paliTIPITAKA Volume 2 - Vinaya Pitaka 2

[619] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sambahulā bhikkhū ca paribbājakā ca sāketā sāvatthiṃ addhānamaggapaṭipannā honti . antarāmagge corā nikkhamitvā te acchindiṃsu . Sāvatthiyā rājabhaṭā nikkhamitvā te core sabhaṇḍe gahetvā bhikkhūnaṃ santike dūtaṃ pāhesuṃ āgacchantu bhaddantā sakaṃ sakaṃ cīvaraṃ sañjānitvā gaṇhantūti . bhikkhū cīvaraṃ ^1- na sañjānanti . Manussā ^2- ujjhāyanti khīyanti vipācenti kathaṃ hi nāma bhaddantā attano attano cīvaraṃ na sañjānissantīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ. {619.1} Athakho te bhikkhū bhagavato etamatthaṃ ārocesuṃ. Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi tenahi bhikkhave bhikkhūnaṃ sikkhāpadaṃ paññāpessāmi dasa atthavase paṭicca saṅghasuṭṭhutāya saṅghaphāsutāya .pe. saddhammaṭṭhitiyā vinayānuggahāya. Evañca pana bhikkhave imaṃ sikkhāpadaṃ uddiseyyātha {619.2} navaṃ pana bhikkhunā cīvaralābhena tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ ādātabbaṃ nīlaṃ vā kaddamaṃ vā kāḷasāmaṃ vā . anādā ce bhikkhu tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ @Footnote: ¹ Ma. ayaṃ pāṭho natthi . ² Ma. te. Navaṃ cīvaraṃ paribhuñjeyya pācittiyanti. [620] Navaṃ nāma akatakappaṃ vuccati . cīvaraṃ nāma channaṃ cīvarānaṃ aññataraṃ cīvaraṃ . tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ ādātabbanti antamaso kusaggenapi ādātabbaṃ . nīlaṃ nāma dve nīlāni kaṃsanīlaṃ palāsanīlaṃ . kaddamo nāma odako vuccati . Kāḷasāmaṃ nāma yaṅkiñci kāḷakaṃ ^1- . anādā ce bhikkhu tiṇṇaṃ dubbaṇṇakaraṇānaṃ aññataraṃ dubbaṇṇakaraṇanti antamaso kusaggenapi anādiyitvā tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ navaṃ cīvaraṃ paribhuñjati āpatti pācittiyassa. [621] Anādinne anādinnasaññī paribhuñjati āpatti pācittiyassa . anādinne vematiko paribhuñjati āpatti pācittiyassa. Anādinne ādinnasaññī paribhuñjati āpatti pācittiyassa . Ādinne anādinnasaññī āpatti dukkaṭassa . ādinne vematiko āpatti dukkaṭassa. Ādinne ādinnasaññī anāpatti. [622] Anāpatti ādiyitvā paribhuñjati kappo naṭṭho hoti kappakatokāso jiṇṇo hoti kappakatena akappakataṃ saṃsibbitaṃ hoti aggaḷe anuvāte paribhaṇḍe ummattakassa ādikammikassāti. Aṭṭhamasikkhāpadaṃ niṭṭhitaṃ. -------- @Footnote: ¹ Ma. Yu. kāḷasāmakaṃ. Navamasikkhāpadaṃ [623] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā upanando sakyaputto bhātuno saddhivihārikassa bhikkhuno sāmaṃ cīvaraṃ vikappetvā apaccuddhārakaṃ ^1- paribhuñjati . athakho so bhikkhu bhikkhūnaṃ etamatthaṃ ārocesi ayaṃ āvuso āyasmā upanando sakyaputto mayhaṃ sāmaṃ cīvaraṃ vikappetvā apaccuddhārakaṃ paribhuñjatīti . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā upanando sakyaputto bhikkhussa sāmaṃ cīvaraṃ vikappetvā apaccuddhārakaṃ paribhuñjissatīti .pe. saccaṃ kira tvaṃ upananda bhikkhussa sāmaṃ cīvaraṃ vikappetvā apaccuddhārakaṃ paribhuñjasīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa bhikkhussa sāmaṃ cīvaraṃ vikappetvā apaccuddhārakaṃ paribhuñjissasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {623.1} yo pana bhikkhu bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā apaccuddhārakaṃ paribhuñjeyya pācittiyanti. @Footnote: ¹ Ma. Yu. apaccuddhāraṇaṃ. evamuparipi. [624] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti. Bhikkhussāti aññassa bhikkhussa. {624.1} Bhikkhunī nāma ubhatosaṅghe upasampannā . sikkhamānā nāma dve vassāni chasu dhammesu sikkhitasikkhā . sāmaṇero nāma dasasikkhāpadiko . sāmaṇerī nāma dasasikkhāpadikā . sāmanti sayaṃ vikappetvā . cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ . vikappanaṃ nāma dve vikappanā sammukhāvikappanā ca parammukhāvikappanā ca . sammukhāvikappanā nāma imaṃ cīvaraṃ tuyhaṃ vikappemi itthannāmassa vāti . parammukhāvikappanā nāma imaṃ cīvaraṃ vikappanatthāya tuyhaṃ dammīti . tena vattabbo ko te mitto vā sandiṭṭho vāti . itthannāmo ca itthannāmo cāti . Tena vattabbo ahaṃ tesaṃ dammi tesaṃ santakaṃ paribhuñja vā vissajjehi vā yathāpaccayaṃ vā karohīti . apaccuddhārakaṃ nāma tassa vā adinnaṃ tassa vā avissāsento ^1- paribhuñjati āpatti pācittiyassa. [625] Apaccuddhārake apaccuddhārakasaññī paribhuñjati āpatti pācittiyassa . apaccuddhārake vematiko paribhuñjati āpatti pācittiyassa . apaccuddhārake paccuddhārakasaññī paribhuñjati āpatti pācittiyassa . adhiṭṭheti vā vissajjeti vā āpatti dukkaṭassa . paccuddhārake apaccuddhārakasaññī āpatti @Footnote: ¹ Ma. avissasanto. Dukkaṭassa . paccuddhārake vematiko āpatti dukkaṭassa . Paccuddhārake paccuddhārakasaññī anāpatti. [626] Anāpatti so vā deti tassa vā vissāsento ^1- paribhuñjati ummattakassa ādikammikassāti. Navamasikkhāpadaṃ niṭṭhitaṃ. ------- @Footnote: ¹ Ma. vissasanto. Dasamasikkhāpadaṃ [627] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sattarasavaggiyā bhikkhū asannihitaparikkhārā honti . chabbaggiyā bhikkhū sattarasavaggiyānaṃ bhikkhūnaṃ pattaṃpi cīvaraṃpi apanidhenti . sattarasavaggiyā bhikkhū chabbaggiye bhikkhū etadavocuṃ dethāvuso amhākaṃ pattaṃpi cīvaraṃpīti . chabbaggiyā bhikkhū hasanti . te rodanti . bhikkhū evamāhaṃsu kissa tumhe āvuso rodathāti . ime āvuso chabbaggiyā bhikkhū amhākaṃ pattaṃpi cīvaraṃpi apanidhentīti. {627.1} Ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū bhikkhūnaṃ pattaṃpi cīvaraṃpi apanidhessantīti .pe. saccaṃ kira tumhe bhikkhave bhikkhūnaṃ pattaṃpi cīvaraṃpi apanidhethāti . saccaṃ bhagavāti . vigarahi buddho bhagavā kathaṃ hi nāma tumhe moghapurisā bhikkhūnaṃ pattaṃpi cīvaraṃpi apanidhessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {627.2} yo pana bhikkhu bhikkhussa pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidheyya vā apanidhāpeyya vā antamaso hassāpekkhopi ^1- pācittiyanti. @Footnote: ¹ Ma. hasāpekkhopi. Yu. hāsāpekkhopi. evamuparipi.

The Pali Tipitaka in Roman Character Volume 2 page 404-409. https://84000.org/tipitaka/read/roman_item.php?book=2&item=619&items=9 Classified by [Item Number] :- http://84000.org/tipitaka/read/roman_item.php?book=2&item=619&items=9&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=2&item=619&items=9 Compare with The Royal Version of Thai Tipitaka :- https://84000.org/tipitaka/read/byitem.php?book=2&item=619&items=9 Study Atthakatha :- https://84000.org/tipitaka/attha/attha.php?b=2&i=619 Contents of The Tipitaka Volume 2 https://84000.org/tipitaka/read/?index_2 https://84000.org/tipitaka/english/?index_2