ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ThaiVersion   McuVersion   PaliThai   PaliRoman 
First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter
TIPITAKA Volume 13 : PALI ROMAN Sutta Pitaka Vol 5 : Sutta. Ma. Ma.

                     Mahāsakuludāyisuttaṃ
     [314]   Evamme   sutaṃ   ekaṃ  samayaṃ  bhagavā  rājagahe  viharati
veḷuvane   kalandakanivāpe   .   tena   kho   pana   samayena  sambahulā
abhiññātā    abhiññātā   paribbājakā   moranivāpe   paribbājakārāme
paṭivasanti   seyyathīdaṃ   annabhāro   1-   varataro   2-   sakuludāyi  ca
paribbājako    aññe   ca   abhiññātā   abhiññātā   paribbājakā  .
Atha   kho   bhagavā   pubbaṇhasamayaṃ  nivāsetvā  pattacīvaramādāya  rājagahaṃ
piṇḍāya  pāvisi  .  atha  kho  bhagavato  etadahosi  atippago  kho  tāva
rājagahe  piṇḍāya  carituṃ  yannūnāhaṃ  yena  moranivāpo  paribbājakārāmo
yena   sakuludāyi   ca   3-   paribbājako   tenupasaṅkameyyanti  .  atha
kho bhagavā yena moranivāpo paribbājakārāmo tenupasaṅkami.
     [315]  Tena  kho  pana  samayena  sakuludāyi  paribbājako  mahatiyā
paribbājakaparisāya      saddhiṃ      nisinno      hoti      unnādiniyā
uccāsaddamahāsaddāya    4-    anekavihitaṃ    tiracchānakathaṃ    kathentiyā
seyyathīdaṃ     rājakathaṃ    corakathaṃ    mahāmattakathaṃ    senākathaṃ    bhayakathaṃ
yuddhakathaṃ     annakathaṃ     pānakathaṃ     vatthakathaṃ     sayanakathaṃ    mālākathaṃ
gandhakathaṃ    ñātikathaṃ   yānakathaṃ   gāmakathaṃ   nigamakathaṃ   nagarakathaṃ   janapadakathaṃ
itthīkathaṃ     sūrakathaṃ    visikhākathaṃ    kumbhaṭṭhānakathaṃ    kumbhadāsikathaṃ    5-
pubbapetakathaṃ        nānattakathaṃ        lokakkhāyikaṃ       samuddakkhāyikaṃ
@Footnote: 1 Yu. anugāro .   2 Yu. varadharo Sī. varacaro .   3 Yu. ayaṃ saddo natthi.
@4 Yu. uccasaddāya .   5 Yu. ayaṃ pāṭho natthi.
Itibhavābhavakathaṃ   iti   vā   .   addasā   kho   sakuludāyi  paribbājako
bhagavantaṃ   dūrato  [1]-  āgacchantaṃ  disvāna  sakaṃ  parisaṃ  saṇṭhapesi  2-
appasaddā   bhonto   hontu   mā   bhonto   saddamakattha  ayaṃ  samaṇo
gotamo    āgacchati    appasaddakāmo    kho    pana   so   āyasmā
appasaddavaṇṇavādī    3-    appevanāma    appasaddaṃ    parisaṃ   viditvā
upasaṅkamitabbaṃ   maññeyyāti   .   atha   kho   te   paribbājakā  tuṇhī
ahesuṃ  .  atha  kho  bhagavā  yena  sakuludāyi  paribbājako tenupasaṅkami.
Atha  kho  sakuludāyi  paribbājako  bhagavantaṃ  etadavoca  etu  kho  bhante
bhagavā   svāgataṃ  4-  bhante  bhagavato  cirassaṃ  kho  bhante  bhagavā  imaṃ
pariyāyamakāsi   yadidaṃ   idhāgamanāya   nisīdatu   bhante   bhagavā  idamāsanaṃ
paññattanti   .   nisīdi   bhagavā   paññatte   āsane   .   sakuludāyipi
kho   paribbājako   aññataraṃ  nīcaṃ  āsanaṃ  gahetvā  ekamantaṃ  nisīdi .
Ekamantaṃ    nisinnaṃ   kho   sakuludāyi   paribbājakaṃ   bhagavā   etadavoca
kāya   nuttha   udāyi   etarahi   kathāya  sannisinnā  kā  ca  pana  vo
antarākathā vippakatāti.
     [316]   Tiṭṭhatesā   bhante   kathā  yāya  mayaṃ  etarahi  kathāya
sannisinnā    nesā    bhante    kathā    bhagavato   dullabhā   bhavissati
pacchāpi     savanāya     purimāni     bhante     divasāni    purimatarāni
nānātitthiyānaṃ        samaṇabrāhmaṇānaṃ        kutūhalasālāyaṃ       5-
sannisinnānaṃ sannipatitānaṃ ayamantarākathā
@Footnote: 1  Yu. va .  2 Yu. saṇṭhāpesi .   3 Yu. appasaddassa .  4 Yu. sāgataṃ.
@5 kotuhalasālāyantipi pāṭho.
Udapādi   lābhā   vata  bho  aṅgamagadhānaṃ  suladdhaṃ  vata  bho  aṅgamagadhānaṃ
yatrime   1-   samaṇabrāhmaṇā   saṅghino   gaṇino   gaṇācariyā   ñātā
yasassino    titthakarā    sādhusammatā   bahujanassa   rājagahaṃ   vassāvāsaṃ
upagatā   2-   .   ayampi  kho  pūraṇo  kassapo  saṅghī  ceva  gaṇī  ca
gaṇācariyo      [3]-    ñāto    yasassī    titthakaro    sādhusammato
bahujanassa    sopi   rājagahaṃ   vassāvāsaṃ   upagato   .   ayampi   kho
makkhali  gosālo  ...  ajito  kesakambalo ... Pakuddho kaccāyano ...
Sañjayo  velaṭṭhaputto  4-  ...  nigantho  5- nāṭaputto saṅghī ceva gaṇī
ca   gaṇācariyo  [6]-  ñāto  yasassī  titthakaro  sādhusammato  bahujanassa
sopi   rājagahaṃ   vassāvāsaṃ   upagato  .  ayampi  kho  samaṇo  gotamo
saṅghī  ceva  gaṇī  ca  gaṇācariyo [7]- ñāto yasassī titthakaro sādhusammato
bahujanassa   sopi  rājagahaṃ  vassāvāsaṃ  upagato  .  ko  nu  kho  imesaṃ
bhavataṃ    8-   samaṇabrāhmaṇānaṃ   saṅghīnaṃ   gaṇīnaṃ   gaṇācariyānaṃ   ñātānaṃ
yasassīnaṃ    titthakarānaṃ    sādhusammatānaṃ   bahujanassa   sāvakānaṃ   sakkato
garukato   mānito   pūjito   kathañca   pana  sāvakā  sakkatvā  garukatvā
upanissāya viharantīti.
     [317]  Tatrekacce  evamāhaṃsu  ayaṃ kho pūraṇo kassapo saṅghī ceva
gaṇī   ca   gaṇācariyo   [10]-   ñāto  yasassī  titthakaro  sādhusammato
bahujanassa   so   kho   sāvakānaṃ  na  sakkato  na  garukato  na  mānito
@Footnote: 1 Yu. yatthime .  2 Sī. Ma. Yu. osaṭā .  3-6-7-10 Yu. etthantare casaddo atthi.
@4 Yu. belaṭṭhiputto. ito paraṃ īdisameva. 5 Yu. nigaṇṭho. 8 Yu. bhagavataṃ.
@9 Yu. kathaṃ.
Na   pūjito   na   ca   pana  pūraṇaṃ  kassapaṃ  sāvakā  sakkatvā  garukatvā
upanissāya    viharanti    .   bhūtapubbaṃ   pūraṇo   kassapo   anekasatāya
parisāya   dhammaṃ   desesi   .   tatra   aññataro   pūraṇassa   kassapassa
sāvako   saddamakāsi   mā   bhonto   pūraṇaṃ  kassapaṃ  etamatthaṃ  pucchittha
neso   etaṃ   jānāti   mayametaṃ   jānāma   amhe  etamatthaṃ  pucchatha
mayametaṃ    bhavataṃ    byākarissāmāti    .   bhūtapubbaṃ   pūraṇo   kassapo
bāhā   paggayha   kandanto   na   labhati   appasaddā   bhonto  hontu
mā   bhonto   saddamakattha   nete   bhavante   pucchanti  amhe  ete
pucchanti mayametesaṃ byākarissāmīti.
     {317.1}   Bahū   kho   pana   pūraṇassa  kassapassa  sāvakā  vādaṃ
āropetvā   apakkantā   na   tvaṃ   imaṃ   dhammavinayaṃ  ājānāsi  ahaṃ
imaṃ   dhammavinayaṃ   ājānāmi   kiṃ   tvaṃ   imaṃ   dhammavinayaṃ   ājānissasi
micchāpaṭipanno     tvamasi     ahamasmi     sammāpaṭipanno     sahitamme
asahitante   pure   vacanīyaṃ   pacchā   avaca  pacchā  vacanīyaṃ  pure  avaca
adhiciṇṇante   1-   viparāvattaṃ   āropito   te   vādo   niggahitosi
cara   vādappamokkhāya   nibbedhehi  vā  sace  pahosīti  .  iti  pūraṇo
kassapo  sāvakānaṃ  na  sakkato  na  garukato  na  mānito  na  pūjito  na
ca   pana   pūraṇaṃ   kassapaṃ   sāvakā   sakkatvā   garukatvā   upanissāya
viharanti akuṭṭho ca pana pūraṇo kassapo dhammakkosenāti.
