ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                          จตุตฺโถ สุมนพุทฺธวํโส
     [๕]   |๕.๑| มงฺคลสฺส อปเรน               สุมโน นาม นายโก
                สพฺพธมฺเมหิ อสโม              สพฺพสตฺตานมุตฺตโม ฯ
       |๕.๒| ตทา ๓- อมตเภริโย             อาหนิ เมขเล ปุเร
                ธมฺมสงฺขสมายุตฺตํ                นวงฺคชินสาสนํ ฯ
       |๕.๓| วิชินิตฺวา ๔- กิเลเส โส          ปตฺโต สมฺโพธิมุตฺตมํ
                มาเปสิ นครํ สตฺถา               สทฺธมฺมปุรวรุตฺตมํ ฯ
       |๕.๔| นิรนฺตรํ อกุฏิลํ                     อุชุํ วิปุลวิตฺถตํ
                มาเปสิ โส มหาวีถึ               สติปฏฺฐานวรุตฺตมํ ฯ
@เชิงอรรถ:  ยุ. สํกิเลสมรณํ ฯ  ม. วสฺสเร ฯ ยุ. เวสฺสโร ฯ  ม. ตทา อมตเภรึ
@โส ฯ ยุ. โสปิ ตทา อมตเภรึ ฯ  ม. นิชฺชินิตฺวา ฯ ยุ. ชินิตฺวาน ฯ
       |๕.๕| ผเล จตฺตาริ สามญฺเญ          จตสฺโส ปฏิสมฺภิทา
                ฉฬภิญฺญาฏฺฐสมาปตฺตี        ปสาเรสิ ตตฺถ วีถิยํ ฯ
       |๕.๖| เย อปฺปมตฺตา อขิลา            หิริวิริเยหุปาคตา
                เต เต อิเม คุณวเร                อาทิยนฺติ ยถา สุขํ ฯ
       |๕.๗| เอวเมเตน โยเคน                 อุทฺธรนฺโต มหาชนํ
                โพเธสิ ปฐมํ สตฺถา               โกฏิสตสหสฺสิโย ฯ
       |๕.๘| ยมฺหิ กาเล มหาวีโร              โอวทิ ติตฺถิเย คเณ
                โกฏิสตสหสฺสานิ ๑-             ทุติเย ธมฺมเทสเน ฯ
       |๕.๙| ยทา เทวา มนุสฺสา จ            สมคฺคา เอกมานสา
                นิโรธปญฺหํ ปุจฺฉึสุ                สํสยญฺจาปิ มานสํ ฯ
       |๕.๑๐| ตทาปิ ธมฺมเทสเน             นิโรธปริทีปเน
                   นวุติโกฏิสหสฺสานํ             ตติยาภิสมโย อหุ ฯ
       |๕.๑๑| สนฺนิปาตา ตโย อาสุํ          สุมนสฺส มเหสิโน
                   ขีณาสวานํ วิมลานํ           สนฺติจิตฺตาน ตาทินํ ฯ
       |๕.๑๒| วสฺสํ วุฏฺฐสฺส ภควโต          อภิสงฺฆุฏฺเฐ ปวารเณ
                   โกฏิสตสหสฺเสหิ               ปวาเรสิ ตถาคโต ฯ
       |๕.๑๓| ตโต ปรํ สนฺนิปาเต             วิมเล กญฺจนปพฺพเต
                   นวุติโกฏิสหสฺสานํ            ทุติโย อาสิ สมาคโม ฯ
       |๕.๑๔| ยทา สกฺโก เทวราชา          พุทฺธทสฺสนมุปาคมิ
                   อสีติโกฏิสหสฺสานํ            ตติโย อาสิ สมาคโม ฯ
@เชิงอรรถ:  ม. ยุ. โกฏิสหสฺสาภิสฺมึสุ ฯ
       |๕.๑๕| อหํ เตน สมเยน                นาคราชา มหิทฺธิโก
                   อตุโล นาม นาเมน           อุปฺปนฺนกุสลสญฺจโย ๑- ฯ
       |๕.๑๖| ตทาหํ นาคภวนา              นิกฺขมิตฺวา สญาติภิ
                   นาคานํ ทิพฺพตุริเยหิ          สสงฺฆํ ชินมุปฏฺฐหึ ฯ
       |๕.๑๗| โกฏิสตสหสฺสานิ ๒-          อนฺนปาเนน ตปฺปยึ
                   ปจฺเจกทุสฺสยุคํ ทตฺวา        สรณํ ตมุปาคมึ ฯ
