abhivinaye pañhaṃ puṭṭho vissajjeti no saṃsādeti idamassa
vaṇṇasmiṃ vadāmi na kho pana lābhī hoti cīvarapiṇḍapātasenāsana-
gilānapaccayabhesajjaparikkhārānaṃ idamassa na ārohapariṇāhasmiṃ
vadāmi evaṃ kho bhikkhave purisakhaluṅko khavasampanno ca hoti
vaṇṇasampanno ca na ārohapariṇāhasampanno
{580.3} kathañca bhikkhave purisakhaluṅko javasampanno
ca hoti vaṇṇasampanno ca ārohapariṇāhasampanno ca
idha bhikkhave bhikkhu idaṃ dukkhanti yathābhūtaṃ parānāti .pe.
Ayaṃ dukkhanirodhagāminī paṭipadāti yathābhūtaṃ pajānāti idamassa
javasmiṃ vadāmi abhidhamme kho pana abhivinaye pañhaṃ puṭṭho vissajjeti
no saṃsādeti idamassa vaṇṇasmiṃ vadāmi lābhī kho pana hoti
cīvarapiṇḍapātasenāsanagilānapaccayabhesajjaparikkhārānaṃ idamassa
ārohapariṇāhasmiṃ vadāmi evaṃ kho bhikkhave purisakhaluṅko javasampanno
ca hoti vaṇṇasampanno ca ārohapariṇāhasampanno ca ime kho
bhikkhave tayo purisakhaluṅkāti.
[581] 142 Tayo ca bhikkhave assasadasse 1- desessāmi tayo ca
purisasadasse 2- taṃ suṇātha sādhukaṃ manasikarotha bhāsissāmīti . evaṃ
bhanteti kho te bhikkhū bhagavato paccassosuṃ . Bhagavā etadavoca katame
ca bhikkhave tayo assasadassā idha bhikkhave ekacco assasadasso
javasampanno hoti na vaṇṇasampanno na ārohapariṇāhasampanno
idha pana bhikkhave ekacco assasadasso javasampanno ca hoti
vaṇṇasampanno ca na ārohapariṇāhasampanno idha pana bhikkhave
ekacco assasadasso javasampanno ca hoti vaṇṇasampanno ca
ārohapariṇāhasampanno ca
{581.1} ime kho bhikkhave tayo assasadassā katame ca bhikkhave
tayo purisasadassā idha bhikkhave ekacco purisasadasso javasampanno
hoti na vaṇṇasampanno na ārohapariṇāhasampanno
idha pana bhikkhave ekacco purisasadasso javasampanno ca hoti
vaṇṇasampanno ca na ārohapariṇāhasampanno idha pana
@Footnote: 1-2 Ma. assaparasse purisaparasse. ito paraṃ īdisameva.
Bhikkhave ekacco purisasadasso javasampanno ca hoti vaṇṇasampanno
ca ārohapariṇāhasampanno ca
{581.2} kathañca bhikkhave purisasadasso javasampanno hoti na
vaṇṇasampanno na ārohapariṇāhasampanno idha bhikkhave bhikkhu
pañcannaṃ orambhāgiyānaṃ saññojanānaṃ parikkhayā opapātiko
hoti tattha parinibbāyī anāvattidhammo tasmā lokā idamassa
javasmiṃ vadāmi abhidhamme kho pana abhivinaye pañhaṃ puṭṭho saṃsādeti
no vissajjeti idamassa na vaṇṇasmiṃ vadāmi na kho pana lābhī
hoti cīvarapiṇḍapātasenāsanagilānapaccayabhesajjaparikkhārānaṃ
idamassa na ārohapariṇāhasmiṃ vadāmi evaṃ kho bhikkhave purisasadasso
javasampanno hoti na vaṇṇasampanno na ārohapariṇāhasampanno
{581.3} kathañca bhikkhave purisasadasso javasampanno ca hoti
vaṇṇasampanno ca na ārohapariṇāhasampanno idha bhikkhave bhikkhu
pañcannaṃ orambhāgiyānaṃ saññojanānaṃ parikkhayā opapātiko
