[342] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena āyasmā
upanando sakyaputto chabbaggiyehi bhikkhūhi saddhiṃ bhaṇḍanakato
hoti . so sañcetanikaṃ sukkavisaṭṭhiṃ āpattiṃ 1- āpajjitvā saṅghaṃ
tassā āpattiyā parivāsaṃ yāci . tassa saṅgho tassā āpattiyā
parivāsaṃ adāsi . tena kho pana samayena sāvatthiyaṃ aññatarassa
pūgassa saṅghabhattaṃ hoti . so parivasanto bhattagge āsanapariyante
nisīdi . chabbaggiyā bhikkhū te upāsake etadavocuṃ eso
āvuso āyasmā upanando sakyaputto tumhākaṃ sambhāvito
kulūpako yeneva hatthena saddhādeyyaṃ bhuñjati teneva hatthena
upakkamitvā asuciṃ moceti so sañcetanikaṃ sukkavisaṭṭhiṃ āpattiṃ
āpajjitvā saṅghaṃ tassā āpattiyā parivāsaṃ yāci tassa
saṅgho tassā āpattiyā parivāsaṃ adāsi so parivasanto
āsanapariyante nisinnoti . ye te bhikkhū appicchā .pe. te
ujjhāyanti khīyanti vipācenti kathaṃ hi nāma chabbaggiyā bhikkhū bhikkhussa
duṭṭhullaṃ āpattiṃ anupasampannassa ārocessantīti . athakho
te bhikkhū bhagavato etamatthaṃ ārocesuṃ .pe. saccaṃ kira tumhe
bhikkhave bhikkhussa duṭṭhullaṃ āpattiṃ anupasampannassa ārocethāti .
@Footnote: 1 Yu. sukkavisaṭṭhiāpattiṃ.
Saccaṃ bhagavāti . vigarahi buddho bhagavā kathaṃ hi nāma tumhe moghapurisā
bhikkhussa duṭṭhullaṃ āpattiṃ anupasampannassa ārocessatha netaṃ
moghapurisā appasannānaṃ vā pasādāya .pe. evañca pana bhikkhave
imaṃ sikkhāpadaṃ uddiseyyātha
{342.1} yo pana bhikkhu bhikkhussa duṭṭhullaṃ āpattiṃ anupasampannassa
āroceyya aññatra bhikkhusammatiyā pācittiyanti.
[343] Yo panāti yo yādiso .pe. Bhikkhūti .pe. Ayaṃ imasmiṃ
atthe adhippeto bhikkhūti . bhikkhussāti aññassa bhikkhussa . Duṭṭhullā
nāma āpatti cattāri ca pārājikāni terasa ca saṅghādisesā .
Anupasampanno nāma bhikkhuñca bhikkhuniñca ṭhapetvā avaseso
anupasampanno nāma . āroceyyāti āroceti 1- itthiyā vā
purisassa vā gahaṭṭhassa vā pabbajitassa vā . aññatra bhikkhusammatiyāti
ṭhapetvā bhikkhusammatiṃ.
[344] Atthi bhikkhusammati āpattipariyantā na kulapariyantā
atthi bhikkhusammati kulapariyantā na āpattipariyantā atthi
bhikkhusammati āpattipariyantā ca kulapariyantā ca atthi bhikkhusammati
neva āpattipariyantā na kulapariyantā . āpattipariyantā nāma
āpattiyo pariggahitāyo honti ettakāhi āpattīhi ārocetabboti.
Kulapariyantā nāma kulāni pariggahitāni honti ettakesu kulesu
ārocetabboti . āpattipariyantā ca kulapariyantā ca nāma
@Footnote: 1 Ma. āroceyya.
Āpattiyo ca pariggahitāyo honti kulāni ca pariggahitāni honti
ettakāhi āpattīhi ettakesu kulesu ārocetabboti . neva
āpattipariyantā na kulapariyantā nāma āpattiyo ca apariggahitāyo
honti kulāni ca apariggahitāni honti ettakāhi āpattīhi ettakesu
kulesu ārocetabboti.
[345] Āpattipariyante yā āpattiyo pariggahitāyo honti
tā āpattiyo ṭhapetvā aññāhi āpattīhi āroceti āpatti
pācittiyassa . kulapariyante yāni kulāni pariggahitāni honti tāni
kulāni ṭhapetvā aññesu kulesu āroceti āpatti pācittiyassa .
Āpattipariyante ca kulapariyante ca yā āpattiyo pariggahitāyo
honti tā āpattiyo ṭhapetvā yāni kulāni pariggahitāni honti
tāni kulāni ṭhapetvā aññāhi āpattīhi aññesu kulesu āroceti
āpatti pācittiyassa . neva āpattipariyante na kulapariyante
anāpatti.
[346] Duṭṭhullāya āpattiyā duṭṭhullāpattisaññī anupasampannassa
āroceti aññatra bhikkhusammatiyā āpatti pācittiyassa . duṭṭhullāya
āpattiyā vematiko anupasampannassa āroceti aññatra bhikkhusammatiyā
āpatti pācittiyassa . duṭṭhullāya āpattiyā aduṭṭhullāpattisaññī
anupasampannassa āroceti aññatra bhikkhusammatiyā āpatti
pācittiyassa.
