บาลีพระไตรปิฎกเล่มที่ ๓๓ - พระสุตตันตปิฎกเล่มที่ ๒๕

                                    จตุตฺถํ วงฺคีสตฺเถราปทานํ (๕๔๔)
     [๑๓๔]   |๑๓๔.๙๖| ปทุมุตฺตโร นาม ชิโน     สพฺพธมฺเมสุ จกฺขุมา
                       อิโต สตสหสฺสสมฺหิ        กปฺเป อุปฺปชฺชิ นายโก ฯ
      |๑๓๔.๙๗| ยถาปิ สาคเร อุมฺมิ ^๑-     คคเน วิย ตารกา
                       เอวํ ปาวจนํ ตสฺส           อรหนฺเตหิ จิตฺติตํ  ฯ
      |๑๓๔.๙๘| สเทวาสูรนาเคหิ             มนุเชหิ ปุรกฺขโต
                       สมณพฺราหฺมณากิณฺเณ   ชนมชฺเฌ ชินุตฺตโม ฯ
      |๑๓๔.๙๙| ปภาหิ อนุรญฺชนฺโต         โลเก โลกนฺตคู ชิโน
                       วจเนน วิโพเธนฺโต          เวเนยฺยปทุมานิ โส ฯ
      |๑๓๔.๑๐๐| เวสารชฺเชหิ สมฺปนฺโน   จตูหิ ปุริสุตฺตโม
                       ปหีนภยสารชฺโช             เขมปฺปตฺโต วิสารโท ฯ
@เชิงอรรถ: ๑. ม. ยุ. อูมิ ฯ
      |๑๓๔.๑๐๑| อาสภํ ปวรํ ฐานํ          พุทฺธภูมิญฺจ เกวลํ
                          ปฏิชานาติ โลกคฺโค     นตฺถิ สญฺโจทโก กฺวจิ ฯ
      |๑๓๔.๑๐๒| สีหนาทมสมฺภีตํ           นทโต ตสฺส ตาทิโน
                          เทโว นโร วา พฺรหฺมา วา  ปฏิวตฺตา น วิชฺชติ ฯ
      |๑๓๔.๑๐๓| เทเสนฺโต ปวรํ ธมฺมํ      สนฺตาเรนฺโต สเทวกํ
                          ธมฺมจกฺกํ ปวตฺเตติ       ปริสาสุ วิสารโท ฯ
      |๑๓๔.๑๐๔| ปฏิภาณวตํ อคฺคํ          สาวกํ สาธุสมฺมตํ
                          คุณํ พหุํ ปกิตฺเตตฺวา    เอตทคฺเค ฐเปสิ ตํ ฯ
      |๑๓๔.๑๐๕| ตทาหํ หํสวติยา           พฺราหฺมโณ สาธุสมฺมโต
                          สพฺพเวทวิทู ชาโต       วงฺคีโส ^๑- วาทิสูทโน ฯ
      |๑๓๔.๑๐๖| อุเปจฺจ ตํ มหาวีรํ         สุตฺวา ตํ ธมฺมเทสนํ
                          ปีติวรํ ปฏิลภึ              สาวกสฺส คุเณ รโต ฯ
      |๑๓๔.๑๐๗| นิมนฺตยิตฺวา สุคตํ        สสงฺฆํ โลกนนฺทนํ
                          สตฺตาหํ โภชยิตฺวาหํ    ทุสฺเสหิ ฉาทยึ ตทา ฯ
      |๑๓๔.๑๐๘| นิปจฺจ สิรสา ปาเท       กโตกาโส กตญฺชลี
                          เอกมนฺตํ ฐิโต หฏฺโฐ    สนฺถวึ ชินมุตฺตมํ ฯ
      |๑๓๔.๑๐๙| นโม เต วาทิสูทน ^๒-    นโม เต อิสิสตฺตม ^๓-
                          นโม เต สพฺพโลกคฺค    นโม เต อภยํกร ฯ
