TIPITAKA Volume 33 : PALI ROMAN
Sutta Pitaka Vol 25 : Sutta. Khu. Apa(2) Buddhavaṃso Cariyāpiṭakaṃ

               Chaṭṭhaṃ kāḷudāyittherāpadānaṃ (546)
     [136] |136.165| Padumuttaro nāma jino  sabbadhammesu cakkhumā
                          ito satasahassamhi          kappe uppajji nāyako.
---------------------------------------------------------------------------------------------
page237.
      |136.166| Nāyakānaṃ varo satthā       guṇāguṇavidū jino
                          kataññūkatavedī ca           titthe yojeti pāṇino.
      |136.167| Sabbaññū tena ñāṇena   tulayitvā dayāsayo
                          deseti pavaraṃ dhammaṃ           anantaguṇasañcayo.
      |136.168| Sa kadāci mahāvīro           anantajanataṃ sudhī
                          deseti madhuraṃ dhammaṃ           catusaccūpasañhitaṃ.
      |136.169| Sutvāna taṃ dhammavaraṃ           ādimajjhantasobhanaṃ
                          pāṇasatasahassānaṃ          dhammābhisamayo ahu.
      |136.170| Ninnāditā tadā bhūmi       gajjiṃsu ca payodharā
                          sādhukāraṃ pavattiṃsu           devabrahmanarāsurā.
      |136.171| Aho kāruṇiko satthā      aho saddhammadesanā
                          aho bhavasamuddasmiṃ          nimugge uddhari jino.
      |136.172| Evaṃ 1- saṃvegajātesu        sanarāmarabrahmesu
                          kulappasādakānaggaṃ        sāvakaṃ vaṇṇayi jino.
      |136.173| Tadāhaṃ haṃsavatiyā             jātomaccakule ahu
                          pāsādiko dassanīyo      pahūtadhanadhaññavā.
      |136.174| Haṃsārāmamupeccāhaṃ         vanditvā taṃ tathāgataṃ
                          suṇitvā madhuraṃ dhammaṃ        kāraṃ katvā ca tādino.
      |136.175| Nipacca pādamūlehaṃ           imaṃ vacanamabraviṃ
                          kulappasādakānaggo       yo tava sāsane mune 2-.
@Footnote: 1 Ma. pavedajātesu. 2 Ma. Yu. yo tayā santhuto mune.
---------------------------------------------------------------------------------------------
page238.
      |136.176| Tādisohaṃ mahāvīra 1-       buddhaseṭṭhassa sāsane
                          tadā mahākāruṇiko        siñcantovāmatena maṃ.
      |136.177| Āha maṃ putta uttiṭṭha      lacchasetaṃ manorathaṃ
                          kathaṃ nāma jine kāraṃ          katvāna viphalo siyā.
      |136.178| Satasahasse ito kappe     okkākakulasambhavo
                          gotamo nāma nāmena       satthā loke bhavissati.
      |136.179| Tassa dhammesu dāyādo     oraso dhammanimmito
                          udāyī nāma nāmena        hessati satthusāvako.
      |136.180| Taṃ sutvā mudito hutvā      yāvajīvaṃ tadā jinaṃ
                          mettacitto paricariṃ           paccayehi vināyakaṃ.
      |136.181| Tena kammavipākena          cetanāpaṇidhīhi ca
                          jahitvā mānusaṃ dehaṃ        tāvatiṃsaṃ agañchahaṃ.
      |136.182| Pacchime ca bhave dāni         ramme kāpilavatthave
                          jāto mahāmaccakule        suddhodano mahīpati 2-.
      |136.183| Tadā ajāyi siddhattho       ramme lumbinikānane
                          hitāya sabbalokassa        sukhāya ca narāsabho.
      |136.184| Tadaheva ahaṃ jāto            saha teneva vaḍḍhito
                          piyo sahāyo dayiko         vissaṭṭho 3- nītikovido.
      |136.185| Ekūnatiṃso vayasā             nikkhanto pabbajittha so 4-
                         chavassāni 5- vināmetvā  āsi buddho vināyako.
@Footnote: 1 Ma. Yu. tādisohomahaṃ vīra. 2 Ma. Yu. suddhodanamahīpate. 3 Ma. viyatto.
@4 Ma. nikkhamitvā agārato. 5 Ma. chabbassaṃ vītināmetvā.
---------------------------------------------------------------------------------------------
page239.
      |136.186| Jetvā sasenakaṃ māraṃ         khepayitvāna āsave
                          bhavaṇṇavaṃ taritvāna         buddho āsi sadevake.
      |136.187| Isivhayaṃ patanaṃ gantvā 1- vinetvā pañcavaggiye
                          tato vinesi bhagavā           gantvā gantvā tahiṃ tahiṃ.
      |136.188| Veneyye vinayanto so      saṅgaṇhanto sadevakaṃ
                          upecca magadhe giriṃ           viharittha tadā jino.
      |136.189| Tadā suddhodanenāhaṃ       bhūmipālena pesito
                          gantvā disvā dasabalaṃ    pabbajitvārahā ahuṃ.
      |136.190| Tadā mahesiṃ yācitvā       pāpayiṃ kapilavhayaṃ
                          tato purāhaṃ gantvāna      pasādesiṃ mahākulaṃ.
      |136.191| Jino tasmiṃ guṇe tuṭṭho      mamāha purisāsabho 2-
                          kulappasādakānaggaṃ        paññāpesi vināyako.
      |136.192| Kilesā jhāpitā mayhaṃ      bhavā sabbe samūhatā
                          nāgova bandhanaṃ chetvā     viharāmi anāsavo.
      |136.193| Svāgataṃ vata me āsi         mama buddhassa santike
                          tisso vijjā anuppattā  kataṃ buddhassa sāsanaṃ.
      |136.194| Paṭisambhidā catasso         vimokkhāpica aṭṭhime
                          chaḷabhiññā sacchikatā      kataṃ buddhassa sāsananti.
    Itthaṃ sudaṃ āyasmā kāḷudāyī thero imā gāthāyo abhāsitthāti.
                                  Kāḷudāyittherassa apadānaṃ samattaṃ.
@Footnote: 1 Ma. Yu. isivhayaṃ gamitvāna. 2 Ma. maṃ. mahāparisāya so.


             The Pali Tipitaka in Roman Character Volume 33 page 236-239.
https://84000.org/tipitaka/read/roman_read.php?B=33&A=4743&pagebreak=1
             Compare with The Pali Tipitaka in Thai Character :-
https://84000.org/tipitaka/read/pali_read.php?B=33&A=4743&pagebreak=1
             Compare with The Royal Version of Thai Tipitaka :-
https://84000.org/tipitaka/read/byitem.php?book=33.1&item=136&items=1
             Compare with The MCU Version of Thai Tipitaka :-
https://84000.org/tipitaka/pitaka_item/m_siri.php?B=33&siri=136
             Study Atthakatha :-
https://84000.org/tipitaka/attha/attha.php?b=33&i=136
             The Pali Atthakatha in Thai :-
https://84000.org/tipitaka/atthapali/read_th.php?B=50&A=6792
             The Pali Atthakatha in Roman :-
https://84000.org/tipitaka/atthapali/read_rm.php?B=50&A=6792
             Contents of The Tipitaka Volume 33
https://84000.org/tipitaka/read/?index_33
https://84000.org/tipitaka/english/?index_33