Dhammapadagāthāya navamo pāpavaggo
[19] |19.116| 9 Abhittharetha kalyāṇe pāpā cittaṃ nivāraye
dandhañhi karoto puññaṃ pāpasmiṃ ramatī mano.
|19.117| Pāpañce puriso kayirā na naṃ kayirā punappunaṃ
na tamhi chandaṃ kayirātha dukkho pāpassa uccayo.
|19.118| Puññañce puriso kayirā kayirāthenaṃ punappunaṃ
tamhi chandaṃ kayirātha sukho puññassa uccayo.
|19.119| Pāpopi passati bhadraṃ yāva pāpaṃ na paccati
yadā ca paccati pāpaṃ atha (pāpo) pāpāni passati.
|19.120| Bhadropi passati pāpaṃ yāva bhadraṃ na paccati
yadā ca paccati bhadraṃ atha (bhadro) bhadrāni passati.
|19.121| Māvamaññetha pāpassa na mattaṃ 1- āgamissati
udabindunipātena udakumbhopi pūrati
āpūrati bālo pāpassa thokaṃ thokaṃpi ācinaṃ.
|19.122| Māvamaññetha puññassa na mattaṃ āgamissati
udabindunipātena udakumbhopi pūrati
āpūrati dhīro puññassa thokaṃ thokaṃpi ācinaṃ.
|19.123| Vāṇijova bhayaṃ maggaṃ appasattho mahaddhano
visaṃ jīvitukāmova pāpāni parivajjaye.
|19.124| Pāṇimhi ce vaṇo nāssa hareyya pāṇinā visaṃ
nābbaṇaṃ visamanveti natthi pāpaṃ akubbato.
|19.125| Yo appaduṭṭhassa narassa dussati
suddhassa posassa anaṅgaṇassa
tameva bālaṃ pacceti pāpaṃ
sukhumo rajo paṭivātaṃva khitto.
|19.126| Gabbhameke upapajjanti nirayaṃ pāpakammino
saggaṃ sugatino yanti parinibbanti anāsavā.
|19.127| Na antalikkhe na samuddamajjhe
na pabbatānaṃ vivaraṃ pavīsaṃ 2-
@Footnote: 1 Yu. na mantaṃ. Ma. na mandaṃ . 2 Ma. Yu. pavissa.
Na vijjatī so jagatippadeso
yatraṭṭhito muñceyya pāpakammā.
|19.128| Na antalikkhe na samuddamajjhe
na pabbatānaṃ vivaraṃ pavīsaṃ
na vijjatī so jagatippadeso
yatraṭṭhitaṃ nappasaheyya maccu.
Pāpavaggo navamo.
--------
Dhammapadagāthāya dasamo daṇḍavaggo
[20] |20.129| 10 Sabbe tasanti daṇḍassa sabbe bhāyanti maccuno
attānaṃ upamaṃ katvā na haneyya na ghātaye.
|20.130| Sabbe tasanti daṇḍassa sabbesaṃ jīvitaṃ piyaṃ
attānaṃ upamaṃ katvā na haneyya na ghātaye.
|20.131| Sukhakāmāni bhūtāni yo daṇḍena vihiṃsati
attano sukhamesāno pecca so na labhate sukhaṃ.
|20.132| Sukhakāmāni bhūtāni yo daṇḍena na hiṃsati
attano sukhamesāno pecca so labhate sukhaṃ.
|20.133| Māvoca pharusaṃ kañci vuttā paṭivadeyyu taṃ
dukkhā hi sārambhakathā paṭidaṇḍā phuseyyu taṃ.
|20.134| Sace neresi attānaṃ kaṃso upahato yathā
esa pattosi nibbānaṃ sārambho te na vijjati.
|20.135| Yathā daṇḍena gopālo gāvo pājeti gocaraṃ
evaṃ jarā ca maccu ca āyuṃ pājenti pāṇinaṃ.
|20.136| Atha pāpāni kammāni karaṃ bālo na bujjhati
sehi kammehi dummedho aggidaḍḍhova tappati.
|20.137| Yo daṇḍena adaṇḍesu appaduṭṭhesu dussati
dasannamaññataraṃ ṭhānaṃ khippameva nigacchati
|20.138| vedanaṃ pharusaṃ jāniṃ sarīrassa ca bhedanaṃ
garukaṃ vāpi ābādhaṃ cittakkhepaṃ va pāpuṇe
|20.139| rājato vā upasaggaṃ abbhakkhānaṃ va dāruṇaṃ
parikkhayaṃ va ñātīnaṃ bhogānaṃ va pabhaṅguṇaṃ
|20.140| atha vāssa agārāni aggi ḍahati pāvako
kāyassa bhedā duppañño nirayaṃ so upapajjati.
|20.141| Na naggacariyā na jaṭā na paṅkā
nānāsakā taṇḍilasāyikā vā
rajojallaṃ ukkuṭikappadhānaṃ
sodhenti maccaṃ avitiṇṇakaṅkhaṃ.
|20.142| Alaṅkato cepi samaṃ careyya
santo danto niyato brahmacārī
Sabbesu bhūtesu nidhāya daṇḍaṃ
so brāhmaṇo so samaṇo sa bhikkhu.
|20.143| Hirinisedho puriso koci lokasmi vijjati
yo niddaṃ apabodheti asso bhadro kasāmiva
|20.144| asso yathā bhadro kasāniviṭṭho
ātāpino saṃvegino bhavātha
saddhāya sīlena ca viriyena ca
samādhinā dhammavinicchayena ca
sampannavijjācaraṇā patissatā
pahassatha dukkhamidaṃ anappakaṃ.
|20.145| Udakaṃ hi nayanti nettikā
usukārā namayanti tejanaṃ
dāruṃ namayanti tacchakā
attānaṃ damayanti subbatā.
Daṇḍavaggo dasamo.
----------
Dhammapadagāthāya ekādasamo jarāvaggo
[21] |21.146| 11 Ko nu hāso kimānando niccaṃ pajjalite sati
andhakārena onaddhā padīpaṃ na gavesatha.
|21.147| Passa cittakataṃ 1- bimbaṃ arukāyaṃ samussitaṃ
āturaṃ bahusaṅkappaṃ yassa natthi dhuvaṇṭhiti.
|21.148| Parijiṇṇamidaṃ rūpaṃ roganiddhaṃ pabhaṅguṇaṃ
bhijjati pūti sandeho maraṇantaṃ hi jīvitaṃ.
|21.149| Yānimāni apatthāni alāpūneva 2- sārade
kāpotakāni aṭṭhīni tāni disvāna kā rati.
|21.150| Aṭṭhīnaṃ nagaraṃ kataṃ maṃsalohitalepanaṃ
yattha jarā ca maccu ca māno makkho ca ohito.
|21.151| Jīranti ve rājarathā sucittā
atho sarīrampi jaraṃ upeti
satañca dhammo na jaraṃ upeti
santo have sabbhi pavedayanti.
|21.152| Appassutāyaṃ puriso balivaddova jīrati
maṃsāni tassa vaḍḍhanti paññā tassa na vaḍḍhati.
|21.153| Anekajātisaṃsāraṃ sandhāvissaṃ anibbisaṃ
gahakārakaṃ gavesanto dukkhā jāti punappunaṃ
|21.154| gahakāraka diṭṭhosi puna gehaṃ na kāhasi
@Footnote: 1 Po. cittīkataṃ . 2 Ma. alābūneva.