       |๕.๑๘| โสปิ มํ พุทฺโธ พฺยากาสิ      สุมโน โลกนายโก
                   อปริเมยฺเย อิโต กปฺเป       อยํ พุทฺโธ ภวิสฺสติ ฯ
       |๕.๑๙| อหุ กปิลวฺหยา รมฺมา         นิกฺขมิตฺวา ตถาคโต
                   ปธานํ ปทหิตฺวาน             กตฺวา ทุกฺกรการิกํ ฯ
       |๕.๒๐| อชปาลรุกฺขมูลสฺมึ             นิสีทิตฺวา ตถาคโต
                   ตตฺถ ปายาสํ ปคฺคยฺห       เนรญฺชรมุเปหิติ ฯ
       |๕.๒๑| เนรญฺชราย ตีรมฺหิ             ปายาสํ อทิ โส ชิโน
                   ปฏิยตฺตวรมคฺเคน             โพธิมูลมฺหิ เอหิติ ฯ
       |๕.๒๒| ตโต ปทกฺขิณํ กตฺวา          โพธิมณฺฑํ อนุตฺตรํ
                   อสฺสตฺถรุกฺขมูลมฺหิ            พุชฺฌิสฺสติ มหายโส ฯ
       |๕.๒๓| อิมสฺส ชนิกา มาตา           มายา นาม ภวิสฺสติ
                   ปิตา สุทฺโธทโน นาม         อยํ เหสฺสติ โคตโม ฯ
       |๕.๒๔| อนาสวา วีตราคา              สนฺตจิตฺตา สมาหิตา
                   โกลิโต อุปติสฺโส จ            อคฺคา เหสฺสนฺติ สาวกา
                   อานนฺโท นามุปฏฺฐาโก      อุปฏฺฐิสฺสติมํ ชินํ ฯ
@เชิงอรรถ:  ม. อุสฺสนฺนกุสลญฺจโย ฯ ยุ. อุสฺสนฺนกุสลปจฺจโย ฯ  ม. ยุ. โกฏิสตสหสฺสานํ ฯ
       |๕.๒๕| เขมา อุปฺปลวณฺณา จ        อคฺคา เหสฺสนฺติ สาวิกา
                   อนาสวา วีตราคา             สนฺตจิตฺตา สมาหิตา ฯ
       |๕.๒๖| โพธิ ตสฺส ภควโต              อสฺสตฺโถติ ปวุจฺจติ
                   จิตฺโต จ หตฺถาฬวโก         อคฺคา เหสฺสนฺตุปฏฺฐกา ฯ
       |๕.๒๗| นนฺทมาตา จ อุตฺตรา         อคฺคา เหสฺสนฺตุปฏฺฐิกา
                   อายุ วสฺสสตํ ตสฺส             โคตมสฺส ยสสฺสิโน ฯ
       |๕.๒๘| อิทํ สุตฺวาน วจนํ               อสมสฺส มเหสิโน
                   อาโมทิตา นรมรู               พุทฺธวีชงฺกุโร อยํ ฯ
       |๕.๒๙| อุกฺกุฏฺฐิสทฺทา วตฺตนฺติ       อปฺโผเฏนฺติ หสนฺติ จ
                   กตญฺชลี นมสฺสนฺติ            ทสสหสฺสี สเทวกา ฯ
       |๕.๓๐| ยทิมสฺส โลกนาถสฺส          วิรชฺชิสฺสาม สาสนํ
                   อนาคตมฺหิ อทฺธาเน          เหสฺสาม สมฺมุขา อิมํ ฯ
       |๕.๓๑| ยถา มนุสฺสา นทึ ตรนฺตา    ปฏิติตฺถํ วิรชฺฌิย
                   เหฏฺฐาติตฺถํ คเหตฺวาน       อุตฺตรนฺติ มหานทึ ฯ
       |๕.๓๒| เอวเมว มยํ สพฺเพ              ยทิ มุญฺจามิมํ ชินํ
                   อนาคตมฺหิ อทฺธาเน          เหสฺสาม สมฺมุขา อิมํ ฯ
       |๕.๓๓| ตสฺสาปิ วจนํ สุตฺวา            ภิยฺโย จิตฺตํ ปสาทยึ
                   อุตฺตรึ วตฺตมธิฏฺฐาสึ          ทสปารมิปูริยา ฯ
       |๕.๓๔| เมขลํ นาม นครํ                 สุทตฺโต นาม ขตฺติโย
                   สิริมา นาม ชนิกา              สุมนสฺส มเหสิโน ฯ
       |๕.๓๕| นววสฺสสหสฺสานิ               อคารํ อชฺฌาวสิ โส
