ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๖ ภาษาบาลี อักษรไทย พระวินัยปิฎกเล่มที่ ๖ วินย. จุลฺลวคฺโค (๑)

     [๒๘]   ตีหิ  ภิกฺขเว  องฺเคหิ  สมนฺนาคตสฺส  ภิกฺขุโน อากงฺขมาโน
สงฺโฆ    ตชฺชนียกมฺมํ    กเรยฺย    ภณฺฑนการโก   โหติ   กลหการโก
วิวาทการโก    ภสฺสการโก    สงฺเฆ   อธิกรณการโก   พาโล   โหติ
อพฺยตฺโต   อาปตฺติพหุโล   อนปทาโน   คิหิสํสฏฺโฐ  วิหรติ  อนนุโลมิเกหิ
คิหิสํสคฺเคหิ     อิเมหิ    โข    ภิกฺขเว    ตีหงฺเคหิ    สมนฺนาคตสฺส
ภิกฺขุโน อากงฺขมาโน สงฺโฆ ตชฺชนียกมฺมํ กเรยฺย ฯ
     [๒๙]   อปเรหิปิ   ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน    สงฺโฆ    ตชฺชนียกมฺมํ   กเรยฺย   อธิสีเล   สีลวิปนฺโน
โหติ    อชฺฌาจาเร   อาจารวิปนฺโน   โหติ   อติทิฏฺฐิยา   ทิฏฺฐิวิปนฺโน
โหติ    อิเมหิ    โข    ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน สงฺโฆ ตชฺชนียกมฺมํ กเรยฺย ฯ
     [๓๐]   อปเรหิปิ   ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน    สงฺโฆ    ตชฺชนียกมฺมํ    กเรยฺย    พุทฺธสฺส    อวณฺณํ
ภาสติ     ธมฺมสฺส    อวณฺณํ    ภาสติ    สงฺฆสฺส    อวณฺณํ    ภาสติ
อิเมหิ   โข   ภิกฺขเว   ตีหงฺเคหิ  สมนฺนาคตสฺส  ภิกฺขุโน  อากงฺขมาโน
สงฺโฆ ตชฺชนียกมฺมํ กเรยฺย ฯ
     [๓๑]   ติณฺณํ  ภิกฺขเว  ภิกฺขูนํ  อากงฺขมาโน  สงฺโฆ  ตชฺชนียกมฺมํ
กเรยฺย    เอโก    ภณฺฑนการโก    ฯเปฯ    สงฺเฆ   อธิกรณการโก
เอโก   พาโล   โหติ   อพฺยตฺโต   อาปตฺติพหุโล   อนปทาโน   เอโก
คิหิสํสฏฺโฐ   วิหรติ   อนนุโลมิเกหิ   คิหิสํสคฺเคหิ   อิเมสํ  โข  ภิกฺขเว
ติณฺณํ ภิกฺขูนํ อากงฺขมาโน สงฺโฆ ตชฺชนียกมฺมํ กเรยฺย ฯ
     [๓๒]   อปเรสํปิ   ภิกฺขเว   ติณฺณํ  ภิกฺขูนํ  อากงฺขมาโน  สงฺโฆ
ตชฺชนียกมฺมํ    กเรยฺย   เอโก   อธิสีเล   สีลวิปนฺโน   โหติ   เอโก
อชฺฌาจาเร   อาจารวิปนฺโน   โหติ   เอโก   อติทิฏฺฐิยา   ทิฏฺฐิวิปนฺโน
โหติ   อิเมสํ   โข   ภิกฺขเว   ติณฺณํ   ภิกฺขูนํ   อากงฺขมาโน   สงฺโฆ
ตชฺชนียกมฺมํ กเรยฺย ฯ
     [๓๓]   อปเรสํปิ   ภิกฺขเว   ติณฺณํ  ภิกฺขูนํ  อากงฺขมาโน  สงฺโฆ
ตชฺชนียกมฺมํ    กเรยฺย    เอโก    พุทฺธสฺส   อวณฺณํ   ภาสติ   เอโก
ธมฺมสฺส     อวณฺณํ    ภาสติ    เอโก    สงฺฆสฺส    อวณฺณํ    ภาสติ
อิเมสํ   โข   ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ  ตชฺชนียกมฺมํ
กเรยฺย ฯ
                            อากงฺขมานจฺฉกฺกํ นิฏฺฐิตํ ฯ