Sabbā te phāsukā bhaggā gahakūṭaṃ visaṅkhataṃ
visaṅkhāragataṃ cittaṃ taṇhānaṃ khayamajjhagā.
|21.155| Acaritvā brahmacariyaṃ aladdhā yobbane dhanaṃ
jiṇṇakoñcāva jhāyanti khīṇamaccheva pallale
|21.156| acaritvā brahmacariyaṃ aladdhā yobbane dhanaṃ
senti cāpātikhīṇāva purāṇāni anutthunaṃ.
Jarāvaggo ekādasamo.
------------
Dhammapadagāthāya dvādasamo attavaggo
[22] |22.157| 12 Attānañce piyaṃ jaññā rakkheyya naṃ surakkhitaṃ
tiṇṇaṃ aññataraṃ yāmaṃ paṭijaggeyya paṇḍito.
|22.158| Attānameva paṭhamaṃ paṭirūpe nivesaye
athaññamanusāseyya na kilisseyya paṇḍito.
|22.159| Attānañce tathā kayirā yathaññamanusāsati
sudanto vata dametha attā hi kira duddamo.
|22.160| Attā hi attano nātho ko hi nātho paro siyā
attanā hi sudantena nāthaṃ labhati dullabhaṃ.
|22.161| Attanā va kataṃ pāpaṃ attajaṃ attasambhavaṃ
abhimatthati dummedhaṃ vajiraṃvamhayaṃ maṇiṃ.
|22.162| Yassa accantadussīlyaṃ māluvā sālamivotthataṃ
karoti so tathattānaṃ yathā naṃ icchatī diso.
|22.163| Sukarāni asādhūni attano ahitāni ca
yaṃ ve hitañca sādhuñca taṃ ve paramadukkaraṃ.
|22.164| Yo sāsanaṃ arahataṃ ariyānaṃ dhammajīvinaṃ
paṭikkosati dummedho diṭṭhiṃ nissāya pāpikaṃ
phalāni kaṇṭakasseva attaghaññāya 1- phallati.
|22.165| Attanā va 2- kataṃ pāpaṃ attanā saṅkilissati
attanā akataṃ pāpaṃ attanā va visujjhati
suddhi asuddhi paccattaṃ nāñño aññaṃ visodhaye.
|22.166| Attadatthaṃ paratthena bahunāpi na hāpaye
attadatthamabhiññāya sadatthapasuto siyā.
Attavaggo dvādasamo.
------------
Dhammapadagāthāya terasamo lokavaggo
[23] |23.167| 13 Hīnaṃ dhammaṃ na seveyya pamādena na saṃvase
micchādiṭṭhiṃ na seveyya na siyā lokavaḍḍhano.
|23.168| Uttiṭṭhe nappamajjeyya dhammaṃ sucaritaṃ care
dhammacārī sukhaṃ seti asmiṃ loke paramhi ca.
@Footnote: 1 Ma. attaghātāya . 2 Ma. hi.
|23.169| Dhammaṃ care sucaritaṃ na naṃ duccaritaṃ care
dhammacārī sukhaṃ seti asmiṃ loke paramhi ca.
|23.170| Yathā pubbuḷakaṃ passe yathā passe marīcikaṃ
evaṃ lokaṃ avekkhantaṃ maccurājā na passati.
|23.171| Etha passathimaṃ lokaṃ cittaṃ rājarathūpamaṃ
yattha bālā visīdanti natthi saṅgo vijānataṃ.
|23.172| Yo ca pubbe pamajjitvā pacchā so nappamajjati
so 1- imaṃ lokaṃ pabhāseti abbhā muttova candimā.
|23.173| Yassa pāpaṃ kataṃ kammaṃ kusalena pithīyati 2-
so imaṃ lokaṃ pabhāseti abbhā muttova candimā.
|23.174| Andhabhūto ayaṃ loko tanukettha vipassati
sakunto 3- jālamuttova appo saggāya gacchati.
|23.175| Haṃsā 4- ādiccapathe yanti ākāse yanti iddhiyā
nīyanti dhīrā lokamhā jetvā māraṃ savāhanaṃ.
|23.176| Ekaṃ dhammaṃ atītassa musāvādissa jantuno
vitiṇṇaparalokassa natthi pāpaṃ akāriyaṃ.
|23.177| Na ve kadariyā devalokaṃ vajanti
bālā have nappasaṃsanti dānaṃ
dhīro ca dānaṃ anumodamāno
@Footnote: 1 Po. Ma. somaṃ . 2 pahīyatītipi . 3 Ma. sakuṇo . 4 Ma. Yu. haṃsādiccapathe
@yanti.
Teneva so hoti sukhī parattha.
|23.178| Paṭhavyā ekarajjena saggassa gamanena vā
sabbalokādhipaccena sotāpattiphalaṃ varaṃ.
Lokavaggo terasamo.
---------
Dhammapadagāthāya cuddasamo buddhavaggo
[24] |24.179| 14 Yassa jitaṃ nāvajīyati
jitamassa no yāti koci loke
taṃ buddhaṃ anantagocaraṃ
apadaṃ kena padena nessatha.
|24.180| Yassa jālinī visattikā
taṇhā natthi kuhiñci netave
taṃ buddhaṃ anantagocaraṃ
apadaṃ kena padena nessatha.
|24.181| Ye jhānapasutā dhīrā nekkhammūpasame ratā
devāpi tesaṃ pihayanti sambuddhānaṃ satīmataṃ.
|24.182| Kiccho manussapaṭilābho kicchaṃ maccāna jīvitaṃ
kicchaṃ saddhammassavanaṃ kiccho buddhānamuppado 1-.
|24.183| Sabbapāpassa akaraṇaṃ kusalassūpasampadā 2-
@Footnote: 1 Ma. buddhānamuppādo. Yu. buddhānaṃ uppādo.
@2 Ma. Yu. kusalassa upsampadā.
Sacittapariyodapanaṃ etaṃ buddhāna sāsanaṃ.
|24.184| Khantī paramaṃ tapo tītikkhā
nibbānaṃ paramaṃ vadanti buddhā
na hi pabbajito parūpaghātī
samaṇo hoti paraṃ viheṭhayanto.
|24.185| Anūpavādo anūpaghāto pātimokkhe ca saṃvaro
mattaññutā ca bhattasmiṃ pantañca sayanāsanaṃ
adhicitte ca āyogo etaṃ buddhāna sāsanaṃ.
|24.186| Na kahāpaṇavassena titti kāmesu vijjati
appassādā dukkhā kāmā iti viññāya paṇḍito
|24.187| api dibbesu kāmesu ratiṃ so nādhigacchati
taṇhakkhayarato hoti sammāsambuddhasāvako.
|24.188| Bahuṃ ve saraṇaṃ yanti pabbatāni vanāni ca
ārāmarukkhacetyāni manussā bhayatajjitā
|24.189| netaṃ kho saraṇaṃ khemaṃ netaṃ saraṇamuttamaṃ
netaṃ saraṇamāgamma sabbadukkhā pamuccati.
|24.190| Yo ca buddhañca dhammañca saṅghañca saraṇaṃ gato
cattāri ariyasaccāni sammappaññāya passati
|24.191| dukkhaṃ dukkhasamuppādaṃ dukkhassa ca atikkamaṃ
ariyañcaṭṭhaṅgikaṃ maggaṃ dukkhūpasamagāminaṃ
|24.192| Etaṃ kho saraṇaṃ khemaṃ etaṃ saraṇamuttamaṃ
etaṃ saraṇamāgamma sabbadukkhā pamuccati.
|24.193| Dullabho purisājañño na so sabbattha jāyati
yattha so jāyatī dhīro taṃ kulaṃ sukhamedhati.
|24.194| Sukho buddhānaṃ uppādo sukhā saddhammadesanā
sukhā saṅghassa sāmaggī samaggānaṃ tapo sukho.
|24.195| Pūjārahe pūjayato buddhe yadi ca sāvake
papañcasamatikkante tiṇṇasokapariddave
|24.196| te tādise pūjayato nibbute akutobhaye
na sakkā puññaṃ saṅkhātuṃ imettamapi kenaci.