     {317.2}   Ekacce   evamāhaṃsu  ayampi  kho  makkhali  gosālo
...   ajito   kesakambalo   2-   ...   pakuddho   kaccāyano  ...
@Footnote: 1 Yu. aviciṇṇante .   2 Yu. sabbattha kesakambalīti dissati.
Sañjayo   velaṭṭhaputto   ...   nigantho   nāṭaputto  saṅghī  ceva  gaṇī
ca    gaṇācariyo   ñāto   yasassī   titthakaro   sādhusammato   bahujanassa
sopi  sāvakānaṃ  na  sakkato  na  garukato  na  mānito  na  pūjito  na ca
pana    niganthaṃ   nāṭaputtaṃ   sāvakā   sakkatvā   garukatvā   upanissāya
viharanti    .   bhūtapubbaṃ   nigantho   nāṭaputto   anekasatāya   parisāya
dhammaṃ   desesi   .   tatra   aññataro  niganthassa  nāṭaputtassa  sāvako
saddamakāsi    mā    bhonto   niganthaṃ   nāṭaputtaṃ   etamatthaṃ   pucchittha
neso   etaṃ   jānāti   mayametaṃ   jānāma   amhe  etamatthaṃ  pucchatha
mayametaṃ bhavataṃ byākarissāmāti.
     {317.3}    Bhūtapubbaṃ    nigantho   nāṭaputto   bāhā   paggayha
kandanto    na   labhati   appasaddā   bhonto   hontu   mā   bhonto
saddamakattha    nete    bhavante    pucchanti   amhe   ete   pucchanti
mayametesaṃ    1-   byākarissāmāti   .   bahū   kho   pana   niganthassa
nāṭaputtassa    sāvakā    vādaṃ   āropetvā   apakkantā   na   tvaṃ
imaṃ    dhammavinayaṃ   ājānāsi   ahaṃ   imaṃ   dhammavinayaṃ   ājānāmi   kiṃ
tvaṃ   imaṃ   dhammavinayaṃ   ājānissasi   micchāpaṭipanno   tvamasi   ahamasmi
sammāpaṭipanno     sahitamme    asahitante    pure    vacanīyaṃ    pacchā
avaca    pacchā    vacanīyaṃ    pure    avaca    adhiciṇṇante   viparāvattaṃ
āropito   te   vādo   niggahitosi  cara  vādappamokkhāya  nibbedhehi
vā   sace   pahosīti   .   iti   nigantho   nāṭaputto   sāvakānaṃ  na
sakkato   na   garukato   na   mānito   na  pūjito  na  ca  pana  niganthaṃ
@Footnote: 1 Yu. mayametaṃ.
Nāṭaputtaṃ    sāvakā    sakkatvā    garukatvā    upanissāya    viharanti
akuṭṭho ca pana nigantho nāṭaputto dhammakkosenāti.
     [318]   Ekacce  evamāhaṃsu  ayampi  1-  kho  samaṇo  gotamo
saṅghī    ceva    gaṇī    ca    gaṇācariyo   ñāto   yasassī   titthakaro
sādhusammato   bahujanassa   so   ca   kho   sāvakānaṃ   sakkato  garukato
mānito   pūjito   samaṇañca   pana   gotamaṃ  sāvakā  sakkatvā  garukatvā
upanissāya    viharanti    .   bhūtapubbaṃ   samaṇo   gotamo   anekasatāya
parisāya   dhammaṃ   desesi   .    tatra   aññataro   samaṇassa  gotamassa
sāvako   ukkāsi   .   tamenamaññataro  sabrahmacārī  jannukena  ghaṭṭesi
appasaddo    āyasmā    hotu   mā   āyasmā   saddamakāsi   satthā
no   bhagavā   dhammaṃ   desetīti   .   yasmiṃ   samaye   samaṇo  gotamo
anekasatāya   parisāya   dhammaṃ   desesi   neva   tasmiṃ  samaye  samaṇassa
gotamassa    sāvakānaṃ   khipitasaddo   vā   hoti   ukkāsitasaddo   vā
tamenaṃ    mahājanakāyo    2-   paccāsiṃsamānarūpo   paccupaṭṭhito   hoti
yanno bhagavā dhammaṃ bhāsissati tanno sossāmāti.
     {318.1}    Seyyathāpi   nāma   puriso   cātummahāpathe   khuddaṃ
madhuṃ    anelakaṃ    pīḷeyya    tamenaṃ   mahājanakāyo   paccāsiṃsamānarūpo
paccupaṭṭhito    assa    evameva    yasmiṃ    samaye   samaṇo   gotamo
anekasatāya   parisāya   dhammaṃ   deseti   neva   tasmiṃ  samaye  samaṇassa
gotamassa     sāvakānaṃ    khipitasaddo    vā    hoti    ukkāsitasaddo
vā     tamenaṃ     mahājanakāyo     paccāsiṃsamānarūpo     paccupaṭṭhito
@Footnote: 1 Yu. ayaṃ .  2 Yu. janakāyo.
Hoti    yanno   bhagavā   dhammaṃ   bhāsissati   tanno   sossāmāti  .
Yepi    samaṇassa    gotamassa   sāvakā   sabrahmacārīhi   sampayojetvā
sikkhaṃ   paccakkhāya   hīnāyāvattanti   tepi   satthuno  ceva  vaṇṇavādino
honti   dhammassa   ca   vaṇṇavādino   honti   saṅghassa  ca  vaṇṇavādino
honti     attagarahinoyeva     honti     anaññagarahino    mayamevamhā
alakkhikā   mayaṃ   appapuññā   ye   mayaṃ  evaṃ  svākkhāte  dhammavinaye
pabbajitvā    na   sakkhimhā   yāvajīvaṃ   paripuṇṇaṃ   parisuddhaṃ   brahmacariyaṃ
caritunti    .   te   ārāmikabhūtā   vā   upāsakabhūtā   vā   pañcasu
sikkhāpadesu   samādāya   vattanti   .   iti  samaṇo  gotamo  sāvakānaṃ
sakkato   garukato   mānito   pūjito   samaṇañca   pana   gotamaṃ  sāvakā
sakkatvā   garukatvā   upanissāya   viharantīti  .  katī  pana  tvaṃ  udāyi
mayi   dhamme   samanupassasi   yehi   mama  sāvakā  sakkaronti  garukaronti
mānenti pūjenti sakkatvā garukatvā upanissāya viharantīti.
     [319]   Pañca   kho   ahaṃ   bhante  bhagavati  dhamme  samanupassāmi
yehi   bhagavantaṃ   sāvakā   sakkaronti   garukaronti   mānenti  pūjenti
sakkatvā    garukatvā    upanissāya   viharanti   katame   pañca   bhagavā
hi    bhante    appāhāro    appāhāratāya    ca   vaṇṇavādī   yampi
bhante    bhagavā    appāhāro   appāhāratāya   ca   vaṇṇavādī   imaṃ
kho   ahaṃ   bhante   bhagavati   paṭhamaṃ   dhammaṃ  samanupassāmi  yena  bhagavantaṃ
sāvakā   sakkaronti  garukaronti  mānenti  pūjenti  sakkatvā  garukatvā
Upanissāya viharanti.
     [320]  Puna  caparaṃ  bhante  bhagavā  santuṭṭho  itarītarena  cīvarena
itarītaracīvarasantuṭṭhiyā   ca   vaṇṇavādī   yampi   bhante  bhagavā  santuṭṭho
itarītarena   cīvarena   itarītaracīvarasantuṭṭhiyā   ca   vaṇṇavādī   imaṃ  kho
ahaṃ   bhante   bhagavati  dutiyaṃ  dhammaṃ  samanupassāmi  yena  bhagavantaṃ  sāvakā
sakkaronti    garukaronti    mānenti    pūjenti   sakkatvā   garukatvā
upanissāya viharanti.
     [321]  Puna  caparaṃ  bhante  bhagavā santuṭṭho itarītarena piṇḍapātena
itarītarapiṇḍapātasantuṭṭhiyā    ca    vaṇṇavādī    yampi    bhante   bhagavā
santuṭṭho      itarītarena     piṇḍapātena     itarītarapiṇḍapātasantuṭṭhiyā
ca   vaṇṇavādī   imaṃ  kho  ahaṃ  bhante  bhagavati  tatiyaṃ  dhammaṃ  samanupassāmi
yena   bhagavantaṃ   sāvakā   sakkaronti   garukaronti   mānenti  pūjenti
sakkatvā garukatvā upanissāya viharanti.
