ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

                                  อธิกรณเภทํ
     [๑๐๔๖]   จตฺตาริ   อธิกรณานิ   วิวาทาธิกรณํ   อนุวาทาธิกรณํ
อาปตฺตาธิกรณํ    กิจฺจาธิกรณํ   ฯ   อิมานิ   จตฺตาริ   อธิกรณานิ   ฯ
อิเมสํ    จตุนฺนํ    อธิกรณานํ   กติ   อุกฺโกฏา   ฯ   อิเมสํ   จตุนฺนํ
อธิกรณานํ    ทส    อุกฺโกฏา    วิวาทาธิกรณสฺส    เทฺว    อุกฺโกฏา
อนุวาทาธิกรณสฺส    จตฺตาโร    อุกฺโกฏา    อาปตฺตาธิกรณสฺส    ตโย
อุกฺโกฏา    กิจฺจาธิกรณสฺส    เอโก   อุกฺโกโฏ   ฯ   อิเมสํ   จตุนฺนํ
อธิกรณานํ   อิเม   ทส   อุกฺโกฏา   ฯ   วิวาทาธิกรณํ   อุกฺโกเฏนฺโต
กติ   สมเถ   อุกฺโกเฏติ   อนุวาทาธิกรณํ   อุกฺโกเฏนฺโต   กติ  สมเถ
อุกฺโกเฏติ    อาปตฺตาธิกรณํ   อุกฺโกเฏนฺโต   กติ   สมเถ   อุกฺโกเฏติ
กิจฺจาธิกรณํ   อุกฺโกเฏนฺโต   กติ   สมเถ  อุกฺโกเฏติ  ฯ  วิวาทาธิกรณํ
อุกฺโกเฏนฺโต   เทฺว   สมเถ   อุกฺโกเฏติ  อนุวาทาธิกรณํ  อุกฺโกเฏนฺโต
จตฺตาโร    สมเถ   อุกฺโกเฏติ   อาปตฺตาธิกรณํ   อุกฺโกเฏนฺโต   ตโย
สมเถ     อุกฺโกเฏติ    กิจฺจาธิกรณํ    อุกฺโกเฏนฺโต    เอกํ    สมถํ
อุกฺโกเฏติ ฯ
     [๑๐๔๗]   กติ    อุกฺโกฏา   กตีหากาเรหิ   อุกฺโกฏนํ   ปสวติ
กตีหงฺเคหิ   สมนฺนาคโต   ปุคฺคโล   อธิกรณํ   อุกฺโกเฏติ  กติ  ปุคฺคลา
อธิกรณํ   อุกฺโกเฏนฺตา   อาปตฺตึ   อาปชฺชนฺติ   ฯ   ทฺวาทส  อุกฺโกฏา
ทสหากาเรหิ    อุกฺโกฏนํ   ปสวติ   จตูหงฺเคหิ   สมนฺนาคโต   ปุคฺคโล
อธิกรณํ    อุกฺโกเฏติ    จตฺตาโร    ปุคฺคลา   อธิกรณํ   อุกฺโกเฏนฺตา
อาปตฺตึ   อาปชฺชนฺติ   ฯ   กตเม   ทฺวาทส  อุกฺโกฏา  ฯ  อกตํ  กมฺมํ
ทุกฺกฏํ   กมฺมํ   ปุน   กาตพฺพํ   กมฺมํ   อนีหตํ  ทุนฺนีหตํ  ปุน  นีหนิตพฺพํ
อวินิจฺฉิตํ   ทุวินิจฺฉิตํ   ปุน   วินิจฺฉิตพฺพํ   อวูปสนฺตํ   ทุวูปสนฺตํ   ปุน
วูปสเมตพฺพนฺติ   อิเม   ทฺวาทส   อุกฺโกฏา   ฯ  กตเมหิ  ทสหากาเรหิ
อุกฺโกฏนํ   ปสวติ   ฯ   ตตฺถชาตกํ   อธิกรณํ   อุกฺโกเฏติ   ตตฺถชาตกํ
วูปสนฺตํ    อธิกรณํ    อุกฺโกเฏติ   อนฺตรามคฺเค   อธิกรณํ   อุกฺโกเฏติ
อนฺตรามคฺเค    วูปสนฺตํ   อธิกรณํ   อุกฺโกเฏติ   ตตฺถ   คตํ   อธิกรณํ
