[103] Sāvatthiyaṃ . tatra kho .pe. etadavoca aniccaññeva
bhikkhave bhikkhu rūpaṃ aniccanti passati sāssa hoti sammādiṭṭhi
sammā passaṃ nibbindati . nandikkhayā rāgakkhayo rāgakkhayā
nandikkhayo nandirāgakkhayā cittaṃ vimuttaṃ suvimuttanti vuccati .
Aniccaññeva bhikkhave bhikkhu vedanaṃ aniccāti passati sāssa hoti
sammādiṭṭhi sammā passaṃ nibbindati . nandikkhayā rāgakkhayo
Rāgakkhayā nandikkhayo nandirāgakkhayā cittaṃ vimuttaṃ suvimuttanti
vuccati . aniccaññeva bhikkhave bhikkhu saññaṃ aniccāti passati
.pe. anicce yeva bhikkhave bhikkhu saṅkhāre aniccāti passati
sāssa hoti sammādiṭṭhi sammā passaṃ nibbindati . nandikkhayā
rāgakkhayo rāgakkhayā nandikkhayo nandirāgakkhayā cittaṃ vimuttaṃ
suvimuttanti vuccati . aniccaññeva bhikkhave bhikkhu viññāṇaṃ
aniccanti passati sāssa hoti sammādiṭṭhi sammā passaṃ
nibbindati nandikkhayā rāgakkhayo rāgakkhayā nandikkhayo
nandirāgakkhayā cittaṃ vimuttaṃ suvimuttanti vuccatīti.
[104] Sāvatthiyaṃ . tatra kho .pe. etadavoca rūpaṃ bhikkhave
yoniso manasikarotha rūpāniccatañca yathābhūtaṃ samanupassatha . rūpaṃ
bhikkhave bhikkhu yoniso manasikaronto rūpāniccatañca yathābhūtaṃ
samanupassanto rūpasmiṃ nibbindati nandikkhayā rāgakkhayo rāgakkhayā
nandikkhayo nandirāgakkhayā cittaṃ vimuttaṃ suvimuttanti vuccati .
Vedanaṃ bhikkhave yoniso manasikarotha vedanāniccatañca yathābhūtaṃ
samanupassatha . vedanaṃ bhikkhave bhikkhu yoniso manasikaronto
vedanāniccatañca yathābhūtaṃ samanupassanto vedanāya nibbindati
nandikkhayā rāgakkhayo rāgakkhayā nandikkhayo nandirāgakkhayā cittaṃ
vimuttaṃ suvimuttanti vuccati . saññaṃ bhikkhave. Saṅkhāre bhikkhave yoniso
manasikarotha saṅkhārāniccatañca yathābhūtaṃ samanupassatha . saṅkhāre
Bhikkhave bhikkhu yoniso manasikaronto saṅkhārāniccatañca yathābhūtaṃ
samanupassanto saṅkhāresu nibbindati . nandikkhayā rāgakkhayo
rāgakkhayā nandikkhayo nandirāgakkhayā cittaṃ vimuttaṃ suvimuttanti
vuccati . viññāṇaṃ bhikkhave yoniso manasikarotha viññāṇāniccatañca
yathābhūtaṃ samanupassatha . viññāṇaṃ bhikkhave bhikkhu yoniso manasikaronto
viññāṇāniccatañca yathābhūtaṃ samanupassanto viññāṇasmiṃ
nibbindati . nandikkhayā rāgakkhayo rāgakkhayā nandikkhayo
nandirāgakkhayā cittaṃ vimuttaṃ suvimuttanti vuccatīti.
Attadīpavaggo pañcamo.
Tassuddānaṃ
attadīpā paṭipadā dve ca honti aniccatā
samanupassanā khandhā dve soṇā dve nandikkhayena cāti.
Mūlapaṇṇāsakaṃ samattaṃ.
Tassa mūlapaṇṇāsakavaggassuddānaṃ
nakulapitā anicco ca bhārena natumhākena ca
attadīpena paṇṇāso paṭhamo tena vuccatīti.