Buddhavaggo cuddasamo.
Paṭhamakabhāṇavāraṃ.
---------
Dhammapadagāthāya paṇṇarasamo sukhavaggo
[25] |25.197| 15 Susukhaṃ vata jīvāma verinesu averino
verinesu manussesu viharāma averino.
|25.198| Susukhaṃ vata jīvāma āturesu anāturā
āturesu manussesu viharāma anāturā.
|25.199| Susukhaṃ vata jīvāma ussukesu anussukā
Ussukesu manussesu viharāma anussukā.
|25.200| Susukhaṃ vata jīvāma yesanno natthi kiñcanaṃ
pītibhakkhā bhavissāma devā ābhassarā yathā.
|25.201| Jayaṃ veraṃ pasavati dukkhaṃ seti parājito
upasanto sukhaṃ seti hitvā jayaparājayaṃ.
|25.202| Natthi rāgasamo aggi natthi dosasamo kali
natthi khandhādisā 1- dukkhā natthi santiparaṃ sukhaṃ.
|25.203| Jighacchā paramā rogā saṅkhārā paramā dukkhā
etaṃ ñatvā yathābhūtaṃ nibbānaṃ paramaṃ sukhaṃ.
|25.204| Ārogyaparamā lābhā santuṭṭhīparamaṃ dhanaṃ
vissāsaparamā ñāti nibbānaṃ paramaṃ sukhaṃ.
|25.205| Pavivekarasaṃ pitvā rasaṃ upasamassa ca
niddaro hoti nippāpo dhammapītirasaṃ pivaṃ.
|25.206| Sāhu dassanamariyānaṃ sannivāso sadā sukho
adassanena bālānaṃ niccameva sukhī siyā.
|25.207| Bālasaṅgatacārī hi dīghamaddhāna socati
dukkho bālehi saṃvāso amitteneva sabbadā.
Dhīro ca sukhasaṃvāso ñātīnaṃva samāgamo
|25.208| tasmā hi
dhīrañca paññañca bahussutañca
@Footnote: 1 Po. Ma. khandhasamā.
Dhorayhasīlaṃ vatavantamariyaṃ
taṃ tādisaṃ sappurisaṃ sumedhaṃ
bhajetha nakkhattapathaṃva candimā.
Sukhavaggo paṇṇarasamo.
------------
Dhammapadagāthāya soḷasamo piyavaggo
[26] |26.209| 16 Ayoge yuñjamattānaṃ yogasmiñca ayojayaṃ
atthaṃ hitvā piyaggāhī pihetattānuyoginaṃ.
|26.210| Mā piyehi samāgañchi appiyehi kudācanaṃ
piyānaṃ adassanaṃ dukkhaṃ appiyānañca dassanaṃ
|26.211| tasmā piyaṃ na kayirātha piyāpāyo hi pāpako
ganthā tesaṃ na vijjanti yesaṃ natthi piyāppiyaṃ.
|26.212| Piyato jāyatī soko piyato jāyatī bhayaṃ
piyato vippamuttassa natthi soko kuto bhayaṃ.
|26.213| Pemato jāyatī soko pemato jāyatī bhayaṃ
pemato vippamuttassa natthi soko kuto bhayaṃ.
|26.214| Ratiyā jāyatī soko ratiyā jāyatī bhayaṃ
ratiyā vippamuttassa natthi soko kuto bhayaṃ.
|26.215| Kāmato jāyatī soko kāmato jāyatī bhayaṃ
Kāmato vippamuttassa natthi soko kuto bhayaṃ.
|26.216| Taṇhāya jāyatī soko taṇhāya jāyatī bhayaṃ
taṇhāya vippamuttassa natthi soko kuto bhayaṃ.
|26.217| Sīladassanasampannaṃ dhammaṭṭhaṃ saccavādinaṃ 1-
attano kammakubbānaṃ tañjano kurute piyaṃ.
|26.218| Chandajāto anakkhāte manasā ca phuṭho 2- siyā
kāme 3- ca apaṭibaddhacitto uddhaṃsototi vuccati.
|26.219| Cirappavāsiṃ purisaṃ dūrato sotthimāgataṃ
ñātī mittā suhajjā ca abhinandanti āgataṃ
|26.220| tatheva katapuññampi asmā lokā paraṃ gataṃ
puññāni paṭigaṇhanti piyaṃ ñātīva āgataṃ.
Piyavaggo soḷasamo.
---------
Dhammapadagāthāya sattarasamo kodhavaggo
[27] |27.221| 17 Kodhaṃ jahe vippajaheyya mānaṃ
saññojanaṃ sabbamatikkameyya
tannāmarūpasmiṃ asajjamānaṃ
akiñcanaṃ nānupatanti dukkhā.
|27.222| Yo ve uppatitaṃ kodhaṃ rathaṃ bhantaṃva dhāraye 4-
@Footnote: 1 Ma. Yu. saccavedinaṃ . 2 Ma. Yu. phuṭo . 3 Ma. Yu. kāmesu ca.
@4 Ma. vāraye.
Tamahaṃ sārathiṃ brūmi rasmiggāho itaro jano.
|27.223| Akkodhena jine kodhaṃ asādhuṃ sādhunā jine
jine kadariyaṃ dānena saccenālikavādinaṃ.
|27.224| Saccaṃ bhaṇe na kujjheyya dajjā appasmi 1- yācito
etehi tīhi ṭhānehi gacche devāna santike.
|27.225| Ahiṃsakā ye munayo niccaṃ kāyena saṃvutā
te yanti accutaṃ ṭhānaṃ yattha gantvā na socare.
|27.226| Sadā jāgaramānānaṃ ahorattānusikkhinaṃ
nibbānaṃ adhimuttānaṃ atthaṃ gacchanti āsavā.
|27.227| Porāṇametaṃ atula netaṃ ajjatanāmiva
nindanti tuṇhimāsīnaṃ nindanti bahubhāṇinaṃ
mitabhāṇimpi nindanti natthi loke anindito.
|27.228| Na cāhu na ca bhavissati na cetarahi vijjati
ekantaṃ nindito poso ekantaṃ vā pasaṃsito
|27.229| yañce viññū pasaṃsanti anuvicca suve suve
acchiddavuttiṃ medhāviṃ paññāsīlasamāhitaṃ
|27.230| nekkhaṃ jambonadasseva ko taṃ ninditumarahati
devāpi naṃ pasaṃsanti brahmunāpi pasaṃsito.
|27.231| Kāyappakopaṃ rakkheyya kāyena saṃvuto siyā
kāyaduccaritaṃ hitvā kāyena sucaritaṃ care
@Footnote: 1 Ma. appampi
|27.232| Vacīpakopaṃ rakkheyya vācāya saṃvuto siyā
vacīduccaritaṃ hitvā vācāya sucaritaṃ care
|27.233| manopakopaṃ rakkheyya manasā saṃvuto siyā
manoduccaritaṃ hitvā manasā sucaritaṃ care
|27.234| kāyena saṃvutā dhīrā atho vācāya saṃvutā
manasā saṃvutā dhīrā te ve suparisaṃvutā.