[347] Aduṭṭhullaṃ āpattiṃ āroceti āpatti dukkaṭassa .
Anupasampannassa duṭṭhullaṃ vā aduṭṭhullaṃ vā ajjhācāraṃ āroceti
āpatti dukkaṭassa . aduṭṭhullāya āpattiyā duṭṭhullāpattisaññī
āpatti dukkaṭassa . aduṭṭhullāya āpattiyā vematiko āpatti
dukkaṭassa . aduṭṭhullāya āpattiyā aduṭṭhullāpattisaññī āpatti
dukkaṭassa.
[348] Anāpatti vatthuṃ āroceti no āpattiṃ āpattiṃ āroceti
no vatthuṃ bhikkhusammatiyā ummattakassa ādikammikassāti.
Navamasikkhāpadaṃ niṭṭhitaṃ.
-------
Dasamasikkhāpadaṃ
[349] Tena samayena buddho bhagavā āḷaviyaṃ viharati aggāḷave
cetiye . tena kho pana samayena āḷavikā 1- bhikkhū navakammaṃ karontā
paṭhaviṃ khaṇantipi khaṇāpentipi . manussā ujjhāyanti khīyanti vipācenti
kathaṃ hi nāma samaṇā sakyaputtiyā paṭhaviṃ khaṇissantipi khaṇāpessantipi
ekindriyaṃ samaṇā sakyaputtiyā jīvaṃ viheṭhentīti . assosuṃ kho
bhikkhū tesaṃ manussānaṃ ujjhāyantānaṃ khīyantānaṃ vipācentānaṃ .
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma āḷavikā 2- bhikkhū paṭhaviṃ khaṇissantipi khaṇāpessantipīti.
Athakho te bhikkhū bhagavato etamatthaṃ ārocesuṃ .pe. Saccaṃ kira tumhe
bhikkhave paṭhaviṃ khaṇathapi khaṇāpethapīti . saccaṃ bhagavāti . vigarahi buddho
bhagavā kathaṃ hi nāma tumhe moghapurisā paṭhaviṃ khaṇissathapi khaṇāpessathapi
jīvasaññino hi moghapurisā manussā paṭhaviyā netaṃ moghapurisā
appasannānaṃ vā pasādāya pasannānaṃ vā bhiyyobhāvāya .pe.
Evañca pana bhikkhave imaṃ sikkhāpadaṃ uddiseyyātha
{349.1} yo pana bhikkhu paṭhaviṃ khaṇeyya vā khaṇāpeyya vā
pācittiyanti.
[350] Yo panāti yo yādiso .pe. bhikkhūti .pe.
Ayaṃ imasmiṃ atthe adhippeto bhikkhūti . paṭhavī nāma dve
@Footnote: 1-2 Ma. āḷavakā.
Paṭhaviyo jātā ca paṭhavī ajātā ca paṭhavī. Jātā nāma paṭhavī suddhapaṃsu
suddhamattikā appapāsāṇā appasakkharā appakaṭhalā appamarumbā
appabālikā yebhuyyena paṃsu 1- yebhuyyena mattikā adaḍḍhāpi
vuccati jātā paṭhavī . yopi paṃsupuñjo vā mattikāpuñjo vā
atirekacātumāsaṃ ovaṭṭho ayampi vuccati jātā paṭhavī . ajātā
nāma paṭhavī suddhapāsāṇā suddhasakkharā suddhakaṭhalā suddhamarumbā
suddhabālikā appapaṃsu appamattikā yebhuyyena pāsāṇā yebhuyyena
sakkharā yebhuyyena kaṭhalā yebhuyyena marumbā yebhuyyena bālikā 2-
daḍḍhāpi vuccati ajātā paṭhavī . yopi paṃsupuñjo vā mattikāpuñjo
vā ūnakacātumāsaṃ 3- ovaṭṭho ayampi vuccati ajātā paṭhavī.
[351] Khaṇeyyāti sayaṃ khaṇati āpatti pācittiyassa .
Khaṇāpeyyāti aññaṃ khaṇāpeti āpatti pācittiyassa . sakiṃ
āṇatto bahukaṃpi khaṇati āpatti pācittiyassa.
[352] Paṭhaviyā paṭhavīsaññī khaṇati vā khaṇāpeti vā bhindati
vā bhedāpeti vā dahati vā dahāpeti vā āpatti pācittiyassa.
Paṭhaviyā vematiko khaṇati vā khaṇāpeti vā bhindati vā bhedāpeti
vā dahati vā dahāpeti vā āpatti dukkaṭassa . paṭhaviyā
apaṭhavīsaññī khaṇati vā khaṇāpeti vā bhindati vā bhedāpeti vā
@Footnote: 1 Ma. paṃsukā . 2 Ma. vālikā . 3 Ma. Yu. omakacātumāsaṃ.
