บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 16 : PALI ROMAN Aṅ.A. (manoratha.3) Page 246.
Anacchariyaṃ kho pana maṃ bhanteti bhante yaṃ maṃ devatā upasaṅkamitvā evaṃ ārocenti, idaṃ na acchariyaṃ. Yaṃ panāhaṃ tatonidānaṃ cittassa uṇṇatiṃ nābhijānāmi, etaṃ 1- acchariyanti vadati. Sādhu sādhu bhikkhūti ettha kiñcāpi bhikkhuṃ āmanteti, upāsakasseva pana veyyākaraṇasampahaṃsane esa sādhukāroti veditabbo. 2. Dutiyauggasuttavaṇṇanā [22] Dutiye nāgavaneti tassa kira seṭṭhino nāgavanaṃ nāma uyyānaṃ, so tattha purebhattaṃ gandhamālādīni gāhāpetvā uyyānakīḷaṃ 2- kīḷitukāmo gantvā parivāriyamāno 3- bhagavantaṃ addasa. Saha dassanenevassa purimanayeneva cittaṃ pasīdi, surāpānena ca uppannamado taṃkhaṇaṃyeva pahiyyi. 4- Taṃ sandhāyevamāha. Oṇojesinti udakaṃ hatthe pātetvā adāsiṃ. Asokoti amuko. Samacittova demīti "imassa thokaṃ dammi, 5- imassa bahukan"ti evaṃ cittanānattaṃ na karomi, deyyadhammampana ekasadisaṃ karomīti dasseti. Ārocentīti ākāse ṭhatvā ārocenti. Natthi taṃ saṃyojananti iminā upāsako attano anāgāmiphalaṃ byākaroti. 3. Paṭhamahatthakasuttavaṇṇanā [23] Tatiye hatthako āḷavakoti bhagavatā āḷavakayakkhassa hatthato hatthehi sampaṭicchitattā hatthakoti laddhanāmo rājakumāro. Sīlavāti pañcasīladasasīlena sīlavā. Cāgavāti cāgasampanno. Kaccittha bhanteti bhante kacci ettha bhagavato byākaraṇaṭṭhāne. Appicchoti adhipagamappicchatāya appiccho. 4. Dutiyahatthakasuttavaṇṇanā [24] Catutthe pañcamattehi upāsakasatehīti sotāpannasakadāgāmi- anāgāmīnaṃyeva 6- ariyasāvakaupāsakānaṃ pañcahi satehi parivuto bhuttapātarāso @Footnote: 1 cha.Ma. taṃ eva 2 cha.Ma. uyyānakīḷikaṃ 3 cha.Ma. paricāriyamāno @4 cha.Ma. pahīyi 5 cha.Ma. ayaṃ pāṭho na dissati 6 cha.Ma. sotāpannasakadāgāmīnaṃyevaThe Pali Atthakatha in Roman Character Volume 16 Page 246. http://84000.org/tipitaka/read/attha_page.php?book=16&page=246&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=16&A=5510&pagebreak=1 http://84000.org/tipitaka/atthapali/rm_line.php?B=16&A=5510&pagebreak=1#p246
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]