อุกฺโกเฏติ    ตตฺถ     คตํ   วูปสนฺตํ   อธิกรณํ   อุกฺโกเฏติ   สติวินยํ
อุกฺโกเฏติ     อมูฬฺหวินยํ     อุกฺโกเฏติ    ตสฺสปาปิยสิกํ    อุกฺโกเฏติ
ติณวตฺถารกํ อุกฺโกเฏติ ฯ อิเมหิ ทสหากาเรหิ อุกฺโกฏนํ ปสวติ ฯ
     {๑๐๔๗.๑}   กตเมหิ   จตูหงฺเคหิ  สมนฺนาคโต  ปุคฺคโล  อธิกรณํ
อุกฺโกเฏติ   ฯ   ฉนฺทาคตึ   คจฺฉนฺโต   อธิกรณํ   อุกฺโกเฏติ  โทสาคตึ
ฯเปฯ   โมหาคตึ   ภยาคตึ   คจฺฉนฺโต  อธิกรณํ  อุกฺโกเฏติ  ฯ  อิเมหิ
จตูหงฺเคหิ   สมนฺนาคโต   ปุคฺคโล   อธิกรณํ   อุกฺโกเฏติ   ฯ   กตเม
จตฺตาโร   ปุคฺคลา   อธิกรณํ   อุกฺโกเฏนฺตา   อาปตฺตึ   อาปชฺชนฺติ  ฯ
ตทหุปสมฺปนฺโน     อุกฺโกเฏติ     อุกฺโกฏนกํ    ปาจิตฺติยํ    อาคนฺตุโก
อุกฺโกเฏติ    อุกฺโกฏนกํ   ปาจิตฺติยํ   การโก   อุกฺโกเฏติ   อุกฺโกฏนกํ
ปาจิตฺติยํ    ฉนฺททายโก    อุกฺโกเฏติ    อุกฺโกฏนกํ    ปาจิตฺติยํ    ฯ
อิเม จตฺตาโร ปุคฺคลา อธิกรณํ อุกฺโกเฏนฺตา อาปตฺตึ อาปชฺชนฺติ ฯ
     [๑๐๔๘]   วิวาทาธิกรณํ   กึนิทานํ   กึสมุทยํ   กึชาติกํ   กึปภวํ
กึสมฺภารํ     กึสมุฏฺฐานํ    ฯ    อนุวาทาธิกรณํ    กึนิทานํ    กึสมุทยํ
กึชาติกํ     กึปภวํ     กึสมฺภารํ    กึสมุฏฺฐานํ    ฯ    อาปตฺตาธิกรณํ
กึนิทานํ    กึสมุทยํ    กึชาติกํ    กึปภวํ    กึสมฺภารํ   กึสมุฏฺฐานํ   ฯ
กิจฺจาธิกรณํ     กึนิทานํ     กึสมุทยํ    กึชาติกํ    กึปภวํ    กึสมฺภารํ
กึสมุฏฺฐานํ   ฯ   วิวาทาธิกรณํ   วิวาทนิทานํ   วิวาทสมุทยํ  วิวาทชาติกํ
วิวาทปฺปภวํ     วิวาทสมฺภารํ    วิวาทสมุฏฺฐานํ    ฯ    อนุวาทาธิกรณํ
อนุวาทนิทานํ       อนุวาทสมุทยํ      อนุวาทชาติกํ      อนุวาทปฺปภวํ
อนุวาทสมฺภารํ        อนุวาทสมุฏฺฐานํ        ฯ       อาปตฺตาธิกรณํ
อาปตฺตินิทานํ       อาปตฺติสมุทยํ      อาปตฺติชาติกํ      อาปตฺติปฺปภวํ
อาปตฺติสมฺภารํ    อาปตฺติสมุฏฺฐานํ   ฯ   กิจฺจาธิกรณํ   กิจฺจนิทานํ   ๑-
กิจฺจสมุทยํ กิจฺจชาติกํ กิจฺจปฺปภวํ กิจฺจสมฺภารํ กิจฺจสมุฏฺฐานํ ฯ
     {๑๐๔๘.๑}   วิวาทาธิกรณํ   กึนิทานํ   กึสมุทยํ   กึชาติกํ  กึปภวํ
กึสมฺภารํ    กึสมุฏฺฐานํ    ฯ   อนุวาทาธิกรณํ   ฯเปฯ   อาปตฺตาธิกรณํ