      |๑๓๔.๑๑๐| นโม เต มารมถน          นโม เต ทิฏฺฐิสูทน
                          นโม เต สนฺติสุขท        นโม เต สรณํกร ^๔- ฯ
@เชิงอรรถ: ^๑ ม. ยุ. วาคีโส ฯ ^๒ ม. วาทิมทฺทน ฯ ยุ. วาลิสทฺทูร ฯ ^๓ ยุ. อิสิสุตฺตม ฯ
@^๔ ยุ. สรณนฺตค ฯ
      |๑๓๔.๑๑๑| อนาถานํ ภวํ นาโถ      ภีตานํ อภยปฺปโท
                          วิสฺสาสํ ^๑- ภูมิสนฺตานํ  สรณํ สรเณสินํ ฯ
      |๑๓๔.๑๑๒| เอวมาทีหิ สมฺพุทฺธํ       สนฺถวิตฺวา มหาคุณํ
                          อโวจํ วาทิสูรสฺส ^๒-      คตึ ปปฺโปมิ ภิกฺขุโน ฯ
      |๑๓๔.๑๑๓| ตทา อโวจ ภควา          อนนฺตปฏิภาณวา
                          โย โส พุทฺธํ อโภเชสิ ^๓- สตฺตาหํ สหสาวกํ ฯ
      |๑๓๔.๑๑๔| คุณญฺจ เม ปกิตฺเตสิ      ปสนฺโน เสหิ ปาณิภิ
                          เอโส ปตฺถยเต ฐานํ      วาทิสูรสฺส ^๔- ภิกฺขุโน ฯ
      |๑๓๔.๑๑๕| อนาคตมฺหิ อทฺธาเน     ลจฺฉเสตํ มโนรถํ
                          เทวมนุสฺสสมฺปตฺตึ       อนุโภตฺวา อนปฺปกํ ฯ
      |๑๓๔.๑๑๖| สตสหสฺเส อิโต กปฺเป   โอกฺกากกุลสมฺภโว
                          โคตโม นาม นาเมน     สตฺถา โลเก ภวิสฺสติ ฯ
      |๑๓๔.๑๑๗| ตสฺส ธมฺเมสุ ทายาโท   โอรโส ธมฺมนิมฺมิโต
                          วงฺคีโส นาม นาเมน     เหสฺสติ สตฺถุสาวโก ฯ
      |๑๓๔.๑๑๘| ตํ สุตฺวา มุทิโต หุตฺวา    ยาวชีวํ ตทา ชินํ
                          ปจฺจเยหิ อุปฏฺฐาสึ       เมตฺตจิตฺโต ตถาคตํ ฯ
      |๑๓๔.๑๑๙| เตน กมฺเมน สุกเตน      เจตนาปณิธีหิ จ
                          ชหิตฺวา มานุสํ เทหํ      ตาวตึสํ ^๕- อคญฺฉหํ ฯ
      |๑๓๔.๑๒๐| ปจฺฉิเม จ ภเว ทานิ       ปริพฺพาชกุเล ^๖- อหํ
                          ปจฺฉา ชาโต ยทา อาสึ   ชาติยา สตฺตวสฺสิโก ฯ
@เชิงอรรถ: ^๑ ม. วิสฺสามภูมิ สนฺตานํ ฯ ยุ. วิสฺสานภูมิสนฺตานํ ฯ ^๒-๔ ม. วาทิสูทสฺส ฯ
@^๓ ยุ. อปูเชสิ ฯ ^๕ ม. ยุ. ตุสิตํ ฯ ^๖ ม. ชาโต วิปฺปกุเล อหํ ฯ
      |๑๓๔.๑๒๑| สพฺพเวทวิทู ชาโต        วาทสตฺถวิสารโท
                          วคฺคุสฺสโร ^๑- จิตฺตกถี   ปรวาทปฺปมทฺทโน ฯ
      |๑๓๔.๑๒๒| วงฺเค ชาโตติ วงฺคีโส      วจเน อิสฺสโรติ วา
                          วงฺคีโส อิติ เม นามํ      อคฺคมฺปิ ^๒- โลกสมฺมตํ ฯ
      |๑๓๔.๑๒๓| ยทาหํ วิญฺญุตํ ปตฺโต    ฐิโต ปฐมโยพฺพเน
                          ตทา ราชคเห รมฺเม      สารีปุตฺตญฺจ อทฺทสํ ^๓- ฯ
