ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

                                        อิทฺธิพลกถา
     [๑๔๖๐]   อิทฺธิพเลน    สมนฺนาคโต   กปฺปํ   ติฏฺเฐยฺยาติ   ฯ
อามนฺตา   ฯ   อิทฺธิมยิโก  โส  อายุ  อิทฺธิมยิกา  สา  คติ  อิทฺธิมยิโก
โส   อตฺตภาวปฏิลาโภติ   ฯ   น   เหวํ  วตฺตพฺเพ  ฯเปฯ  อิทฺธิพเลน
สมนฺนาคโต    กปฺปํ   ติฏฺเฐยฺยาติ   ฯ   อามนฺตา   ฯ   อตีตํ   กปฺปํ
ติฏฺเฐยฺย   อนาคตํ   กปฺปํ  ติฏฺเฐยฺยาติ  ฯ  น  เหวํ  วตฺตพฺเพ  ฯเปฯ
อิทฺธิพเลน   สมนฺนาคโต   กปฺปํ   ติฏฺเฐยฺยาติ   ฯ  อามนฺตา  ฯ  เทฺว
กปฺเป    ติฏฺเฐยฺย    ตโย    กปฺเป    ติฏฺเฐยฺย   จตฺตาโร   กปฺเป
ติฏฺเฐยฺยาติ   ฯ   น   เหวํ  วตฺตพฺเพ  ฯเปฯ  อิทฺธิพเลน  สมนฺนาคโต
กปฺปํ  ติฏฺเฐยฺยาติ  ฯ  อามนฺตา  ฯ  สติ  ชีวิเต  ชีวิตาวเสเส ติฏฺเฐยฺย
อสติ   ชีวิเต  ชีวิตาวเสเส  ติฏฺเฐยฺยาติ  ฯ  สติ  ชีวิเต  ชีวิตาวเสเส
ติฏฺเฐยฺยาติ  ฯ  ๑-  ฯ  หญฺจิ  สติ  ชีวิเต  ชีวิตาวเสเส  ติฏฺเฐยฺย โน
วต   เร  วตฺตพฺเพ  อิทฺธิพเลน  สมนฺนาคโต  กปฺปํ  ติฏฺเฐยฺยาติ  ฯเปฯ
อสติ   ชีวิเต  ชีวิตาวเสเส  ติฏฺเฐยฺยาติ  ฯ  มโต  ติฏฺเฐยฺย  กาลกโต
ติฏฺเฐยฺยาติ ฯ น เหวํ วตฺตพฺเพ ฯเปฯ
     [๑๔๖๑]   อิทฺธิพเลน  สมนฺนาคโต  กปฺปํ ติฏฺเฐยฺยาติ ฯ อามนฺตา ฯ
อุปฺปนฺโน   ผสฺโส   มา   นิรุชฺฌีติ   ลพฺภา   อิทฺธิยา   ปคฺคเหตุนฺติ  ฯ
น   เหวํ   วตฺตพฺเพ   ฯเปฯ   อุปฺปนฺนา   เวทนา   ฯเปฯ  อุปฺปนฺนา
@เชิงอรรถ: ๑. ม. โปตฺถเก อยํ ปโยโค นตฺถิ อิโต ปุพฺโพ จ อิติสทฺโท นตฺถิ ยุ. โปตฺถเก
@อีทิโสว อตฺถิ
สญฺญา   ฯเปฯ   อุปฺปนฺนา   เจตนา   ฯเปฯ  อุปฺปนฺนํ  จิตฺตํ  อุปฺปนฺนา
สทฺธา     อุปฺปนฺนํ    วิริยํ    อุปฺปนฺนา    สติ    อุปฺปนฺโน    สมาธิ
ฯเปฯ  อุปฺปนฺนา  ปญฺญา  มา  นิรุชฺฌีติ  ลพฺภา  อิทฺธิยา  ปคฺคเหตุนฺติ  ฯ
น เหวํ วตฺตพฺเพ ฯเปฯ
     [๑๔๖๒]   อิทฺธิพเลน  สมนฺนาคโต  กปฺปํ ติฏฺเฐยฺยาติ ฯ อามนฺตา ฯ
รูปํ  นิจฺจํ  โหตูติ  ลพฺภา  อิทฺธิยา  ปคฺคเหตุนฺติ  ฯ  น  เหวํ  วตฺตพฺเพ
ฯเปฯ   เวทนา   ฯเปฯ   สญฺญา   ฯเปฯ   สงฺขารา  ฯเปฯ  วิญฺญาณํ
นิจฺจํ โหตูติ ลพฺภา อิทฺธิยา ปคฺคเหตุนฺติ ฯ น เหวํ วตฺตพฺเพ ฯเปฯ
     [๑๔๖๓]   อิทฺธิพเลน  สมนฺนาคโต  กปฺปํ ติฏฺเฐยฺยาติ ฯ อามนฺตา ฯ
ชาติธมฺมา   สตฺตา   มา   ชายึสูติ   ลพฺภา   อิทฺธิยา  ปคฺคเหตุนฺติ  ฯ
น  เหวํ  วตฺตพฺเพ  ฯเปฯ  ชราธมฺมา  สตฺตา  มา  ชิรึสูติ  ๑-  ฯเปฯ
พฺยาธิธมฺมา   สตฺตา   มา   พฺยาธิยึสูติ  ฯเปฯ  มรณธมฺมา  สตฺตา  มา
มิยฺยึสูติ ลพฺภา อิทฺธิยา ปคฺคเหตุนฺติ ฯ น เหวํ วตฺตพฺเพ ฯเปฯ