Dahati vā dahāpeti vā anāpatti . apaṭhaviyā paṭhavīsaññī
āpatti dukkaṭassa . apaṭhaviyā vematiko āpatti dukkaṭassa .
Apaṭhaviyā apaṭhavīsaññī anāpatti.
[353] Anāpatti imaṃ jāna imaṃ dehi imaṃ āhara
iminā attho imaṃ kappiyaṃ karohīti bhaṇati asañcicca asatiyā
ajānantassa ummattakassa ādikammikassāti.
Dasamasikkhāpadaṃ niṭṭhitaṃ 1-.
Musāvādavaggo paṭhamo 2-.
-------
Tassuddānaṃ.
Musāomasapesuññaṃ padaseyyāya ve duve
aññatra viññunā bhūtā duṭṭhullāpatti khaṇanāti.
-------
@Footnote: 1 Ma. pathavīkhaṇanasikkhāpadaṃ niṭṭhitaṃ dasamaṃ . 2 Ma. musāvādavaggo niṭṭhito paṭhamo.
@Yu. paṭhamo vaggo.
Bhūtagāmavaggassa paṭhamasikkhāpadaṃ
[354] Tena samayena buddho bhagavā āḷaviyaṃ viharati aggāḷave
cetiye . tena kho pana samayena āḷavikā bhikkhū navakammaṃ karontā
rukkhaṃ chindantipi chedāpentipi . aññataropi āḷaviko bhikkhu rukkhaṃ
chindati . tasmiṃ rukkhe adhivatthā devatā taṃ bhikkhuṃ etadavoca
mā bhante attano bhavanaṃ kattukāmo mayhaṃ bhavanaṃ chindāti 1-. So
bhikkhu anādiyanto chindiyeva tassā ca devatāya dārakassa bāhuṃ
ākoṭesi . athakho tassā devatāya etadahosi yannūnāhaṃ imaṃ bhikkhuṃ
idheva jīvitā voropeyyanti . athakho tassā devatāya etadahosi na
kho panetaṃ 2- paṭirūpaṃ yāhaṃ imaṃ bhikkhuṃ idheva jīvitā voropeyyaṃ
yannūnāhaṃ bhagavato etamatthaṃ āroceyyanti.
{354.1} Athakho sā devatā yena bhagavā tenupasaṅkami upasaṅkamitvā
bhagavato etamatthaṃ ārocesi. Sādhu sādhu devate sādhu kho tvaṃ devate taṃ
bhikkhuṃ na jīvitā voropesi sacajja tvaṃ devate taṃ bhikkhuṃ jīvitā voropeyyāsi
bahuṃ ca tvaṃ devate apuññaṃ pasaveyyāsi gaccha tvaṃ devate amukasmiṃ
okāse rukkho vivitto tasmiṃ upagacchāti . manussā ujjhāyanti
khīyanti vipācenti kathaṃ hi nāma samaṇā sakyaputtiyā rukkhaṃ
chindissantipi chedāpessantipi
@Footnote: 1 Ma. Yu. chindīti . 2 Ma. Yu. metaṃ.
Ekindriyaṃ samaṇā sakyaputtiyā jīvaṃ viheṭhentīti . assosuṃ kho
bhikkhū tesaṃ manussānaṃ ujjhāyantānaṃ khīyantānaṃ vipācentānaṃ .
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma āḷavikā bhikkhū rukkhaṃ chindissantipi chedāpessantipīti.
{354.2} Athakho te bhikkhū bhagavato etamatthaṃ ārocesuṃ .pe.
Saccaṃ kira tumhe bhikkhave rukkhaṃ chindathapi chedāpethapīti . saccaṃ
bhagavāti . vigarahi buddho bhagavā kathaṃ hi nāma tumhe moghapurisā
rukkhaṃ chindissathapi chedāpessathapi jīvasaññino hi moghapurisā
manussā rukkhasmiṃ netaṃ moghapurisā appasannānaṃ vā pasādāya
pasannānaṃ vā bhiyyobhāvāya .pe. evañca pana bhikkhave imaṃ
sikkhāpadaṃ uddiseyyātha
{354.3} bhūtagāmapātabyatāya pācittiyanti.
[355] Bhūtagāmo nāma pañca bījajātāni mūlabījaṃ khandhabījaṃ
phaḷubījaṃ aggabījaṃ bījabījameva 1- pañcamaṃ . mūlabījaṃ nāma haḷiddaṃ 2-
siṅgaveraṃ vacaṃ 3- vacatthaṃ ativisaṃ 4- kaṭukarohiṇī usīraṃ bhaddamuttakaṃ yāni
vā panaññānipi atthi mūle jāyanti mūle sañjāyanti etaṃ
mūlabījaṃ nāma . khandhabījaṃ nāma assaṭṭho nigrodho pilakkho
udumbaro kacchako kapiṭhano yāni vā panaññānipi atthi khandhe
jāyanti khandhe sañjāyanti etaṃ khandhabījaṃ nāma . phaḷubījaṃ nāma
ucchu veḷu naḷo yāni vā panaññānipi atthi pabbe jāyanti
@Footnote: 1 Yu. bījabījañceva . 2 Ma. Yu. baliddi . 3 Ma. siṅgiveraṃ vacā . 4 Ma. ativisā.