hoti tattha parinibbāyī anāvattidhammo tasmā lokā idamassa
javasmiṃ vadāmi abhidhamme kho pana abhivinaye pañhaṃ puṭṭho vissajjeti
no saṃsādeti idamassa vaṇṇasmiṃ vadāmi na kho pana lābhī hoti
cīvarapiṇḍapātasenāsanagilānapaccayabhesajjaparikkhārānaṃ idamassa
na ārohapariṇāhasmiṃ vadāmi evaṃ kho bhikkhave purisasadasso javasampanno
ca hoti vaṇṇasampanno ca na ārohapariṇāhasampanno
{581.4} kathañca bhikkhave purisasadasso javasampanno ca
hoti vaṇṇasampanno ca ārohapariṇāhasampanno ca idha
Bhikkhave bhikkhu pañcannaṃ orambhāgiyānaṃ saññojanānaṃ parikkhayā
opapātiko hoti tattha parinibbāyī anāvattidhammo tasmā lokā
idamassa javasmiṃ vadāmi abhidhamme kho pana abhivinaye pañhaṃ puṭṭho
vissajjeti no saṃsādeti idamassa vaṇṇasmiṃ vadāmi lābhī kho pana
hoti cīvarapiṇḍapātasenāsanagilānapaccayabhesajjaparikkhārānaṃ
idamassa ārohapariṇāhasmiṃ vadāmi evaṃ kho bhikkhave purisasadasso
javasampanno ca hoti vaṇṇasampanno ca ārohapariṇāhasampanno ca
ime kho bhikkhave tayo purisasadassāti.
[582] 143 Tayo ca bhikkhave bhadde assājāniye desessāmi
tayo ca bhadde purisājāniye taṃ suṇātha sādhukaṃ manasikarotha
bhāsissāmīti . evaṃ bhanteti kho te bhikkhū bhagavato paccassosuṃ .
Bhagavā etadavoca katame ca bhikkhave tayo bhaddā assājāniyā idha
bhikkhave ekacco bhaddo assājāniyo .pe. javasampanno ca hoti
vaṇṇasampanno ca ārohapariṇāhasampanno ca ime kho bhikkhave
tayo bhaddā assājāniyā katame ca bhikkhave tayo bhaddā
purisājāniyā idha bhikkhave ekacco bhaddo purisājāniyo .pe.
Javasampanno ca hoti vaṇṇasampanno ca ārohapariṇāhasampanno
ca .pe. kathañca bhikkhave bhaddo purisājāniyo javasampanno ca hoti
vaṇṇasampanno ca ārohapariṇāhasampanno ca idha bhikkhave bhikkhu
āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme
Sayaṃ abhiññā sacchikatvā upasampajja viharati idamassa javasmiṃ
vadāmi abhidhamme kho pana abhivinaye pañhaṃ puṭṭho vissajjeti no
saṃsādeti idamassa vaṇṇasmiṃ vadāmi lābhī kho pana hoti
cīvarapiṇḍapātasenāsanagilānapaccayabhesajjaparikkhārānaṃ idamassa
ārohapariṇāhasmiṃ vadāmi evaṃ kho bhikkhave bhaddo purisājāniyo
javasampanno ca hoti vaṇṇasampanno ca ārohapariṇāhasampanno
ca ime kho bhikkhave tayo bhaddā purisājāniyāti.
[583] 144 Ekaṃ samayaṃ bhagavā rājagahe viharati moranivāpe
paribbājakārāme . tatra kho bhagavā bhikkhū āmantesi bhikkhavoti .
Bhadanteti te bhikkhū bhagavato paccassosuṃ. Bhagavā etadavoca tīhi bhikkhave
dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṃ katamehi
tīhi asekkhena sīlakkhandhena asekkhena samādhikkhandhena asekkhena
paññākkhandhena imehi kho bhikkhave tīhi dhammehi samannāgato
bhikkhu accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānanti.