     [322]  Puna  caparaṃ  bhante  bhagavā santuṭṭho itarītarena senāsanena
itarītarasenāsanasantuṭṭhiyā    ca    vaṇṇavādī    yampi    bhante   bhagavā
santuṭṭho    itarītarena    senāsanena    itarītarasenāsanasantuṭṭhiyā   ca
vaṇṇavādī   imaṃ   kho   ahaṃ   bhante  bhagavati  catutthaṃ  dhammaṃ  samanupassāmi
yena   bhagavantaṃ   sāvakā   sakkaronti   garukaronti   mānenti  pūjenti
sakkatvā garukatvā upanissāya viharanti.
     [323]   Puna   caparaṃ   bhante   bhagavā  pavivitto  pavivekassa  ca
Vaṇṇavādī    yampi    bhante    bhagavā    pavivitto    pavivekassa    ca
vaṇṇavādī   imaṃ   kho   ahaṃ   bhante  bhagavati  pañcamaṃ  dhammaṃ  samanupassāmi
yena    bhagavantaṃ   sāvakā   sakkaronti   garukaronti  mānenti  pūjenti
sakkatvā   garukatvā   upanissāya   viharanti  .  ime  kho  ahaṃ  bhante
bhagavati    pañca    dhamme    samanupassāmi    yehi    bhagavantaṃ   sāvakā
sakkaronti    garukaronti    mānenti    pūjenti   sakkatvā   garukatvā
upanissāya viharantīti.
     [324]    Appāhāro    samaṇo   gotamo   appāhāratāya   ca
vaṇṇavādīti   iti   ce   maṃ   udāyi   sāvakā   sakkareyyuṃ  garukareyyuṃ
māneyyuṃ   pūjeyyuṃ   sakkatvā   garukatvā   upanissāya  vihareyyuṃ  santi
kho   pana  me  udāyi  sāvakā  kosakāhārāpi  addhakosakāhārāpi  1-
veluvāhārāpi   addhaveluvāhārāpi   2-  ahaṃ  kho  panudāyi  appekadā
iminā    pattena    samatittikampi    bhuñjāmi    bhiyyopi   bhuñjāmi  .
Appāhāro    samaṇo    gotamo    appāhāratāya    ca    vaṇṇavādīti
iti  ce  maṃ  udāyi  sāvakā  sakkareyyuṃ  garukareyyuṃ  māneyyuṃ  pūjeyyuṃ
sakkatvā   garukatvā   upanissāya   vihareyyuṃ   ye   te   udāyi  mama
sāvakā      kosakāhārāpi      addhakosakāhārāpi     veluvāhārāpi
addhaveluvāhārāpi   na   mante  iminā  dhammena  sakkareyyuṃ  garukareyyuṃ
māneyyuṃ pūjeyyuṃ sakkatvā garukatvā upanissāya vihareyyuṃ.
     [325] Santuṭṭho samaṇo gotamo itarītarena cīvarena itarītaracīvarasantuṭṭhiyā
@Footnote: 1-2 Yu. aḍḍha....
Ca   vaṇṇavādīti   iti   ce  maṃ  udāyi  sāvakā  sakkareyyuṃ  garukareyyuṃ
māneyyuṃ    pūjeyyuṃ    sakkatvā    garukatvā    upanissāya   vihareyyuṃ
santi   kho   pana   me   udāyi   sāvakā  paṃsukūlikā  lūkhacīvaradharā  te
susānā   vā   saṅkārakuṭā   vā  pāpaṇikā  vā  nantakāni  uccinitvā
saṅghāṭiṃ   karitvā   dhārenti   ahaṃ  kho  panudāyi  appekadā  gahapatāni
cīvarāni   dhāremi   daḷhāni   suttalūkhāni  1-  alāvulomasāni  santuṭṭho
samaṇo    gotamo    itarītarena    cīvarena   itarītaracīvarasantuṭṭhiyā   ca
vaṇṇavādīti   iti   ce   maṃ   udāyi   sāvakā   sakkareyyuṃ  garukareyyuṃ
māneyyuṃ   pūjeyyuṃ   sakkatvā   garukatvā   upanissāya   vihareyyuṃ  ye
te   udāyi   mama   sāvakā  paṃsukūlikā  lūkhacīvaradharā  te  susānā  vā
saṅkārakuṭā    vā   pāpaṇikā   vā   nantakāni   uccinitvā   saṅghāṭiṃ
karitvā   dhārenti   na  mante  iminā  dhammena  sakkareyyuṃ  garukareyyuṃ
māneyyuṃ pūjeyyuṃ sakkatvā garukatvā upanissāya vihareyyuṃ.
     [326]   Santuṭṭho   samaṇo   gotamo   itarītarena   piṇḍapātena
itarītarapiṇḍapātasantuṭṭhiyā    ca    vaṇṇavādīti   iti   ce   maṃ   udāyi
sāvakā   sakkareyyuṃ  garukareyyuṃ  māneyyuṃ  pūjeyyuṃ  sakkatvā  garukatvā
upanissāya  vihareyyuṃ  santi  kho  pana  me  udāyi  sāvakā  piṇḍapātikā
sapadānacārino    uccāpake    2-    vatte   ratā   te   antaragharaṃ
paviṭṭhā    samānā    āsanenapi   nimantiyamānā   na   sādiyanti   ahaṃ
kho    panudāyi    appekadā    nimantanepi   bhuñjāmi   sālīnaṃ   odanaṃ
@Footnote: 1 Yu. yattha lūkhāni .   2 Yu. uccepake vate. ito paraṃ īdisameva.
Vicitakāḷakaṃ    anekasūpaṃ    anekabyañjanaṃ    santuṭṭho   samaṇo   gotamo
itarītarena    piṇḍapātena    itarītarapiṇḍapātasantuṭṭhiyā   ca   vaṇṇavādīti
iti   ce   maṃ   udāyi   sāvakā   sakkareyyuṃ   garukareyyuṃ   māneyyuṃ
pūjeyyuṃ   sakkatvā   garukatvā   upanissāya  vihareyyuṃ  ye  te  udāyi
mama   sāvakā   piṇḍapātikā   sapadānacārino   uccāpake  vatte  ratā
te  antaragharaṃ  paviṭṭhā  samānā  āsanenapi  nimantiyamānā  na  sādiyanti
na   mante   iminā  dhammena  sakkareyyuṃ  garukareyyuṃ  māneyyuṃ  pūjeyyuṃ
sakkatvā garukatvā upanissāya vihareyyuṃ.
     [327]   Santuṭṭho   samaṇo   gotamo   itarītarena   senāsanena
itarītarasenāsanasantuṭṭhiyā    ca    vaṇṇavādīti   iti   ce   maṃ   udāyi
sāvakā   sakkareyyuṃ  garukareyyuṃ  māneyyuṃ  pūjeyyuṃ  sakkatvā  garukatvā
upanissāya   vihareyyuṃ  santi  kho  pana  me  udāyi  sāvakā  rukkhamūlikā
abbhokāsikā   te  aṭṭha  māse  channaṃ  na  upenti  ahaṃ  kho  panudāyi
appekadā    kūṭāgāresupi    viharāmi    ullittāvalittesu    nivātesu
phusitaggaḷesu   pihitavātapānesu   santuṭṭho   samaṇo   gotamo  itarītarena
senāsanena   itarītarasenāsanasantuṭṭhiyā   ca   vaṇṇavādīti   iti  ce  maṃ
udāyi   sāvakā   sakkareyyuṃ   garukareyyuṃ  māneyyuṃ  pūjeyyuṃ  sakkatvā
garukatvā   upanissāya   vihareyyuṃ   ye   te   udāyi   mama   sāvakā
rukkhamūlikā   abbhokāsikā   te   1-  aṭṭha  māse  channaṃ  na  upenti
na   mante   iminā  dhammena  sakkareyyuṃ  garukareyyuṃ  māneyyuṃ  pūjeyyuṃ
@Footnote: 1 Yu. ayaṃ pāṭho natthi.
Sakkatvā garukatvā upanissāya vihareyyuṃ.
     [328]   Pavivitto   samaṇo   gotamo  pavivekassa  ca  vaṇṇavādīti
iti  ce  maṃ  udāyi  sāvakā  sakkareyyuṃ  garukareyyuṃ  māneyyuṃ  pūjeyyuṃ
sakkatvā   garukatvā  upanissāya  vihareyyuṃ  santi  kho  pana  me  udāyi
sāvakā   āraññakā  pantāni  senāsanāni  1-  araññavanapatthāni  [2]-
ajjhogahetvā    viharanti    te   anvaḍḍhamāsaṃ   saṅghamajjhe   osaranti
pātimokkhuddesāya    ahaṃ    kho    panudāyi    appekadā    ākiṇṇo
viharāmi    bhikkhūhi    bhikkhunīhi    upāsakehi   upāsikāhi   raññā   3-
rājamahāmattehi   titthiyehi   titthiyasāvakehi   pavivitto  samaṇo  gotamo
pavivekassa   ca   vaṇṇavādīti   iti  ce  maṃ  udāyi  sāvakā  sakkareyyuṃ
garukareyyuṃ  māneyyuṃ  pūjeyyuṃ  sakkatvā  garukatvā  upanissāya  vihareyyuṃ
ye   te   udāyi   mama   sāvakā   āraññakā   pantāni  senāsanāni
araññavanapatthāni   [4]-   ajjhogahetvā   viharanti   te   anvaḍḍhamāsaṃ
saṅghamajjhe   osaranti   pātimokkhuddesāya   na  mante  iminā  dhammena
sakkareyyuṃ    garukareyyuṃ    māneyyuṃ    pūjeyyuṃ   sakkatvā   garukatvā
upanissāya vihareyyuṃ.
