ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

     [๑๐๐๐]   ทส   อาฆาตวตฺถูนิ  ฯ  ทส  อาฆาตปฏิวินยา  ฯ  ทส
วินีตวตฺถูนิ   ฯ   ทสวตฺถุกา   มิจฺฉาทิฏฺฐิ  ฯ  ทสวตฺถุกา  สมฺมาทิฏฺฐิ  ฯ
ทส   อนฺตคฺคาหิกา   ทิฏฺฐิ   ฯ   ทส  มิจฺฉตฺตา  ฯ  ทส  สมฺมตฺตา  ฯ
ทส    อกุสลกมฺมปถา   ฯ   ทส   กุสลกมฺมปถา   ฯ   ทส   อธมฺมิกา
สลากคาหา   ฯ   ทส   อธมฺมิกา   สลากคาหา   ฯ  สามเณรานํ  ทส
สิกฺขาปทานิ ฯ ทสหงฺเคหิ สมนฺนาคโต สามเณโร นาเสตพฺโพ ฯ
     [๑๐๐๑]   ทสหงฺเคหิ   สมนฺนาคโต  วินยธโร  พาโลเตฺวว  สงฺขํ
คจฺฉติ   อตฺตโน   ภาสปริยนฺตํ   น   อุคฺคณฺหาติ   ปรสฺส   ภาสปริยนฺตํ
น     อุคฺคณฺหาติ    อตฺตโน    ภาสปริยนฺตํ    อนุคฺคเหตฺวา    ปรสฺส
ภาสปริยนฺตํ     อนุคฺคเหตฺวา     อธมฺเมน     กาเรติ    อปฺปฏิญฺญาย
อาปตฺตึ   น   ชานาติ   อาปตฺติยา   มูลํ   น   ชานาติ  อาปตฺติสมุทยํ
น   ชานาติ   อาปตฺตินิโรธํ   น   ชานาติ   อาปตฺตินิโรธคามินึ  ปฏิปทํ
น ชานาติ ฯ
     {๑๐๐๑.๑}   ทสหงฺเคหิ   สมนฺนาคโต   วินยธโร   ปณฺฑิโตเตฺวว
สงฺขํ     คจฺฉติ     อตฺตโน     ภาสปริยนฺตํ     อุคฺคณฺหาติ    ปรสฺส
ภาสปริยนฺตํ     อุคฺคณฺหาติ     อตฺตโน     ภาสปริยนฺตํ    อุคฺคเหตฺวา
ปรสฺส    ภาสปริยนฺตํ    อุคฺคเหตฺวา    ธมฺเมน    กาเรติ   ปฏิญฺญาย
อาปตฺตึ     ชานาติ     อาปตฺติยา    มูลํ    ชานาติ    อาปตฺติสมุทยํ
ชานาติ     อาปตฺตินิโรธํ     ชานาติ     อาปตฺตินิโรธคามินึ    ปฏิปทํ
ชานาติ ฯ
     {๑๐๐๑.๒}   อปเรหิปิ    ทสหงฺเคหิ    สมนฺนาคโต   วินยธโร
พาโลเตฺวว   สงฺขํ   คจฺฉติ   อธิกรณํ   น   ชานาติ   อธิกรณสฺส  มูลํ
น   ชานาติ   อธิกรณสมุทยํ   น   ชานาติ   อธิกรณนิโรธํ  น  ชานาติ
อธิกรณนิโรธคามินึ    ปฏิปทํ    น    ชานาติ    วตฺถุํ    น   ชานาติ
นิทานํ    น    ชานาติ    ปญฺญตฺตึ    น   ชานาติ   อนุปฺปญฺญตฺตึ   น
ชานาติ   อนุสนฺธิวจนปถํ   น   ชานาติ   ฯ   ทสหงฺเคหิ   สมนฺนาคโต
วินยธโร     ปณฺฑิโตเตฺวว     สงฺขํ     คจฺฉติ    อธิกรณํ    ชานาติ
อธิกรณสฺส    มูลํ    ชานาติ    อธิกรณสมุทยํ   ชานาติ   อธิกรณนิโรธํ
ชานาติ    อธิกรณนิโรธคามินึ    ปฏิปทํ    ชานาติ    วตฺถุํ    ชานาติ
นิทานํ     ชานาติ     ปญฺญตฺตึ     ชานาติ    อนุปฺปญฺญตฺตึ    ชานาติ
อนุสนฺธิวจนปถํ ชานาติ ฯ
     {๑๐๐๑.๓}   อปเรหิปิ       ทสหงฺเคหิ       สมนฺนาคโต
วินยธโร   พาโลเตฺวว   สงฺขํ   คจฺฉติ   ญตฺตึ   น   ชานาติ  ญตฺติยา
กรณํ   น   ชานาติ   น   ปุพฺพกุสโล   โหติ   น   อปรกุสโล   โหติ
อกาลญฺญู    จ    โหติ    อาปตฺตานาปตฺตึ    น   ชานาติ   ลหุกครุกํ
