PaliRoman Vol.17

[62] Sāvatthiyaṃ . tatra kho . no cedaṃ bhikkhave rūpassa assādo abhavissa na yidaṃ sattā rūpasmiṃ sārajjeyyuṃ . yasmā ca kho bhikkhave atthi rūpassa assādo tasmā sattā rūpasmiṃ sārajjanti . no cedaṃ bhikkhave rūpassa ādīnavo abhavissa na yidaṃ sattā rūpasmiṃ nibbindeyyuṃ . yasmā ca kho bhikkhave atthi rūpassa ādīnavo tasmā sattā rūpasmiṃ nibbindanti . no cedaṃ bhikkhave rūpassa nissaraṇaṃ abhavissa na yidaṃ sattā rūpasmā nissareyyuṃ . yasmā ca kho bhikkhave atthi rūpassa nissaraṇaṃ tasmā sattā rūpasmā nissaranti . no cedaṃ bhikkhave vedanāya assādo abhavissa .pe. no cedaṃ bhikkhave saññāya . no cedaṃ bhikkhave saṅkhārānaṃ assādo abhavissa na yidaṃ sattā saṅkhāresu sārajjeyyuṃ . yasmā ca kho bhikkhave atthi saṅkhārānaṃ assādo tasmā sattā saṅkhāresu sārajjanti . no cedaṃ bhikkhave saṅkhārānaṃ ādīnavo abhavissa na yidaṃ sattā saṅkhāresu nibbindeyyuṃ . Yasmā ca kho bhikkhave atthi saṅkhārānaṃ ādīnavo tasmā sattā saṅkhāresu nibbindanti . no cedaṃ bhikkhave saṅkhārānaṃ nissaraṇaṃ @Footnote: ¹ Po. Yu. abbhaññāsiṃ.

--------------------------------------------------------------------------------------------- page38.

Abhavissa na yidaṃ sattā saṅkhārehi nissareyyuṃ . yasmā ca kho bhikkhave atthi saṅkhārānaṃ nissaraṇaṃ tasmā sattā saṅkhārehi nissaranti . no cedaṃ bhikkhave viññāṇassa assādo abhavissa na yidaṃ sattā viññāṇasmiṃ sārajjeyyuṃ . yasmā ca kho bhikkhave atthi viññāṇassa assādo tasmā sattā viññāṇasmiṃ sārajjanti . no cedaṃ bhikkhave viññāṇassa ādīnavo abhavissa na yidaṃ sattā viññāṇasmiṃ nibbindeyyuṃ . yasmā ca kho bhikkhave atthi viññāṇassa ādīnavo tasmā sattā viññāṇasmiṃ nibbindanti . No cedaṃ bhikkhave viññāṇassa nissaraṇaṃ abhavissa na yidaṃ sattā viññāṇasmā nissareyyuṃ . yasmā ca kho bhikkhave atthi viññāṇassa nissaraṇaṃ tasmā sattā viññāṇasmā nissaranti. [63] Yāvakīvañca bhikkhave sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ na abbhaññiṃsu ^1- neva tāva bhikkhave sattā sadevake ^2- loke samārake sabrahmake sassamaṇabrāhmaṇiyā pajāya sadevamanussāya nissaṭā visaññuttā vippamuttā vimariyādikatena cetasā vihariṃsu ^3- . yato ca kho bhikkhave sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññiṃsu atha bhikkhave sattā sadevake ^4- loke samārake sabrahmake sassamaṇabrāhmaṇiyā pajāya @Footnote: ¹ Ma. Yu. abbhaññaṃsu . 2-4 Ma. Yu. sadevakā lokā samārakā sabrahmakā .... @³ Po. vicariṃsu.

--------------------------------------------------------------------------------------------- page39.

Sadevamanussāya nissaṭā visaññuttā vippamuttā vimariyādikatena cetasā viharantīti.

The Pali Tipitaka in Roman Character Volume 17 page 37-39. https://84000.org/tipitaka/read/roman_read.php?B=17&A=739&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=17&A=739&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=17&item=62&items=2 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=17&siri=28 Study Atthakatha :- https://84000.org/tipitaka/attha/attha.php?b=17&i=62 Contents of The Tipitaka Volume 17 https://84000.org/tipitaka/read/?index_17 https://84000.org/tipitaka/english/?index_17