Pabbe sañjāyanti etaṃ phaḷubījaṃ nāma.
{355.1} Aggabījaṃ nāma ajjukaṃ phaṇijjakaṃ hiriveraṃ yāni vā
panaññānipi atthi agge jāyanti agge sañjāyanti etaṃ
aggabījaṃ nāma . bījabījaṃ nāma pubbaṇṇaṃ aparaṇṇaṃ yāni vā
panaññānipi atthi bīje jāyanti bīje sañjāyanti etaṃ bījabījaṃ
nāma pañcamaṃ.
[356] Bīje bījasaññī chindati vā chedāpeti vā bhindati vā
bhedāpeti vā pacati vā pacāpeti vā āpatti pācittiyassa. Bīje
vematiko chindati vā chedāpeti vā bhindati vā bhedāpeti vā pacati
vā pacāpeti vā āpatti dukkaṭassa . bīje abījasaññī chindati vā
chedāpeti vā bhindati vā bhedāpeti vā pacati vā pacāpeti vā
anāpatti . abīje bījasaññī āpatti dukkaṭassa . abīje vematiko
āpatti dukkaṭassa. Abīje abījasaññī anāpatti.
[357] Anāpatti imaṃ jāna imaṃ dehi imaṃ āhara iminā attho
imaṃ kappiyaṃ karohīti bhaṇati asañcicca asatiyā ajānantassa
ummattakassa ādikammikassāti.
Paṭhamasikkhāpadaṃ niṭṭhitaṃ.
-------
Dutiyasikkhāpadaṃ
[358] Tena samayena buddho bhagavā kosambiyaṃ viharati ghositārāme.
Tena kho pana samayena āyasmā channo sayaṃ 1- anācāraṃ ācaritvā
saṅghamajjhe āpattiyā anuyuñjiyamāno aññenaññaṃ paṭicarati ko
āpanno kiṃ āpanno kismiṃ āpanno kathaṃ āpanno kaṃ bhaṇatha kiṃ
bhaṇathāti . ye te bhikkhū appicchā .pe. te ujjhāyanti khīyanti
vipācenti kathaṃ hi nāma āyasmā channo saṅghamajjhe āpattiyā
anuyuñjiyamāno aññenaññaṃ paṭicarissati ko āpanno kiṃ
āpanno kismiṃ āpanno kathaṃ āpanno kaṃ bhaṇatha kiṃ bhaṇathāti .
Athakho te bhikkhū bhagavato etamatthaṃ ārocesuṃ . athakho bhagavā
āyasmantaṃ channaṃ paṭipucchi saccaṃ kira tvaṃ channa saṅghamajjhe
āpattiyā anuyuñjiyamāno aññenaññaṃ paṭicarasi ko
āpanno .pe. kiṃ bhaṇathāti . saccaṃ bhagavāti . vigarahi buddho
bhagavā kathaṃ hi nāma tvaṃ moghapurisa saṅghamajjhe āpattiyā
anuyuñjiyamāno aññenaññaṃ paṭicarissasi ko āpanno .pe.
Kiṃ bhaṇathāti netaṃ moghapurisa appasannānaṃ vā pasādāya .pe.
Vigarahitvā dhammiṃ kathaṃ katvā bhikkhū āmantesi tenahi bhikkhave
saṅgho channassa bhikkhuno 2- aññavādakaṃ ropetu . evañca pana
@Footnote: 1 Ma. ayaṃ pāṭho natthi . 2 atirekapāṭhena bhavitabbaṃ.
Bhikkhave ropetabbaṃ byattena bhikkhunā paṭibalena saṅgho ñāpetabbo
{358.1} suṇātu me bhante saṅgho ayaṃ channo bhikkhu saṅghamajjhe
āpattiyā anuyuñjiyamāno aññenaññaṃ paṭicarati . yadi saṅghassa
pattakallaṃ saṅgho channassa bhikkhuno aññavādakaṃ ropeyya . esā
ñatti.
{358.2} Suṇātu me bhante saṅgho ayaṃ channo bhikkhu saṅghamajjhe
āpattiyā anuyuñjiyamāno aññenaññaṃ paṭicarati . saṅgho channassa
bhikkhuno aññavādakaṃ ropeti . yassāyasmato khamati channassa bhikkhuno
aññavādakassa ropanā so tuṇhassa yassa nakkhamati so bhāseyya.
{358.3} Ropitaṃ saṅghena channassa bhikkhuno aññavādakaṃ . Khamati
saṅghassa tasmā tuṇhī. Evametaṃ dhārayāmīti.
[359] Athakho bhagavā āyasmantaṃ channaṃ anekapariyāyena vigarahitvā
dubbharatāya .pe. Evañca pana bhikkhave imaṃ sikkhāpadaṃ uddiseyyātha
{359.1} aññavādake pācittiyanti . evañcidaṃ bhagavatā
bhikkhūnaṃ sikkhāpadaṃ paññattaṃ hoti.