[584] 145 Tīhi bhikkhave dhammehi samannāgato bhikkhu accantaniṭṭho
hoti accantayogakkhemī accantabrahmacārī accantapariyosāno
seṭṭho devamanussānaṃ katamehi tīhi iddhipāṭihāriyena ādesanā-
pāṭihāriyena anusāsanīpāṭihāriyena imehi kho bhikkhave tīhi
Dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānanti.
[585] 146 Tīhi bhikkhave dhammehi samannāgato bhikkhu
accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṃ katamehi tīhi sammādiṭṭhiyā
sammāñāṇena sammāvimuttiyā imehi kho bhikkhave tīhi dhammehi
samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānanti.
Yodhājīvavaggo catuttho.
Tassuddānaṃ
yodhaparisamittā ca uppādo kesakambalo
saddhā vuḍḍhi tayo assā tayo moranivāpinoti.
------------
Maṅgalavaggo pañcamo
[586] 147 Tīhi bhikkhave dhammehi samannāgato yathābhataṃ nikkhitto
evaṃ niraye katamehi tīhi akusalena kāyakammena akusalena
vacīkammena akusalena manokammena imehi kho bhikkhave tīhi dhammehi
samannāgato yathābhataṃ nikkhitto evaṃ niraye . tīhi bhikkhave dhammehi
samannāgato yathābhataṃ nikkhitto evaṃ sagge katamehi tīhi kusalena
kāyakammena kusalena vacīkammena kusalena manokammena imehi
Kho bhikkhave tīhi dhammehi samannāgato yathābhataṃ nikkhitto evaṃ saggeti.
[587] 148 Tīhi bhikkhave dhammehi samannāgato .pe.
Sāvajjena kāyakammena sāvajjena vacīkammena sāvajjena
manokammena .pe. anavajjena kāyakammena anavajjena
vacīkammena anavajjena manokammena .pe.
[588] 149 Tīhi bhikkhave dhammehi samannāgato .pe. Visamena
kāyakammena visamena vacīkammena visamena manokammena .pe.
Samena kāyakammena samena vacīkammena samena manokammena .pe.
[589] 150 Tīhi bhikkhave dhammehi samannāgato .pe. Asucinā
kāyakammena asucinā vacīkammena asucinā manokammena .pe.
Sucinā kāyakammena sucinā vacīkammena sucinā manokammena
imehi kho bhikkhave tīhi dhammehi samannāgato yathābhataṃ nikkhitto
evaṃ saggeti.
[590] 151 Tīhi bhikkhave dhammehi samannāgato bālo abyatto
asappuriso khataṃ upahataṃ attānaṃ pariharati sāvajjo ca hoti
sānuvajjo [1]- viññūnaṃ bahuñca apuññaṃ pasavati katamehi tīhi
akusalena kāyakammena akusalena vacīkammena akusalena manokammena
imehi kho bhikkhave tīhi dhammehi samannāgato bālo abyatto asappuriso
khataṃ upahataṃ attānaṃ pariharati sāvajjo ca hoti sānuvajjo [2]-
viññūnaṃ bahuñca apuññaṃ pasavati . tīhi bhikkhave dhammehi
@Footnote: 1-2 Po. Ma. Yu. ca. ito paraṃ īdisameva.
Samannāgato paṇḍito byatto 1- sappuriso akkhataṃ anupahataṃ
attānaṃ pariharati anavajjo ca hoti ananuvajjo viññūnaṃ bahuñca
puññaṃ pasavati katamehi tīhi kusalena kāyakammena kusalena
vacīkammena kusalena manokammena .pe.
[591] 152 Tīhi bhikkhave dhammehi samannāgato .pe.
Sāvajjena kāyakammena sāvajjena vacīkammena sāvajjena
manokammena .pe. anavajjena kāyakammena anavajjena vacīkammena
anavajjena manokammena .pe.
[592] 153 Tīhi bhikkhave dhammehi samannāgato .pe. Visamena
kāyakammena visamena vacīkammena visamena manokammena .pe.
Samena kāyakammena samena vacīkammena samena manokammena .pe.