Kodhavaggo sattarasamo.
----------
Dhammapadagāthāya aṭṭhārasamo malavaggo
[28] |28.235| 18 Paṇḍupalāsovadānisi
yamapurisāpi ca taṃ 1- upaṭṭhitā
uyyogamukhe ca tiṭṭhasi
pātheyyampi ca te na vijjati.
|28.236| So karohi dīpamattano
khippaṃ vāyama paṇḍito bhava
niddhantamalo anaṅgaṇo
dibbaṃ ariyabhūmimehisi 2-.
|28.237| Upanītavayo va dānisi
@Footnote: 1 Po. Ma. te. . 2 Ma. ariyabhūmiṃ upehisi.
Sampayātosi yamassa santikaṃ
vāsopi ca te natthi antarā
pātheyyampi ca te na vijjati.
|28.238| So karohi dīpamattano
khippaṃ vāyama paṇḍito bhava
niddhantamalo anaṅgaṇo
na puna jātijaraṃ upehisi.
|28.239| Anupubbena medhāvī thokaṃ thokaṃ khaṇe khaṇe
kammāro rajatasseva niddhame malamattano.
|28.240| Ayasā va malaṃ samuṭṭhitaṃ 1-
taduṭṭhāya tameva khādati
evaṃ atidhonacārinaṃ
sāni kammāni nayanti duggatiṃ.
|28.241| Asajjhāyamalā mantā anuṭṭhānamalā gharā
malaṃ vaṇṇassa kosajjaṃ pamādo rakkhato malaṃ.
|28.242| Malitthiyā duccaritaṃ maccheraṃ dadato malaṃ
malā ve pāpakā dhammā asmiṃ loke paramhi ca
|28.243| tato malā malataraṃ avijjā paramaṃ malaṃ
etaṃ malaṃ pahatvāna nimmalā hotha bhikkhavo.
@Footnote: 1 samuṭṭhāyātipi.
|28.244| Sujīvaṃ ahirikena kākasūrena dhaṃsinā
pakkhandinā pagabbhena saṅkiliṭṭhena jīvitaṃ.
|28.245| Hirīmatā ca dujjīvaṃ niccaṃ sucigavesinā
alīnenāpagabbhena suddhājīvena passatā.
|28.246| Yo pāṇamatimāpeti musāvādañca bhāsati
loke adinnaṃ ādiyati paradārañca gacchati
|28.247| surāmerayapānañca yo naro anuyuñjati
idhevameso lokasmiṃ mūlaṃ khanati attano.
|28.248| Evaṃ bho purisa jānāhi pāpadhammā asaññatā
mā taṃ lobho adhammo ca ciraṃ dukkhāya randhayuṃ.
|28.249| Dadāti ve yathāsaddhaṃ yathāpasādanaṃ jano
tattha yo maṅkuto hoti paresaṃ pānabhojane
na so divā vā rattiṃ vā samādhiṃ adhigacchati.
|28.250| Yassacetaṃ samucchinnaṃ mulaghaccaṃ 1- samūhataṃ
sa ve divā vā rattiṃ vā samādhiṃ adhigacchati.
|28.251| Natthi rāgasamo aggi natthi dosasamo gaho
natthi mohasamaṃ jālaṃ natthi taṇhāsamā nadī.
|28.252| Sudassaṃ vajjamaññesaṃ attano pana duddasaṃ
paresaṃ hi so vajjāni opunāti yathābhusaṃ
attano pana chādeti kaliṃva kitavā saṭho.
@Footnote: 1 Po. mūlaghacchaṃ.
|28.253| Paravajjānupassissa niccaṃ ujjhānasaññino
āsavā tassa vaḍḍhanti ārā so āsavakkhayā.
|28.254| Ākāseva padaṃ natthi samaṇo natthi bāhiro 1-
papañcābhiratā pajā nippapañcā tathāgatā.
|28.255| Ākāseva padaṃ natthi samaṇo natthi bāhiro 2-
saṅkhārā sassatā natthi natthi buddhānamiñjitaṃ.
Malavaggo aṭṭhārasamo.
-----------
Dhammapadagāthāya ekūnavīsatimo dhammaṭṭhavaggo
[29] |29.256| 19 Na tena hoti dhammaṭṭho yenatthaṃ sahasā naye
yo ca atthaṃ anatthañca ubho niccheyya paṇḍito
|29.257| asāhasena dhammena samena nayatī pare
dhammassa gutto medhāvī dhammaṭṭhoti pavuccati.
|29.258| Na tena paṇḍito hoti yāvatā bahu bhāsati
khemī averī abhayo paṇḍitoti pavuccati.
|29.259| Na tāvatā dhammadharo yāvatā bahu bhāsati
yo ca appampi sutvāna dhammaṃ kāyena passati
sa ve dhammadharo hoti yo dhammaṃ nappamajjati.
|29.260| Na tena thero hoti yenassa palitaṃsiro.
@Footnote: 1-2 Ma. Yu. bāhire.
Paripakko vayo tassa moghajiṇṇoti vuccati.
|29.261| Yamhi saccañca dhammo ca ahiṃsā saññamo damo
sa ve vantamalo dhīro so theroti pavuccati.
|29.262| Na vākkaraṇamattena vaṇṇapokkharatāya vā
sādhurūpo naro hoti issukī maccharī saṭho.
|29.263| Yassa cetaṃ samucchinnaṃ mūlaghaccaṃ samūhataṃ
sa vantadoso medhāvī sādhurūpoti vuccati.
|29.264| Na muṇḍakena samaṇo abbato alikaṃ bhaṇaṃ
icchālobhasamāpanno samaṇo kiṃ bhavissati.
|29.265| Yo ca sameti pāpāni aṇuṃthūlāni sabbaso
samitattā hi pāpānaṃ samaṇoti pavuccati.
|29.266| Na tena bhikkhu so hoti yāvatā bhikkhate pare
vissaṃ dhammaṃ samādāya bhikkhu hoti na tāvatā.
|29.267| Yodha puññañca pāpañca bāhetvā brahmacariyavā
saṅkhāya loke carati sa ve bhikkhūti vuccati.
|29.268| Na monena muni hoti mūḷharūpo aviddasu
yo ca tulaṃva paggayha varamādāya paṇḍito
|29.269| pāpāni parivajjeti sa muni tena so muni
yo munāti ubho loke muni tena pavuccati.
|29.270| Na tena ariyo hoti yena pāṇāni hiṃsati.
Ahiṃsā sabbapāṇānaṃ ariyoti pavuccati.
|29.271| Na sīlabbatamattena bāhusaccena vā pana
athavā samādhilābhena vivittasayanena vā
|29.272| phusāmi nekkhammasukhaṃ aputhujjanasevitaṃ
bhikkhu vissāsamāpādi appatto āsavakkhayaṃ.
Dhammaṭṭhavaggo ekūnavīsatimo.
-------------
Dhammapadagāthāya vīsatimo maggavaggo
[30] |30.273| 20 Maggānaṭṭhaṅgiko seṭṭho saccānaṃ caturo padā
virāgo seṭṭho dhammānaṃ dipadānañca cakkhumā
|30.274| eseva maggo natthañño dassanassa visuddhiyā.
Etañhi tumhe paṭipajjatha mārassetaṃ 1- pamohanaṃ
|30.275| etañhi tumhe paṭipannā dukkhassantaṃ karissatha.