กิจฺจาธิกรณํ     กึนิทานํ     กึสมุทยํ    กึชาติกํ    กึปภวํ    กึสมฺภารํ
กึสมุฏฺฐานํ    ฯ    วิวาทาธิกรณํ   เหตุนิทานํ   เหตุสมุทยํ   เหตุชาติกํ
เหตุปฺปภวํ    เหตุสมฺภารํ   เหตุสมุฏฺฐานํ   ฯ   อนุวาทาธิกรณํ   ฯเปฯ
อาปตฺตาธิกรณํ    กิจฺจาธิกรณํ    เหตุนิทานํ    เหตุสมุทยํ    เหตุชาติกํ
เหตุปฺปภวํ      เหตุสมฺภารํ     เหตุสมุฏฺฐานํ     ฯ     วิวาทาธิกรณํ
กึนิทานํ    กึสมุทยํ    กึชาติกํ    กึปภวํ    กึสมฺภารํ   กึสมุฏฺฐานํ   ฯ
@เชิงอรรถ:  โป. ม. กิจฺจยนิทานํ ฯ
อนุวาทาธิกรณํ     ฯเปฯ     อาปตฺตาธิกรณํ    กิจฺจาธิกรณํ    กึนิทานํ
กึสมุทยํ   กึชาติกํ   กึปภวํ   กึสมฺภารํ   กึสมุฏฺฐานํ   ฯ   วิวาทาธิกรณํ
ปจฺจยนิทานํ        ปจฺจยสมุทยํ        ปจฺจยชาติกํ       ปจฺจยปฺปภวํ
ปจฺจยสมฺภารํ      ปจฺจยสมุฏฺฐานํ     ฯ     อนุวาทาธิกรณํ     ฯเปฯ
อาปตฺตาธิกรณํ    กิจฺจาธิกรณํ   ปจฺจยนิทานํ   ปจฺจยสมุทยํ   ปจฺจยชาติกํ
ปจฺจยปฺปภวํ ปจฺจยสมฺภารํ ปจฺจยสมุฏฺฐานํ ฯ
     [๑๐๔๙]   จตุนฺนํ   อธิกรณานํ   กติ  มูลานิ  กติ  สมุฏฺฐานา  ฯ
จตุนฺนํ   อธิกรณานํ   เตตฺตึส   มูลานิ   เตตฺตึส  สมุฏฺฐานา  ฯ  จตุนฺนํ
อธิกรณานํ   กตมานิ   เตตฺตึส   มูลานิ   ฯ   วิวาทาธิกรณสฺส  ทฺวาทส
มูลานิ    อนุวาทาธิกรณสฺส    จุทฺทส    มูลานิ   อาปตฺตาธิกรณสฺส   ฉ
มูลานิ   กิจฺจาธิกรณสฺส   เอกํ   มูลํ   สงฺโฆ   ฯ   จตุนฺนํ  อธิกรณานํ
อิมานิ   เตตฺตึส   มูลานิ   ฯ   จตุนฺนํ   อธิกรณานํ   กตเม   เตตฺตึส
สมุฏฺฐานา   ฯ   วิวาทาธิกรณสฺส   อฏฺฐารส   เภทกรวตฺถูนิ  สมุฏฺฐานา
อนุวาทาธิกรณสฺส    จตสฺโส   วิปตฺติโย   สมุฏฺฐานา   อาปตฺตาธิกรณสฺส
สตฺต         อาปตฺติกฺขนฺธา        สมุฏฺฐานา        กิจฺจาธิกรณสฺส
จตฺตาริ   กมฺมานิ   สมุฏฺฐานา   ฯ   จตุนฺนํ  อธิกรณานํ  อิเม  เตตฺตึส
สมุฏฺฐานา ฯ
     [๑๐๕๐]   วิวาทาธิกรณํ   อาปตฺตานาปตฺตีติ  ฯ  วิวาทาธิกรณํ  น
อาปตฺติ   ฯ   กึ  ปน  วิวาทาธิกรณปจฺจยา  อาปตฺตึ  อาปชฺเชยฺยาติ  ฯ
อาม  วิวาทาธิกรณปจฺจยา  อาปตฺตึ  อาปชฺเชยฺย  ฯ  วิวาทาธิกรณปจฺจยา
กติ       อาปตฺติโย      อาปชฺชติ      ฯ      วิวาทาธิกรณปจฺจยา