อาปตฺตึ    น    ชานาติ    สาวเสสานวเสสํ   อาปตฺตึ   น   ชานาติ
ทุฏฺฐุลฺลาทุฏฺฐุลฺลํ    อาปตฺตึ    น    ชานาติ    อาจริยปรมฺปรา    โข
ปนสฺส น สุคฺคหิตา โหติ น สุมนสิกตา น สูปธาริตา ฯ
     {๑๐๐๑.๔}   ทสหงฺเคหิ   สมนฺนาคโต   วินยธโร   ปณฺฑิโตเตฺวว
สงฺขํ   คจฺฉติ  ญตฺตึ  ชานาติ  ญตฺติยา  กรณํ  ชานาติ  ปุพฺพกุสโล  โหติ
อปรกุสโล    โหติ    กาลญฺญู   จ   โหติ   อาปตฺตานาปตฺตึ   ชานาติ
ลหุกครุกํ    อาปตฺตึ    ชานาติ   สาวเสสานวเสสํ   อาปตฺตึ   ชานาติ
ทุฏฺฐุลฺลาทุฏฺฐุลฺลํ    อาปตฺตึ    ชานาติ   อาจริยปรมฺปรา   โข   ปนสฺส
สุคฺคหิตา โหติ สุมนสิกตา สูปธาริตา ฯ
     {๑๐๐๑.๕}   อปเรหิปิ       ทสหงฺเคหิ       สมนฺนาคโต
วินยธโร   พาโลเตฺวว   สงฺขํ   คจฺฉติ   อาปตฺตานาปตฺตึ   น  ชานาติ
ลหุกครุกํ     อาปตฺตึ    น    ชานาติ    สาวเสสานวเสสํ    อาปตฺตึ
น   ชานาติ   ทุฏฺฐุลฺลาทุฏฺฐุลฺลํ   อาปตฺตึ   น   ชานาติ   อุภยานิ  โข
ปนสฺส   ปาติโมกฺขานิ  วิตฺถาเรน  น  สฺวาคตานิ  โหนฺติ  น  สุวิภตฺตานิ
น   สุปฺปวตฺตีนิ  น  สุวินิจฺฉิตานิ  สุตฺตโส  อนุพฺยญฺชนโส  อาปตฺตานาปตฺตึ
น    ชานาติ    ลหุกครุกํ   อาปตฺตึ   น   ชานาติ   สาวเสสานวเสสํ
อาปตฺตึ   น   ชานาติ  ทุฏฺฐุลฺลาทุฏฺฐุลฺลํ  อาปตฺตึ  น  ชานาติ  อธิกรเณ
จ น ๑- วินิจฺฉยกุสโล โหติ ฯ
     {๑๐๐๑.๖}   ทสหงฺเคหิ   สมนฺนาคโต   วินยธโร   ปณฺฑิโตเตฺวว
สงฺขํ   คจฺฉติ   อาปตฺตานาปตฺตึ   ชานาติ   ลหุกครุกํ  อาปตฺตึ  ชานาติ
สาวเสสานวเสสํ     อาปตฺตึ    ชานาติ    ทุฏฺฐุลฺลาทุฏฺฐุลฺลํ    อาปตฺตึ
ชานาติ   อุภยานิ   โข   ปนสฺส   ปาติโมกฺขานิ  วิตฺถาเรน  สฺวาคตานิ
โหนฺติ   สุวิภตฺตานิ   สุปฺปวตฺตีนิ   สุวินิจฺฉิตานิ   สุตฺตโส   อนุพฺยญฺชนโส
อาปตฺตานาปตฺตึ   ชานาติ  ลหุกครุกํ  อาปตฺตึ  ชานาติ  สาวเสสานวเสสํ
อาปตฺตึ   ชานาติ   ทุฏฺฐุลฺลาทุฏฺฐุลฺลํ   อาปตฺตึ   ชานาติ   อธิกรเณ  จ
วินิจฺฉยกุสโล โหติ ฯ
     [๑๐๐๒]   ทสหงฺเคหิ  สมนฺนาคโต ภิกฺขุ อุพฺพาหิกาย สมฺมนฺนิตพฺโพ ฯ
ทส     อตฺถวเส     ปฏิจฺจ     ตถาคเตน     สาวกานํ    สิกฺขาปทํ
ปญฺญตฺตํ  ฯ  ทส  อาทีนวา  ราชนฺเตปุรปฺปเวสเน  ฯ  ทส  ทานวตฺถูนิ ฯ
ทส    รตนานิ   ฯ   ทสวคฺโค   ภิกฺขุสงฺโฆ   ฯ   ทสวคฺเคน   คเณน
อุปสมฺปาเทตพฺพํ   ฯ   ทส   ปํสุกูลานิ   ฯ  ทส  จีวรธารณานิ  ๒-  ฯ
ทสาหปรมํ  อติเรกจีวรํ  ธาเรตพฺพํ  ฯ  ทส  สุกฺกานิ  ฯ  ทส อิตฺถิโย ฯ
@เชิงอรรถ:  โป. ยุ. น จ ฯ   ม. ยุ. จีวรธารณา ฯ
ทส  ภริยาโย  ฯ  เวสาลิยํ  ๑-  ทส  วตฺถูนิ  ทีเปนฺติ  ฯ  ทส ปุคฺคลา
อวนฺทิยา    ฯ    ทส    อกฺโกสวตฺถูนิ    ฯ   ทสหากาเรหิ   เปสุญฺญํ