                                         ปญฺจวีสติมํ ภาณวารํ ฯ
      |๑๓๔.๑๒๔| ปิณฺฑาย วิจรนฺตํ ตํ       ปตฺตปาณึ สุสํวุตํ
                          อโลลกฺขึ มิตภาณึ        ยุคมตฺตํ อุทิกฺขตํ ^๔- ฯ
      |๑๓๔.๑๒๕| ตํ ทิสฺวา วิมฺหิโต หุตฺวา  อโวจมนนุจฺฉวํ
                          กณิการํว นิจิตํ             จิตฺตํ คาถาปทํ อหํ ฯ
      |๑๓๔.๑๒๖| อาจิกฺขิ โส เม สตฺถารํ    สมฺพุทฺธํ โลกนายกํ
                          ตทา โส ปณฺฑิโต ธีโร   อุตฺตรํ สมโวจ เม ฯ
      |๑๓๔.๑๒๗| วิราคสหิตํ วากฺยํ           กตฺวา ทุทฺทสมุตฺตมํ
                          วิจิตฺตปฏิภาเณหิ          โตสิโต เตน ตาทินา ฯ
      |๑๓๔.๑๒๘| นิปจฺจ สิรสา ปาเท        ปพฺพาเชหีติ ^๕- อพฺรวึ
                          ตโต มํ ส มหปฺปญฺโญ   พุทฺธเสฏฺฐมุปานยิ ฯ
      |๑๓๔.๑๒๙| นิปจฺจ สิรสา ปาเท         นิสีทึ สตฺถุ สนฺติเก
                          มมาห วทตํ เสฏฺโฐ        สจฺจํ วงฺคีส กจฺจิ ^๖- เต ฯ
@เชิงอรรถ: ^๑ ม. วาทิสฺสโร ฯ ^๒ ม. ยุ. อภวี ฯ ^๓ ม. สารีปุตฺตมหทฺทสํ ฯ
@ยุ. สารีปุตฺตมถทฺทสํ ฯ ^๔ ม. นิทกฺขิตํ ฯ ยุ. นิริกฺขิตํ ฯ ^๕ ม. ปพฺพาเชหีติมํ
@พฺรวิ ฯ ยุ. ...หีติ จ พฺรวึ ฯ ^๖ ม. กจฺจิ วํคีส ชานาสิ ฯ
                                                    ^[๑]-
      |๑๓๔.๑๓๐| มตํ ^๒- สีสํว วิทิตํ          สุคติทุคฺคติมตํ
                          ตุยฺหํ วิชฺชาวิเสเสน       สเจ สกฺโกสิ วาจย ฯ
      |๑๓๔.๑๓๑| อาโมติ ^๓- เม ปฏิญฺญาเต   ตีณิ สีสานิ ทสฺสยิ
                          อโถ นิรยเทเวสุ ^๔-        อุปปนฺเน อวาจยึ ฯ
      |๑๓๔.๑๓๒| ตทา ขีณาสวสฺเสว ^๕-     สีสํ ทสฺเสสิ นายโก
                          ตโตหํ วิหตารมฺโภ         ปพฺพชฺชํ สมยาจิสํ ฯ
      |๑๓๔.๑๓๓| ปพฺพชิตฺวาน สุคตํ          สนฺถวามิ ยหึ ^๖- ตหึ
                          ตโต มํ กวิจิตฺโตติ ^๗-      อุชฺฌายนฺติ หิ ภิกฺขโว ฯ
      |๑๓๔.๑๓๔| ตโต วีมํสนตฺถํ เม            อาห พุทฺโธ วินายโก
                          ตกฺกิตานํ ^๘- อิมา คาถา  ฐานโส ปฏิภนฺติ วา ^๙- ฯ
      |๑๓๔.๑๓๕| น กพฺยจิตฺโตหํ ^๑๐- วีร     ฐานโส ปฏิภนฺติ เม
                          เตนหิ ทานิ วงฺคีส            ฐานโส สนฺถวาหิ มํ ฯ