-------------
Khandhasaṃyuttassa majjhimapaṇṇāsake upāyavaggo paṭhamo
[105] Sāvatthiyaṃ . tatra kho .pe. Etadavoca upāyo bhikkhave
avimutto anupāyo vimutto . rūpūpāyaṃ vā bhikkhave viññāṇaṃ
tiṭṭhamānaṃ tiṭṭheyya rūpārammaṇaṃ rūpappatiṭṭhaṃ nandūpasevanaṃ
vuḍḍhiṃ virūḷhiṃ vepullaṃ āpajjeyya .pe. saṅkhārūpāyaṃ vā bhikkhave
viññāṇaṃ tiṭṭhamānaṃ tiṭṭheyya saṅkhārārammaṇaṃ saṅkhārappatiṭṭhaṃ
nandūpasevanaṃ vuḍḍhiṃ virūḷhiṃ vepullaṃ āpajjeyya.
{105.1} Yo bhikkhave evaṃ vadeyya ahaṃ aññatra rūpā aññatra
vedanāya aññatra saññāya aññatra saṅkhārehi viññāṇassa
āgatiṃ vā gatiṃ vā cutiṃ vā upapattiṃ vā vuḍḍhiṃ vā virūḷhiṃ vā vepullaṃ
vā paññapessāmīti netaṃ ṭhānaṃ vijjati . rūpadhātuyā ce bhikkhave
bhikkhuno . vedanādhātuyā ce bhikkhave bhikkhuno . saññādhātuyā
ce bhikkhave bhikkhuno . saṅkhāradhātuyā ce bhikkhave bhikkhuno .
Viññāṇadhātuyā ce bhikkhave bhikkhuno rāgo pahīno hoti rāgassa
pahānā vocchijjatārammaṇaṃ patiṭṭhā viññāṇassa na hoti
tadappatiṭṭhitaṃ viññāṇaṃ avirūḷhaṃ anabhisaṅkhacca vimuttaṃ vimuttattā
ṭhitaṃ ṭhitattā santusitaṃ santusitattā na paritassati aparitassaṃ
paccattaññeva parinibbāyati . khīṇā jāti vusitaṃ brahmacariyaṃ
kataṃ karaṇīyaṃ nāparaṃ itthattāyāti pajānātīti.
[106] Sāvatthiyaṃ . tatra kho . Pañcimāni bhikkhave bījajātāni.
Katamāni pañca . mūlabījaṃ khandhabījaṃ phalabījaṃ aggabījaṃ bījabījaññeva
pañcamaṃ . imāni cassu bhikkhave pañca bījajātāni akkhaṇḍāni
apūtikāni avātātapappahatāni 1- sārādāni sukhasayitāni paṭhavī ca
nāssa āpo ca nāssa . api numāni bhikkhave pañca bījajātāni
vuḍḍhiṃ virūḷhiṃ vepullaṃ āpajjeyyunti . no hetaṃ bhante . imāni
cassu bhikkhave pañca bījajātāni akkhaṇḍāni 2- .pe. sukhasayitāni
paṭhavī ca assa āpo ca assa . api numāni bhikkhave pañca
bījajātāni vuḍḍhiṃ virūḷhiṃ vepullaṃ āpajjeyyunti. Evaṃ bhante.
[107] Seyyathāpi bhikkhave paṭhavīdhātu evaṃ catasso viññāṇaṭṭhitiyo
daṭṭhabbā . seyyathāpi bhikkhave āpodhātu evaṃ nandirāgo
daṭṭhabbo . seyyathāpi bhikkhave pañca bījajātāni evaṃ viññāṇaṃ
sāhāraṃ daṭṭhabbaṃ . rūpūpāyaṃ 3- vā 4- bhikkhave viññāṇaṃ
tiṭṭhamānaṃ tiṭṭheyya rūpārammaṇaṃ rūpappatiṭṭhaṃ nandūpasevanaṃ vuḍḍhiṃ
virūḷhiṃ vepullaṃ āpajjeyya . vedanūpāyaṃ vā bhikkhave viññāṇaṃ
tiṭṭhamānaṃ tiṭṭheyya .pe. nandūpasevanaṃ vuḍḍhiṃ virūḷhiṃ vepullaṃ
āpajjeyya . saññūpāyaṃ vā .pe. saṅkhārūpāyaṃ vā bhikkhave
viññāṇaṃ tiṭṭhamānaṃ tiṭṭheyya saṅkhārārammaṇaṃ saṅkhārappatiṭṭhaṃ
nandūpasevanaṃ vuḍḍhiṃ virūḷhiṃ vepullaṃ āpajjeyya . yo bhikkhave
evaṃ vadeyya ahaṃ aññatra rūpā aññatra vedanāya aññatra
@Footnote: 1 Yu. avātātapahatāni . 2 Yu. khaṇḍāni . 3 Ma. rupupayaṃ . 4 Ma. vāsaddo
@natthi.