[360] Tena kho pana samayena āyasmā channo saṅghamajjhe
āpattiyā anuyuñjiyamāno aññenaññaṃ paṭicaranto āpattiṃ
āpajjissāmīti tuṇhībhūto saṅghaṃ viheseti . ye te bhikkhū appicchā
.pe. te ujjhāyanti khīyanti vipācenti kathaṃ hi nāma āyasmā
channo saṅghamajjhe āpattiyā anuyuñjiyamāno tuṇhībhūto saṅghaṃ
Vihesessatīti . athakho te bhikkhū bhagavato etamatthaṃ ārocesuṃ .pe.
Athakho bhagavā āyasmantaṃ channaṃ paṭipucchi saccaṃ kira tvaṃ channa
saṅghamajjhe āpattiyā anuyuñjiyamāno tuṇhībhūto saṅghaṃ vihesesīti .
Saccaṃ bhagavāti . vigarahi buddho bhagavā kathaṃ hi nāma tvaṃ moghapurisa
saṅghamajjhe āpattiyā anuyuñjiyamāno tuṇhībhūto saṅghaṃ
vihesessasi netaṃ moghapurisa appasannānaṃ vā pasādāya .pe.
Vigarahitvā dhammiṃ kathaṃ katvā bhikkhū āmantesi tenahi bhikkhave
saṅgho channassa bhikkhuno 1- vihesakaṃ ropetu . evañca pana bhikkhave
ropetabbaṃ byattena bhikkhunā paṭibalena saṅgho ñāpetabbo
{360.1} suṇātu me bhante saṅgho ayaṃ channo bhikkhu saṅghamajjhe
āpattiyā anuyuñjiyamāno tuṇhībhūto saṅghaṃ viheseti . yadi saṅghassa
pattakallaṃ saṅgho channassa bhikkhuno vihesakaṃ ropeyya. Esā ñatti.
{360.2} Suṇātu me bhante saṅgho ayaṃ channo bhikkhu saṅghamajjhe
āpattiyā anuyuñjiyamāno tuṇhībhūto saṅghaṃ viheseti . saṅgho
channassa bhikkhuno vihesakaṃ ropeti . yassāyasmato khamati channassa
bhikkhuno vihesakassa ropanā so tuṇhassa yassa nakkhamati so bhāseyya.
{360.3} Ropitaṃ saṅghena channassa bhikkhuno vihesakaṃ. Khamati saṅghassa
tasmā tuṇhī. Evametaṃ dhārayāmīti.
[361] Athakho bhagavā āyasmantaṃ channaṃ anekapariyāyena vigarahitvā
@Footnote: 1 atirekapāṭhena bhavitabbaṃ.
Dubbharatāya .pe. Evañca pana bhikkhave imaṃ sikkhāpadaṃ uddiseyyātha
{361.1} aññavādake vihesake pācittiyanti.
[362] Aññavādako nāma saṅghamajjhe vatthusmiṃ vā āpattiyā
vā anuyuñjiyamāno taṃ na kathetukāmo taṃ na ugghāṭetukāmo
aññenaññaṃ paṭicarati ko āpanno kiṃ āpanno kismiṃ āpanno
kathaṃ āpanno kaṃ bhaṇatha kiṃ bhaṇathāti eso aññavādako nāma.
[363] Vihesako nāma saṅghamajjhe vatthusmiṃ vā āpattiyā
vā anuyuñjiyamāno taṃ na kathetukāmo taṃ na ugghāṭetukāmo
tuṇhībhūto saṅghaṃ viheseti eso vihesako nāma.
[364] Aropite aññavādake saṅghamajjhe vatthusmiṃ vā āpattiyā
vā anuyuñjiyamāno taṃ na kathetukāmo taṃ na ugghāṭetukāmo
aññenaññaṃ paṭicarati ko āpanno kiṃ āpanno kismiṃ āpanno
kathaṃ āpanno kaṃ bhaṇatha kiṃ bhaṇathāti āpatti dukkaṭassa .
Aropite vihesake saṅghamajjhe vatthusmiṃ vā āpattiyā vā
anuyuñjiyamāno taṃ na kathetukāmo taṃ na ugghāṭetukāmo tuṇhībhūto
saṅghaṃ viheseti āpatti dukkaṭassa.
[365] Ropite aññavādake saṅghamajjhe vatthusmiṃ vā āpattiyā
vā anuyuñjiyamāno taṃ na kathetukāmo taṃ na ugghāṭetukāmo
aññenaññaṃ paṭicarati ko āpanno .pe. kiṃ bhaṇathāti āpatti
Pācittiyassa . ropite vihesake saṅghamajjhe vatthusmiṃ vā āpattiyā
vā anuyuñjiyamāno taṃ na kathetukāmo taṃ na ugghāṭetukāmo
tuṇhībhūto saṅghaṃ viheseti āpatti pācittiyassa.
[366] Dhammakamme dhammakammasaññī aññavādake vihesake
āpatti pācittiyassa . dhammakamme vematiko aññavādake
vihesake āpatti pācittiyassa . dhammakamme adhammakammasaññī
aññavādake vihesake āpatti pācittiyassa . adhammakamme
dhammakammasaññī āpatti dukkaṭassa . adhammakamme vematiko
āpatti dukkaṭassa . adhammakamme adhammakammasaññī āpatti
dukkaṭassa.