     {328.1}  Iti  kho  udāyi na maṃ 5- sāvakā imehi pañcahi dhammehi
sakkaronti    garukaronti    mānenti    pūjenti   sakkatvā   garukatvā
upanissāya viharanti.
     [329]  Atthi  kho  udāyi  aññe  ca  pañca  dhammā  yehi pañcahi
dhammehi     mama     sāvakā     sakkaronti    garukaronti    mānenti
@Footnote: 1 Yu. pantasenāsanā .   2-4 Yu. etthantare pantāni senāsanānīti dissati.
@3 Yu. rañño .  5 Yu. mamaṃ.
Pūjenti    sakkatvā   garukatvā   upanissāya   viharanti   katame   pañca
idhudāyi   mama   sāvakā   adhisīle  sambhāventi  sīlavā  samaṇo  gotamo
paramena   sīlakkhandhena   samannāgatoti   .   yamudāyi  1-  mama  sāvakā
adhisīle   sambhāventi   sīlavā   samaṇo   gotamo  paramena  sīlakkhandhena
samannāgatoti   .  ayaṃ  kho  udāyi  paṭhamo  dhammo  yena  mama  sāvakā
sakkaronti    garukaronti    mānenti    pūjenti   sakkatvā   garukatvā
upanissāya viharanti.
     [330]  Puna  caparaṃ  udāyi  mama  sāvakā  abhikkante  ñāṇadassane
sambhāventi    jānaṃyevāha   samaṇo   gotamo   jānāmīti   passaṃyevāha
samaṇo    gotamo    passāmīti    abhiññāya    samaṇo   gotamo   dhammaṃ
deseti   no   anabhiññāya   sanidānaṃ   samaṇo   gotamo  dhammaṃ  deseti
no   anidānaṃ   sappāṭihāriyaṃ   samaṇo   gotamo   dhammaṃ   deseti  no
appāṭihāriyanti    .    yamudāyi    2-    mama   sāvakā   abhikkante
ñāṇadassane    sambhāventi   jānaṃyevāha   samaṇo   gotamo   jānāmīti
passaṃyevāha     samaṇo     gotamo    passāmīti    abhiññāya    samaṇo
gotamo   dhammaṃ   deseti   no   anabhiññāya   sanidānaṃ  samaṇo  gotamo
dhammaṃ   deseti   no   anidānaṃ   sappāṭihāriyaṃ   samaṇo  gotamo  dhammaṃ
deseti  no  appāṭihāriyanti  .  ayaṃ  kho  udāyi  dutiyo  dhammo yena
mama   sāvakā   sakkaronti   garukaronti   mānenti   pūjenti  sakkatvā
garukatvā upanissāya viharanti.
@Footnote: 1-2 Yu. yaṃ panudāyi. sabbattha īdisameva.
     [331]  Puna  caparaṃ  udāyi  mama  sāvakā  adhipaññāya  sambhāventi
paññavā    samaṇo    gotamo    paramena   paññākkhandhena   samannāgato
taṃ   vata   anāgataṃ   vā  vādapathaṃ  na  dakkhati  uppannaṃ  vā  parappavādaṃ
na   sahadhammena   suniggahitaṃ   niggahissatīti   netaṃ   ṭhānaṃ  vijjati  .  taṃ
kiṃ   maññasi   udāyi   api   nu   me   sāvakā  evaṃ  jānantā  evaṃ
passantā antarantarā kathaṃ opāteyyunti.
     {331.1}  No  hetaṃ  bhante  .  na  kho  panāhaṃ udāyi sāvakesu
anusāsaniṃ    paccāsiṃsāmi    aññadatthuṃ    mamaṃyeva    sāvakā   anusāsaniṃ
paccāsiṃsanti    .   yamudāyi   mama   sāvakā   adhipaññāya   sambhāventi
paññavā    samaṇo    gotamo    paramena   paññākkhandhena   samannāgato
taṃ  vata  1-  anāgataṃ  vā  vādapathaṃ  na  dakkhati  uppannaṃ  vā parappavādaṃ
na  sahadhammena  suniggahitaṃ  niggahissatīti  netaṃ  ṭhānaṃ  vijjati  .  ayaṃ  kho
udāyi   tatiyo   dhammo   yena   mama   sāvakā  sakkaronti  garukaronti
mānenti pūjenti sakkatvā garukatvā upanissāya viharanti.
     [332]   Puna   caparaṃ   udāyi   mama   sāvakā   yena   dukkhena
dukkhotiṇṇā   dukkhaparetā   te   maṃ   upasaṅkamitvā   dukkhaṃ   ariyasaccaṃ
pucchanti    tesāhaṃ    dukkhaṃ   ariyasaccaṃ   puṭṭho   byākaromi   tesāhaṃ
cittaṃ   ārādhemi   pañhassa   veyyākaraṇena   te   maṃ   upasaṅkamitvā
dukkhasamudayaṃ   ...   dukkhanirodhaṃ  ...  dukkhanirodhagāminiṃ  paṭipadaṃ  ariyasaccaṃ
pucchanti    tesāhaṃ    dukkhanirodhagāminiṃ    paṭipadaṃ    ariyasaccaṃ    puṭṭho
@Footnote: 1 Yu. vatasaddo natthi.
Byākaromi   tesāhaṃ   cittaṃ   ārādhemi   pañhassa   veyyākaraṇena .
Yamudāyi    mama   sāvakā   yena   dukkhena   dukkhotiṇṇā   dukkhaparetā
te   maṃ   upasaṅkamitvā   dukkhaṃ   ariyasaccaṃ   pucchanti   tesāhaṃ   dukkhaṃ
ariyasaccaṃ   puṭṭho   byākaromi   tesāhaṃ   cittaṃ   ārādhemi   pañhassa
veyyākaraṇena  te  maṃ  upasaṅkamitvā  dukkhasamudayaṃ  ...  dukkhanirodhaṃ ...
Dukkhanirodhagāminiṃ   paṭipadaṃ   ariyasaccaṃ   pucchanti  tesāhaṃ  dukkhanirodhagāminiṃ
paṭipadaṃ    ariyasaccaṃ   puṭṭho   byākaromi   tesāhaṃ   cittaṃ   ārādhemi
pañhassa   veyyākaraṇena   .   ayaṃ  kho  udāyi  catuttho  dhammo  yena
mama   sāvakā   sakkaronti   garukaronti   mānenti   pūjenti  sakkatvā
garukatvā upanissāya viharanti.
     [333]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   cattāro   satipaṭṭhāne   bhāventi  .
Idhudāyi    bhikkhu   kāye   kāyānupassī   viharati   ātāpī   sampajāno
satimā    vineyya   loke   abhijjhādomanassaṃ   vedanāsu   vedanānupassī
viharati   ...   citte  cittānupassī  viharati  ...  dhammesu  dhammānupassī
viharati  ātāpī  sampajāno  satimā  vineyya  loke  abhijjhādomanassaṃ .
Tatra    ca    pana    me   sāvakā   bahū   abhiññāvosānapāramippattā
viharanti.
     [334]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   cattāro   sammappadhāne   bhāventi .
Idhudāyi   bhikkhu   anuppannānaṃ  pāpakānaṃ  akusalānaṃ  dhammānaṃ  anuppādāya
chandaṃ   janeti   vāyamati   viriyaṃ   ārabhati   cittaṃ   paggaṇhāti   padahati
uppannānaṃ   pāpakānaṃ   akusalānaṃ   dhammānaṃ   pahānāya   chandaṃ   janeti
vāyamati    viriyaṃ    ārabhati   cittaṃ   paggaṇhāti   padahati   anuppannānaṃ
kusalānaṃ   dhammānaṃ   uppādāya   chandaṃ   janeti  vāyamati  viriyaṃ  ārabhati
cittaṃ    paggaṇhāti    padahati   uppannānaṃ   kusalānaṃ   dhammānaṃ   ṭhitiyā
asammosāya   bhiyyobhāvāya   vepullāya   bhāvanāya   pāripūriyā   chandaṃ
janeti   vāyamati   viriyaṃ   ārabhati   cittaṃ  paggaṇhāti  padahati  .  tatra
ca pana me sāvakā bahū abhiññāvosānapāramippattā viharanti.
     [335]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me   sāvakā   cattāro   iddhipāde   bhāventi  .
Idhudāyi      bhikkhu      chandasamādhipadhānasaṅkhārasamannāgataṃ      iddhipādaṃ
bhāveti      viriyasamādhipadhānasaṅkhārasamannāgataṃ     iddhipādaṃ     bhāveti
cittasamādhipadhānasaṅkhārasamannāgataṃ           iddhipādaṃ          bhāveti
vīmaṃsāsamādhipadhānasaṅkhārasamannāgataṃ    iddhipādaṃ    bhāveti    .    tatra
ca pana me sāvakā bahū abhiññāvosānapāramippattā viharanti.