เทฺว     อาปตฺติโย     อาปชฺชติ    อุปสมฺปนฺนํ    โอมสติ    อาปตฺติ
ปาจิตฺติยสฺส      อนุปสมฺปนฺนํ      โอมสติ      อาปตฺติ     ทุกฺกฏสฺส
วิวาทาธิกรณปจฺจยา    อิมา   เทฺว   อาปตฺติโย   อาปชฺชติ   ฯ   ตา
อาปตฺติโย    จตุนฺนํ    วิปตฺตีนํ    กติ    วิปตฺติโย    ภชนฺติ   จตุนฺนํ
อธิกรณานํ     กตมํ    อธิกรณํ    สตฺตนฺนํ    อาปตฺติกฺขนฺธานํ    กตีหิ
อาปตฺติกฺขนฺเธหิ     สงฺคหิตา     ฉนฺนํ     อาปตฺติสมุฏฺฐานานํ    กตีหิ
สมุฏฺฐาเนหิ   สมุฏฺฐหนฺติ   ๑-   กตีหิ  อธิกรเณหิ  กตีสุ  ฐาเนสุ  กตีหิ
สมเถหิ สมฺมนฺติ ฯ
     {๑๐๕๐.๑}   ตา   อาปตฺติโย   จตุนฺนํ   วิปตฺตีนํ   เอกํ  วิปตฺตึ
ภชนฺติ      อาจารวิปตฺตึ     จตุนฺนํ     อธิกรณานํ     อาปตฺตาธิกรณํ
สตฺตนฺนํ      อาปตฺติกฺขนฺธานํ     ทฺวีหิ    อาปตฺติกฺขนฺเธหิ    สงฺคหิตา
สิยา    ปาจิตฺติยาปตฺติกฺขนฺเธน    สิยา    ทุกฺกฏาปตฺติกฺขนฺเธน    ฉนฺนํ
อาปตฺติสมุฏฺฐานานํ    ตีหิ    สมุฏฺฐาเนหิ    สมุฏฺฐหนฺติ   ๑-   เอเกน
อธิกรเณน    กิจฺจาธิกรเณน    ตีสุ    ฐาเนสุ   สงฺฆมชฺเฌ   คณมชฺเฌ
ปุคฺคลสฺส   สนฺติเก   ตีหิ   สมเถหิ   สมฺมนฺติ  สิยา  สมฺมุขาวินเยน  จ
ปฏิญฺญาตกรเณน จ สิยา สมฺมุขาวินเยน จ ติณวตฺถารเกน จ ฯ
     [๑๐๕๑]   อนุวาทาธิกรณํ   อาปตฺตานาปตฺตีติ   ฯ  อนุวาทาธิกรณํ
น  อาปตฺติ  ฯ  กึ  ปน  อนุวาทาธิกรณปจฺจยา  อาปตฺตึ อาปชฺเชยฺยาติ ฯ
อาม  อนุวาทาธิกรณปจฺจยา  อาปตฺตึ  อาปชฺเชยฺย ฯ อนุวาทาธิกรณปจฺจยา
กติ      อาปตฺติโย      อาปชฺชติ      ฯ      อนุวาทาธิกรณปจฺจยา
@เชิงอรรถ:  ม. ยุ. สมุฏฺฐนฺติ ฯ อิโต ปรํ เอวํ ญาตพฺพํ ฯ
ติสฺโส   อาปตฺติโย   อาปชฺชติ   ภิกฺขุํ   อมูลเกน  ปาราชิเกน  ธมฺเมน
อนุทฺธํเสติ     อาปตฺติ    สงฺฆาทิเสสสฺส    อมูลเกน    สงฺฆาทิเสเสน
อนุทฺธํเสติ     อาปตฺติ     ปาจิตฺติยสฺส    อมูลิกาย    อาจารวิปตฺติยา
อนุทฺธํเสติ     อาปตฺติ     ทุกฺกฏสฺส     อนุวาทาธิกรณปจฺจยา    อิมา
ติสฺโส อาปตฺติโย อาปชฺชติ ฯ
     {๑๐๕๑.๑}   ตา  อาปตฺติโย  จตุนฺนํ  วิปตฺตีนํ  กติ วิปตฺติโย ภชนฺติ
จตุนฺนํ   อธิกรณานํ   กตมํ   อธิกรณํ   สตฺตนฺนํ   อาปตฺติกฺขนฺธานํ  กตีหิ