Akkhāto vo mayā maggo aññāya sallasatthanaṃ 2-
|30.276| tumhehi kiccaṃ ātappaṃ akkhātāro tathāgatā
paṭipannā pamokkhanti jhāyino mārabandhanā.
|30.277| Sabbe saṅkhārā aniccāti yadā paññāya passati
atha nibbindati dukkhe esa maggo visuddhiyā.
|30.278| Sabbe saṅkhārā dukkhāti yadā paññāya passati
@Footnote: 1 Po. mārasenappamohanaṃ . 2 Ma. sallakantanaṃ. Yu. sallasanthanaṃ.
Atha nibbindati dukkhe esa maggo visuddhiyā.
|30.279| Sabbe dhammā anattāti yadā paññāya passati
atha nibbindati dukkhe esa maggo visuddhiyā.
|30.280| Uṭṭhānakālamhi anuṭṭhahāno
yuvā balī ālasiyaṃ upeto
saṃsannasaṅkappamano kusīto
paññāya maggaṃ alaso na vindati.
|30.281| Vācānurakkhī manasā susaṃvuto
kāyena ca akusalaṃ na kayirā
ete tayo kammapathe visodhaye
ārādhaye maggaṃ isippaveditaṃ.
|30.282| Yogā ve jāyatī 1- bhūri 2- ayogā bhūrisaṅkhayo
etaṃ dvedhā pathaṃ ñatvā bhavāya vibhavāya ca
tathattānaṃ niveseyya yathā bhūri pavaḍḍhati.
|30.283| Vanaṃ chindatha mā rukkhaṃ vanato jāyatī bhayaṃ
chetvā vanañca vanathañca nibbanā hotha bhikkhavo.
|30.284| Yāvaṃ hi vanatho na chijjati
aṇumattopi narassa nārisu
paṭibaddhamano va tāva so
vaccho khīrapakova mātari.
@Footnote: 1 Yu. jāyate . 2 Yu. bhūrī.
|30.285| Ucchinda sinehamattano
kumudaṃ sāradikaṃva pāṇinā
santimaggameva brūhaya
nibbānaṃ sugatena desitaṃ.
|30.286| Idha vassaṃ vasissāmi idha hemantagimhisu
iti bālo vicinteti antarāyaṃ na bujjhati.
|30.287| Taṃ puttapasusammattaṃ byāsattamanasaṃ naraṃ
suttaṃ gāmaṃ mahoghova maccu ādāya gacchati.
|30.288| Na santi puttā tāṇāya na pitā napi bandhavā
antakenādhipannassa natthi ñātīsu tāṇatā
|30.289| etamatthavasaṃ ñatvā paṇḍito sīlasaṃvuto
nibbānagamanaṃ maggaṃ khippameva visodhaye.
Maggavaggo vīsatimo.
-----------
Dhammapadagāthāya ekavīsatimo pakiṇṇakavaggo
[31] |31.290| 21 Mattāsukhapariccāgā passe ce vipulaṃ sukhaṃ
caje mattāsukhaṃ dhīro sampassaṃ vipulaṃ sukhaṃ.
|31.291| Paradukkhūpadhānena yo 1- attano sukhamicchati
verasaṃsaggasaṃsaṭṭho verā so na parimuccati.
@Footnote: 1 Ma. Yu. ayaṃ pāṭho na dissati.
|31.292| Yañhi kiccaṃ tadapaviddhaṃ akiccaṃ pana kayirati 1-
unnaḷānaṃ pamattānaṃ tesaṃ vaḍḍhanti āsavā.
|31.293| Yesañca susamāraddhā niccaṃ kāyagatā sati
akiccante na sevanti kicce sātaccakārino
satānaṃ sampajānānaṃ atthaṃ gacchanti āsavā.
|31.294| Mātaraṃ pitaraṃ hantvā rājāno dve ca khattiye
raṭṭhaṃ sānucaraṃ hantvā anīgho yāti brāhmaṇo.
|31.295| Mātaraṃ pitaraṃ hantvā rājāno dve ca sotthiye
veyyagghapañcamaṃ hantvā anīgho yāti brāhmaṇo.
|31.296| Suppabuddhaṃ pabujjhanti sadā gotamasāvakā
yesaṃ divā ca ratto ca niccaṃ buddhagatā sati.
|31.297| Suppabuddhaṃ pabujjhanti sadā gotamasāvakā
yesaṃ divā ca ratto ca niccaṃ dhammagatā sati.
|31.298| Suppabuddhaṃ pabujjhanti sadā gotamasāvakā
yesaṃ divā ca ratto ca niccaṃ saṅghagatā sati.
|31.299| Suppabuddhaṃ pabujjhanti sadā gotamasāvakā
yesaṃ divā ca ratto ca niccaṃ kāyagatā sati.
|31.300| Suppabuddhaṃ pabujjhanti sadā gotamasāvakā
yesaṃ divā ca ratto ca ahiṃsāya rato mano.
|31.301| Suppabuddhaṃ pabujjhanti sadā gotamasāvakā
@Footnote: 1 Ma. karīyati.
Yesaṃ divā ca ratto ca bhāvanāya rato mano.
|31.302| Duppabbajjaṃ durabhiramaṃ durāvāsā gharā dukkhā
dukkho samānasaṃvāso dukkhānupatitaddhagū
tasmā na caddhagū siyā na ca dukkhānupatito siyā.
|31.303| Saddho sīlena sampanno yasobhogasamappito
yaṃ yaṃ padesaṃ bhajati tattha tattheva pūjito.
|31.304| Dūre santo pakāsenti himavantova pabbato
asantettha na dissanti rattikhittā 1- yathā sarā.
|31.305| Ekāsanaṃ ekaseyyaṃ eko caramatandito
eko damayamattānaṃ vanante ramito siyā.
Pakiṇṇakavaggo ekavīsatimo.
-----------
Dhammapadagāthāya dvāvīsatimo nirayavaggo
[32] |32.306| 22 Abhūtavādī nirayaṃ upeti
yo vāpi katvā na karomīti cāha
ubhopi te pecca samā bhavanti
nihīnakammā manujā parattha.
|32.307| Kāsāvakaṇṭhā bahavo pāpadhammā asaññatā
pāpā pāpehi kammehi nirayante upapajjare.
@Footnote: 1 aññattha rattiṃ khittātipi dissati.
|32.308| Seyyo ayoguḷo bhutto tatto aggisikhūpamo
yañce bhuñjeyya dussīlo raṭṭhapiṇḍaṃ asaññato.
|32.309| Cattāri ṭhānāni naro pamatto
āpajjatī paradārūpasevī
apuññalābhaṃ nanikāmaseyyaṃ
nindaṃ tatiyaṃ nirayaṃ catutthaṃ.
|32.310| Apuññalābho ca gatī ca pāpikā
bhītassa bhītāya ratī ca thokikā
rājā ca daṇḍaṃ garukaṃ paṇeti
tasmā naro paradāraṃ na seve.
|32.311| Kuso yathā duggahito hatthamevānukantati
sāmaññaṃ dupparāmaṭṭhaṃ nirayāyūpakaḍḍhati.
|32.312| Yaṃ kiñci sithilaṃ kammaṃ saṅkiliṭṭhañca yaṃ vataṃ
saṅkassaraṃ brahmacariyaṃ na taṃ hoti mahapphalaṃ.
|32.313| Kayirañce 1- kayirathenaṃ daḷhamenaṃ parakkame
sithilo hi paribbājo bhiyyo ākirate rajaṃ.
|32.314| Akataṃ dukkataṃ seyyo pacchā tappati dukkataṃ
katañca sukataṃ seyyo yaṃ katvā nānutappati.
|32.315| Nagaraṃ yathā paccantaṃ guttaṃ santarabāhiraṃ
@Footnote: 1 kayirā ce kayirāthenantipi.