      |๑๓๔.๑๓๖| ตทาหํ สนฺถวึ ธีรํ              คาถาหิ อิสิสตฺตมํ
                          โส ^๑๑- ฐานโส ตทา ตุฏฺโฐ  ชิโน อคฺเค ฐเปสิ มํ ฯ
      |๑๓๔.๑๓๗| ปฏิภาเณน จิตฺเตน           อญฺเญสมติมญฺญหํ
                          เปสโล ^๑๒- เตน สํวิคฺโค  อรหตฺตํ อปาปุณึ ฯ
      |๑๓๔.๑๓๘| ปฏิภาณวตํ อคฺโค            อญฺโญ โกจิ น วิชฺชติ
                          ยถายํ ภิกฺขุ วงฺคีโส          เอวํ ธาเรถ ภิกฺขโว ฯ
      |๑๓๔.๑๓๙| สตสหสฺเส กตํ กมฺมํ          ผลํ ทสฺเสสิ เม อิธ
                          สุมุตฺโต สรเวโคว             กิเลสา ^๑๓- ฌาปิตา มม ฯ
@เชิงอรรถ: ๑. ม. กิญฺจิ สิปฺปนฺติ ตสฺสาหํ ชานามีติ จ อพฺรวึ ฯ ^๒ ม. ยุ. มตสีสํ วนจฺฉุทฺธํ
@อปิ พาลสวตฺถิกํ ฯ ^๓ ยุ. อามาติ ฯ ^๔ ม. นิรยนรเทเวสุ ฯ ^๕ ยุ.
@ปจฺเจกพุทฺธสฺส ฯ ^๖ ม. ตหึ ตหึ ฯ ^๗ ม. กพฺพวิตฺโตสิ ฯ ^๘ ม. ตกฺกิกา
@ปนิมา คาถา ฯ ^๙ ม. ตํ ฯ ^๑๐ ม. กพฺพวิตฺโตหํ ฯ ^๑๑ ม. ฐานโส เม ฯ
@^๑๒ ม. ยุ. เปสเล ฯ ^๑๓ ม. ยุ. กิเลเส ฌาปยึ ฯ อิโต ปรํ สทิสเมว ฯ
      |๑๓๔.๑๔๐| กิเลสา ฌาปิตา มยฺหํ      ภวา สพฺเพ สมูหตา
                          นาโคว พนฺธนํ เฉตฺวา     วิหรามิ อนาสโว ฯ
      |๑๓๔.๑๔๑| สฺวาคตํ วต เม อาสิ         มม พุทฺธสฺส สนฺติเก
                          ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
      |๑๓๔.๑๔๒| ปฏิสมฺภิทา จตสฺโส         วิโมกฺขาปิจ อฏฺฐิเม
                          ฉฬภิญฺญา สจฺฉิกตา      กตํ พุทฺธสฺส สาสนนฺติ ฯ
            อิตฺถํ สุทํ อายสฺมา วงฺคีโส เถโร อิมา คาถาโย อภาสิตฺถาติ ฯ
                                   วงฺคีสตฺเถรสฺส อปทานํ สมตฺตํ ฯ
เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๒๙-๒๓๔. https://84000.org/tipitaka/read/pali_read.php?B=33&A=4582&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=4582&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=134&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=134 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=134 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=6703 The Pali Atthakatha in Roman :- https://84000.org/tipitaka/atthapali/read_rm.php?B=50&A=6703 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33