Saññāya aññatra saṅkhārehi viññāṇassa āgatiṃ vā gatiṃ vā
cutiṃ vā upapattiṃ vā vuḍḍhiṃ vā virūḷhiṃ vā vepullaṃ vā
paññapessāmīti netaṃ ṭhānaṃ vijjati.
{107.1} Rūpadhātuyā ce bhikkhave bhikkhuno rāgo pahīno hoti
rāgassa pahānā vocchijjatārammaṇaṃ patiṭṭhā viññāṇassa na hoti .
Vedanādhātuyā ce . saññādhātuyā ce . saṅkhāradhātuyā ce .
Viññāṇadhātuyā ce bhikkhave bhikkhuno rāgo pahīno hoti rāgassa
pahānā vocchijjatārammaṇaṃ patiṭṭhā viññāṇassa na hoti .
Tadappatiṭṭhitaṃ viññāṇaṃ avirūḷhaṃ anabhisaṅkhacca 1- vimuttaṃ
vimuttattā ṭhitaṃ ṭhitattā santusitaṃ santusitattā na paritassati
aparitassaṃ paccattaññeva parinibbāyati . khīṇā jāti .pe.
Nāparaṃ itthattāyāti pajānātīti.
[108] Sāvatthī . tatra kho . bhagavā udānaṃ udānesi no
cassaṃ 2- no ca me siyā na bhavissati 3- na me bhavissatīti evaṃ
vimuccamāno 4- bhikkhu chindeyya orambhāgiyāni saññojanānīti.
[109] Evaṃ vutte aññataro bhikkhu bhagavantaṃ etadavoca
yathākathaṃ pana bhante no cassaṃ no ca me siyā na bhavissati na me
bhavissatīti evaṃ vimuccamāno 5- bhikkhu chindeyya orambhāgiyāni
saññojanānīti . idha bhikkhu assutavā puthujjano ariyānaṃ adassāvī
.pe. sappurisadhamme avinīto rūpaṃ attato samanupassati rūpavantaṃ
@Footnote: 1 Yu. anabhisaṅkhārañca . 2 Yu. cassa . 3 Ma. nābhavissa . 4 Ma. adhimuccamāno.
@5 Yu. adhimuccamāno.
Vā attānaṃ attani vā rūpaṃ rūpasmiṃ vā attānaṃ . vedanaṃ .
Saññaṃ . saṅkhāre . viññāṇaṃ attato samanupassati viññāṇavantaṃ
vā attānaṃ attani vā viññāṇaṃ viññāṇasmiṃ vā attānaṃ.
{109.1} So aniccaṃ rūpaṃ aniccaṃ rūpanti yathābhūtaṃ nappajānāti
aniccaṃ vedanaṃ aniccā vedanāti yathābhūtaṃ nappajānāti aniccaṃ saññaṃ
aniccā saññāti yathābhūtaṃ nappajānāti anicce saṅkhāre aniccā
saṅkhārāti yathābhūtaṃ nappajānāti aniccaṃ viññāṇaṃ aniccaṃ viññāṇanti
yathābhūtaṃ nappajānāti.
{109.2} Dukkhaṃ rūpaṃ dukkhaṃ rūpanti yathābhūtaṃ nappajānāti
dukkhaṃ vedanaṃ . dukkhaṃ saññaṃ . dukkhe saṅkhāre . dukkhaṃ viññāṇaṃ
dukkhaṃ viññāṇanti yathābhūtaṃ nappajānāti.
{109.3} Anattaṃ rūpaṃ anattaṃ rūpanti yathābhūtaṃ nappajānāti
anattaṃ vedanaṃ . anattaṃ saññaṃ . anatte saṅkhāre . anattaṃ
viññāṇaṃ anattaṃ viññāṇanti yathābhūtaṃ nappajānāti.