Evaṃ gopetha attānaṃ khaṇo vo 1- mā upaccagā
khaṇātītā hi socanti nirayamhi samappitā.
|32.316| Alajjitāye lajjanti lajjitāye na lajjare
micchādiṭṭhisamādānā sattā gacchanti duggatiṃ.
|32.317| Abhaye bhayadassino bhaye ca abhayadassino
micchādiṭṭhisamādānā sattā gacchanti duggatiṃ.
|32.318| Avajje vajjamatino vajje ca avajjadassino
micchādiṭṭhisamādānā sattā gacchanti duggatiṃ.
|32.319| Vajjañca vajjato ñatvā avajjañca avajjato
sammādiṭṭhisamādānā sattā gacchanti suggatiṃ.
Nirayavaggo dvāvīsatimo.
--------
Dhammapadagāthāya tevīsatimo nāgavaggo
[33] |33.320| 23 Ahaṃ nāgova saṅgāme cāpato patitaṃ saraṃ
ativākyantitikkhissaṃ dussīlo hi bahujjano.
|33.321| Dantaṃ nayanti samitiṃ dantaṃ rājābhirūhati
danto seṭṭho manussesu yotivākyantitikkhati.
|33.322| Varamassatarā dantā ājānīyā ca sindhavā
kuñjarā ca mahānāgā attadanto tato varaṃ.
@Footnote: 1 Yu. ve.
|33.323| Na hi etehi yānehi gaccheyya agataṃ disaṃ
yathāttanā sudantena danto dantena gacchati.
|33.324| Dhanapālako nāma kuñjaro
kaṭukappabhedano dunnivārayo
baddho kabalaṃ na bhuñjati
sumarati nāgavanassa kuñjaro.
|33.325| Middhī yadā hoti mahagghaso ca
niddāyitā samparivattasāyī
mahāvarāhova nivāpapuṭṭho
punappunaṃ gabbhamupeti mando.
|33.326| Idaṃ pure cittamacāri cārikaṃ 1-
yenicchakaṃ yatthakāmaṃ yathāsukhaṃ
tadajjahaṃ niggahessāmi yoniso
hatthippabhinnaṃ viya aṃkusaggaho.
|33.327| Appamādaratā hotha sacittamanurakkhatha
duggā uddharathattānaṃ paṅke sannova 2- kuñjaro.
|33.328| Sace labhetha nipakaṃ sahāyaṃ
saddhiṃcaraṃ sādhuvihāridhīraṃ
abhibhuyya sabbāni parissayāni
careyya tenattamano satīmā.
@Footnote: 1 Yu. cāritaṃ . 2 Yu. sattova.
|33.329| No ce labhetha nipakaṃ sahāyaṃ
saddhiṃcaraṃ sādhuvihāridhīraṃ
rājāva raṭṭhaṃ vijitaṃ pahāya
eko care mātaṅgaraññeva nāgo.
|33.330| Ekassa caritaṃ seyyo natthi bāle sahāyatā
eko care na ca pāpāni kayirā
appossukko mātaṅgaraññeva nāgo.
|33.331| Atthamhi jātamhi sukhā sahāyā
tuṭṭhī sukhā yā itarītarena
puññaṃ sukhaṃ jīvitasaṅkhayamhi
sabbassa dukkhassa sukhaṃ pahānaṃ.
|33.332| Sukhā matteyyatā loke atho petteyyatā sukhā
sukhā sāmaññatā loke atho brahmaññatā sukhā.
|33.333| Sukhaṃ yāva jarā sīlaṃ sukhā saddhā patiṭṭhitā
sukho paññāya paṭilābho pāpānaṃ akaraṇaṃ sukhaṃ.
Nāgavaggo tevīsatimo.
---------
Dhammapadagāthāya catuvīsatimo taṇhāvaggo
[34] |34.334| 24 Manujassa pamattacārino
taṇhā vaḍḍhati māluvā viya
so palavatī 1- hurāhuraṃ
phalamicchaṃva vanasmiṃ vānaro.
|34.335| Yaṃ esā sahatī jammī taṇhā loke visattikā
sokā tassa pavaḍḍhanti abhivaḍḍhaṃva bīraṇaṃ.
|34.336| Yo ce taṃ sahatī jammiṃ taṇhaṃ loke duraccayaṃ
sokā tamhā papatanti udabinduva pokkharā.
|34.337| Taṃ vo vadāmi bhaddaṃ vo yāvantettha samāgatā
taṇhāya mūlaṃ khaṇatha usīratthova bīraṇaṃ.
Mā vo naḷaṃ va sotova māro bhañji punappunaṃ.
|34.338| Yathāpi mūle anupaddave daḷhe
chinnopi rukkho punareva rūhati
evampi taṇhānusaye anūhate
nibbattati dukkhamidaṃ punappunaṃ.
|34.339| Yassa chattiṃsatīsotā manāpassavanā bhusā
mahā 2- vahanti duddiṭṭhiṃ saṅkappā rāganissitā.
@Footnote: 1 pariplavatītipi . 2 Yu. vāhāvahanti.
|34.340| Savanti sabbadhī sotā latā ubbhijja tiṭṭhati
tañca disvā lataṃ jātaṃ mūlaṃ paññāya chindatha.
|34.341| Saritāni sinehitāni ca
somanassāni bhavanti jantuno
te sātasitā sukhesino
te ve jātijarūpagā narā.
|34.342| Tasiṇāya purakkhatā pajā
parisappanti sasova bādhito 1-
saññojanasaṅgasattā 2-
dukkhamupenti punappunaṃ cirāya.
|34.343| Tasiṇāya purakkhatā pajā
parisappanti sasova bādhito 3-
tasmā tasiṇaṃ vinodaye
bhikkhu ākaṅkhaṃ 4- virāgamattano.
|34.344| Yo nibbanaṭho vanādhimutto
vanamutto vanameva dhāvati
taṃ puggalameva passatha
mutto bandhanameva dhāvati.
|34.345| Na taṃ daḷhaṃ bandhanamāhu dhīrā
yadāyasaṃ dārujaṃ pabbajañca
@Footnote: 1-3 Ma. banudhito. . 2 Ma. Yu. saññojanasaṅgasattakā . 4 Yu. ākaṅkhī.
Sārattarattā maṇikuṇḍalesu
puttesu dāresu ca yā apekkhā.
|34.346| Etaṃ daḷhaṃ bandhanamāhu dhīrā
ohārinaṃ sithilaṃ duppamuñcaṃ
etaṃpi chetvāna paribbajanti
anapekkhino kāmasukhaṃ pahāya.
|34.347| Ye rāgarattānupatanti sotaṃ
sayaṃ kataṃ makkaṭakova jālaṃ
etampi chetvāna vajanti dhīrā
anapekkhino sabbadukkhaṃ pahāya.
|34.348| Muñca pure muñca pacchato
majjhe muñca bhavassa pāragū
sabbattha vimuttamānaso
na puna jātijaraṃ upehisi.
|34.349| Vitakkamathitassa jantuno
tibbarāgassa subhānupassino
bhiyyo taṇhā pavaḍḍhati
esa kho daḷhaṃ karoti bandhanaṃ.
|34.350| Vitakkūpasame ca yo rato
asubhaṃ bhāvayatī sadā sato
Esa kho vyantikāhati
esacchecchati 1- mārabandhanaṃ.
|34.351| Niṭṭhaṃ gato asantāsī vītataṇho anaṅgaṇo
acchindi bhavasallāni antimoyaṃ samussayo.
|34.352| Vītataṇho anādāno niruttipadakovido
akkharānaṃ sannipātaṃ jaññā pubbaparāni ca
sa ve antimasārīro mahāpañño mahāpurisoti vuccati.
|34.353| Sabbābhibhū sabbavidūhamasmi
sabbesu dhammesu anūpalitto
sabbañjaho taṇhakkhaye vimutto
sayaṃ abhiññāya kamuddiseyyaṃ.
|34.354| Sabbadānaṃ dhammadānaṃ jināti
sabbaṃ rasaṃ dhammaraso jināti
sabbaṃ ratiṃ dhammaratī jināti
taṇhakkhayo sabbadukkhaṃ jināti.
|34.355| Hananti bhogā dummedhaṃ no 1- ce pāragavesino
bhogataṇhāya dummedho hanti aññeva attanaṃ.
|34.356| Tiṇadosāni khettāni rāgadosā ayaṃ pajā
tasmā hi vītarāgesu dinnaṃ hoti mahapphalaṃ.