     [๓๔]   สงฺเฆน  ๑-  ตชฺชนียกมฺมกเตน  ภิกฺขเว  ภิกฺขุนา  สมฺมา
วตฺติตพฺพํ    ฯ    ตตฺรายํ    สมฺมาวตฺตนา   น   อุปสมฺปาเทตพฺพํ   น
นิสฺสโย  ทาตพฺโพ  น  สามเณโร  อุปฏฺฐาเปตพฺโพ  น ภิกฺขุโนวาทกสมฺมติ
สาทิตพฺพา       สมฺมเตนปิ       ภิกฺขุนิโย      น      โอวทิตพฺพา
ยาย   อาปตฺติยา   สงฺเฆน   ตชฺชนียกมฺมํ   กตํ   โหติ   สา  อาปตฺติ
น   อาปชฺชิตพฺพา   อญฺญา   ว   ตาทิสิกา   ตโต   วา   ปาปิฏฺฐตรา
กมฺมํ    น    ครหิตพฺพํ    กมฺมิกา   น   ครหิตพฺพา   น   ปกตตฺตสฺส
ภิกฺขุโน    อุโปสโถ    ฐเปตพฺโพ    น    ปวารณา   ฐเปตพฺพา   น
สวจนียํ    กาตพฺพํ    น    อนุวาโท    ปฏฺฐเปตพฺโพ   น   โอกาโส
กาเรตพฺโพ   น   โจเทตพฺโพ   น  สาเรตพฺโพ  น  ภิกฺขู  ๒-  ภิกฺขูหิ
สมฺปโยเชตพฺพนฺติ ฯ
                      ตชฺชนียกมฺเม อฏฺฐารสวตฺตํ นิฏฺฐิตํ ฯ
     [๓๕]   อถโข   สงฺโฆ   ปณฺฑุกโลหิตกานํ   ภิกฺขูนํ   ตชฺชนียกมฺมํ
@เชิงอรรถ:  ม. ยุ. อยํ ปาโฐ น ทิสฺสติ ฯ       ม. ยุ. อยํ ปาโฐ น ทิสฺสติ ฯ
อกาสิ   ฯ   เต   สงฺเฆน   ตชฺชนียกมฺมกตา   สมฺมา   วตฺตนฺติ  โลมํ
ปาเตนฺติ   เนตฺถารํ   วตฺตนฺติ   ภิกฺขู   อุปสงฺกมิตฺวา   เอวํ   วเทนฺติ
มยํ    อาวุโส    สงฺเฆน   ตชฺชนียกมฺมกตา   สมฺมา   วตฺตาม   โลมํ
ปาเตม   เนตฺถารํ   วตฺตาม  กถํ  นุ  โข  อเมฺหหิ  ปฏิปชฺชิตพฺพนฺติ  ฯ
[๑]-   ภควโต   เอตมตฺถํ   อาโรเจสุํ   ฯ   เตนหิ  ภิกฺขเว  สงฺโฆ
ปณฺฑุกโลหิตกานํ ภิกฺขูนํ ตชฺชนียกมฺมํ ปฏิปฺปสฺสมฺเภตุ ฯ
     [๓๖]   ปญฺจหิ    ภิกฺขเว    องฺเคหิ   สมนฺนาคตสฺส   ภิกฺขุโน
ตชฺชนียกมฺมํ    น    ปฏิปฺปสฺสมฺเภตพฺพํ    อุปสมฺปาเทติ   นิสฺสยํ   เทติ
สามเณรํ     อุปฏฺฐาเปติ    ภิกฺขุโนวาทกสมฺมตึ    สาทิยติ    สมฺมโตปิ
ภิกฺขุนิโย   โอวทติ   อิเมหิ   โข   ภิกฺขเว  ปญฺจหงฺเคหิ  สมนฺนาคตสฺส
ภิกฺขุโน ตชฺชนียกมฺมํ น ปฏิปฺปสฺสมฺเภตพฺพํ ฯ
     [๓๗]   อปเรหิปิ   ภิกฺขเว   ปญฺจหงฺเคหิ  สมนฺนาคตสฺส  ภิกฺขุโน
ตชฺชนียกมฺมํ    น    ปฏิปฺปสฺสมฺเภตพฺพํ    ยาย    อาปตฺติยา   สงฺเฆน
ตชฺชนียกมฺมํ    กตํ    โหติ    ตํ    อาปตฺตึ   อาปชฺชติ   อญฺญํ   วา
ตาทิสิกํ    ตโต   วา   ปาปิฏฺฐตรํ   กมฺมํ   ครหติ   กมฺมิเก   ครหติ
อิเมหิ   โข   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน  ตชฺชนียกมฺมํ
น ปฏิปฺปสฺสมฺเภตพฺพํ ฯ
     [๓๘]   อฏฺฐหิ    ภิกฺขเว    องฺเคหิ   สมนฺนาคตสฺส   ภิกฺขุโน