     [336]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   pañcindriyāni   bhāventi   .   idhudāyi
bhikkhu    saddhindriyaṃ    bhāveti    upasamagāmiṃ   sambodhagāmiṃ   viriyindriyaṃ
bhāveti  ...  satindriyaṃ bhāveti ... Samādhindriyaṃ bhāveti ... Paññindriyaṃ
Bhāveti   upasamagāmiṃ   sambodhagāmiṃ   .   tatra   ca  pana  me  sāvakā
bahū abhiññāvosānapāramippattā viharanti.
     [337]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   pañca   balāni   bhāventi   .  idhudāyi
bhikkhu  saddhābalaṃ  bhāveti  upasamagāmiṃ  sambodhagāmiṃ  viriyabalaṃ  bhāveti ...
Satibalaṃ  bhāveti  ...  samādhibalaṃ bhāveti ... Paññābalaṃ bhāveti upasamagāmiṃ
sambodhagāmiṃ  .  tatra  ca  pana me sāvakā bahū abhiññāvosānapāramippattā
viharanti.
     [338]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   satta  bojjhaṅge  bhāventi  .  idhudāyi
bhikkhu   satisambojjhaṅgaṃ   bhāveti   vivekanissitaṃ  virāganissitaṃ  nirodhanissitaṃ
vossaggapariṇāmiṃ   dhammavicayasambojjhaṅgaṃ   bhāveti   ...  viriyasambojjhaṅgaṃ
bhāveti  ...  pītisambojjhaṅgaṃ  bhāveti  ...  passaddhisambojjhaṅgaṃ bhāveti
...   samādhisambojjhaṅgaṃ   bhāveti   ...  upekkhāsambojjhaṅgaṃ  bhāveti
vivekanissitaṃ   virāganissitaṃ   nirodhanissitaṃ    vossaggapariṇāmiṃ   .   tatra
ca pana me sāvakā bahū  abhiññāvosānapāramippattā viharanti.
     [339]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   ariyaṃ   aṭṭhaṅgikaṃ   maggaṃ   bhāventi .
Idhudāyi   bhikkhu   sammādiṭṭhiṃ  bhāveti  sammāsaṅkappaṃ  bhāveti  sammāvācaṃ
Bhāveti   sammākammantaṃ   bhāveti   sammāājīvaṃ   bhāveti  sammāvāyāmaṃ
bhāveti   sammāsatiṃ   bhāveti   sammāsamādhiṃ  bhāveti  .  tatra  ca  pana
me sāvakā bahū abhiññāvosānapāramippattā viharanti.
     [340]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   aṭṭha   vimokkhe   bhāventi   .   rūpī
rūpāni    passati    ayaṃ   paṭhamo   vimokkho   .   ajjhattaṃ   arūpasaññī
bahiddhā    rūpāni    passati   ayaṃ   dutiyo   vimokkho   .   subhanteva
adhimutto   hoti   ayaṃ   tatiyo   vimokkho   .   sabbaso   rūpasaññānaṃ
samatikkamā    paṭighasaññānaṃ    aṭṭhaṅgamā    nānattasaññānaṃ   amanasikārā
ananto     ākāsoti     ākāsānañcāyatanaṃ     upasampajja    viharati
ayaṃ   catuttho   vimokkho   .   sabbaso  ākāsānañcāyatanaṃ  samatikkamma
anantaṃ    viññāṇanti    viññāṇañcāyatanaṃ    upasampajja    viharati    ayaṃ
pañcamo   vimokkho   .   sabbaso   viññāṇañcāyatanaṃ   samatikkamma  natthi
kiñcīti   ākiñcaññāyatanaṃ   upasampajja  viharati  ayaṃ  chaṭṭho  vimokkho .
Sabbaso      ākiñcaññāyatanaṃ     samatikkamma     nevasaññānāsaññāyatanaṃ
upasampajja   viharati   ayaṃ   sattamo  vimokkho  .  sabbaso  nevasaññā-
nāsaññāyatanaṃ      samatikkamma      saññāvedayitanirodhaṃ      upasampajja
viharati   ayaṃ   aṭṭhamo  vimokkho  .  tatra  ca  pana  me  sāvakā  bahū
abhiññāvosānapāramippattā viharanti.
     [341]   Puna   caparaṃ  udāyi  akkhātā  mayā  sāvakānaṃ  paṭipadā
Yathāpaṭipannā me sāvakā aṭṭha abhibhāyatanāni bhāventi.
     {341.1}   Ajjhattaṃ   rūpasaññī   eko   bahiddhā  rūpāni  passati
parittāni    suvaṇṇadubbaṇṇāni    tāni    abhibhuyya    jānāmi   passāmīti
evaṃsaññī hoti idaṃ paṭhamaṃ abhibhāyatanaṃ.
     {341.2}   Ajjhattaṃ   rūpasaññī   eko   bahiddhā  rūpāni  passati
appamāṇāni    suvaṇṇadubbaṇṇāni    tāni   abhibhuyya   jānāmi   passāmīti
evaṃsaññī hoti idaṃ dutiyaṃ abhibhāyatanaṃ.
     {341.3}   Ajjhattaṃ   arūpasaññī   eko  bahiddhā  rūpāni  passati
parittāni    suvaṇṇadubbaṇṇāni    tāni    abhibhuyya    jānāmi   passāmīti
evaṃsaññī hoti idaṃ tatiyaṃ abhibhāyatanaṃ.
     {341.4}   Ajjhattaṃ   arūpasaññī   eko  bahiddhā  rūpāni  passati
appamāṇāni   [1]-  tāni  abhibhuyya  jānāmi  passāmīti  evaṃsaññī  hoti
idaṃ catutthaṃ abhibhāyatanaṃ.
     {341.5}   Ajjhattaṃ   arūpasaññī   eko  bahiddhā  rūpāni  passati
nīlāni   nīlavaṇṇāni   nīlanidassanāni   nīlanibhāsāni   .  seyyathāpi  nāma
ummārapupphaṃ  [2]-  nīlavaṇṇaṃ  nīlanidassanaṃ  nīlanibhāsaṃ  seyyathāpi  vā  pana
taṃ  vatthaṃ  bārāṇaseyyakaṃ  ubhatobhāgavimatthaṃ  3-  nīlaṃ  nīlavaṇṇaṃ  nīlanidassanaṃ
nīlanibhāsaṃ  evameva  4-  ajjhattaṃ  arūpasaññī  eko bahiddhā rūpāni passati
nīlāni    nīlavaṇṇāni    nīlanidassanāni    nīlanibhāsāni    tāni   abhibhuyya
jānāmi passāmīti evaṃsaññī hoti idaṃ pañcamaṃ abhibhāyatanaṃ.
     {341.6}      Ajjhattaṃ      arūpasaññī      eko     bahiddhā
rūpāni       passati       pītāni       pītavaṇṇāni      pītanidassanāni
pītanibhāsāni     .     seyyathāpi     nāma     kaṇṇikārapupphaṃ     1-
@Footnote: 1 Yu. etthantare suvaṇṇadubbaṇṇānīti dissati. 2 Yu. etthantare nīlanti
@dissati. 3 Yu. ubhato-vimaṭṭhaṃ. 4 Yu. evamevaṃ.
Pītavaṇṇaṃ     pītanidassanaṃ    pītanibhāsaṃ    seyyathāpi    vā    pana    taṃ
vatthaṃ      bārāṇaseyyakaṃ      ubhatobhāgavimatthaṃ      pītaṃ      pītavaṇṇaṃ
pītanidassanaṃ     pītanibhāsaṃ     evameva     2-    ajjhattaṃ    arūpasaññī
eko      bahiddhā      rūpāni     passati     pītāni     pītavaṇṇāni
pītanidassanāni       pītanibhāsāni      tāni      abhibhuyya      jānāmi
passāmīti evaṃsaññī hoti idaṃ chaṭṭhaṃ abhibhāyatanaṃ.
     {341.7}   Ajjhattaṃ   arūpasaññī   eko  bahiddhā  rūpāni  passati
lohitakāni    lohitakavaṇṇāni    lohitakanidassanāni   lohitakanibhāsāni  .
Seyyathāpi   nāma   bandhujīvakapupphaṃ   lohitakaṃ  lohitakavaṇṇaṃ  lohitakanidassanaṃ
lohitakanibhāsaṃ  seyyathāpi  vā  pana  taṃ  vatthaṃ  bārāṇaseyyakaṃ ubhatobhāga-
vimatthaṃ     lohitakaṃ     lohitakavaṇṇaṃ    lohitakanidassanaṃ    lohitakanibhāsaṃ
evameva   3-   ajjhattaṃ   arūpasaññī   eko   bahiddhā  rūpāni  passati
lohitakāni     lohitakavaṇṇāni     lohitakanidassanāni     lohitakanibhāsāni
tāni abhibhuyya jānāmi passāmīti evaṃsaññī hoti idaṃ sattamaṃ abhibhāyatanaṃ.
     {341.8}   Ajjhattaṃ   arūpasaññī   eko  bahiddhā  rūpāni  passati
odātāni    odātavaṇṇāni    odātanidassanāni   odātanibhāsāni  .