[367] Anāpatti ajānanto pucchati gilāno [1]- na katheti
saṅghassa bhaṇḍanaṃ vā kalaho vā viggaho vā vivādo vā bhavissatīti
na katheti saṅghabhedo vā saṅgharāji vā bhavissatīti na katheti
adhammena vā vaggena vā na kammārahassa vā kammaṃ karissatīti na
katheti ummattakassa ādikammikassāti.
Dutiyasikkhāpadaṃ niṭṭhitaṃ.
-------
@Footnote: 1 Ma. vā.
Tatiyasikkhāpadaṃ
[368] Tena samayena buddho bhagavā rājagahe viharati veḷuvane
kalandakanivāpe . tena kho pana samayena āyasmā dabbo mallaputto
saṅghassa senāsanañca paññāpeti 1- bhattāni ca uddisati . tena
kho pana samayena mettiyabhummajakā bhikkhū navakā ceva honti
appapuññā ca yāni saṅghassa lāmakāni senāsanāni tāni
tesaṃ pāpuṇanti lāmakāni ca bhattāni.
{368.1} Te āyasmantaṃ dabbaṃ mallaputtaṃ bhikkhū ujjhāpenti
chandāya dabbo mallaputto senāsanaṃ paññāpeti chandāya ca
bhattāni uddisatīti . ye te bhikkhū appicchā .pe. te ujjhāyanti
khīyanti vipācenti kathaṃ hi nāma mettiyabhummajakā bhikkhū āyasmantaṃ
dabbaṃ mallaputtaṃ bhikkhū ujjhāpessantīti . athakho te bhikkhū bhagavato
etamatthaṃ ārocesuṃ . athakho bhagavā .pe. mettiyabhummajake bhikkhū
paṭipucchi saccaṃ kira tumhe bhikkhave dabbaṃ mallaputtaṃ bhikkhū ujjhāpethāti.
Saccaṃ bhagavāti . vigarahi buddho bhagavā kathaṃ hi nāma tumhe moghapurisā
dabbaṃ mallaputtaṃ bhikkhū ujjhāpessatha netaṃ moghapurisā appasannānaṃ
vā pasādāya .pe. Evañca pana bhikkhave imaṃ sikkhāpadaṃ uddiseyyātha
{368.2} ujjhāpanake pācittiyanti.
{368.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.
@Footnote: 1 Ma. paññapeti. evamuparipi.
[369] Tena kho pana samayena mettiyabhummajakā bhikkhū bhagavatā
ujjhāpanakaṃ paṭikkhittanti ettāvatā bhikkhū sossantīti bhikkhūnaṃ
sāmantā āyasmantaṃ dabbaṃ mallaputtaṃ khīyanti chandāya dabbo
mallaputto senāsanaṃ paññāpeti chandāya ca bhattāni uddisatīti .
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma mettiyabhummajakā bhikkhū āyasmantaṃ dabbaṃ mallaputtaṃ
khīyantīti.
{369.1} Athakho te bhikkhū bhagavato etamatthaṃ ārocesuṃ. Athakho
bhagavā .pe. mettiyabhummajake bhikkhū paṭipucchi saccaṃ kira tumhe bhikkhave
dabbaṃ mallaputtaṃ khīyathāti . saccaṃ bhagavāti . vigarahi buddho bhagavā kathaṃ
hi nāma tumhe moghapurisā dabbaṃ mallaputtaṃ khīyissatha netaṃ moghapurisā
appasannānaṃ vā pasādāya .pe. evañca pana bhikkhave imaṃ sikkhāpadaṃ
uddiseyyātha
{369.2} ujjhāpanake khīyanake pācittiyanti.
[370] Ujjhāpanakaṃ nāma upasampannaṃ saṅghena sammataṃ
senāsanapaññāpakaṃ vā bhattuddesakaṃ vā yāgubhājakaṃ vā phalabhājakaṃ
vā khajjabhājakaṃ vā appamattakavissajjakaṃ vā avaṇṇaṃ kattukāmo
ayasaṃ kattukāmo maṅkukattukāmo 1- upasampannaṃ ujjhāpeti vā
khīyati vā āpatti pācittiyassa.
[371] Dhammakamme dhammakammasaññī ujjhāpanake khīyanake
@Footnote: 1 Yu. maṅkuṃ kattukāmo. evamuparipi.
Āpatti pācittiyassa . dhammakamme vematiko ujjhāpanake
khīyanake āpatti pācittiyassa . dhammakamme adhammakammasaññī
ujjhāpanake khīyanake āpatti pācittiyassa.