{109.4} Saṅkhataṃ rūpaṃ saṅkhataṃ rūpanti yathābhūtaṃ nappajānāti saṅkhataṃ
vedanaṃ . saṅkhataṃ saññaṃ . saṅkhate saṅkhāre . Saṅkhataṃ viññāṇaṃ saṅkhataṃ
viññāṇanti yathābhūtaṃ nappajānāti . rūpaṃpi 1- bhavissatīti yathābhūtaṃ
nappajānāti vedanāpi bhavissati . saññāpi bhavissati . saṅkhārāpi
bhavissanti. Viññāṇampi bhavissatīti yathābhūtaṃ nappajānāti.
[110] Sutavā ca kho bhikkhu 2- ariyasāvako ariyānaṃ dassāvī
ariyadhammassa kovido ariyadhamme suvinīto sappurisānaṃ dassāvī
@Footnote: 1 Ma. Yu. rūpaṃ vibhavissatīti . 2 Yu. bhikkhave.
Sappurisadhammassa kovido sappurisadhamme suvinīto na rūpaṃ attato
samanupassati .pe. na vedanaṃ . na saññaṃ . na saṅkhāre . na
viññāṇaṃ attato samanupassati . so aniccaṃ rūpaṃ aniccaṃ
rūpanti yathābhūtaṃ pajānāti aniccaṃ vedanaṃ . aniccaṃ saññaṃ .
Anicce saṅkhāre . aniccaṃ viññāṇaṃ aniccaṃ viññāṇanti
yathābhūtaṃ pajānāti . dukkhaṃ rūpaṃ .pe. dukkhaṃ viññāṇaṃ . anattaṃ
rūpaṃ .pe. anattaṃ viññāṇaṃ . saṅkhataṃ rūpaṃ .pe. saṅkhataṃ
viññāṇaṃ saṅkhataṃ viññāṇanti yathābhūtaṃ pajānāti . rūpaṃpi
bhavissatīti yathābhūtaṃ pajānāti vedanā . saññā . saṅkhārā .
Viññāṇampi bhavissatīti yathābhūtaṃ pajānāti . so rūpassa vibhavā
vedanāya vibhavā saññāya vibhavā saṅkhārānaṃ vibhavā viññāṇassa
vibhavā . evaṃ kho bhikkhu no cassaṃ no ca me siyā na bhavissati na me
bhavissatīti evaṃ vimuccamāno bhikkhu chindeyya orambhāgiyāni
saññojanānīti.
[111] Evaṃ vimuccamāno bhante bhikkhu chindeyya orambhāgiyāni
saññojanāni . kathaṃ pana bhante jānato kathaṃ passato anantarā
āsavānaṃ khayo hotīti . idha bhikkhu assutavā puthujjano .pe. 1-
atasitāye ṭhāne tāsaṃ āpajjati . tāso heso bhikkhu assutavato
puthujjanassa no cassaṃ no ca me siyā na bhavissati na me
bhavissatīti . sutavā ca kho bhikkhu ariyasāvako .pe. atasitāye
@Footnote: 1 Po. Ma. Yu. peyyālo natthi.
Ṭhāne na tāsaṃ āpajjati . Na heso bhikkhu tāso sutavato ariyasāvakassa
no cassaṃ no ca me siyā na bhavissati na me bhavissatīti. Rūpūpāyaṃ vā
bhikkhu viññāṇaṃ tiṭṭhamānaṃ tiṭṭheyya rūpārammaṇaṃ rūpappatiṭṭhaṃ
nandūpasevanaṃ vuḍḍhiṃ virūḷhiṃ vepullaṃ āpajjeyya . vedanūpāyaṃ vā
bhikkhu . saññūpāyaṃ vā bhikkhu . saṅkhārūpāyaṃ vā bhikkhu viññāṇaṃ
tiṭṭhamānaṃ tiṭṭheyya saṅkhārārammaṇaṃ saṅkhārappatiṭṭhaṃ nandūpasevanaṃ
vuḍḍhiṃ virūḷhiṃ vepullaṃ āpajjeyya . so 1- bhikkhu evaṃ vadeyya
ahamaññatra rūpā aññatra vedanāya aññatra saññāya aññatra
saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuḍḍhiṃ
vā virūḷhiṃ vā vepullaṃ vā paññapessāmīti netaṃ ṭhānaṃ vijjati.