Seyyathāpi  nāma  osadhitārakā  odātā  odātavaṇṇā  odātanidassanā
odātanibhāsā  seyyathāpi  vā  pana  taṃ  vatthaṃ bārāṇaseyyakaṃ ubhatobhāga-
vimatthaṃ     odātaṃ     odātavaṇṇaṃ    odātanidassanaṃ    odātanibhāsaṃ
evameva   4-   ajjhattaṃ   arūpasaññī   eko   bahiddhā  rūpāni  passati
odātāni     odātavaṇṇāni     odātanidassanāni     odātanibhāsāni
@Footnote: 1 Yu. etthantare pītanti dissati. 2-3-4 Yu. evamevaṃ.
Tāni   abhibhuyya   jānāmi   passāmīti   evaṃsaññī   hoti   idaṃ   aṭṭhamaṃ
abhibhāyatanaṃ   .   tatra   ca   pana   me  sāvakā  bahū  abhiññāvosāna-
pāramippattā viharanti.
     [342]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me    sāvakā    dasa   kasiṇāyatanāni   bhāventi  .
Paṭhavīkasiṇameko    sañjānāti    uddhamadho    tiriyaṃ    anvayaṃ   appamāṇaṃ
āpokasiṇameko   sañjānāti   ...   tejokasiṇameko  sañjānāti  ...
Vāyokasiṇameko   sañjānāti   ...   nīlakasiṇameko   sañjānāti   ...
Pītakasiṇameko   sañjānāti   ...   lohitakasiṇameko   sañjānāti   ...
Odātakasiṇameko    sañjānāti   ...   ākāsakasiṇameko    sañjānāti
...  viññāṇakasiṇameko  sañjānāti  uddhamadho  tiriyaṃ  anvayaṃ  appamāṇaṃ.
Tatra ca pana me sāvakā bahū abhiññāvosānapāramippattā viharanti.
     [343]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā  me  sāvakā  cattāri  jhānāni  1-  bhāventi . Idhudāyi
bhikkhu   vivicceva   kāmehi  vivicca  akusalehi  dhammehi  savitakkaṃ  savicāraṃ
vivekajaṃ   pītisukhaṃ   paṭhamaṃ   jhānaṃ  upasampajja  viharati  so  imameva  kāyaṃ
vivekajena  pītisukhena  abhisanneti  2-  parisanneti  3- paripūreti parippharati
nāssa    kiñci   sabbāvato   kāyassa   vivekajena   pītisukhena   apphutaṃ
hoti   .   seyyathāpi   udāyi  dakkho  nhāpako  vā  nhāpakantevāsī
@Footnote: 1 Yu. cattāro jhāne .   2 Sī. Yu. catūsu ṭhānesu abhisandeti .  3 parisandetīti
@pāṭho dissati. Yu. catūsu ṭhānesu parisandeti.
Vā   kaṃsathāle   nhāniyacuṇṇāni   ākīritvā   udakena  paripphosakaṃ  1-
sanneyya   sāssa   nhāniyapiṇḍi   snehānuggatā   2-   snehāparetā
santarabāhirā   phuṭṭhā  snehena  na  ca  paggharinī  evameva  kho  udāyi
bhikkhu   imameva   kāyaṃ   vivekajena   pītisukhena   abhisanneti  parisanneti
paripūreti   parippharati   nāssa   kiñci   sabbāvato   kāyassa  vivekajena
pītisukhena apphutaṃ hoti.
     [344]  Puna  caparaṃ  udāyi  bhikkhu  vitakkavicārānaṃ  vūpasamā  .pe.
Dutiyaṃ   jhānaṃ   upasampajja   viharati   so   imameva   kāyaṃ   samādhijena
pītisukhena    abhisanneti    parisanneti    paripūreti    parippharati   nāssa
kiñci   sabbāvato   kāyassa   samādhijena   pītisukhena   apphutaṃ  hoti .
Seyyathāpi   udāyi   udakarahado  gambhīro  3-  ubbhitodako  4-   tassa
nevassa    puratthimāya   disāya   udakassāyamukhaṃ   na   pacchimāya   disāya
udakassāyamukhaṃ   na  uttarāya  disāya  udakassāyamukhaṃ  na  dakkhiṇāya  disāya
udakassāyamukhaṃ   devo   ca   kālena  kālaṃ  sammādhāraṃ  anuppaveccheyya
atha  kho  tamhā  [5]-  udakarahadā  sītā  vāridhārā ubbhijjitvā tameva
udakarahadaṃ    sītena    vārinā   abhisanneyya   parisanneyya   paripūreyya
paripphareyya   nāssa   kiñci   sabbāvato   udakarahadassa  sītena  vārinā
apphutaṃ   assa   evameva  kho  udāyi  bhikkhu  imameva  kāyaṃ  samādhijena
pītisukhena   abhisanneti   parisanneti   paripūreti   parippharati  nāssa  kiñci
@Footnote: 1 Yu. ayaṃ pāṭho dve vāre āmeḍito dissati. 2 Sī. subhānugatā.
@3 Yu. gambhīroti natthi .  4 Yu. ubbhidodakoti dissati .  5 Yu. ca.
Sabbāvato kāyassa samādhijena pītisukhena apphutaṃ hoti.
     [345]   Puna   caparaṃ   udāyi  bhikkhu  pītiyā  ca  virāgā  .pe.
Tatiyaṃ   jhānaṃ   upasampajja   viharati   so   imameva   kāyaṃ   nippītikena
sukhena   abhisanneti   parisanneti   paripūreti   parippharati   nāssa   kiñci
sabbāvato   kāyassa   nippītikena   sukhena  apphutaṃ  hoti  .  seyyathāpi
udāyi   uppaliniyaṃ   vā   paduminiyaṃ   vā  puṇḍarīkiniyaṃ  vā  appekaccāni
uppalāni   vā   padumāni  vā  puṇḍarīkāni  vā  udake  jātāni  udake
saṃvaḍḍhāni   udakānuggatāni   antonimmuggapositāni   1-  tāni  yāva  ca
aggā  yāva  ca  mūlā  tena  2- vārinā abhisannāni parisannāni paripūrāni
paripphutāni   nāssa   kiñci   sabbāvataṃ   uppalānaṃ   vā   padumānaṃ  vā
puṇḍarīkānaṃ  vā  tena  2-  vārinā  apphutaṃ  assa evameva [3]- udāyi
bhikkhu    imameva   kāyaṃ   nippītikena   sukhena   abhisanneti   parisanneti
paripūreti   parippharati   nāssa   kiñci   sabbāvato   kāyassa  nippītikena
sukhena apphutaṃ hoti.
     [346]   Puna   caparaṃ   udāyi  bhikkhu  sukhassa  ca  pahānā  .pe.
Catutthaṃ   jhānaṃ   upasampajja   viharati   so   imameva   kāyaṃ  parisuddhena
cetasā    pariyodātena    pharitvā    nisinno   hoti   nāssa   kiñci
sabbāvato  kāyassa  parisuddhena  cetasā  pariyodātena  apphutaṃ  hoti .
Seyyathāpi   udāyi   puriso   odātena  vatthena  sīsaṃ  4-  pārupitvā
nisinno    assa    nāssa    kiñci   sabbāvato   kāyassa   odātena
@Footnote: 1 Yu. antonimuggaposīni tāni .   2 Yu. sītenāti dissati .   3 Yu. kho.
@4 Yu. sasīsaṃ.
Vatthena   apphutaṃ   assa   evameva   kho  udāyi  bhikkhu  imameva  kāyaṃ
parisuddhena   cetasā   pariyodātena   pharitvā   nisinno   hoti  nāssa
kiñci   sabbāvato   kāyassa   parisuddhena  cetasā  pariyodātena  apphutaṃ
hoti   .  tatra  ca  pana  me  sāvakā  bahū  abhiññāvosānapāramippattā
viharanti.
     [347]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   evaṃ   pajānanti  ayaṃ  kho  me  kāyo
rūpī      cātummahābhūtiko     mātāpettikasambhavo    odanakummāsūpacayo
aniccucchādanaparimaddanabhedanaviddhaṃsanadhammo       idañca      pana      me
viññāṇaṃ   ettha   sitaṃ   ettha   paṭibaddhaṃ   .  seyyathāpi  udāyi  maṇi
veḷuriyo  subho  jotimā  1-  aṭṭhaṃso  suparikammakato  accho  vippasanno
sabbākārasampanno    tatrassa   suttaṃ   āvutaṃ   nīlaṃ   vā   pītaṃ   vā
lohitaṃ   vā   odātaṃ   vā   paṇḍusuttaṃ   vā  tamenaṃ  cakkhumā  puriso
hatthe   karitvā   paccavekkheyya   ayaṃ   kho   maṇi   veḷuriyo   subho
jotimā     2-     aṭṭhaṃso     suparikammakato    accho    vippasanno
sabbākārasampanno   tatridaṃ   suttaṃ   āvutaṃ  nīlaṃ  vā  pītaṃ  vā  lohitaṃ
vā   odātaṃ   vā   paṇḍusuttaṃ  vāti  evameva  kho  udāyi  akkhātā
mayā  sāvakānaṃ  paṭipadā  yathāpaṭipannā  me  sāvakā  evaṃ pajānanti 3-
ayaṃ   kho   me   kāyo   rūpī   cātummahābhūtiko   mātāpettikasambhavo
odanakummāsūpacayo aniccucchādanaparimaddanabhedanaviddhaṃsanadhammo
@Footnote: 1-2 Yu. jātimā .   3 Yu. jānanti.
