paliTIPITAKA Volume 19 - Sutta Pitaka 11

[627] Evamme sutaṃ ekaṃ samayaṃ bhagavā rājagahe viharati gijjhakūṭe pabbate . atha kho abhayo rājakumāro yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinno kho abhayo rājakumāro bhagavantaṃ etadavoca [628] Pūraṇo bhante kassapo evamāha natthi hetu natthi paccayo aññāṇāya adassanāya ahetu appaccayo aññāṇaṃ adassanaṃ hoti . natthi hetu natthi paccayo ñāṇāya dassanāya ahetu appaccayo ñāṇaṃ dassanaṃ hotīti. Idha bhagavā kimāhāti. [629] Atthi rājakumāra hetu atthi paccayo aññāṇāya adassanāya sahetu sappaccayo aññāṇaṃ adassanaṃ hoti . atthi rājakumāra hetu atthi paccayo ñāṇāya dassanāya sahetu Sappaccayo ñāṇaṃ dassanaṃ hotīti. [630] Katamo ^[1]- bhante hetu katamo paccayo aññāṇāya adassanāya. Kathaṃ sahetu sappaccayo aññāṇaṃ adassanaṃ hotīti. [631] Yasmiṃ kho rājakumāra samaye kāmarāgapariyuṭṭhitena cetasā viharati kāmarāgaparetena uppannassa ca kāmarāgassa nissaraṇaṃ yathābhūtaṃ nappajānāti na passati . ayampi kho rājakumāra hetu ayaṃ paccayo aññāṇāya adassanāya . evampi sahetu sappaccayo aññāṇaṃ adassanaṃ hoti. [632] Puna caparaṃ rājakumāra yasmiṃ samaye byāpādapariyuṭṭhitena cetasā viharati byāpādaparetena uppannassa ca byāpādassa nissaraṇaṃ yathābhūtaṃ nappajānāti na passati . ayampi kho rājakumāra hetu ayaṃ paccayo aññāṇāya adassanāya . evampi sahetu sappaccayo aññāṇaṃ adassanaṃ hoti. [633] Puna caparaṃ rājakumāra yasmiṃ samaye thīnamiddhapariyuṭṭhitena cetasā. [634] Uddhaccakukkuccapariyuṭṭhitena cetasā. [635] Vicikicchāpariyuṭṭhitena cetasā viharati vicikicchāparetena uppannāya ca vicikicchāya nissaraṇaṃ yathābhūtaṃ nappajānāti na passati . Ayampi kho rājakumāra hetu ayaṃ paccayo aññāṇāya adassanāya . Evampi sahetu sappaccayo aññāṇaṃ adassanaṃ hotīti. @Footnote: ¹ Ma. Yu. pana. [636] Ko nāmāyaṃ bhante dhammapariyāyoti . Nīvaraṇā nāmete rājakumārāti . taggha bhagavā nīvaraṇā taggha sugata nīvaraṇā ekamekenapi kho bhante nīvaraṇena abhibhūto yathābhūtaṃ nappajāneyya na passeyya ko pana vādo pañcahi nīvaraṇehi. [637] Katamo pana bhante hetu katamo paccayo ñāṇāya dassanāya. Kathaṃ sahetu sappaccayo ñāṇaṃ dassanaṃ hotīti. [638] Idha rājakumāra bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . so satisambojjhaṅgaṃ bhāveti ^1- tena cittena yathābhūtaṃ pajānāti passati . ayampi kho rājakumāra hetu ayaṃ paccayo ñāṇāya dassanāya . evampi sahetu sappaccayo ñāṇaṃ dassanaṃ hoti. [639] Puna caparaṃ rājakumāra bhikkhu .pe. upekkhāsombajjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . So upekkhāsambojjhaṅgaṃ bhāveti ^2- tena cittena yathābhūtaṃ pajānāti passati . ayaṃpi kho rājakumāra hetu ayaṃ paccayo ñāṇāya dassanāya . evampi sahetu sappaccayo ñāṇaṃ dassanaṃ hotīti. [640] Ko nāmāyaṃ bhante dhammapariyāyoti . bojjhaṅgā nāmete rājakumārāti . taggha bhagavā bojjhaṅgā taggha sugata bojjhaṅgā ekamekenapi kho bhante bojjhaṅgena samannāgato @Footnote: ^1-2 Ma. Yu. bhāvitena cittena. Yathābhūtaṃ pajāneyya passeyya ko pana vādo sattahi bojjhaṅgehi. Yopi me bhante gijjhakūṭaṃ pabbataṃ ārohantassa kāyakilamatho cittakilamatho sopi me paṭippassaddho dhammo ca me abhisametoti. Uddānaṃ bhavati āhārāpariyāyaggi ^1- mittaṃ ^2- sagāravena ca abhayo pucchito pañhaṃ gijjhakūṭamhi pabbateti. Bojjhaṅgasaṃyuttassa bojjhaṅgachaṭṭhakaṃ chaṭṭhaṃ. -------------- @Footnote: ¹ Ma. āhārāpariyāyamaggi. ² Ma. Yu. mettaṃ saṅgāravena ca. Bojjhaṅgassa ānāpānādipeyyālo sattamo [641] Sāvatthīnidānaṃ . aṭṭhikasaññā bhikkhave bhāvitā