{111.1} Rūpadhātuyā ce bhikkhu bhikkhuno rāgo pahīno hoti rāgassa
pahānā vocchijjatārammaṇaṃ patiṭṭhā viññāṇassa na hoti .
Vedanādhātuyā ce bhikkhu bhikkhuno . saññādhātuyā ce bhikkhu bhikkhuno.
Saṅkhāradhātuyā ce bhikkhu bhikkhuno . viññāṇadhātuyā ce bhikkhu
bhikkhuno rāgo pahīno hoti rāgassa pahānā vocchijjatārammaṇaṃ
patiṭṭhā viññāṇassa na hoti . tadappatiṭṭhitaṃ viññāṇaṃ avirūḷhaṃ
anabhisaṅkhacca vimuttaṃ vimuttattā ṭhitaṃ ṭhitattā santusitaṃ santusitattā
na paritassati aparitassaṃ paccattaññeva parinibbāyati . khīṇā jāti
.pe. nāparaṃ itthattāyāti pajānāti . evaṃ kho bhikkhu jānato
evaṃ passato anantarā āsavānaṃ khayo hotīti.
@Footnote: 1 Po. Ma. yo.
[112] Sāvatthī . tatra kho. Pañcime bhikkhave upādānakkhandhā.
Katame pañca . seyyathīdaṃ . rūpūpādānakkhandho vedanūpādānakkhandho
saññūpādānakkhandho saṅkhārūpādānakkhandho viññāṇūpādānakkhandho .
Yāvakīvañcāhaṃ bhikkhave ime pañcupādānakkhandhe catuparivaṭṭaṃ yathābhūtaṃ
na abbhaññāsiṃ neva tāvāhaṃ bhikkhave sadevake loke samārake sabrahmake
sassamaṇabrāhmaṇiyā pajāya sadevamanussāya anuttaraṃ sammāsambodhiṃ
abhisambuddho 1- paccaññāsiṃ . yato ca khvāhaṃ bhikkhave ime
pañcupādānakkhandhe catuparivaṭṭaṃ yathābhūtaṃ abbhaññāsiṃ athāhaṃ
bhikkhave sadevake .pe. sadevamanussāya anuttaraṃ sammāsambodhiṃ
abhisambuddho paccaññāsiṃ.
{112.1} Kathaṃ 2- catuparivaṭṭaṃ . rūpaṃ abbhaññāsiṃ rūpasamudayaṃ
abbhaññāsiṃ rūpanirodhaṃ abbhaññāsiṃ rūpanirodhagāminīpaṭipadaṃ
abbhaññāsiṃ vedanaṃ abbhaññāsiṃ . saññaṃ . saṅkhāre . viññāṇaṃ
abbhaññāsiṃ viññāṇasamudayaṃ abbhaññāsiṃ viññāṇanirodhaṃ
abbhaññāsiṃ viññāṇanirodhagāminīpaṭipadaṃ abbhaññāsiṃ.
[113] Katamañca bhikkhave rūpaṃ . cattāro ca mahābhūtā catunnañca
mahābhūtānaṃ upādāyarūpaṃ . idaṃ vuccati bhikkhave rūpaṃ . Āhārasamudayā
rūpasamudayo āhāranirodhā rūpanirodho ayameva ariyo aṭṭhaṅgiko
maggo rūpanirodhagāminīpaṭipadā . seyyathīdaṃ . sammādiṭṭhi
.pe. sammāsamādhi . ye hi keci bhikkhave samaṇā vā
@Footnote: 1 Ma. Yu. abhisambuddhoti . 2 Ma. kathañca.