Idañca   pana   me   1-   viññāṇaṃ  ettha  sitaṃ  ettha  paṭibaddhanti .
Tatra    ca    pana    me   sāvakā   bahū   abhiññāvosānapāramippattā
viharanti.
     [348]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā  imamhā  kāyā  aññaṃ  kāyaṃ  abhinimminanti
rūpiṃ    manomayaṃ    sabbaṅgapaccaṅgaṃ    ahīnindriyaṃ   2-   .   seyyathāpi
udāyi   puriso   muñjamhā   īsikaṃ   ubbāheyya   tassa  evamassa  3-
ayaṃ   īsikā  ayaṃ  muñjo  4-  añño  muñjo  aññā  īsikā  muñjamhā
tveva   īsikā  ubbāḷhāti  5-  seyyathāpi  vā  panudāyi  puriso  asiṃ
kosiyā   ubbāheyya   6-   tassa   evamassa   ayaṃ   asi  ayaṃ  kosi
añño   asi   aññā   7-   kosi   kosiyā  tveva  asi  ubbāḷhoti
seyyathāpi   vā   8-  panudāyi  puriso  ahiṃ  karaṇḍā  uddhareyya  tassa
evamassa   ayaṃ   ahi   ayaṃ   karaṇḍo   añño   ahi   añño  karaṇḍo
karaṇḍā   tveva  ahi  ubbhatoti  evameva  kho  udāyi  akkhātā  mayā
sāvakānaṃ   paṭipadā   yathāpaṭipannā  me  sāvakā  imamhā  kāyā  aññaṃ
kāyaṃ  abhinimminanti  rūpiṃ  manomayaṃ  sabbaṅgapaccaṅgaṃ  9-  ahīnindriyaṃ 10-.
Tatra ca pana me sāvakā bahū abhiññāvosānapāramippattā viharanti.
     [349]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me    sāvakā    anekavihitaṃ    iddhividhaṃ   paccanubhonti
@Footnote: 1 Yu. ayaṃ pāṭho natthi .  2-10 Yu. abhinindriyaṃ .   3 Yu. evañcassa .   4 Yu.
@ayaṃ muñjo. ayaṃ īsikā .   5 Yu. pabbāḷhati .  6 Yu. pabbāheyya .  7 Yu.
@añño .   8 Yu. vāsaddo natthi .  9 Yu. sabbaṅgapaccaṅgiṃ.
Ekopi   hutvā   bahudhā   honti   bahudhāpi   hutvā   eko   honti
āvibhāvaṃ   tirobhāvaṃ   tirokuḍḍaṃ   tiropākāraṃ   tiropabbataṃ  asajjamānā
gacchanti   seyyathāpi   ākāse   .  paṭhaviyāpi  ummujjanimmujjaṃ  karonti
seyyathāpi   udake   .   udakepi   abhijjamāne   gacchanti   seyyathāpi
paṭhaviyaṃ  .  ākāsepi  pallaṅkena  kamanti  seyyathāpi  pakkhī sakuṇā 1-.
Imepi   candimasuriye   evaṃmahiddhike  evaṃmahānubhāve  pāṇinā  parimasanti
parimajjanti yāva brahmalokāpi kāyena vasaṃ vattenti.
     {349.1}  Seyyathāpi udāyi dakkho kumbhakāro vā kumbhakārantevāsī
vā  suparikammakatāya  mattikāya  yaṃyadeva  bhājanavikatiṃ  ākaṅkheyya tantadeva
kareyya   abhinipphādeyya   seyyathā   vā   panudāyi  dakkho  dantakāro
vā    dantakārantevāsī    vā    suparikammakatasmiṃ    dantasmiṃ   yaṃyadeva
dantavikatiṃ   ākaṅkheyya   tantadeva   kareyya   abhinipphādeyya  seyyathā
vā    panudāyi   dakkho   suvaṇṇakāro   vā   suvaṇṇakārantevāsī   vā
suparikammakatasmiṃ     suvaṇṇasmiṃ     yaṃyadeva     suvaṇṇavikatiṃ    ākaṅkheyya
tantadeva   kareyya   abhinipphādeyya   evameva   kho  udāyi  akkhātā
mayā   sāvakānaṃ   paṭipadā   yathāpaṭipannā   me   sāvakā   anekavihitaṃ
iddhividhaṃ    paccanubhonti    ekopi   hutvā   bahudhā   honti   bahudhāpi
hutvā   eko   honti   āvibhāvaṃ   tirobhāvaṃ   tirokuḍḍaṃ  tiropākāraṃ
tiropabbataṃ   asajjamānā   gacchanti   seyyathāpi  ākāse  .  paṭhaviyāpi
ummujjanimmujjaṃ   karonti   seyyathāpi   udake  .  udakepi  abhijjamāne
@Footnote: 1 Yu. sakuṇo.
Gacchanti   seyyathāpi   paṭhaviyaṃ   .   ākāse   1-  pallaṅkena  kamanti
seyyathāpi    pakkhī   sakuṇā   .   imepi   candimasuriye   evaṃmahiddhike
evaṃmahānubhāve   pāṇinā   parimasanti   parimajjanti   yāva  brahmalokāpi
kāyena   vasaṃ   vattenti   .   tatra   ca   pana   me   sāvakā  bahū
abhiññāvosānapāramippattā viharanti.
     [350]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me    sāvakā    dibbāya    sotadhātuyā    visuddhāya
atikkantamānusakāya   ubho   sadde  suṇanti  dibbe  ca  mānuse  ca  ye
dūre  santike  ca  .  seyyathāpi  udāyi balavā saṅkhadhamo appakasirena 2-
ca    catuddisā    viññāpeyya    evameva    kho   udāyi   akkhātā
mayā    sāvakānaṃ    paṭipadā   yathāpaṭipannā   me   sāvakā   dibbāya
sotadhātuyā   visuddhāya   atikkantamānusakāya   3-  ubho  sadde  suṇanti
dibbe  ca  mānuse  ca  ye  dūre  santike  ca  .  tatra  ca  pana  me
sāvakā bahū abhiññāvosānapāramippattā viharanti.
     [351]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me    sāvakā    parasattānaṃ    parapuggalānaṃ   cetasā
ceto    paricca    pajānanti   sarāgaṃ   vā   cittaṃ   sarāgaṃ   cittanti
pajānanti    vītarāgaṃ    vā    cittaṃ    vītarāgaṃ    cittanti   pajānanti
sadosaṃ    vā    cittaṃ    sadosaṃ   cittanti   pajānanti   vītadosaṃ   vā
cittaṃ    vītadosaṃ    cittanti   pajānanti   samohaṃ   vā   cittaṃ   samohaṃ
@Footnote: 1 Yu. ākāsepi .  2 Yu. appakasireneva. casaddo natthi .  3 Yu. ...mānusikāya.
Cittanti    pajānanti    vītamohaṃ    vā    cittaṃ    vītamohaṃ    cittanti
pajānanti    saṅkhittaṃ    vā    cittaṃ    saṅkhittaṃ    cittanti   pajānanti
vikkhittaṃ    vā   cittaṃ   vikkhittaṃ   cittanti   pajānanti   mahaggataṃ   vā
cittaṃ     mahaggataṃ    cittanti    pajānanti    amahaggataṃ    vā    cittaṃ
amahaggataṃ    cittanti    pajānanti    sauttaraṃ    vā    cittaṃ   sauttaraṃ
cittanti    pajānanti    anuttaraṃ    vā    cittaṃ    anuttaraṃ    cittanti
pajānanti    samāhitaṃ    vā    cittaṃ    samāhitaṃ    cittanti   pajānanti
asamāhitaṃ    vā    cittaṃ    asamāhitaṃ    cittanti    pajānanti   vimuttaṃ
vā    cittaṃ    vimuttaṃ    cittanti    pajānanti   avimuttaṃ   vā   cittaṃ
avimuttaṃ cittanti pajānanti.
     {351.1}  Seyyathāpi  udāyi  itthī  vā  puriso  vā daharo yuvā
maṇḍanakajātiko   ādāse   vā   parisuddhe   pariyodāte   acche  vā
udakapatte   sakaṃ   mukhanimittaṃ   paccavekkhamāno   sakaṇikaṃ   vā  sakaṇikanti
pajāneyya  akaṇikaṃ  vā  akaṇikanti  pajāneyya  evameva  udāyi akkhātā
mayā   sāvakānaṃ   paṭipadā   yathāpaṭipannā   me   sāvakā   parasattānaṃ
parapuggalānaṃ  cetasā  ceto  paricca  pajānanti  sarāgaṃ  vā  cittaṃ sarāgaṃ
cittanti   pajānanti   vītarāgaṃ   vā   cittaṃ  vītarāgaṃ  cittanti  pajānanti
sadosaṃ   vā   cittaṃ   sadosaṃ   cittanti   pajānanti  vītadosaṃ  vā  cittaṃ
vītadosaṃ   cittanti   pajānanti   samohaṃ   vā  cittaṃ  ...  vītamohaṃ  vā
cittaṃ  ...  saṅkhittaṃ  vā  cittaṃ  ...  vikkhittaṃ  vā  cittaṃ ... Mahaggataṃ
Vā  cittaṃ  ...  amahaggataṃ  vā cittaṃ ... Sauttaraṃ vā cittaṃ ... Anuttaraṃ
vā  cittaṃ  ...  samāhitaṃ  vā  cittaṃ ... Asamāhitaṃ vā cittaṃ ... Vimuttaṃ
vā   cittaṃ   ...  avimuttaṃ  vā  cittaṃ  avimuttaṃ  cittanti  pajānanti .