@Footnote: 1 esacchindatītipi . 2 no ca itipi.
|34.357| Tiṇadosāni khettāni dosadosā ayaṃ pajā
tasmā hi vītadosesu dinnaṃ hoti mahapphalaṃ.
|34.358| Tiṇadosāni khettāni mohadosā ayaṃ pajā
tasmā hi vītamohesu dinnaṃ hoti mahapphalaṃ.
|34.359| Tiṇadosāni khettāni icchādosā ayaṃ pajā
tasmā hi vigaticchesu dinnaṃ hoti mahapphalaṃ.
Taṇhāvaggo catuvīsatimo.
------------
Dhammapadagāthāya pañcavīsatimo bhikkhuvaggo
[35] |35.360| 25 Cakkhunā saṃvaro sādhu sādhu sotena saṃvaro
ghānena saṃvaro sādhu sādhu jivhāya saṃvaro
|35.361| kāyena saṃvaro sādhu sādhu vācāya saṃvaro
manasā saṃvaro sādhu sādhu sabbattha saṃvaro
sabbattha saṃvuto bhikkhu sabbadukkhā pamuccati.
|35.362| Hatthasaññato pādasaññato
vācāya saññato saññatattamo
ajjhattarato samāhito
eko santusito tamāhu bhikkhu 1-.
|35.363| Yo mukhasaññato bhikkhu mantabhāṇī anuddhato
atthaṃ dhammañca dīpeti madhuraṃ tassa bhāsitaṃ.
@Footnote: 1 Ma. Yu. bhikkhuṃ.
|35.364| Dhammārāmo dhammarato dhammaṃ anuvicintayaṃ
dhammaṃ anussaraṃ bhikkhu saddhammā na parihāyati.
|35.365| Salābhaṃ nātimaññeyya nāññesaṃ pihayañcare
aññesaṃ pihayaṃ bhikkhu samādhiṃ nādhigacchati.
|35.366| Appalābhopi ce bhikkhu salābhaṃ nātimaññati
taṃ ve devā pasaṃsanti suddhājīviṃ atanditaṃ.
|35.367| Sabbaso nāmarūpasmiṃ yassa natthi mamāyitaṃ
asatā ca na socati sa ve bhikkhūti vuccati.
|35.368| Mettāvihārī yo bhikkhu pasanno buddhasāsane
adhigacche padaṃ santaṃ saṅkhārūpasamaṃ sukhaṃ.
|35.369| Siñca bhikkhu imaṃ nāvaṃ sittā te lahumessati
chetvā rāgañca dosañca tato nibbānamehisi.
|35.370| Pañca chinde pañca jahe pañca uttari bhāvaye
pañcasaṅgātigo bhikkhu oghatiṇṇoti vuccati.
|35.371| Jhāya bhikkhu mā ca pamādo
mā te kāmaguṇe bhamassu cittaṃ
mā lohaguḷaṃ gilī pamatto
mā kandi dukkhamidanti ḍayhamāno.
|35.372| Natthi jhānaṃ apaññassa paññā natthi ajhāyato 3-
yamhi jhānañca paññā ca sa ve nibbānasantike.
@Footnote: 1 Po. ajhāyino.
|35.373| Suññāgāraṃ paviṭṭhassa santacittassa bhikkhuno
amānusī ratī hoti sammā dhammaṃ vipassato.
|35.374| Yato yato sammasati khandhānaṃ udayabbayaṃ
labhatī pītipāmojjaṃ amataṃ taṃ vijānataṃ.
|35.375| Tatrāyamādi bhavati idha paññassa bhikkhuno
indriyagutti 1- santuṭṭhī pātimokkhe ca saṃvaro
|35.376| mitte bhajassu kalyāṇe suddhājīve atandite.
Paṭisanthāravuttyassa ācārakusalo siyā
tato pāmojjabahulo dukkhassantaṃ karissati 2-.
|35.377| Vassikā viya pupphāni maddavāni pamuñcati
evaṃ rāgañca dosañca vippamuñcetha bhikkhavo.
|35.378| Santakāyo santavāco santamano susamāhito
vantalokāmiso bhikkhu upasantoti vuccati.
|35.379| Attanā codayattānaṃ paṭimaṃsetamattanā
so attagutto satimā sukhaṃ bhikkhu vihāhisi.
|35.380| Attā hi attano nātho attā hi attano gati
tasmā saññama attānaṃ assaṃ bhadraṃva vāṇijo.
|35.381| Pāmojjabahulo bhikkhu pasanno buddhasāsane
adhigacche padaṃ santaṃ saṅkhārūpasamaṃ sukhaṃ.
|35.382| Yo have daharo bhikkhu yuñjati buddhasāsane
@Footnote: 1 Yu. indriyagutto . 2 Po. karissasi.
So imaṃ lokaṃ pabhāseti abbhā muttova candimā.
Bhikkhuvaggo pañcavīsatimo.
-----------
Dhammapadagāthāya chabbīsatimo brāhmaṇavaggo
[36] |36.383| 26 Chinda sotaṃ parakkamma kāme panūda brāhmaṇa
saṅkhārānaṃ khayaṃ ñatvā akataññūsi brāhmaṇa.
|36.384| Yadā dvayesu dhammesu pāragū hoti brāhmaṇo
athassa sabbe saṃyogā atthaṃ gacchanti jānato.
|36.385| Yassa pāraṃ apāraṃ vā pārāpāraṃ na vijjati
vītaddaraṃ visaññuttaṃ tamahaṃ brūmi brāhmaṇaṃ.
|36.386| Jhāyiṃ virajamāsīnaṃ katakiccaṃ anāsavaṃ
uttamatthaṃ anuppattaṃ tamahaṃ brūmi brāhmaṇaṃ.
|36.387| Divā tapati ādicco rattimābhāti candimā
sannaddho khattiyo tapati jhāyī tapati brāhmaṇo
atha sabbamahorattiṃ buddho tapati tejasā.
|36.388| Bāhitapāpo hi brāhmaṇo
samacariyā samaṇoti vuccati
pabbājayamattano malaṃ
tasmā pabbajitoti vuccati.
|36.389| Na brāhmaṇassa pahareyya nāssa muñcetha brāhmaṇo
dhi brāhmaṇassa hantāraṃ tato dhi yassa muñcati.
|36.390| Na brāhmaṇassetadakiñci seyyo
yadānisedho manaso piyehi
yato yato hiṃsamano nivattati
tato tato sammatimeva dukkhaṃ.