ตชฺชนียกมฺมํ    น    ปฏิปฺปสฺสมฺเภตพฺพํ   ปกตตฺตสฺส   ภิกฺขุโน   อุโปสถํ
ฐเปติ    ปวารณํ    ฐเปติ    สวจนียํ    กโรติ   อนุวาทํ   ปฏฺฐเปติ
@เชิงอรรถ:  ม. ภิกฺขู ฯ
โอกาสํ   กาเรติ   โจเทติ   สาเรติ   ภิกฺขู  ๑-  ภิกฺขูหิ  สมฺปโยเชติ
อิเมหิ   โข   ภิกฺขเว  อฏฺฐหงฺเคหิ  สมนฺนาคตสฺส  ภิกฺขุโน  ตชฺชนียกมฺมํ
น ปฏิปฺปสฺสมฺเภตพฺพํ ฯ
                    นปฏิปฺปสฺสมฺเภตพฺพอฏฺฐารสกํ นิฏฺฐิตํ ฯ
     [๓๙]   ปญฺจหิ    ภิกฺขเว    องฺเคหิ   สมนฺนาคตสฺส   ภิกฺขุโน
ตชฺชนียกมฺมํ   ปฏิปฺปสฺสมฺเภตพฺพํ   น   อุปสมฺปาเทติ   น   นิสฺสยํ  เทติ
น     สามเณรํ    อุปฏฺฐาเปติ    น    ภิกฺขุโนวาทกสมฺมตึ    สาทิยติ
สมฺมโตปิ   ภิกฺขุนิโย   น   โอวทติ   อิเมหิ  โข  ภิกฺขเว  ปญฺจหงฺเคหิ
สมนฺนาคตสฺส ภิกฺขุโน ตชฺชนียกมฺมํ ปฏิปฺปสฺสมฺเภตพฺพํ ฯ
     [๔๐]   อปเรหิปิ   ภิกฺขเว   ปญฺจหงฺเคหิ  สมนฺนาคตสฺส  ภิกฺขุโน
ตชฺชนียกมฺมํ     ปฏิปฺปสฺสมฺเภตพฺพํ     ยาย     อาปตฺติยา     สงฺเฆน
ตชฺชนียกมฺมํ   กตํ  โหติ  ตํ  อาปตฺตึ  น  อาปชฺชติ  อญฺญํ  วา  ตาทิสิกํ
ตโต   วา   ปาปปิฏฺฐตรํ  กมฺมํ  น  ครหติ  กมฺมิเก  น  ครหติ  อิเมหิ
โข    ภิกฺขเว    ปญฺจหงฺเคหิ    สมนฺนาคตสฺส   ภิกฺขุโน   ตชฺชนียกมฺมํ
ปฏิปฺปสฺสมฺเภตพฺพํ ฯ
     [๔๑]   อฏฺฐหิ  ภิกฺขเว  องฺเคหิ  สมนฺนาคตสฺส ภิกฺขุโน ตชฺชนียกมฺมํ
ปฏิปฺปสฺสมฺเภตพฺพํ    น    ปกตตฺตสฺส   ภิกฺขุโน   อุโปสถํ   ฐเปติ   น
ปวารณํ   ฐเปติ   น   สวจนียํ   กโรติ   น   อนุวาทํ   ปฏฺฐเปติ  น
โอกาสํ   กาเรติ    น   โจเทติ   น  สาเรติ  น  ภิกฺขู  ๑-  ภิกฺขูหิ
สมฺปโยเชติ    อิเมหิ    โข    ภิกฺขเว    อฏฺฐหงฺเคหิ   สมนฺนาคตสฺส
@เชิงอรรถ:  ม. ยุ. อยํ ปาโฐ น ทิสฺสติ ฯ
ภิกฺขุโน ตชฺชนียกมฺมํ ปฏิปฺปสฺสมฺเภตพฺพํ ฯ
                     ปฏิปฺปสฺสมฺเภตพฺพํ อฏฺฐารสกํ นิฏฺฐิตํ ฯ
     [๔๒]   เอวญฺจ  ปน  ภิกฺขเว  ปฏิปฺปสฺสมฺเภตพฺพํ  ฯ  เตหิ ภิกฺขเว
ปณฺฑุกโลหิตเกหิ    ภิกฺขูหิ   สงฺฆํ   อุปสงฺกมิตฺวา   เอกํสํ   อุตฺตราสงฺคํ
กริตฺวา   วุฑฺฒานํ   ภิกฺขูนํ  ปาเท  วนฺทิตฺวา  อุกฺกุฏิกํ  นิสีทิตฺวา  อญฺชลึ
ปคฺคเหตฺวา   เอวมสฺส  วจนีโย   มยํ  ภนฺเต  สงฺเฆน  ตชฺชนียกมฺมกตา
สมฺมา   วตฺตาม   โลมํ   ปาเตม   เนตฺถารํ   วตฺตาม  ตชฺชนียกมฺมสฺส
ปฏิปฺปสฺสทฺธึ    ยาจามาติ    ฯ    ทุติยมฺปิ   ยาจิตพฺพา   ฯ   ตติยมฺปิ
ยาจิตพฺพา ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๔๒.๑}   สุณาตุ   เม   ภนฺเต   สงฺโฆ   อิเม  ปณฺฑุกโลหิตกา
