PaliRoman Vol.16

[691] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā ca sārīputto āyasmā ca mahāmoggallāno rājagahe viharanti veḷuvane kalandakanivāpe ekavihāre . atha kho āyasmā sārīputto sāyaṇhasamayaṃ paṭisallānā vuṭṭhito yenāyasmā mahāmoggallāno tenupasaṅkami upasaṅkamitvā āyasmatā mahāmoggallānena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi. [692] Ekamantaṃ nisinno kho āyasmā sārīputto āyasmantaṃ mahāmoggallānaṃ etadavoca vippasannāni kho te āvuso moggallāna indriyāni parisuddho mukhavaṇṇo pariyodāto santena nūnāyasmā mahāmoggallāno ajja vihārena vihāsīti . oḷārikena khvāhaṃ āvuso ajja vihārena vihāsiṃ apica me ahosi dhammī kathāti . Kena saddhiṃ panāyasmato mahāmoggallānassa ahosi dhammī kathāti . Bhagavatā kho me āvuso saddhiṃ ahosi dhammī kathāti . dūre kho āvuso bhagavā etarahi sāvatthiyaṃ viharati jetavane anāthapiṇḍikassa ārāme kinnu kho āyasmā mahāmoggallāno bhagavantaṃ iddhiyā upasaṅkami udāhu bhagavā āyasmantaṃ mahāmoggallānaṃ iddhiyā upasaṅkamīti . na khvāhaṃ āvuso bhagavantaṃ iddhiyā upasaṅkamiṃ napi maṃ bhagavā iddhiyā upasaṅkami apica me yāvatā bhagavā ettāvatā dibbacakkhuṃ ^1- visujjhi dibbā ca sotadhātu bhagavatopi yāvatāhaṃ ettāvatā dibbacakkhuṃ ^1- visujjhi dibbā ca sotadhātūti . Yathākathaṃ panāyasmato mahāmoggallānassa bhagavatā saddhiṃ ahosi dhammī kathāti. [693] Idhāhaṃ āvuso bhagavantaṃ etadavocaṃ āraddhaviriyo āraddhaviriyoti bhante vuccati kittāvatā nu kho bhante āraddhaviriyo hotīti . evaṃ vutte maṃ āvuso bhagavāpi ^2- etadavoca idha moggallāna bhikkhu āraddhaviriyo viharati kāmaṃ taco ca nahāru ca aṭṭhi ca avasissatu sarīre avasussatu ^3- maṃsalohitaṃ yantaṃ purisathāmena purisaviriyena purisaparakkamena pattabbaṃ na taṃ apāpuṇitvā viriyassa saṇṭhānaṃ bhavissatīti evaṃ kho moggallāna āraddhaviriyo hotīti . evaṃ ^4- kho me āvuso bhagavatā saddhiṃ ahosi dhammī kathāti. [694] Seyyathāpi āvuso himavato pabbatarājassa parittā @Footnote: ¹ Ma. Yu. dibbacakkhu . ² Ma. Yu. pisaddo natthi . ³ Ma. Yu. upasussatu. @⁴ Yu. evameva. Pāsāṇasakkharā yāvadeva upanikkhepanamattāya evameva kho mayaṃ āyasmato mahāmoggallānassa yāvadeva upanikkhepanamattāya āyasmā hi mahāmoggallāno mahiddhiko mahānubhāvo ākaṅkhamāno kappaṃ tiṭṭheyyāti. [695] Seyyathāpi āvuso mahatiyā loṇaghaṭāya parittā loṇasakkharā ^1- yāvadeva upanikkhepanamattāya evameva kho mayaṃ āyasmato sārīputtassa yāvadeva upanikkhepanamattāya āyasmā hi sārīputto bhagavatā anekapariyāyena thomito vaṇṇito pasattho sārīputto ca ^2- paññāya sīlena upasamena ca yopi pāragato ^3- bhikkhu eva so paramo siyāti ^4-. Itiha ^5- te ubho mahānāgā aññamaññassa subhāsitaṃ sulapitaṃ samanumodiṃsūti. Tatiyaṃ.

The Pali Tipitaka in Roman Character Volume 16 page 320-322. https://84000.org/tipitaka/read/roman_read.php?B=16&A=6432 Compare with The Pali Tipitaka in Thai Character :- https://84000.org/tipitaka/read/pali_read.php?B=16&A=6432 Compare with The Royal Version of Thai Tipitaka :- https://84000.org/tipitaka/read/byitem.php?book=16&item=691&items=5 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=16&siri=231 Study Atthakatha :- https://84000.org/tipitaka/attha/attha.php?b=16&i=691 The Pali Atthakatha in Thai :- https://84000.org/tipitaka/atthapali/read_th.php?B=12&A=5682 The Pali Atthakatha in Roman :- https://84000.org/tipitaka/atthapali/read_rm.php?B=12&A=5682 Contents of The Tipitaka Volume 16 https://84000.org/tipitaka/read/?index_16 https://84000.org/tipitaka/english/?index_16