Brāhmaṇā vā evaṃ rūpaṃ abhiññāya evaṃ rūpasamudayaṃ abhiññāya
evaṃ rūpanirodhaṃ abhiññāya evaṃ rūpanirodhagāminīpaṭipadaṃ abhiññāya
rūpassa nibbidāya virāgāya nirodhāya paṭipannā te supaṭipannā
ye supaṭipannā te imasmiṃ dhammavinaye gādhanti . ye ca kho
keci bhikkhave samaṇā vā brāhmaṇā vā evaṃ rūpaṃ abhiññāya
evaṃ rūpasamudayaṃ abhiññāya evaṃ rūpanirodhaṃ abhiññāya evaṃ
rūpanirodhagāminīpaṭipadaṃ abhiññāya rūpassa nibbidā virāgā nirodhā
anupādā vimuttā te suvimuttā ye suvimuttā te kebalino 1-
ye kebalino vaṭṭaṃ tesaṃ natthi paññāpanāya.
[114] Katamā ca bhikkhave vedanā. Cha yime bhikkhave vedanākāyā
cakkhusamphassajā vedanā sotasamphassajā vedanā ghānasamphassajā
vedanā jivhāsamphassajā vedanā kāyasamphassajā vedanā
manosamphassajā vedanā . ayaṃ vuccati bhikkhave vedanā. Phassasamudayā
vedanāsamudayo phassanirodhā vedanānirodho ayameva ariyo aṭṭhaṅgiko
maggo vedanānirodhagāminīpaṭipadā . seyyathīdaṃ . sammādiṭṭhi .pe.
Sammāsamādhi . ye hi keci bhikkhave samaṇā vā brāhmaṇā
vā evaṃ vedanaṃ abhiññāya evaṃ vedanāsamudayaṃ abhiññāya evaṃ
vedanānirodhaṃ abhiññāya evaṃ vedanānirodhagāminīpaṭipadaṃ abhiññāya
vedanāya nibbidāya virāgāya nirodhāya paṭipannā te supaṭipannā
ye supaṭipannā te imasmiṃ dhammavinaye gādhanti . ye ca kho
@Footnote: 1 Po. Ma. Yu. kevalino.
Keci bhikkhave samaṇā vā brāhmaṇā vā evaṃ vedanaṃ abhiññāya
evaṃ vedanāsamudayaṃ abhiññāya evaṃ vedanānirodhaṃ abhiññāya evaṃ
vedanānirodhagāminīpaṭipadaṃ abhiññāya .pe. vaṭṭaṃ tesaṃ natthi
paññāpanāya.
[115] Katamā ca bhikkhave saññā . Cha yime bhikkhave saññākāyā
rūpasaññā saddasaññā gandhasaññā rasasaññā phoṭṭhabbasaññā
dhammasaññā . ayaṃ vuccati bhikkhave saññā . phassasamudayā
saññāsamudayo phassanirodhā saññānirodho ayameva ariyo aṭṭhaṅgiko
maggo saññānirodhagāminīpaṭipadā . seyyathīdaṃ . sammādiṭṭhi
.pe. sammāsamādhi . ye hi keci bhikkhave samaṇā vā brāhmaṇā
vā evaṃ saññaṃ abhiññāya .pe. Vaṭṭaṃ tesaṃ natthi paññāpanāya.
[116] Katame ca bhikkhave saṅkhārā. Cha yime bhikkhave cetanākāyā
rūpasañcetanā saddasañcetanā gandhasañcetanā rasasañcetanā
phoṭṭhabbasañcetanā dhammasañcetanā . ime vuccanti bhikkhave
saṅkhārā . phassasamudayā saṅkhārasamudayo phassanirodhā saṅkhāranirodho
ayameva ariyo aṭṭhaṅgiko maggo saṅkhāranirodhagāminīpaṭipadā .
Seyyathīdaṃ. Sammādiṭṭhi .pe. Sammāsamādhi.
{116.1} Ye hi keci bhikkhave samaṇā vā brāhmaṇā vā evaṃ saṅkhāre
abhiññāya evaṃ saṅkhārasamudayaṃ abhiññāya evaṃ saṅkhāranirodhaṃ abhiññāya evaṃ
Saṅkhāranirodhagāminīpaṭipadaṃ abhiññāya saṅkhārānaṃ nibbidāya virāgāya
nirodhāya paṭipannā te supaṭipannā ye supaṭipannā te imasmiṃ
dhammavinaye gādhanti.