[593] 154 Tīhi bhikkhave .pe. asucinā kāyakammena
asucinā vacīkammena asucinā manokammena .pe. sucinā
kāyakammena sucinā vacīkammena sucinā manokammena imehi kho
bhikkhave tīhi dhammehi samannāgato paṇḍito byatto sappuriso
akkhataṃ anupahataṃ attānaṃ pariharati anavajjo ca hoti ananuvajjo
viññūnaṃ bahuñca puññaṃ pasavatīti.
[594] 155 Tisso imā bhikkhave vandanā katamā tisso
kāyena vācāya manasā imā kho bhikkhave tisso vandanāti.
[595] 156 Ye bhikkhave sattā pubbaṇhasamayaṃ kāyena sucaritaṃ
@Footnote: 1 Po. Ma. viyatto. Yu. vyatto. ito paraṃ īdisameva.
Caranti vācāya sucaritaṃ caranti manasā sucaritaṃ caranti supubbaṇho
bhikkhave tesaṃ sattānaṃ ye bhikkhave sattā majjhantikasamayaṃ kāyena
sucaritaṃ caranti vācāya sucaritaṃ caranti manasā sucaritaṃ caranti
sumajjhantiko bhikkhave tesaṃ sattānaṃ ye bhikkhave sattā
sāyaṇhasamayaṃ kāyena sucaritaṃ caranti vācāya sucaritaṃ caranti manasā
sucaritaṃ caranti susāyaṇho bhikkhave tesaṃ sattānanti.
Sunakkhattaṃ sumaṅgalaṃ supabhātaṃ suhuṭṭhitaṃ 1-
sukhaṇo sumuhutto ca suyiṭṭhaṃ brahmacārisu
padakkhiṇaṃ kāyakammaṃ vācākammaṃ padakkhiṇaṃ
padakkhiṇaṃ manokammaṃ paṇidhi 2- te padakkhiṇā 3-
padakkhiṇāni katvāna labhantatthe padakkhiṇe.
Te atthaladdhā sukhitā virūḷhā buddhasāsane
arogā sukhitā hotha saha sabbehi ñātibhīti.
Maṅgalavaggo pañcamo.
Tassuddānaṃ
akusalañca sāvajjaṃ visamāsucinā saha
catukkhatā ca vandanā supubbaṇhena te dasāti.
-----------
Tatiyo paṇṇāsako samatto.
@Footnote: 1 Yu. suvuṭṭhito . 2 Yu. paṇidhiyo . 3 Ma. padakkhiṇe.
Paṇṇāsakāsaṅgahitā suttantā
[596] 157 Tisso imā bhikkhave paṭipadā katamā tisso
āgāḷhā paṭipadā nijjhāmā paṭipadā majjhimā paṭipadā . katamā ca
bhikkhave āgāḷhā paṭipadā idha bhikkhave ekacco evaṃvādī hoti
evaṃdiṭṭhi natthi kāmesu dosoti so kāmesu pātabyataṃ āpajjati ayaṃ
vuccati bhikkhave āgāḷhā paṭipadā . katamā ca bhikkhave nijjhāmā
paṭipadā idha bhikkhave ekacco acelako hoti muttācāro hatthāvalekhano 1-
na ehibhadantiko na tiṭṭhabhadantiko nābhihaṭaṃ na uddissakataṃ
na nimantanaṃ sādiyati so na kumbhimukhā paṭiggaṇhāti na kaḷopimukhā
paṭiggaṇhāti na elakamantaraṃ na daṇḍamantaraṃ na musalamantaraṃ na
dvinnaṃ bhuñjamānānaṃ na gabbhiniyā na pāyamānāya na purisantaragatāya
na saṅkittīsu na yattha sā upaṭṭhito hoti na yattha makkhikā
saṇḍasaṇḍacārinī 2- na macchaṃ na maṃsaṃ na suraṃ na merayaṃ na thūsodakaṃ
pivati so ekāgāriko vā hoti ekālopiko dvāgāriko vā hoti
dvālopiko ... sattāgāriko vā hoti sattālopiko ekissāpi
dattiyā yāpeti dvīhipi dattīhi yāpeti ... sattahipi dattīhi yāpeti
ekāhikampi āhāraṃ āhāreti dvīhikampi āhāraṃ āhāreti ...