อุปสํหรติ  ฯ  ทส  เสนาสนานิ  ฯ  ทส  วรานิ  ยาจึสุ ฯ ทส อธมฺมิกานิ
ปาติโมกฺขฏฺฐปนานิ    ฯ    ทส    ธมฺมิกานิ    ปาติโมกฺขฏฺฐปนานิ   ฯ
ทสานิสํสา   ยาคุยา   ฯ   ทส   มํสา  อกปฺปิยา  ฯ  ทส  ปรมานิ  ฯ
ทสวสฺเสน      ภิกฺขุนา      พฺยตฺเตน     ปฏิพเลน     ปพฺพาเชตพฺพํ
อุปสมฺปาเทตพฺพํ   นิสฺสโย   ทาตพฺโพ   สามเณโร   อุปฏฺฐาเปตพฺโพ  ฯ
ทสวสฺสาย      ภิกฺขุนิยา     พฺยตฺตาย     ปฏิพลาย     ปพฺพาเชตพฺพํ
อุปสมฺปาเทตพฺพํ   นิสฺสโย   ทาตพฺโพ   สามเณรี   อุปฏฺฐาเปตพฺพา   ฯ
ทสวสฺสาย     ภิกฺขุนิยา     พฺยตฺตาย     ปฏิพลาย     วุฏฺฐาปนสมฺมติ
สาทิตพฺพา ฯ ทสวสฺสาย [๒]- คิหิคตาย สิกฺขา ทาตพฺพาติ ฯ
                                  ทสกํ นิฏฺฐิตํ ฯ
                                    ตสฺสุทฺทานํ
     [๑๐๐๓]   อาฆาตวินยา ๓- วตฺถุ        มิจฺฉา สมฺมา จ อนฺตคา
                มิจฺฉตฺตา เจว สมฺมตฺตา      อกุสลา กุสลาปิ จ
                สลากาธมฺมธมฺมา จ          สามเณรา จ นาสนา
                ภาสาธิกรณญฺเจว             ญตฺติ ลหุกเมว จ
                ลหุกา ครุกา เอเต             กณฺหสุกฺกา วิชานถ
                อุพฺพาหิกา จ สิกฺขา จ       อนฺเตปุรา ๔- จ วตฺถูนิ
@เชิงอรรถ:  ม. ยุ. เวสาลิยา ฯ   โป. ภิกฺขุนิยา ฯ   ม. ยุ. อาฆาตํ วินยํ ฯ
@ ม. อนฺเตปุเร ฯ
                รตนํ ทสวคฺโค จ                ตเถว อุปสมฺปทา
                ปํสุกูลธารณา จ                ทสาหสุกฺกอิตฺถิโย
                ภริยา ทส วตฺถูนิ               อวนฺทิยกฺโกเสน จ
                เปสุญฺญญฺเจว ๑- เสนา จ ๒-      วรานิ จ อธมฺมิกา
                ธมฺมิกา ยาคุ มํสา จ          ปรมา ภิกฺขุ ภิกฺขุนี
                วุฏฺฐาปนา คิหิคตา            ทสกา สุปฺปกาสิตาติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๓๔๗-๓๕๒. https://84000.org/tipitaka/read/pali_read.php?B=8&A=7089&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=7089&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1000&items=4              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=85              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1000              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=3&A=10729              The Pali Atthakatha in Roman :- https://84000.org/tipitaka/atthapali/read_rm.php?B=3&A=10729              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]