อาปตฺติกฺขนฺเธหิ   สงฺคหิตา  ฉนฺนํ  อาปตฺติสมุฏฺฐานานํ  กตีหิ  สมุฏฺฐาเนหิ
สมุฏฺฐหนฺติ  กตีหิ  อธิกรเณหิ  กตีสุ  ฐาเนสุ  กตีหิ  สมเถหิ  สมฺมนฺติ  ฯ
ตา  อาปตฺติโย  จตุนฺนํ  วิปตฺตีนํ  เทฺว  วิปตฺติโย  ภชนฺติ  สิยา สีลวิปตฺตึ
สิยา    อาจารวิปตฺตึ    จตุนฺนํ   อธิกรณานํ   อาปตฺตาธิกรณํ   สตฺตนฺนํ
อาปตฺติกฺขนฺธานํ      ตีหิ      อาปตฺติกฺขนฺเธหิ     สงฺคหิตา     สิยา
สงฺฆาทิเสสาปตฺติกฺขนฺเธน     สิยา     ปาจิตฺติยาปตฺติกฺขนฺเธน     สิยา
ทุกฺกฏาปตฺติกฺขนฺเธน    ฉนฺนํ    อาปตฺติสมุฏฺฐานานํ    ตีหิ   สมุฏฺฐาเนหิ
สมุฏฺฐหนฺติ  ยา  สา  ๑-  อาปตฺติ  ๒-  ครุกา  สา ๓- อาปตฺติ เอเกน
อธิกรเณน    กิจฺจาธิกรเณน    เอกมฺหิ    ฐาเน    สงฺฆมชฺเฌ   ทฺวีหิ
สมเถหิ   สมฺมติ  ๔-  สมฺมุขาวินเยน  จ  ปฏิญฺญาตกรเณน  จ  ยา  ตา
อาปตฺติโย   ลหุกา  ตา  อาปตฺติโย  เอเกน  อธิกรเณน  กิจฺจาธิกรเณน
ตีสุ     ฐาเนสุ     สงฺฆมชฺเฌ     คณมชฺเฌ     ปุคฺคลสฺส    สนฺติเก
ตีหิ   สมเถหิ   สมฺมนฺติ   สิยา   สมฺมุขาวินเยน   จ   ปฏิญฺญาตกรเณน
@เชิงอรรถ: ๑-๓ ม. ตา ฯ   ม. อาปตฺติโย ฯ   ม. สมฺมนฺติ ฯ
จ สิยา สมฺมุขาวินเยน จ ติณวตฺถารเกน จ ฯ
     [๑๐๕๒]   อาปตฺตาธิกรณํ   อาปตฺตานาปตฺตีติ   ฯ  อาปตฺตาธิกรณํ๑-  อาปตฺติ  ฯ กึ ปน อาปตฺตาธิกรณปจฺจยา อาปตฺตึ อาปชฺเชยฺยาติ ฯ
อาม  อาปตฺตาธิกรณปจฺจยา  อาปตฺตึ  อาปชฺเชยฺย ฯ อาปตฺตาธิกรณปจฺจยา
กติ  อาปตฺติโย  อาปชฺชติ  ฯ  อาปตฺตาธิกรณปจฺจยา  จตสฺโส  อาปตฺติโย
อาปชฺชติ   ภิกฺขุนี   ชานํ  ปาราชิกํ  ธมฺมํ  อชฺฌาปนฺนํ  ๒-  ปฏิจฺฉาเทติ
อาปตฺติ  ปาราชิกสฺส  เวมติกา  ปฏิจฺฉาเทติ  อาปตฺติ  ถุลฺลจฺจยสฺส  ภิกฺขุ
สงฺฆาทิเสสํ  ปฏิจฺฉาเทติ  อาปตฺติ  ปาจิตฺติยสฺส  อาจารวิปตฺตึ ปฏิจฺฉาเทติ
อาปตฺติ   ทุกฺกฏสฺส   อาปตฺตาธิกรณปจฺจยา   อิมา   จตสฺโส  อาปตฺติโย
อาปชฺชติ ฯ
     {๑๐๕๒.๑}   ตา   อาปตฺติโย   จตุนฺนํ   วิปตฺตีนํ  กติ  วิปตฺติโย
ภชนฺติ   จตุนฺนํ   อธิกรณานํ   กตมํ   อธิกรณํ  สตฺตนฺนํ  อาปตฺติกฺขนฺธานํ
กตีหิ     อาปตฺติกฺขนฺเธหิ     สงฺคหิตา     ฉนฺนํ    อาปตฺติสมุฏฺฐานานํ
กตีหิ    สมุฏฺฐาเนหิ   สมุฏฺฐหนฺติ   กตีหิ   อธิกรเณหิ   กตีสุ   ฐาเนสุ