ภิกฺขู   สงฺเฆน   ตชฺชนียกมฺมกตา   สมฺมา   วตฺตนฺติ   โลมํ   ปาเตนฺติ
เนตฺถารํ    วตฺตนฺติ    ตชฺชนียกมฺมสฺส    ปฏิปฺปสฺสทฺธึ    ยาจนฺติ    ฯ
ยทิ     สงฺฆสฺส     ปตฺตกลฺลํ     สงฺโฆ    ปณฺฑุกโลหิตกานํ    ภิกฺขูนํ
ตชฺชนียกมฺมํ ปฏิปฺปสฺสมฺเภยฺย ฯ เอสา ญตฺติ ฯ
     {๔๒.๒}   สุณาตุ   เม   ภนฺเต   สงฺโฆ   อิเม  ปณฺฑุกโลหิตกา
ภิกฺขู   สงฺเฆน   ตชฺชนียกมฺมกตา   สมฺมา   วตฺตนฺติ   โลมํ   ปาเตนฺติ
เนตฺถารํ    วตฺตนฺติ    ตชฺชนียกมฺมสฺส    ปฏิปฺปสฺสทฺธึ    ยาจนฺติ    ฯ
สงฺโฆ    ปณฺฑุกโลหิตกานํ    ภิกฺขูนํ   ตชฺชนียกมฺมํ   ปฏิปฺปสฺสมฺเภติ   ฯ
ยสฺสายสฺมโต     ขมติ     ปณฺฑุกโลหิตกานํ    ภิกฺขูนํ    ตชฺชนียกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๔๒.๓}   ทุติยมฺปิ     เอตมตฺถํ     วทามิ     ฯ    สุณาตุ
เม   ภนฺเต   ฯเปฯ   ยสฺสายสฺมโต   ขมติ   ปณฺฑุกโลหิตกานํ   ภิกฺขูนํ
ตชฺชนียกมฺมสฺส     ปฏิปฺปสฺสทฺธิ     โส    ตุณฺหสฺส    ยสฺส    นกฺขมติ
โส ภาเสยฺย ฯ
     {๔๒.๔}   ตติยมฺปิ  เอตมตฺถํ  วทามิ  ฯ  สุณาตุ  เม ภนฺเต สงฺโฆ
อิเม    ปณฺฑุกโลหิตกา    ภิกฺขู    สงฺเฆน    ตชฺชนียกมฺมกตา   สมฺมา
วตฺตนฺติ    โลมํ    ปาเตนฺติ     เนตฺถารํ    วตฺตนฺติ   ตชฺชนียกมฺมสฺส
ปฏิปฺปสฺสทฺธึ     ยาจนฺติ     ฯ    สงฺโฆ    ปณฺฑุกโลหิตกานํ    ภิกฺขูนํ
ตชฺชนียกมฺมํ      ปฏิปฺปสฺสมฺเภติ      ฯ      ยสฺสายสฺมโต      ขมติ
ปณฺฑุกโลหิตกานํ     ภิกฺขูนํ     ตชฺชนียกมฺมสฺส     ปฏิปฺปสฺสทฺธิ     โส
ตุณฺหสฺส ยสฺส นกฺขมติ โส ภาเสยฺย ฯ
     {๔๒.๕}   ปฏิปฺปสฺสทฺธํ    สงฺเฆน    ปณฺฑุกโลหิตกานํ    ภิกฺขูนํ
ตชฺชนียกมฺมํ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
                           ตชฺชนียกมฺมํ ปฐมํ นิฏฺฐิตํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๖ หน้าที่ ๑๒-๑๘. https://84000.org/tipitaka/read/pali_read.php?B=6&A=239&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=6&A=239&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=6&item=28&items=15              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=6&siri=2              สารบัญพระไตรปิฎกเล่มที่ ๖ https://84000.org/tipitaka/read/?index_6 https://84000.org/tipitaka/english/?index_6

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]