                   จนฺโท สุจนฺโท วฏํโส [๑]-  ตโย ปาสาทมุตฺตมา ฯ
       |๕.๓๖| เตสฏฺฐิสตสหสฺสานิ           นาริโย สมลงฺกตา
                   วฏํสกี ๒- นาม นารี          อนุปโม นาม อตฺรโช ฯ
       |๕.๓๗| นิมิตฺเต จตุโร ทิสฺวา           หตฺถิยาเนน นิกฺขมิ
                   อนูนทสมาสานิ                ปธานํ ปทหี ชิโน ฯ
       |๕.๓๘| พฺรหฺมุนา ยาจิโต สนฺโต     สุมโน โลกนายโก
                   วตฺตจกฺโก มหาวีโร            เมขเล ปุรวรุตฺตเม ฯ
       |๕.๓๙| สรโณ ภาวิตตฺโต จ            อเหสุํ อคฺคสาวกา
                   อุเทโน นามุปฏฺฐาโก         สุมนสฺส มเหสิโน ฯ
       |๕.๔๐| โสณา จ อุปโสณา จ          อเหสุํ อคฺคสาวิกา
                   โสปิ พุทฺโธ อสมสโม ๓-    นาคมูเล อพุชฺฌถ ฯ
       |๕.๔๑| วรุโณ เจว สรโณ จ            อเหสุํ อคฺคุปฏฺฐกา
                   จาลา จ อุปจาลา จ           อเหสุํ อคฺคุปฏฺฐิกา ฯ
       |๕.๔๒| อุจฺจตฺตเนน ๔- โส พุทฺโธ    นวุติหตฺถมุคฺคโต ๕-
                   กญฺจนคฺฆิกสงฺกาโส          ทสสหสฺสี วิโรจติ ฯ
       |๕.๔๓| นวุติวสฺสสหสฺสานิ             อายุ วิชฺชติ ตาวเท
                   ตาวตา ติฏฺฐมาโน โส        ตาเรสิ ชนตํ พหุํ ฯ
                   ตารณีเย ตารยิตฺวา            โพธเนยฺเย ๖- อโพธยิ
                   ปรินิพฺพายิ สมฺพุทฺโธ         อุฬุราชาว อตฺถมิ ฯ
@เชิงอรรถ:  ม. ยุ. จ ฯ  ม. ยุ. วฏํสิกา ฯ  ม. ยุ. อมิตยโส ฯ  ยุ. อุจฺจตเรน ฯ
@อิโต ปรํ อีทิสเมว ฯ  ยุ. ...สมุคฺคโต ฯ  ม. ยุ. โพธนีเย ฯ
       |๕.๔๔| เต จ ขีณาสวา ภิกฺขู           โส จ พุทฺโธ อสาทิโส ๑-
                   อตุลํ ปภํ ทสฺสยิตฺวา          นิพฺพุตา เต มหายสา ฯ
       |๕.๔๕| ตญฺจ ญาณมตุลิยํ             ตานิ จ อตุลิยานิ ๒- รตนานิ
                   สพฺพํ สมนฺตรหิตํ              นนุ ริตฺตา สพฺพสงฺขาราติ ฯ
       |๕.๔๖| สุมโน ยสธโร พุทฺโธ          องฺคารามมฺหิ นิพฺพุโต
                   ตตฺเถว ตสฺส ชินถูโป         จตุโยชนมุคฺคโต ฯ
                                         สุมนพุทฺธวํโส จตุตฺโถ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๔๔๘-๔๕๓. https://84000.org/tipitaka/read/pali_read.php?B=33&A=9214&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=9214&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.2&item=5&items=1              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=196              ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=185              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=51&A=5024              The Pali Atthakatha in Roman :- https://84000.org/tipitaka/atthapali/read_rm.php?B=51&A=5024              สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]