{116.2} Ye ca kho keci bhikkhave samaṇā vā brāhmaṇā vā evaṃ
saṅkhāre abhiññāya evaṃ saṅkhārasamudayaṃ abhiññāya evaṃ saṅkhāranirodhaṃ
abhiññāya evaṃ saṅkhāranirodhagāminīpaṭipadaṃ abhiññāya saṅkhārānaṃ
nibbidā virāgā nirodhā anupādā vimuttā te suvimuttā ye suvimuttā
te kebalino ye kebalino vaṭṭaṃ tesaṃ natthi paññāpanāya.
[117] Katamañca bhikkhave viññāṇaṃ . Cha yime bhikkhave viññāṇakāyā
cakkhuviññāṇaṃ sotaviññāṇaṃ ghānaviññāṇaṃ jivhāviññāṇaṃ
kāyaviññāṇaṃ manoviññāṇaṃ . idaṃ vuccati bhikkhave viññāṇaṃ .
Nāmarūpasamudayā viññāṇasamudayo nāmarūpanirodhā viññāṇanirodho
ayameva ariyo aṭṭhaṅgiko maggo viññāṇanirodhagāminīpaṭipadā .
Seyyathīdaṃ. Sammādiṭṭhi .pe. Sammāsamādhi.
{117.1} Ye hi keci bhikkhave samaṇā vā brāhmaṇā vā evaṃ
viññāṇaṃ abhiññāya evaṃ viññāṇasamudayaṃ abhiññāya evaṃ
viññāṇanirodhaṃ abhiññāya evaṃ viññāṇanirodhagāminīpaṭipadaṃ
abhiññāya viññāṇassa nibbidāya virāgāya nirodhāya paṭipannā
te supaṭipannā ye supaṭipannā te imasmiṃ dhammavinaye gādhanti.
{117.2} Ye ca kho keci bhikkhave samaṇā vā brāhmaṇā
vā evaṃ viññāṇaṃ abhiññāya evaṃ viññāṇasamudayaṃ
Abhiññāya evaṃ viññāṇanirodhaṃ abhiññāya evaṃ viññāṇa-
nirodhagāminīpaṭipadaṃ abhiññāya viññāṇassa nibbidā virāgā
nirodhā anupādā vimuttā te suvimuttā ye suvimuttā te
kebalino ye kebalino vaṭṭaṃ tesaṃ natthi paññāpanāyāti.
[118] Evamme sutaṃ ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . tatra kho bhagavā bhikkhū
āmantesi bhikkhavoti . bhadanteti te bhikkhū bhagavato paccassosuṃ .
Bhagavā etadavoca sattaṭṭhānakusalo bhikkhave bhikkhu tividhūpaparikkhī
imasmiṃ dhammavinaye kebalī vusitavā uttamapurisoti vuccati . kathañca
bhikkhave bhikkhu sattaṭṭhānakusalo hoti . idha bhikkhave bhikkhu rūpaṃ
pajānāti rūpasamudayaṃ pajānāti rūpanirodhaṃ pajānāti rūpanirodha-
gāminīpaṭipadaṃ pajānāti . rūpassa assādaṃ pajānāti rūpassa ādīnavaṃ
pajānāti rūpassa nissaraṇaṃ pajānāti . vedanaṃ pajānāti . saññaṃ .
Saṅkhāre . viññāṇaṃ pajānāti viññāṇasamudayaṃ pajānāti
viññāṇanirodhaṃ pajānāti viññāṇanirodhagāminīpaṭipadaṃ pajānāti .
Viññāṇassa assādaṃ pajānāti viññāṇassa ādīnavaṃ pajānāti
viññāṇassa nissaraṇaṃ pajānāti.
The Pali Tipitaka in Roman Character Volume 17 page 63-76.
https://84000.org/tipitaka/read/roman_item.php?book=17&item=103&items=16
Classified by [Item Number] :-
http://84000.org/tipitaka/read/roman_item.php?book=17&item=103&items=16&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=17&item=103&items=16
Compare with The Royal Version of Thai Tipitaka :-
https://84000.org/tipitaka/read/byitem.php?book=17&item=103&items=16
Study Atthakatha :-
https://84000.org/tipitaka/attha/attha.php?b=17&i=103
Contents of The Tipitaka Volume 17
https://84000.org/tipitaka/read/?index_17
https://84000.org/tipitaka/english/?index_17
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
