paliTIPITAKA Volume 14 - Sutta Pitaka 6

Isigilisuttaṃ [247] Evamme sutaṃ ekaṃ samayaṃ bhagavā rājagahe viharati isigilismiṃ pabbate . tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ. [248] Bhagavā etadavoca passatha no tumhe bhikkhave etaṃ vebhāraṃ pabbatanti . evambhante . etassa kho bhikkhave vebhārassa pabbatassa aññāva samaññā ahosi aññā paññatti . passatha no tumhe bhikkhave etaṃ paṇḍavaṃ pabbatanti . evambhante . Etassapi kho bhikkhave paṇḍavassa pabbatassa aññāva samaññā ahosi aññā paññatti . passatha no tumhe bhikkhave etaṃ vepullaṃ pabbatanti . evambhante . etassapi kho bhikkhave vepullassa pabbatassa aññāva samaññā ahosi aññā paññatti . passatha no tumhe bhikkhave etaṃ gijjhakūṭaṃ pabbatanti . evambhante . Etassapi kho bhikkhave gijjhakūṭassa pabbatassa aññāva samaññā ahosi aññā paññatti . passatha no tumhe bhikkhave imaṃ isigiliṃ pabbatanti . evambhante . imassa kho pana bhikkhave isigilissa pabbatassa esāva samaññā ahosi esā paññatti. [249] Bhūtapubbaṃ bhikkhave pañca paccekabuddhasatāni imasmiṃ isigilismiṃ pabbate ciranivāsino ahesuṃ . te imaṃ pabbataṃ pavisantā Dissanti paviṭṭhā na dissanti . tamenaṃ manussā disvā evamāhaṃsu ayaṃ pabbato ime isī gilatīti isigili isigilītveva samaññā udapādi. Ācikkhissāmi bhikkhave paccekabuddhānaṃ nāmāni kittayissāmi bhikkhave paccekabuddhānaṃ nāmāni desissāmi bhikkhave paccekabuddhānaṃ nāmāni taṃ suṇātha sādhukaṃ manasikarotha bhāsissāmīti . Evambhanteti jo te bhikkhū bhagavato paccassosuṃ. [250] Bhagavā etadavoca ariṭṭho nāma bhikkhave paccekasambuddho ^1- imasmiṃ isigilismiṃ pabbate ciranivāsī ahosi . upariṭṭho nāma bhikkhave paccekasambuddho imasmiṃ isigilismiṃ pabbate ciranivāsī ahosi . tagarasikhī nāma bhikkhave paccekasambuddho imasmiṃ isigilismiṃ pabbate ciranivāsī ahosi . yasassī nāma bhikkhave paccekasambuddho imasmiṃ isigilismiṃ pabbate ciranivāsī ahosi . sudassano nāma bhikkhave paccekasambuddho imasmiṃ isigilismiṃ pabbate ciranivāsī ahosi . piyadassī nāma bhikkhave paccekasambuddho imasmiṃ isigilismiṃ pabbate ciranivāsī ahosi . gandhāro nāma bhikkhave paccekasambuddho imasmiṃ isigilismiṃ pabbate ciranivāsī ahosi . piṇḍolo nāma bhikkhave paccekasambuddho imasmiṃ isigilismiṃ pabbate ciranivāsī ahosi . upāsabho nāma bhikkhave paccekasambuddho imasmiṃ isigilismiṃ pabbate ciranivāsī ahosi . nitho nāma bhikkhave paccekasambuddho imasmiṃ isigilismiṃ pabbate ciranivāsī ahosi . tatho nāma bhikkhave @Footnote: ¹ Yu. sabbattha paccekabuddho. Paccekasambuddho imasmiṃ isigilismiṃ pabbate ciranivāsī ahosi . Sutavā nāma bhikkhave paccekasambuddho imasmiṃ isigilismiṃ pabbate ciranivāsī ahosi . bhāvitatto nāma bhikkhave paccekasambuddho imasmiṃ isigilismiṃ pabbate ciranivāsī ahosi. [251] Ye sattasārā anighā nirāsā paccekamevajjhagamuṃ subodhiṃ tesaṃ visallāna naruttamānaṃ nāmāni me kittayato suṇātha ariṭṭho upariṭṭho tagarasikhī yasassī sudassano piyadassī ca buddho ^1- gandhāro piṇḍolo upāsabho ca nitho tatho sutavā bhāvitatto sumbho subho methulo ^2- aṭṭhamo ca athassumegho anigho sudāṭho paccekabuddhā bhavanettikhīṇā hiṅgū ca hiṅgo ca mahānubhāvā dve jālino munino aṭṭhako ca atha kosallo ^3- buddho atho subāhu upanemiso nemiso santacitto sacco tatho virajo paṇḍito ca @Footnote: ¹ Ma. susambuddho . ² matulo . ³ Po. Yu. kosalo. Kāḷūpakāḷā vijito jito ca aṅgo ca paṅgo ca guticchito ^1- ca passī jahi upadhiṃ dukkhamūlaṃ aparājito mārabalaṃ ajesi satthā pavattā sarabhaṅgo lomahaṃso uccaṅgamāyo asito anāsavo manomayo mānacchido ca bandhumā tadādhimutto vimalo ca ketumā ketumbarāgo ca mātaṅgo ariyo athaccuto accutagāmabyāmako sumaṅgalo dabbilo supatiṭṭhito asayho khemābhirato ca sorato durannayo saṅgho athopi ujjayo aparo muni sayho anomanikkamo ^2- ānanda nando upanando dvādasa bhāradvājo antimadehadhārī bodhi mahānāmo athopi uttaro