บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
| |
Dasamaṃ sumaṅgalattherāpadānaṃ (20) [22] |22.123| Āhutiṃ yiṭṭhukāmohaṃ paṭiyādetvāna bhojanaṃ brāhmaṇe paṭimānento visāle māḷake ṭhito. |22.124| Athaddasāsiṃ sambuddhaṃ piyadassiṃ mahāyasaṃ sabbalokaṃ vinetāraṃ sayambhuṃ aggapuggalaṃ. |22.125| Bhagavantaṃ jutimantaṃ sāvakehi purakkhataṃ ādiccamiva rocantaṃ rathiyaṃ paṭipannakaṃ. |22.126| Añjaliṃ paggahetvāna sakaṃ cittaṃ pasādayiṃ manasāva nimantesiṃ āgacchatu mahāmuni. |22.127| Mama saṅkappamaññāya satthā loke anuttaro khīṇāsavasahassehi mama dvāraṃ upāgami. |22.128| Namo te purisājañña namo te purisuttama pāsādaṃ abhirūhitvā sīhāsane nisīdatu 1-. @Footnote: 1 Ma. nisidataṃ. Yu. nisida tvaṃ. |22.129| Danto dantaparivāro tiṇṇo tārayataṃ varo pāsādaṃ abhirūhitvā nisīdi pavarāsane. |22.130| Yaṃ me atthi sake gehe āmisaṃ paccupaṭṭhitaṃ tāhaṃ buddhassa pādāsiṃ pasanno sehi pāṇibhi. |22.131| Pasannacitto sumano vedajāto katañjalī buddhaseṭṭhaṃ namassāmi aho buddhassuḷāratā. |22.132| Aṭṭhannaṃ payirupāsataṃ bhuñjaṃ khīṇāsavā bahū tuyheveso ānubhāvo saraṇantaṃ upemahaṃ. |22.133| Piyadassī ca bhagavā lokajeṭṭho narāsabho bhikkhusaṅghe nisīditvā imā gāthā abhāsatha. |22.134| Yo so saṅghaṃ abhojesi ujubhūtaṃ samāhitaṃ tathāgatañca sambuddhaṃ suṇātha mama bhāsato. |22.135| Sattavīsatikkhattuṃ so devarajjaṃ karissati sakakammābhiraddho so devaloke ramissati. |22.136| Dasa ca aṭṭhakkhattuṃ so cakkavatti bhavissati paṭhabyā rajjaṃ pañcasataṃ vasudhaṃ āvasissati. |22.137| Araññaṃ vanamoggayha kānanaṃ byagghasevitaṃ padhānaṃ padahitvāna kilesā jhāpitā mayā. |22.138| Aṭṭhārase kappasate yaṃ dānamadadiṃ tadā duggatiṃ nābhajānāmi bhattadānassidaṃ phalaṃ. |22.139| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā sumaṅgalo thero imā gāthāyo abhāsitthāti. Sumaṅgalattherassa apadānaṃ samattaṃ. Uddānaṃ sīhāsanī ekatthambhī nando ca cullapanthako pilindarāhulo ceva vaṅganto raṭṭhapālako. Sopāko maṅgalo ceva daseva dutiye vagge satañca sattatiṃsā ca gāthā cettha pakāsitā. Sīhāsaniyavaggo dutiyo. -----------The Pali Tipitaka in Roman Character Volume 32 page 92-94. https://84000.org/tipitaka/read/roman_read.php?B=32&A=1914 Compare with The Pali Tipitaka in Thai Character :- https://84000.org/tipitaka/read/pali_read.php?B=32&A=1914 Compare with The Royal Version of Thai Tipitaka :- https://84000.org/tipitaka/read/byitem.php?book=32&item=22&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=32&siri=22 Study Atthakatha :- https://84000.org/tipitaka/attha/attha.php?b=32&i=22 The Pali Atthakatha in Thai :- https://84000.org/tipitaka/atthapali/read_th.php?B=50&A=728 The Pali Atthakatha in Roman :- https://84000.org/tipitaka/atthapali/read_rm.php?B=50&A=728 Contents of The Tipitaka Volume 32 https://84000.org/tipitaka/read/?index_32 https://84000.org/tipitaka/english/?index_32
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]