paliTIPITAKA Volume 19 - Sutta Pitaka 11

[1734] Ye ca kho keci bhikkhave samaṇā vā brāhmaṇā vā idaṃ dukkhanti yathābhūtaṃ pajānanti .pe. ayaṃ dukkhanirodhagāminī @Footnote: ¹ Po. Ma. ceva. ² Yu. bhikkhu. evamuparipi. Paṭipadāti yathābhūtaṃ pajānanti . te jātisaṃvattanikesu saṅkhāresu nābhiramanti .pe. anabhiratā . na abhisaṅkharonti . anabhisaṅkharitvā jātipariḷāhenapi na pariḍayhanti jarāpariḷāhenapi na pariḍayhanti maraṇapariḷāhenapi na pariḍayhanti sokaparidevadukkhadomanassupāyāsa- pariḷāhenapi na pariḍayhanti . te parimuccanti jātiyā jarāya maraṇena sokehi paridevehi dukkhehi domanassehi upāyāsehi parimuccanti dukkhasmāti vadāmi . tasmā tiha bhikkhave idaṃ dukkhanti yogo karaṇīyo .pe. Ayaṃ dukkhanirodhagāminī paṭipadāti yogo karaṇīyoti. [1735] Yo ca ^1- kho bhikkhave evaṃ vadeyya ahaṃ dukkhaṃ ariyasaccaṃ yathābhūtaṃ anabhisamecca .pe. dukkhanirodhagāminīpaṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmīti netaṃ ṭhānaṃ vijjati . Seyyathāpi bhikkhave yo evaṃ vadeyya ahaṃ kūṭāgārassa heṭṭhimaṃ gharaṃ akaritvā uparimaṃ gharaṃ āropessāmīti netaṃ ṭhānaṃ vijjati . Evameva kho bhikkhave yo evaṃ vadeyya ahaṃ dukkhaṃ ariyasaccaṃ yathābhūtaṃ anabhisamecca .pe. dukkhanirodhagāminīpaṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmīti netaṃ ṭhānaṃ vijjati.

The Pali Tipitaka in Roman Character Volume 19 page 563-564. https://84000.org/tipitaka/read/roman_item.php?book=19&item=1734&items=2&mode=bracket Classified by content :- https://84000.org/tipitaka/read/roman_item.php?book=19&item=1734&items=2 Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=1734&items=2&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=19&item=1734&items=2&mode=bracket Study Atthakatha :- https://84000.org/tipitaka/attha/attha.php?b=19&i=1734 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19