Tatra ca pana me sāvakā bahū abhiññāvosānapāramippattā viharanti.
     [352]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā    me    sāvakā   anekavihitaṃ   pubbenivāsaṃ   anussaranti
seyyathīdaṃ   ekampi   jātiṃ  dvepi  jātiyo  tissopi  jātiyo  catassopi
jātiyo   pañcapi   jātiyo   dasapi   jātiyo   vīsampi   jātiyo  tiṃsampi
jātiyo   cattāḷīsampi   jātiyo   paññāsampi   jātiyo  jātisatampi  1-
jātisahassampi    jātisatasahassampi    anekepi    saṃvaṭṭakappe   anekepi
vivaṭṭakappe    anekepi    saṃvaṭṭavivaṭṭakappe    amutrāsiṃ    evaṃnāmo
evaṃgotto     evaṃvaṇṇo    evamāhāro    evaṃ    sukhadukkhapaṭisaṃvedī
evamāyupariyanto    so   tato   cuto   amutra   udapādiṃ   tatrāpāsiṃ
evaṃnāmo  evaṃgotto  evaṃvaṇṇo  evamāhāro  evaṃ  sukhadukkhapaṭisaṃvedī
evamāyupariyanto   so   tato   cuto   idhūpapannoti   .  iti  sākāraṃ
sauddesaṃ anekavihitaṃ pubbenivāsaṃ anussaranti.
     {352.1}  Seyyathāpi  udāyi  puriso  sakamhā  gāmā  aññaṃ gāmaṃ
gaccheyya  tamhāpi  gāmā  aññaṃ  gāmaṃ gaccheyya so tamhā gāmā sakaṃyeva
gāmaṃ   paccāgaccheyya   tassa  evamassa  ahaṃ  kho  sakamhā  gāmā  amuṃ
@Footnote: 1 katthaci satampi jātiyo sahassampi jātiyo satasahassampi jātiyotipi dissati.
Gāmaṃ   āgacchiṃ   tatra  evaṃ  aṭṭhāsiṃ  evaṃ  nisīdiṃ  abhāsiṃ  evaṃ  tuṇhī
ahosiṃ   tamhāpi   gāmā   amuṃ  gāmaṃ  āgacchiṃ  tatrāpi  evaṃ  aṭṭhāsiṃ
evaṃ   nisīdiṃ   evaṃ  abhāsiṃ  evaṃ  tuṇhī  ahosiṃ  somhi  tamhā  gāmā
sakaṃyeva   gāmaṃ   paccāgatoti   evameva   kho  udāyi  akkhātā  mayā
sāvakānaṃ     paṭipadā    yathāpaṭipannā    me    sāvakā    anekavihitaṃ
pubbenivāsaṃ   anussaranti   seyyathīdaṃ   ekampi   jātiṃ   dvepi  jātiyo
.pe.   iti  sākāraṃ  sauddesaṃ  anekavihitaṃ  pubbenivāsaṃ  anussaranti .
Tatra ca pana me sāvakā bahū abhiññāvosānapāramippattā viharanti.
     [353]   Puna   caparaṃ  udāyi  akkhātā  mayā  sāvakānaṃ  paṭipadā
yathāpaṭipannā   me   sāvakā   dibbena   cakkhunā  visuddhena  atikkanta-
mānusakena   satte   passanti   cavamāne   upapajjamāne  hīne  paṇīte
suvaṇṇe   dubbaṇṇe   sugate   duggate   yathākammūpage  satte  pajānanti
ime   vata   bhonto  sattā  kāyaduccaritena  samannāgatā  vacīduccaritena
samannāgatā     manoduccaritena    samannāgatā    ariyānaṃ    upavādakā
micchādiṭṭhikā     micchādiṭṭhikammasamādānā     te    kāyassa    bhedā
parammaraṇā   apāyaṃ   duggatiṃ   vinipātaṃ  nirayaṃ  upapannā  ime  vā  pana
bhonto   sattā   kāyasucaritena   samannāgatā  vacīsucaritena  samannāgatā
manosucaritena    samannāgatā    ariyānaṃ    anupavādakā    sammādiṭṭhikā
sammādiṭṭhikammasamādānā   te   kāyassa  bhedā  parammaraṇā  sugatiṃ  saggaṃ
Lokaṃ  upapannāti  .  iti  dibbena  cakkhunā  visuddhena atikkantamānusakena
satte    passanti   cavamāne   upapajjamāne   hīne   paṇīte   suvaṇṇe
dubbaṇṇe    sugate    duggate   yathākammūpage   satte   pajānanti  .
Seyyathāpassu   udāyi   1-   dve   agārā  sadvārā  tatra  cakkhumā
puriso  majjhe  ṭhito  passeyya  manusse  gehe  pavisantepi  nikkhamantepi
anusaṃcarantepi   anuvicarantepi   evameva   kho   udāyi  akkhātā  mayā
sāvakānaṃ   paṭipadā   yathāpaṭipannā   me   sāvakā   dibbena   cakkhunā
visuddhena   atikkantamānusakena   satte  passanti  cavamāne  upapajjamāne
hīne   paṇīte  suvaṇṇe  dubbaṇṇe  sugate  duggate  .pe.  yathākammūpage
satte  pajānanti  .  tatra  ca  pana  me  sāvakā  bahū  abhiññāvosāna-
pāramippattā viharanti.
     [354]   Puna  caparaṃ  udāyi   akkhātā  mayā  sāvakānaṃ  paṭipadā
yathāpaṭipannā   me   sāvakā   āsavānaṃ   khayā   anāsavaṃ  cetovimuttiṃ
paññāvimuttiṃ   diṭṭheva   dhamme   sayaṃ   abhiññā   sacchikatvā  upasampajja
viharanti   .   seyyathāpi   udāyi   pabbatasaṅkhepe   udakarahado  accho
vippasanno   anāvilo   tatra   cakkhumā   puriso  tīre  ṭhito  passeyya
sippikasambukampi   2-   sakkharakaṭhalampi   macchagumbampi  carantampi  tiṭṭhantampi
tassa  evamassa  ayaṃ  kho  udakarahado  accho vippasanno anāvilo tatrime
sippikasambukāpi    3-    sakkharakaṭhalāpi    4-    macchagumbāpi   carantipi
tiṭṭhantipīti   evameva   kho  udāyi  akkhātā  mayā  sāvakānaṃ  paṭipadā
@Footnote: 1 Yu. seyyathāpassudāyi .  2-3 Yu. sippisambukampi .   4 Yu. pisaddo natthi.
Yathāpaṭipannā   me   sāvakā   āsavānaṃ   khayā   anāsavaṃ  cetovimuttiṃ
paññāvimuttiṃ   diṭṭheva   dhamme   sayaṃ   abhiññā   sacchikatvā  upasampajja
viharanti  .  tatra  ca  pana  me  sāvakā  bahū abhiññāvosānapāramippattā
viharanti.
     [355]   Ayaṃ   kho  udāyi  pañcamo  dhammo  yena  mama  sāvakā
sakkaronti    garukaronti    mānenti    pūjenti   sakkatvā   garukatvā
upanissāya   viharanti   .   ime   kho   udāyi   pañca   dhammā  yehi
mama   sāvakā   sakkaronti   garukaronti   mānenti   pūjenti  sakkatvā
garukatvā upanissāya viharantīti.
     Idamavoca   bhagavā   attamano   sakuludāyi   paribbājako   bhagavato
bhāsitaṃ abhinandīti.
               Mahāsakuludāyisuttaṃ niṭṭhitaṃ sattamaṃ.
                      ----------



             The Pali Tipitaka in Roman Character Volume 13 page 310-341. https://84000.org/tipitaka/read/roman_read.php?B=13&A=6360              Compare with The Pali Tipitaka in Thai Character :- https://84000.org/tipitaka/read/pali_read.php?B=13&A=6360              Compare with The Royal Version of Thai Tipitaka :- https://84000.org/tipitaka/read/byitem.php?book=13&item=314&items=42              Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=13&siri=27              Study Atthakatha :- https://84000.org/tipitaka/attha/attha.php?b=13&i=314              The Pali Atthakatha in Thai :- https://84000.org/tipitaka/atthapali/read_th.php?B=9&A=4350              The Pali Atthakatha in Roman :- https://84000.org/tipitaka/atthapali/read_rm.php?B=9&A=4350              Contents of The Tipitaka Volume 13 https://84000.org/tipitaka/read/?index_13 https://84000.org/tipitaka/english/?index_13

First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]