Sattāhikampi āhāraṃ āhāreti iti evarūpaṃ aḍḍhamāsikampi
pariyāyabhattabhojanānuyogamanuyutto viharati
{596.1} so sākabhakkhopi hoti sāmākabhakkhopi hoti
nivārabhakkhopi hoti daddulabhakkhopi hoti haṭabhakkhopi
@Footnote: 1 Ma. hatthāpalekhano . 2 Yu. saṇḍacārinī.
Hoti kaṇabhakkhopi hoti ācāmabhakkhopi hoti piññākabhakkhopi
hoti tiṇabhakkhopi hoti gomayabhakkhopi hoti vanamūlaphalāhāro
yāpeti pavattaphalabhojī so sāṇānipi dhāreti masāṇānipi dhāreti
chavadussānipi dhāreti paṃsukūlānipi dhāreti tirīṭakānipi dhāreti
ajinānipi dhāreti ajinakkhipampi dhāreti kusacīrampi dhāreti
vākacīrampi dhāreti phalakacīrampi dhāreti kesakambalampi dhāreti
vālakambalampi dhāreti ulūkapakkhampi dhāreti kesamassulocakopi
hoti kesamassulocanānuyogamanuyutto ubbhaṭṭhakopi hoti
āsanapaṭikkhitto ukkuṭikopi hoti ukkuṭikappadhānamanuyutto
kaṇṭakāpassayikopi hoti kaṇṭakāpassaye seyyaṃ kappeti
sāyatatiyakampi 1- udakorohaṇānuyogamanuyutto viharati iti
evarūpaṃ anekavihitaṃ kāyassa ātāpanaparitāpanānuyogamanuyutto
viharati ayaṃ vuccati bhikkhave nijjhāmā paṭipadā.
{596.2} Katamā ca bhikkhave majjhimā paṭipadā idha bhikkhave bhikkhu
kāye kāyānupassī viharati ātāpī sampajāno satimā vineyya loke
abhijjhādomanassaṃ vedanāsu ... citte ... Dhammesu dhammānupassī viharati
ātāpī sampajāno satimā vineyya loke abhijjhādomanassaṃ ayaṃ vuccati
bhikkhave majjhimā paṭipadā. Imā kho bhikkhave tisso paṭipadāti.
[597] 158 Tisso imā bhikkhave paṭipadā katamā tisso
āgāḷhā paṭipadā nijjhāmā paṭipadā majjhimā paṭipadā . katamā ca
bhikkhave āgāḷhā paṭipadā .pe. Ayaṃ vuccati bhikkhave āgāḷhā paṭipadā.
@Footnote: 1 Po. Yu. sāyaṃ tatiyakampi.
Katamā ca bhikkhave nijjhāmā paṭipadā .pe. ayaṃ vuccati bhikkhave
nijjhāmā paṭipadā.