[372] Anupasampannaṃ ujjhāpeti vā khīyati vā āpatti
dukkaṭassa . upasampannaṃ saṅghena asammataṃ senāsanapaññāpakaṃ vā
bhattuddesakaṃ vā yāgubhājakaṃ vā phalabhājakaṃ vā khajjabhājakaṃ vā
appamattakavissajjakaṃ vā avaṇṇaṃ kattukāmo ayasaṃ kattukāmo
maṅkukattukāmo upasampannaṃ vā anupasampannaṃ vā ujjhāpeti vā
khīyati vā āpatti dukkaṭassa . anupasampannaṃ saṅghena sammataṃ
vā asammataṃ vā senāsanapaññāpakaṃ vā bhattuddesakaṃ vā yāgubhājakaṃ
vā phalabhājakaṃ vā khajjabhājakaṃ vā appamattakavissajjakaṃ vā avaṇṇaṃ
kattukāmo ayasaṃ kattukāmo maṅkukattukāmo upasampannaṃ vā
anupasampannaṃ vā ujjhāpeti vā khīyati vā āpatti dukkaṭassa .
Adhammakamme dhammakammasaññī āpatti dukkaṭassa . adhammakamme
vematiko āpatti dukkaṭassa . adhammakamme adhammakammasaññī
āpatti dukkaṭassa.
[373] Anāpatti pakatiyā chandā dosā mohā bhayā karontaṃ
ujjhāpeti vā khīyati vā ummattakassa ādikammikassāti.
Tatiyasikkhāpadaṃ niṭṭhitaṃ.
-------
Catutthasikkhāpadaṃ
[374] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena bhikkhū hemantike
kāle ajjhokāse senāsanaṃ paññāpetvā kāyaṃ otāpentā kāle
ārocite taṃ pakkamantā neva uddhariṃsu na uddharāpesuṃ anāpucchā
pakkamiṃsu . senāsanaṃ ovaṭṭhaṃ hoti . ye te bhikkhū appicchā .pe.
Te ujjhāyanti khīyanti vipācenti kathaṃ hi nāma bhikkhū ajjhokāse
senāsanaṃ paññāpetvā taṃ pakkamantā neva uddharissanti na
uddharāpessanti anāpucchā pakkamissanti senāsanaṃ ovaṭṭhanti.
{374.1} Athakho te bhikkhū bhagavato etamatthaṃ ārocesuṃ. Athakho
bhagavā bhikkhū paṭipucchi saccaṃ kira bhikkhave bhikkhū ajjhokāse senāsanaṃ
paññāpetvā taṃ pakkamantā neva uddharanti na uddharāpenti
anāpucchā pakkamanti senāsanaṃ ovaṭṭhanti . saccaṃ bhagavāti .
Vigarahi buddho bhagavā kathaṃ hi nāma te bhikkhave moghapurisā ajjhokāse
senāsanaṃ paññāpetvā taṃ pakkamantā neva uddharissanti na
uddharāpessanti anāpucchā pakkamissanti . senāsanaṃ ovaṭṭhaṃ
netaṃ bhikkhave appasannānaṃ vā pasādāya .pe. evañca pana
bhikkhave imaṃ sikkhāpadaṃ uddiseyyātha
{374.2} yo pana bhikkhu saṅghikaṃ mañcaṃ vā pīṭhaṃ vā bhisiṃ vā kocchaṃ vā
Ajjhokāse santharitvā vā santharāpetvā vā taṃ pakkamanto neva
uddhareyya na uddharāpeyya anāpucchaṃ vā gaccheyya pācittiyanti.
{374.3} Evañcidaṃ bhagavatā bhikkhūnaṃ sikkhāpadaṃ paññattaṃ hoti.
[375] Tena kho pana samayena bhikkhū ajjhokāse vasitvā kālasseva
senāsanaṃ atiharanti 1- . addasā kho bhagavā te bhikkhū kālasseva
senāsanaṃ atiharante . disvāna etasmiṃ nidāne etasmiṃ pakaraṇe
dhammiṃ kathaṃ katvā bhikkhū āmantesi anujānāmi bhikkhave aṭṭha māse
avassikasaṅkete maṇḍape vā rukkhamūle vā yattha kākā vā kulalā
vā na ūhadanti 2- tattheva 3- senāsanaṃ nikkhipitunti.
[376] Yo panāti yo yādiso .pe. Bhikkhūti .pe. Ayaṃ imasmiṃ
atthe adhippeto bhikkhūti . saṅghikaṃ nāma saṅghassa dinnaṃ hoti
pariccattaṃ . mañco nāma cattāro mañcā masārako bundikābaddho
kulirapādako āhaccapādako . pīṭhaṃ nāma cattāri pīṭhāni masārakaṃ
bundikābaddhaṃ kulirapādakaṃ āhaccapādakaṃ . bhisi nāma pañca bhisiyo
uṇṇabhisi vākabhisi colabhisi tiṇabhisi paṇṇabhisi . kocchaṃ nāma
vākamayaṃ vā usīramayaṃ vā muñjamayaṃ vā pabbajamayaṃ vā anto
saṃveṭhetvā baddhaṃ hoti . santharitvāti sayaṃ santharitvā .
Santharāpetvāti aññaṃ santharāpetvā . anupasampannaṃ santharāpeti
@Footnote: 1 Ma. abhiharanti. evamuparipi . 2 Ma. uhadanti . 3 Ma. Yu. tattha.