bahulīkatā mahapphalā hoti mahānisaṃsā . kathaṃ bhāvitā ca bhikkhave aṭṭhikasaññā kathaṃ bahulīkatā mahapphalā hoti mahānisaṃsā . idha bhikkhave bhikkhu aṭṭhikasaññāsahagataṃ satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ .pe. aṭṭhikasaññāsahagataṃ upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitā kho bhikkhave aṭṭhikasaññā evaṃ bahulīkatā mahapphalā hoti mahānisaṃsāti. [642] Sāvatthīnidānaṃ . aṭṭhikasaññāya bhikkhave bhāvitāya bahulīkatāya davinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā sati vā upādisese anāgāmitā . kathaṃ bhāvitāya ca kho bhikkhave aṭṭhikasaññāya kathaṃ bahulīkatāya dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā sati vā upādisese anāgāmitā. Idha bhikkhave bhikkhu aṭṭhikasaññāsahagataṃ satisambojjhaṅgaṃ bhāveti .pe. upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitāya kho bhikkhave aṭṭhikasaññāya evaṃ bahulīkatāya dvinnaṃ phalānaṃ aññataraṃ Phalaṃ pāṭikaṅkhaṃ diṭṭheva dhamme aññā sati vā upādisese anāgāmitāti. [643] Sāvatthīnidānaṃ . aṭṭhikasaññā bhikkhave bhāvitā bahulīkatā mahato atthāya saṃvattati . kathaṃ bhāvitā ca bhikkhave aṭṭhikasaññā kathaṃ bahulīkatā mahato atthāya saṃvattati . idha bhikkhave bhikkhu aṭṭhikasaññāsahagataṃ satisambojjhaṅgaṃ bhāveti .pe. Aṭṭhikasaññāsahagataṃ upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitā kho bhikkhave aṭṭhikasaññā evaṃ bahulīkatā mahato atthāya saṃvattatīti. [644] Sāvatthīnidānaṃ . aṭṭhikasaññā bhikkhave bhāvitā bahulīkatā mahato yogakkhemāya saṃvattati . kathaṃ bhāvitā ca bhikkhave aṭṭhikasaññā kathaṃ bahulīkatā mahato yogakkhemāya saṃvattati . idha bhikkhave bhikkhu aṭṭhikasaññāsahagataṃ satisambojjhaṅgaṃ bhāveti .pe. aṭṭhikasaññā- sahagataṃ upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitā kho bhikkhave aṭṭhikasaññā evaṃ bahulīkatā mahato yogakkhemāya saṃvattatīti. [645] Sāvatthīnidānaṃ . aṭṭhikasaññā bhikkhave bhāvitā bahulīkatā mahato saṃvegāya saṃvattati . kathaṃ bhāvitā ca bhikkhave aṭṭhikasaññā kathaṃ bahulīkatā mahato saṃvegāya saṃvattati . idha bhikkhave bhikkhu aṭṭhikasaññā- sahagataṃ satisambojjhaṅgaṃ bhāveti .pe. aṭṭhikasaññāsahagataṃ Upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . evaṃ bhāvitā kho bhikkhave aṭṭhikasaññā evaṃ bahulīkatā mahato saṃvegāya saṃvattatīti. [646] Sāvatthīnidānaṃ . aṭṭhikasaññā bhikkhave bhāvitā bahulīkatā mahato phāsuvihārāya saṃvattati . kathaṃ bhāvitā ca bhikkhave aṭṭhikasaññā kathaṃ bahulīkatā mahato phāsuvihārāya saṃvattati . idha bhikkhave bhikkhu aṭṭhikasaññāsahagataṃ satisambojjhaṅgaṃ bhāveti .pe. aṭṭhikasaññāsahagataṃ upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ . Evaṃ bhāvitā kho bhikkhave aṭṭhikasaññā evaṃ bahulīkatā mahato phāsuvihārāya saṃvattatīti. [647] Puḷavakasaññā ^1- bhikkhave bhāvitā .pe. [648] Vinīlakasaññā bhikkhave. [649] Vicchiddakasaññā bhikkhave. [650] Uddhumātasaññā ^2- bhikkhave. [651] Mettā bhikkhave bhāvitā. [652] Karuṇā bhikkhave bhāvitā.

The Pali Tipitaka in Roman Character Volume 19 page 175-181. https://84000.org/tipitaka/read/roman_item.php?book=19&item=627&items=26 Classified by [Item Number] :- http://84000.org/tipitaka/read/roman_item.php?book=19&item=627&items=26&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=627&items=26 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=627&items=26 Study Atthakatha :- https://84000.org/tipitaka/attha/attha.php?b=19&i=627 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19