{597.1} Katamā ca bhikkhave majjhimā paṭipadā idha bhikkhave
bhikkhu anuppannānaṃ pāpakānaṃ akusalānaṃ dhammānaṃ anuppādāya
chandaṃ janeti vāyamati viriyaṃ ārabhati cittaṃ paggaṇhāti padahati
uppannānaṃ pāpakānaṃ akusalānaṃ dhammānaṃ pahānāya chandaṃ janeti
vāyamati viriyaṃ ārabhati cittaṃ paggaṇhāti padahati anuppannānaṃ
kusalānaṃ dhammānaṃ uppādāya chandaṃ janeti vāyamati viriyaṃ ārabhati
cittaṃ paggaṇhāti padahati
{597.2} uppannānaṃ kusalānaṃ dhammānaṃ ṭhitiyā asammosāya
bhiyyobhāvāya vepullāya bhāvanāya pāripūriyā chandaṃ janeti vāyamati
viriyaṃ ārabhati cittaṃ paggaṇhāti padahati ... chandasamādhipadhānasaṅkhāra-
samannāgataṃ iddhipādaṃ bhāveti viriyasamādhipadhānasaṅkhārasamannāgataṃ
iddhipādaṃ bhāveti cittasamādhipadhānasaṅkhārasamannāgataṃ iddhipādaṃ bhāveti
vīmaṃsāsamādhipadhānasaṅkhārasamannāgataṃ iddhipādaṃ bhāveti ... saddhindriyaṃ
bhāveti viriyindriyaṃ bhāveti satindriyaṃ bhāveti samādhindriyaṃ bhāveti
paññindriyaṃ bhāveti ... saddhābalaṃ bhāveti viriyabalaṃ bhāveti satibalaṃ
bhāveti samādhibalaṃ bhāveti paññābalaṃ bhāveti ... satisambojjhaṅgaṃ
bhāveti dhammavicayasambojjhaṅgaṃ bhāveti viriyasambojjhaṅgaṃ bhāveti
pītisambojjhaṅgaṃ bhāveti passaddhisambojjhaṅgaṃ bhāveti samādhisambojjhaṅgaṃ
bhāveti upekkhāsambojjhaṅgaṃ bhāveti ... sammādiṭṭhiṃ bhāveti
sammāsaṅkappaṃ bhāveti sammāvācaṃ bhāveti sammākammantaṃ
Bhāveti sammāājīvaṃ bhāveti sammāvāyāmaṃ bhāveti sammāsatiṃ
bhāveti sammāsamādhiṃ bhāveti ayaṃ vuccati bhikkhave majjhimā
paṭipadā. Imā kho bhikkhave tisso paṭipadāti.
[598] 159 Tīhi bhikkhave dhammehi samannāgato yathābhataṃ
nikkhitto evaṃ niraye katamehi tīhi attanā ca pāṇātipātī hoti parañca
pāṇātipāte samādapeti pāṇātipāte ca samanuñño hoti imehi kho
bhikkhave tīhi dhammehi samannāgato yathābhataṃ nikkhitto evaṃ niraye. Tīhi
bhikkhave dhammehi samannāgato yathābhataṃ nikkhitto evaṃ sagge katamehi
tīhi attanā ca pāṇātipātā paṭivirato hoti parañca pāṇātipātā
veramaṇiyā samādapeti pāṇātipātā veramaṇiyā ca samanuñño
hoti .pe. attanā ca adinnādāyī hoti parañca adinnādāne
samādapeti adinnādāne ca samanuñño hoti ... Attanā ca adinnādānā
paṭivirato hoti parañca adinnādānā veramaṇiyā samādapeti
adinnādānā veramaṇiyā ca samanuñño hoti ... attanā ca kāmesu
micchācārī hoti parañca kāmesu micchācāre samādapeti kāmesu
micchācāre ca samanuñño hoti ... attanā ca kāmesu micchācārā
paṭivirato hoti parañca kāmesu micchācārā veramaṇiyā samādapeti
kāmesu micchācārā veramaṇiyā ca samanuñño hoti
{598.1} ... attanā ca musāvādī hoti parañca
musāvāde samādapeti musāvāde ca samanuñño hoti
... attanā ca musāvādā paṭivirato hoti parañca
Musāvādā veramaṇiyā samādapeti musāvādā veramaṇiyā ca samanuñño
hoti ... attanā ca pisuṇavāco hoti parañca pisuṇāya vācāya
samādapeti pisuṇāya vācāya ca samanuñño hoti ... Attanā ca pisuṇāya
vācāya paṭivirato hoti parañca pisuṇāya vācāya veramaṇiyā samādapeti
pisuṇāya vācāya veramaṇiyā ca samanuñño hoti ... attanā ca
pharusavāco hoti parañca pharusāya vācāya samādapeti pharusāya
vācāya ca samanuñño hoti ... attanā ca pharusāya vācāya