     [๑๔๖๔]   น  วตฺตพฺพํ  อิทฺธิพเลน  สมนฺนาคโต กปฺปํ ติฏฺเฐยฺยาติ ฯ
อามนฺตา   ฯ   นนุ   วุตฺตํ   ภควตา  ยสฺส  กสฺสจิ  อานนฺท  จตฺตาโร
อิทฺธิปาทา    ภาวิตา    พหุลีกตา    ยานีกตา    วตฺถุกตา   อนุฏฺฐิตา
ปริจิตา    สุสมารทฺธา    โส   อากงฺขมาโน   กปฺปํ   วา   ติฏฺเฐยฺย
กปฺปาวเสสํ  วาติ  ๒-  อตฺเถว  สุตฺตนฺโตติ  ฯ  อามนฺตา  ฯ  เตน  หิ
อิทฺธิพเลน สมนฺนาคโต กปฺปํ ติฏฺเฐยฺยาติ ฯ
@เชิงอรรถ: ๑. ม. ชิยีสุ  ขุ. อุ. ๑๓๘ ฯ
     [๑๔๖๕]   อิทฺธิพเลน    สมนฺนาคโต   กปฺปํ   ติฏฺเฐยฺยาติ   ฯ
อามนฺตา  ฯ  นนุ  วุตฺตํ  ภควตา  จตุนฺนํ  ภิกฺขเว  ธมฺมานํ  นตฺถิ  โกจิ
ปาฏิโภโค  สมโณ  วา  พฺราหฺมโณ  วา  เทโว  วา  มาโร วา พฺรหฺมา
วา  โกจิ  วา  โลกสฺมึ  ฯ  กตเมสํ  จตุนฺนํ  ฯ  ชราธมฺโม  มา  ชิรีติ
นตฺถิ   โกจิ   ปาฏิโภโค   สมโณ   วา   พฺราหฺมโณ  วา  เทโว  วา
มาโร   วา   พฺรหฺมา   วา   โกจิ   วา   โลกสฺมึ  พฺยาธิธมฺโม  มา
พฺยาธิยีติ   ฯเปฯ   มรณธมฺโม   มา   มิยฺยีติ   ฯเปฯ  ยานิ  โข  ปน
ตานิ   ปุพฺเพ   กตานิ  ปาปกานิ  กมฺมานิ  สงฺกิเลสิกานิ  โปโนพฺภวิกานิ
ทุกฺขุทฺรยานิ   ทุกฺขวิปากานิ   อายตึ   ชาติชรามรณิยานิ   เตสํ  วิปาโก
มา   นิพฺพตฺตีติ   นตฺถิ   โกจิ   ปาฏิโภโค   สมโณ   วา   พฺราหฺมโณ
วา  เทโว  วา  มาโร  วา  พฺรหฺมา  วา  โกจิ  วา  โลกสฺมึ  อิเมสํ
โข   ภิกฺขเว   จตุนฺนํ   ธมฺมานํ   นตฺถิ  โกจิ  ปาฏิโภโค  สมโณ  วา
พฺราหฺมโณ   วา   เทโว   วา   มาโร  วา  พฺรหฺมา  วา  โกจิ  วา
โลกสฺมินฺติ   ๑-   อตฺเถว   สุตฺตนฺโตติ  ฯ  อามนฺตา  ฯ  เตน  หิ  น
วตฺตพฺพํ อิทฺธิพเลน สมนฺนาคโต กปฺปํ ติฏฺเฐยฺยาติ ฯ
                                         อิทฺธิพลกถา ฯ
                                          -----------
@เชิงอรรถ:  อํ. จตุกฺก ๒๓๙ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๔๘๕-๔๘๗. https://84000.org/tipitaka/read/pali_read.php?B=37&A=9651&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=9651&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1460&items=6              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=131              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1460              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=5808              The Pali Atthakatha in Roman :- https://84000.org/tipitaka/atthapali/read_rm.php?B=55&A=5808              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]