กตีหิ   สมเถหิ   สมฺมนฺติ   ฯ   ตา  อาปตฺติโย  จตุนฺนํ  วิปตฺตีนํ  เทฺว
วิปตฺติโย    ภชนฺติ    สิยา   สีลวิปตฺตึ   สิยา   อาจารวิปตฺตึ   จตุนฺนํ
อธิกรณานํ     อาปตฺตาธิกรณํ     สตฺตนฺนํ     อาปตฺติกฺขนฺธานํ    จตูหิ
อาปตฺติกฺขนฺเธหิ    สงฺคหิตา    สิยา    ปาราชิกาปตฺติกฺขนฺเธน    สิยา
ถุลฺลจฺจยาปตฺติกฺขนฺเธน      สิยา      ปาจิตฺติยาปตฺติกฺขนฺเธน     สิยา
ทุกฺกฏาปตฺติกฺขนฺเธน   ฉนฺนํ   อาปตฺติสมุฏฺฐานานํ   เอเกน   สมุฏฺฐาเนน
@เชิงอรรถ:  ม. ยุ. นสทฺโท นตฺถิ ฯ   ม. ยุ. อยํ ปาโฐ นตฺถิ ฯ
สมุฏฺฐหนฺติ    กายโต    จ   วาจโต   จ   จิตฺตโต   จ   สมุฏฺฐหนฺติ
ยา   สา   อาปตฺติ   อนวเสสา  สา  อาปตฺติ  น  กตเมน  อธิกรเณน
น   กตมมฺหิ  ฐาเน  น  กตเมน  สมเถน  สมฺมติ  ยา  ตา  อาปตฺติโย
ลหุกา   ตา   อาปตฺติโย   เอเกน   อธิกรเณน   กิจฺจาธิกรเณน   ตีสุ
ฐาเนสุ    สงฺฆมชฺเฌ   คณมชฺเฌ   ปุคฺคลสฺส   สนฺติเก   ตีหิ   สมเถหิ
สมฺมนฺติ    สิยา    สมฺมุขาวินเยน    จ   ปฏิญฺญาตกรเณน   จ   สิยา
สมฺมุขาวินเยน จ ติณวตฺถารเกน จ ฯ
     [๑๐๕๓]   กิจฺจาธิกรณํ   อาปตฺตานาปตฺตีติ   ฯ   กิจฺจาธิกรณํ  น
อาปตฺติ   ฯ   กึ   ปน  กิจฺจาธิกรณปจฺจยา  อาปตฺตึ  อาปชฺเชยฺยาติ  ฯ
อาม   กิจฺจาธิกรณปจฺจยา   อาปตฺตึ  อาปชฺเชยฺย  ฯ  กิจฺจาธิกรณปจฺจยา
กติ     อาปตฺติโย     อาปชฺชติ     ฯ    กิจฺจาธิกรณปจฺจยา    ปญฺจ
อาปตฺติโย     อาปชฺชติ     อุกฺขิตฺตานุวตฺติกา     ภิกฺขุนี     ยาวตติยํ
สมนุภาสนาย    นปฺปฏินิสฺสชฺชติ   ญตฺติยา   ทุกฺกฏํ   ทฺวีหิ   กมฺมวาจาหิ
ถุลฺลจฺจยา   กมฺมวาจาปริโยสาเน  อาปตฺติ  ปาราชิกสฺส  เภทกานุวตฺตกา
ภิกฺขู    ๑-    ยาวตติยํ    สมนุภาสนาย    นปฺปฏินิสฺสชฺชนฺติ   อาปตฺติ
สงฺฆาทิเสสสฺส     ปาปิกาย     ทิฏฺฐิยา     ยาวตติยํ    สมนุภาสนาย
นปฺปฏินิสฺสชฺชนฺติ      อาปตฺติ      ปาจิตฺติยสฺส      กิจฺจาธิกรณปจฺจยา
อิมา ปญฺจ อาปตฺติโย อาปชฺชติ ฯ
     {๑๐๕๓.๑}   ตา     อาปตฺติโย    จตุนฺนํ    วิปตฺตีนํ    กติ
วิปตฺติโย    ภชนฺติ    จตุนฺนํ    อธิกรณานํ   กตมํ   อธิกรณํ   สตฺตนฺนํ
อาปตฺติกฺขนฺธานํ      กตีหิ     อาปตฺติกฺขนฺเธหิ     สงฺคหิตา     ฉนฺนํ