paṭivirato hoti parañca pharusāya vācāya veramaṇiyā samādapeti pharusāya
vācāya veramaṇiyā ca samanuñño hoti ... attanā ca samphappalāpī
hoti ... parañca samphappalāpe samādapeti samphappalāpe ca
samanuñño hoti ... attanā ca samphappalāpā paṭivirato hoti
parañca samphappalāpā veramaṇiyā samādapeti samphappalāpā
veramaṇiyā ca samanuñño hoti
{598.2} ... attanā ca abhijjhālu hoti parañca abhijjhāya
samādapeti abhijjhāya ca samanuñño hoti ... attanā ca
anabhijjhālu hoti parañca anabhijjhāya samādapeti anabhijjhāya
ca samanuñño hoti ... attanā ca byāpannacitto hoti parañca
byāpāde samādapeti byāpāde ca samanuñño hoti ... attanā
ca abyāpannacitto hoti parañca abyāpāde samādapeti
abyāpāde ca samanuñño hoti ... attanā ca micchādiṭṭhiko hoti
parañca micchādiṭṭhiyā samādapeti micchādiṭṭhiyā ca samanuñño hoti
... Attanā ca sammādiṭṭhito hoti parañca sammādiṭṭhiyā samādapeti
sammādiṭṭhiyā ca samanuñño hoti . imehi kho bhikkhave tīhi dhammehi
samannāgato yathābhataṃ nikkhitto evaṃ saggeti.
[599] 160 Rāgassa bhikkhave abhiññāya tayo dhammā bhāvetabbā
katame tayo suññato samādhi animitto samādhi appaṇihito samādhi
rāgassa bhikkhave abhiññāya ime tayo dhammā bhāvetabbā . Rāgassa
bhikkhave pariññāya .pe. parikkhayāya pahānāya khayāya vayāya virāgāya
nirodhāya cāgāya paṭinissaggāya ime tayo dhammā bhāvetabbā .
Dosassa mohassa kodhassa upanāhassa makkhassa paḷāsassa issāya
macchariyassa māyāya sātheyyassa thambhassa sārambhassa mānassa atimānassa
madassa pamādassa abhiññāya pariññāya parikkhayāya pahānāya khayāya
vayāya virāgāya nirodhāya cāgāya paṭinissaggāya ime tayo dhammā
bhāvetabbāti 1-.
Tikanipāto niṭṭhito.
----------
@Footnote: 1 Ma. Yu. idamavoca bhagavā attamanā te bhikkhū bhagavato bhāsitaṃ abhinandunti.
@Yu. ekanipāti ca dkanipāti ca tikanipāti ca samatti.
@ aṅguttaranikāyavare sabbañañutaparamavisuddhadassanā nipātā ekādasā yeva
@ pavattitā uddānato te nisāmetha ādito.
@ Ma. tassuddānaṃ
@ rāgaṃ dosañca mohañca kodhūpanāhapañcamaṃ
@ makkhapaḷāsaissā ca macchariyamāyāsāṭheyyā
@ thambhasārambhamānañca atimānamadassa ca
@ pamādā sattarasa vuttā rāgapeyyā sanissitā
@ ete sopammayuttena āpādena abhiññāya
@ pariññāya parikkhayā pahānakkhayabbayena
@ virāganirodhacāgaṃ paṭinisasagge ime dasa
@ suññato animitto ca appaṇihito ca tayo
@ samādhimūlakā peyyā- lesupi vavatthitā cāti
@ tikanipātapāli niṭṭhitā
The Pali Tipitaka in Roman Character Volume 20 page 370-385.
https://84000.org/tipitaka/read/roman_item.php?book=20&item=580&items=20
Classified by [Item Number] :-
http://84000.org/tipitaka/read/roman_item.php?book=20&item=580&items=20&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=20&item=580&items=20
Compare with The Royal Version of Thai Tipitaka :-
https://84000.org/tipitaka/read/byitem.php?book=20&item=580&items=20
Study Atthakatha :-
https://84000.org/tipitaka/attha/attha.php?b=20&i=580
Contents of The Tipitaka Volume 20
https://84000.org/tipitaka/read/?index_20
https://84000.org/tipitaka/english/?index_20
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