|36.391| Yassa kāyena vācāya manasā natthi dukkataṃ
saṃvutaṃ tīhi ṭhānehi tamahaṃ brūmi brāhmaṇaṃ.
|36.392| Yamhā dhammaṃ vijāneyya sammāsambuddhadesitaṃ
sakkaccaṃ naṃ namasseyya aggihuttaṃva brāhmaṇo.
|36.393| Na jaṭāhi na gottehi 1- na jaccā hoti brāhmaṇo
yamhi saccañca dhammo ca so sucī 2- so ca brāhmaṇo.
|36.394| Kinte jaṭāhi dummedha kinte ajinasāṭiyā
abbhantarante gahaṇaṃ bāhiraṃ parimajjasi.
|36.395| Paṃsukūladharaṃ jantuṃ kisandhamanisanthataṃ
ekaṃ vanasmiṃ jhāyantaṃ tamahaṃ brūmi brāhmaṇaṃ.
|36.396| Na cāhaṃ brāhmaṇaṃ brūmi yonijaṃ mattisambhavaṃ
bhovādī nāma so hoti sa ve hoti sakiñcano
akiñcanaṃ anādānaṃ tamahaṃ brūmi brāhmaṇaṃ.
|36.397| Sabbasaṃyojanaṃ chetvā yo ve na paritassati
@Footnote: 1 Po. Ma. Yu. gotutena . 2 Yu. sukhī.
Saṅgātigaṃ visaṃyuttaṃ tamahaṃ brūmi brāhmaṇaṃ.
|36.398| Chetvā naddhiṃ 1- varattañca sandānaṃ 2- sahanukkamaṃ
ukkhittapalighaṃ buddhaṃ tamahaṃ brūmi brāhmaṇaṃ.
|36.399| Akkosaṃ vadhabandhañca aduṭṭho yo titikkhati
khantībalaṃ balāṇīkaṃ tamahaṃ brūmi brāhmaṇaṃ.
|36.400| Akkodhanaṃ vatavantaṃ sīlavantaṃ anussadaṃ
dantaṃ antimasārīraṃ tamahaṃ brūmi brāhmaṇaṃ.
|36.401| Vāri pokkharapatteva āraggeriva sāsapo
yo na limpati kāmesu tamahaṃ brūmi brāhmaṇaṃ.
|36.402| Yo dukkhassa pajānāti idheva khayamattano
pannabhāraṃ visaññuttaṃ tamahaṃ brūmi brāhmaṇaṃ.
|36.403| Gambhīrapaññaṃ medhāviṃ maggāmaggassa kovidaṃ
uttamatthaṃ anuppattaṃ tamahaṃ brūmi brāhmaṇaṃ.
|36.404| Asaṃsaṭṭhaṃ gahaṭṭhehi anāgārehi cūbhayaṃ
anokasāriṃ appicchaṃ tamahaṃ brūmi brāhmaṇaṃ.
|36.405| Nidhāya daṇḍaṃ bhūtesu tasesu thāvaresu ca
yo na hanti na ghāteti tamahaṃ brūmi brāhmaṇaṃ.
|36.406| Aviruddhaṃ viruddhesu attadaṇḍesu nibbutaṃ
sādānesu anādānaṃ tamahaṃ brūmi brāhmaṇaṃ.
|36.407| Yassa rāgo ca doso ca māno makkho ca pātito
@Footnote: 1 Yu. nandī . 2 Yu. sandāmaṃ. Ma. Po. sandhānaṃ.
Sāsaporiva āraggā tamahaṃ brūmi brāhmaṇaṃ.
|36.408| Akakkasaṃ viññāpaniṃ giraṃ saccaṃ udīraye
yāya nābhisaje kañci tamahaṃ brūmi brāhmaṇaṃ.
|36.409| Yodha dīghaṃ vā rassaṃ vā aṇuṃ thūlaṃ subhāsubhaṃ
loke adinnaṃ nādiyati tamahaṃ brūmi brāhmaṇaṃ.
|36.410| Āsā yassa na vijjanti asmiṃ loke paramhi ca
nirāsayaṃ 1- visaṃyuttaṃ tamahaṃ brūmi brāhmaṇaṃ.
|36.411| Yassālayā na vijjanti aññāya akathaṅkathī
amatogadhaṃ anuppattaṃ tamahaṃ brūmi brāhmaṇaṃ.
|36.412| Yodha puññañca pāpañca ubho saṅgaṃ upaccagā
asokaṃ virajaṃ suddhaṃ tamahaṃ brūmi brāhmaṇaṃ.
|36.413| Candaṃva vimalaṃ suddhaṃ vippasannamanāvilaṃ
nandibhavaparikkhīṇaṃ tamahaṃ brūmi brāhmaṇaṃ.
|36.414| Yo imaṃ palipathaṃ duggaṃ saṃsāraṃ mohamaccagā
tiṇṇo pāragato jhāyī anejo akathaṅkathī
anupādāya nibbuto tamahaṃ brūmi brāhmaṇaṃ.
|36.415| Yodha kāme pahantvāna anāgāro paribbaje
kāmabhavaparikkhīṇaṃ tamahaṃ brūmi brāhmaṇaṃ.
|36.416| Yodha taṇhaṃ pahantvāna anāgāro paribbaje
@Footnote: 1 nirāsāsantipi.
Taṇhābhavaparikkhīṇaṃ tamahaṃ brūmi brāhmaṇaṃ.
|36.417| Hitvā mānusakaṃ yogaṃ dibbaṃ yogaṃ upaccagā
sabbayogavisaṃyuttaṃ tamahaṃ brūmi brāhmaṇaṃ.
|36.418| Hitvā ratiñca aratiñca sītibhūtaṃ nirūpadhiṃ
sabbalokābhibhuṃ vīraṃ tamahaṃ brūmi brāhmaṇaṃ.
|36.419| Cutiṃ yo vedi sattānaṃ upapattiñca sabbaso
asattaṃ sugataṃ buddhaṃ tamahaṃ brūmi brāhmaṇaṃ.
|36.420| Yassa gatiṃ na jānanti devā gandhabbamānusā
khīṇāsavaṃ arahantaṃ tamahaṃ brūmi brāhmaṇaṃ.
|36.421| Yassa pure ca pacchā ca majjhe ca natthi kiñcanaṃ
akiñcanaṃ anādānaṃ tamahaṃ brūmi brāhmaṇaṃ.
|36.422| Usabhaṃ pavaraṃ vīraṃ mahesiṃ vijitāvinaṃ
anejaṃ nhātakaṃ buddhaṃ tamahaṃ brūmi brāhmaṇaṃ.
|36.423| Pubbenivāsaṃ yo vedi saggāpāyañca passati
atho jātikkhayaṃ patto abhiññā vosito muni
sabbavositavosānaṃ tamahaṃ brūmi brāhmaṇaṃ.
Brāhmaṇavaggo chabbīsatimo.
Dhammapadagāthāya uddānaṃ
The Pali Tipitaka in Roman Character Volume 25 page 30-71.
https://84000.org/tipitaka/read/roman_item.php?book=25&item=19&items=18
Classified by [Item Number] :-
http://84000.org/tipitaka/read/roman_item.php?book=25&item=19&items=18&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=25&item=19&items=18
Compare with The Royal Version of Thai Tipitaka :-
https://84000.org/tipitaka/read/byitem.php?book=25&item=19&items=18
Study Atthakatha :-
https://84000.org/tipitaka/attha/attha.php?b=25&i=19
Contents of The Tipitaka Volume 25
https://84000.org/tipitaka/read/?index_25
https://84000.org/tipitaka/english/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