@เชิงอรรถ:  ยุ. อยํ ปาโฐ นตฺถิ ฯ
อาปตฺติสมุฏฺฐานานํ   กตีหิ   สมุฏฺฐาเนหิ   สมุฏฺฐหนฺติ   กตีหิ  อธิกรเณหิ
กตีสุ   ฐาเนสุ   กตีหิ   สมเถหิ   สมฺมนฺติ  ฯ  ตา  อาปตฺติโย  จตุนฺนํ
วิปตฺตีนํ   เทฺว   วิปตฺติโย  ภชนฺติ  สิยา  สีลวิปตฺตึ  สิยา  อาจารวิปตฺตึ
จตุนฺนํ     อธิกรณานํ     อาปตฺตาธิกรณํ    สตฺตนฺนํ    อาปตฺติกฺขนฺธานํ
ปญฺจหิ    อาปตฺติกฺขนฺเธหิ    สงฺคหิตา    สิยา   ปาราชิกาปตฺติกฺขนฺเธน
สิยา     สงฺฆาทิเสสาปตฺติกฺขนฺเธน     สิยา     ถุลฺลจฺจยาปตฺติกฺขนฺเธน
สิยา       ปาจิตฺติยาปตฺติกฺขนฺเธน      สิยา      ทุกฺกฏาปตฺติกฺขนฺเธน
ฉนฺนํ   อาปตฺติสมุฏฺฐานานํ   เอเกน   สมุฏฺฐาเนน   สมุฏฺฐหนฺติ  กายโต
จ    วาจโต    จ   จิตฺตโต   จ   สมุฏฺฐหนฺติ   ยา   สา   อาปตฺติ
อนวเสสา    สา   อาปตฺติ   น   กตเมน   อธิกรเณน   น   กตมมฺหิ
ฐาเน   น   กตเมน   สมเถน  สมฺมติ  ยา  สา  อาปตฺติ  ครุกา  สา
อาปตฺติ    เอเกน    อธิกรเณน    กิจฺจาธิกรเณน    เอกมฺหิ   ฐาเน
สงฺฆมชฺเฌ   ทฺวีหิ   สมเถหิ  สมฺมติ  สมฺมุขาวินเยน  จ  ปฏิญฺญาตกรเณน
จ    ยา    ตา    อาปตฺติโย    ลหุกา   ตา   อาปตฺติโย   เอเกน
อธิกรเณน    กิจฺจาธิกรเณน    ตีสุ    ฐาเนสุ   สงฺฆมชฺเฌ   คณมชฺเฌ
ปุคฺคลสฺส   สนฺติเก   ตีหิ   สมเถหิ   สมฺมนฺติ  สิยา  สมฺมุขาวินเยน  จ
ปฏิญฺญาตกรเณน จ สิยา สมฺมุขาวินเยน จ ติณวตฺถารเกน จ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๓๗๒-๓๘๐. https://84000.org/tipitaka/read/pali_read.php?B=8&A=7546&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=7546&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1046&items=8              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=92              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1046              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=3&A=11034              The Pali Atthakatha in Roman :- https://84000.org/tipitaka/atthapali/read_rm.php?B=3&A=11034              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]