paliTIPITAKA Volume 1 - Vinaya Pitaka 1

[595] Tattha ye te manussa assaddha appasanna dubbuddhino te evamahamsu ime kho samana sakyaputtiya dhuta sallekhavuttino samano pana gotamo bahulliko bahullaya cetetiti . ye pana te manussa saddha pasanna pandita buddhimanto te ujjhayanti khiyanti vipacenti katham hi nama devadatto bhagavato sanghabhedaya parakkamissati cakkabhedayati . assosum kho bhikkhu tesam manussanam ujjhayantanam khiyantanam vipacentanam . ye te bhikkhu appiccha .pe. te ujjhayanti khiyanti vipacenti katham hi nama devadatto sanghabhedaya parakkamissati cakkabhedayati. {595.1} Athakho te bhikkhu bhagavato etamattham arocesum. Athakho bhagava etasmim nidane etasmim pakarane bhikkhusangham sannipatapetva devadattam patipucchi saccam kira tvam devadatta sanghabhedaya parakkamasi cakkabhedayati . saccam bhagavati . vigarahi buddho bhagava ananucchavikam moghapurisa .pe. katham hi nama tvam moghapurisa sanghabhedaya parakkamissasi cakkabhedaya netam moghapurisa appasannanam va pasadaya .pe. Evanca pana bhikkhave imam sikkhapadam uddiseyyatha {595.2} yo pana bhikkhu samaggassa sanghassa bhedaya parakkameyya bhedanasamvattanikam va adhikaranam samadaya paggayha tittheyya so bhikkhu bhikkhuhi evamassa vacaniyo ma ayasma samaggassa sanghassa bhedaya parakkami bhedanasamvattanikam Va adhikaranam samadaya paggayha atthasi sametayasma sanghena samaggo hi sangho sammodamano avivadamano ekuddeso phasu viharatiti . evanca so bhikkhu bhikkhuhi vuccamano tatheva pagganheyya so bhikkhu bhikkhuhi yavatatiyam samanubhasitabbo tassa patinissaggaya . Yavatatiyance samanubhasiyamano tam patinissajjeyya iccetam kusalam no ce patinissajjeyya sanghadisesoti.

The Pali Tipitaka in Roman Character Volume 1 page 401-402. https://84000.org/tipitaka/read/roman_item.php?book=1&item=595&items=1 Classified by [Item Number] :- http://84000.org/tipitaka/read/roman_item.php?book=1&item=595&items=1&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=1&item=593&items=1 Compare with The Royal Version of Thai Tipitaka :- https://84000.org/tipitaka/read/byitem.php?book=1&item=593&items=1 Study Atthakatha :- https://84000.org/tipitaka/attha/attha.php?b=1&i=593 Contents of The Tipitaka Volume 1 https://84000.org/tipitaka/read/?index_1 https://84000.org/tipitaka/english/?index_1