kesī sikhī sundaro bhāradvājo @Footnote: ¹ Yu. gutijjitoti dissati . ² Yu. anomanikkhamo . ³ Yu. bhāradvājā. Tissūpatissā bhavabandhanacchidā upasīdarī ^1- taṇhacchido ca sīdarī ^1- buddho ahu maṅgalo vītarāgo usabhacchidā jāliniṃ dukkhamūlaṃ santaṃ padaṃ ajjhagamūpaṇīto uposatho sundaro saccanāmo jeto jayanto padumo uppalo ca padumuttaro rakkhito pabbato ca mānatthaddho sobhito vītarāgo kaṇho ca buddho suvimuttacitto ete ca aññe ca mahānubhāvā paccekabuddhā bhavanettikhīṇā te sabbasaṅgādhigate mahesī parinibbute vandatha appameyyeti. Isigilisuttaṃ niṭṭhitaṃ chaṭṭhaṃ. --------- @Footnote: ¹ Ma. upasikhi. sikhari. Mahācattārīsakasuttaṃ [252] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ . Bhagavā etadavoca ariyaṃ vo bhikkhave sammāsamādhiṃ desissāmi saupanisaṃ saparikkhāraṃ taṃ suṇātha sādhukaṃ manasikarotha bhāsissāmīti . Evambhanteti kho te bhikkhū bhagavato paccassosuṃ. [253] Bhagavā etadavoca katamo ca bhikkhave ariyo sammāsamādhi saupaniso saparikkhāro seyyathīdaṃ sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati yā kho bhikkhave imehi sattaṅgehi cittassa ekaggatā parikkhatā ayaṃ vuccati bhikkhave ariyo sammāsamādhi saupaniso itipi saparikkhāro itipīti ^1-. [254] Tatra bhikkhave sammādiṭṭhi pubbaṅgamā hoti . kathañca bhikkhave sammādiṭṭhi pubbaṅgamā hoti . micchādiṭṭhiṃ micchādiṭṭhīti pajānāti sammādiṭṭhiṃ sammādiṭṭhīti pajānāti . sāssa hoti sammādiṭṭhi. [255] Katamā ca bhikkhave micchādiṭṭhi . natthi dinnaṃ natthi yiṭṭhaṃ natthi hutaṃ natthi sukatadukkaṭānaṃ kammānaṃ phalaṃ vipāko @Footnote: ¹ Ma. Yu. itipi. Natthi ayaṃ loko natthi paro loko natthi mātā natthi pitā natthi sattā opapātikā natthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti ayaṃ bhikkhave micchādiṭṭhi. [256] Katamā ca bhikkhave sammādiṭṭhi . sammādiṭṭhiṃpahaṃ bhikkhave dvayaṃ vadāmi atthi bhikkhave sammādiṭṭhi sāsavā puññabhāgiyā upadhivepakkā atthi bhikkhave sammādiṭṭhi ariyā anāsavā lokuttarā maggaṅgā. [257] Katamā ca bhikkhave sammādiṭṭhi sāsavā puññabhāgiyā upadhivepakkā . atthi dinnaṃ atthi yiṭṭhaṃ atthi hutaṃ atthi sukatadukkaṭānaṃ kammānaṃ phalaṃ vipāko atthi ayaṃ loko atthi paro loko atthi mātā atthi pitā atthi sattā opapātikā atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentīti ayaṃ bhikkhave sammādiṭṭhi sāsavā puññabhāgiyā upadhivepakkā. [258] Katamā ca bhikkhave sammādiṭṭhi ariyā anāsavā lokuttarā maggaṅgā . yā kho bhikkhave ariyacittassa anāsavacittassa ariyamaggasamaṅgino ariyamaggaṃ bhāvayato paññā paññindriyaṃ paññāphalaṃ dhammavicayasambojjhaṅgo sammādiṭṭhi maggaṅgaṃ ayaṃ bhikkhave sammādiṭṭhi ariyā anāsavā lokuttarā maggaṅgā. So ^1- micchādiṭṭhiyā @Footnote: ¹ Yu. yo. Pahānāya vāyamati sammādiṭṭhiyā upasampadāya . svāssa hoti sammāvāyāmo . so sato micchādiṭṭhiṃ pajahati sato sammādiṭṭhiṃ upasampajja viharati . sāssa hoti sammāsati . itissime tayo dhammā sammādiṭṭhiṃ anuparidhāvanti anuparivattanti seyyathīdaṃ sammādiṭṭhi sammāvāyāmo sammāsati. [259] Tatra bhikkhave sammādiṭṭhi pubbaṅgamā hoti . kathañca bhikkhave sammādiṭṭhi pubbaṅgamā hoti . micchāsaṅkappaṃ micchāsaṅkappoti pajānāti sammāsaṅkappaṃ sammāsaṅkappoti pajānāti. Sāssa hoti sammādiṭṭhi.

The Pali Tipitaka in Roman Character Volume 14 page 175-182. https://84000.org/tipitaka/read/roman_item.php?book=14&item=247&items=13 Classified by [Item Number] :- http://84000.org/tipitaka/read/roman_item.php?book=14&item=247&items=13&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=14&item=247&items=13 Compare with The Royal Version of Thai Tipitaka :- https://84000.org/tipitaka/read/byitem.php?book=14&item=247&items=13 Study Atthakatha :- https://84000.org/tipitaka/attha/attha.php?b=14&i=247 Contents of The Tipitaka Volume 14 https://84000.org/tipitaka/read/?index_14 https://84000.org/tipitaka/english/?index_14