บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                     นวมํ วนวจฺฉตฺเถราปทานํ (๕๔๙)
     [๑๓๙]   |๑๓๙.๒๕๑| อิมมฺหิ ภทฺทเก กปฺเป        พฺรหฺมพนฺธุ มหายโส
                          กสฺสโป นาม นาเมน     อุปฺปชฺชิ วทตํ วโร ฯ
      |๑๓๙.๒๕๒| ตทาหํ ปพฺพชิตฺวาน        ตสฺส พุทฺธสฺส สาสเน
                          ยาวชีวํ จริตฺวาน            พฺรหฺมจรํ ^๑- ตโต จุโต ฯ
      |๑๓๙.๒๕๓| เตน กมฺเมน สุกเตน       เจตนาปณิธีหิ จ
                          ชหิตฺวา มานุสํ เทหํ        ตาวตึสํ อคญฺฉหํ ฯ
      |๑๓๙.๒๕๔| ตโต จุโต อรญฺญมฺหิ       กโปโต อาสหํ ตหึ
                          วสเต คุณสมฺปนฺโน        ภิกฺขุ ฌานรโต สทา ฯ
      |๑๓๙.๒๕๕| เมตฺตจิตฺโต การุณิโก       สทา ปมุทิตานโน
                          อุเปกฺขโก มหาวีโร         อปฺปมญฺญาสุ โกวิโท ฯ
      |๑๓๙.๒๕๖| วินีวรณสงฺกปฺโป            สพฺพสตฺตหิตาสโย
                          วิสฺสฏฺโฐ น จิเรนาสึ       ตสฺมึ สุคตสาวเก ฯ
      |๑๓๙.๒๕๗| อุเปจฺจ ปาทมูลมฺหิ         นิสินฺนสฺส ตทาสฺสเม
                          กทาจิ อามิสํ ^๒- เทติ     ธมฺมํ เทเสสิ เจกทา ฯ
@เชิงอรรถ: ^๑ ม. พฺรหฺมจารํ ฯ ยุ. พฺรหฺมเจรํ ฯ ^๒ ม. สามิสํ ฯ
      |๑๓๙.๒๕๘| ตทา วิปุลเปเมน            อุปาสิตฺวา ชินตฺรชํ
                          ตโต จุโต คโต สคฺคํ       ปวาโส สฆรํ ยถา ฯ
      |๑๓๙.๒๕๙| สคฺคา จุโต มนุสฺเสสุ       นิพฺพตฺโต ปุญฺญกมฺมุนา
                          อคารํ ฉฑฺฑยิตฺวาน        ปพฺพชึ พหุโส อหํ ฯ
      |๑๓๙.๒๖๐| สมโณ ตาปโส ทิโช ^๑-    ปริพฺพาโช ตเถวหํ
                          หุตฺวา วสึ อรญฺญมฺหิ     อเนกสตโย ^๒- อหํ ฯ
      |๑๓๙.๒๖๑| ปจฺฉิเม จ ภเว ทานิ        รมฺเม กาปิลวตฺถเว
                          วจฺฉโคตฺโต ทิโช ตสฺส     ชายาย อหโมกฺกมึ ฯ
      |๑๓๙.๒๖๒| มาตุ เม โทหโฬ อาสิ      ติโรกุจฺฉิคตสฺส เม
                          ชายมานสมีปมฺหิ          วนวาสาย นิจฺฉโย ฯ
      |๑๓๙.๒๖๓| ตโต เม อชนิ มาตา        รมณีเย วนนฺตเร
                          คพฺภโต นิกฺขมนฺตํ มํ      กาสาเยน ปฏิคฺคหุํ ฯ
      |๑๓๙.๒๖๔| ตโต กุมาโร สิทฺธตฺโถ      ชาโต สกฺยกุลทฺธโช
                          ตสฺส มิตฺโต ปิโย อาสึ    สํวิสฺสฏฺโฐ สุมานิโย ^๓- ฯ
      |๑๓๙.๒๖๕| สตฺตสาเรหิ นิกฺขนฺเต ^๔-  โอหาย วิปุลํ ยสํ
                          อหํปิ ปพฺพชิตฺวาน        หิมวนฺตํ อุปาคมึ ฯ
      |๑๓๙.๒๖๖| วนาลยํ ภาวนิยํ             กสฺสปํ ธุตวาทกํ ^๕-
                          ทิสฺวา สุตฺวา ชินุปฺปาทํ   อุเปสึ นรสารถึ ฯ
      |๑๓๙.๒๖๗| โส เม ธมฺมํ อเทเสสิ       สพฺพตฺถํ สมฺปกาสยํ
                          ตโตหํ ปพฺพชิตฺวาน       วนเมว ปุโนกฺกมํ ^๖- ฯ
@เชิงอรรถ: ^๑ ม. ยุ. วิปฺโป ฯ ^๒ ม. ยุ. อเนกสตโส ฯ ^๓ ยุ. สุมานิโค ฯ
@^๔ ม. นิกฺขนฺโต ฯ ^๕ ม. ธุตวาทิกํ ฯ ^๖ ม. ปุนาคมํ ฯ ยุ. ปุนาคมึ ฯ
      |๑๓๙.๒๖๘| ตตฺถปฺปมตฺโต วิหรํ         ฉฬภิญฺญา อปสฺสยึ
                           อโห สุลทฺธลาโภมฺหิ     สุมิตฺเตนานุกมฺปิโต ฯ
      |๑๓๙.๒๖๙| กิเลสา ฌาปิตา มยฺหํ     ภวา สพฺเพ สมูหตา
                          นาโคว พนฺธนํ เฉตฺวา     วิหรามิ อนาสโว ฯ
      |๑๓๙.๒๗๐| สฺวาคตํ วต เม อาสิ        พุทฺธเสฏฺฐสฺส สนฺติเก
                          ติสฺโส วิชฺชา อนุปฺปตฺตา   กตํ พุทฺธสฺส สาสนํ ฯ
      |๑๓๙.๒๗๑| ปฏิสมฺภิทา จตสฺโส        วิโมกฺขาปิจ อฏฺฐิเม
                          ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
             อิตฺถํ สุทํ อายสฺมา วนวจฺโฉ เถโร อิมา คาถาโย อภาสิตฺถาติ ฯ
                                วนวจฺฉตฺเถรสฺส อปทานํ สมตฺตํ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๔๖-๒๔๘. https://84000.org/tipitaka/read/pali_read.php?B=33&A=4942&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=4942&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=139&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=139 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=139 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=7106 The Pali Atthakatha in Roman :- https://84000.org/tipitaka/atthapali/read_rm.php?B=50&A=7106 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33