Tassa palibodho . upasampannaṃ santharāpeti santhārakassa palibodho .
Taṃ pakkamanto neva uddhareyyāti na sayaṃ uddhareyya. Na uddharāpeyyāti
na aññaṃ uddharāpeyya . anāpucchaṃ vā gaccheyyāti bhikkhuṃ vā sāmaṇeraṃ
vā ārāmikaṃ vā anāpucchā majjhimassa purisassa leḍḍupātaṃ
atikkamantassa āpatti pācittiyassa.
[377] Saṅghike saṅghikasaññī ajjhokāse santharitvā vā
santharāpetvā vā taṃ pakkamanto neva uddhareyya na uddharāpeyya
anāpucchaṃ vā gaccheyya āpatti pācittiyassa . saṅghike vematiko
ajjhokāse santharitvā vā santharāpetvā vā taṃ pakkamanto neva
uddhareyya na uddharāpeyya anāpucchaṃ vā gaccheyya āpatti
pācittiyassa . saṅghike puggalikasaññī ajjhokāse santharitvā vā
santharāpetvā vā taṃ pakkamanto neva uddhareyya na uddharāpeyya
anāpucchaṃ vā gaccheyya āpatti pācittiyassa . cimilikaṃ vā
uttarattharaṇaṃ vā bhummattharaṇaṃ vā taṭṭikaṃ vā cammakhaṇḍaṃ vā
pādapuñchaniṃ vā phalakapīṭhaṃ vā ajjhokāse santharitvā vā
santharāpetvā vā taṃ pakkamanto neva uddhareyya na uddharāpeyya
anāpucchaṃ vā gaccheyya āpatti dukkaṭassa . puggalike saṅghikasaññī
āpatti dukkaṭassa . puggalike vematiko āpatti dukkaṭassa .
Puggalike puggalikasaññī aññassa puggalike āpatti dukkaṭassa .
Attano puggalike anāpatti.
[378] Anāpatti uddharitvā gacchati uddharāpetvā gacchati
āpucchaṃ gacchati otāpento gacchati kenaci palibuddhaṃ hoti
āpadāsu ummattakassa ādikammikassāti.
Catutthasikkhāpadaṃ niṭṭhitaṃ.
-------
Pañcamasikkhāpadaṃ
[379] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena sattarasavaggiyā
bhikkhū sahāyakā honti . te vasantāpi ekato va vasanti pakkamantāpi
ekato va pakkamanti . te aññatarasmiṃ saṅghike vihāre seyyaṃ
santharitvā taṃ pakkamantā neva uddhariṃsu na uddharāpesuṃ anāpucchā
pakkamiṃsu . senāsanaṃ upacikāhi khāyitaṃ hoti . Ye te bhikkhū appicchā
.pe. te ujjhāyanti khīyanti vipācenti kathaṃ hi nāma sattarasavaggiyā
bhikkhū saṅghike vihāre seyyaṃ santharitvā taṃ pakkamantā neva
uddharissanti na uddharāpessanti anāpucchā pakkamissanti senāsanaṃ
upacikāhi khāyitanti.
{379.1} Athakho te bhikkhū bhagavato etamatthaṃ ārocesuṃ. Athakho
bhagavā bhikkhū paṭipucchi saccaṃ kira bhikkhave sattarasavagtiyā bhikkhū saṅghike
vihāre seyyaṃ santharitvā taṃ pakkamantā neva uddhariṃsu na uddharāpesuṃ
anāpucchā pakkamiṃsu senāsanaṃ upacikāhi khāyitanti . saccaṃ bhagavāti.
Vigarahi buddho bhagavā kathaṃ hi nāma te bhikkhave moghapurisā saṅghike
vihāre seyyaṃ santharitvā taṃ pakkamantā neva uddharissanti na
uddharāpessanti anāpucchā pakkamissanti senāsanaṃ upacikāhi
khāyitaṃ netaṃ bhikkhave appasannānaṃ vā pasādāya .pe. evañca
Pana bhikkhave imaṃ sikkhāpadaṃ uddiseyyātha
{379.2} yo pana bhikkhu saṅghike vihāre seyyaṃ santharitvā vā
santharāpetvā vā taṃ pakkamanto neva uddhareyya na uddharāpeyya
anāpucchaṃ vā gaccheyya pācittiyanti.
The Pali Tipitaka in Roman Character Volume 2 page 225-248.
https://84000.org/tipitaka/read/roman_item.php?book=2&item=342&items=38&mode=bracket
Classified by content :-
https://84000.org/tipitaka/read/roman_item.php?book=2&item=342&items=38
Compare with The Pali Tipitaka in Thai Character :-
https://84000.org/tipitaka/read/pali_item.php?book=2&item=342&items=38&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=2&item=342&items=38&mode=bracket
Study Atthakatha :-
https://84000.org/tipitaka/attha/attha.php?b=2&i=342
Contents of The Tipitaka Volume 2
https://84000.org/tipitaka/read/?index_2
https://84000.org/tipitaka/english/?index_2
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
