บาลีพระไตรปิฎกเล่มที่ ๓๒ - พระสุตตันตปิฎกเล่มที่ ๒๔

ปญฺจมํ สมฺมุขาถวิกตฺเถราปทานํ (๑๒๕) [๑๒๗] |๑๒๗.๔๑| ชายมาเน วิปสฺสมฺหิ นิมิตฺตํ พฺยากรึ อหํ นิพฺพาปยํ จ ชนตํ พุทฺโธ โลเก ภวิสฺสติ ฯ |๑๒๗.๔๒| ยสฺมึ จ ชายมานสฺมึ ทสสหสฺสี ปกมฺปติ โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๓| ยสฺมึ จ ชายมานสฺมึ อาโลโก วิปุโล อหุ โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๔| ยสฺมึ จ ชายมานสฺมึ สริตาโย น สนฺทิสุํ ^๑- โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๕| ยสฺมึ จ ชายมานสฺมึ อวีจิคฺคิ น ปชฺชลิ โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๖| ยสฺมึ จ ชายมานสฺมึ ปกฺขิสงฺโฆ น สญฺจริ โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๗| ยสฺมิญฺจ ชายมานสฺมึ วาตกฺขนฺโธ น วายติ โสทานิ ภควา สตฺถา ธมฺมํ เทเสติ จกฺขุมา ฯ @เชิงอรรถ: ^๑ ม สนฺทยุํ ฯ

--------------------------------------------------------------------------------------------- หน้าที่ ๒๒๘.

|๑๒๗.๔๘| ยสฺมิญฺจ ชายมานสฺมึ สพฺพรตนานิ โชติสุํ โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๔๙| ยสฺมิญฺจ ชายมานสฺมึ สตฺตาสุํ ปทวิกฺกมา โสทานิ ภควา สตฺถา ธมฺมํ เทเสติ จกฺขุมา ฯ |๑๒๗.๕๐| ชาตมตฺโตว สมฺพุทฺโธ ทิสา สพฺพา วิโลกยิ วาจาสภิมุทีเรสิ เอสา พุทฺธาน ธมฺมตา ฯ |๑๒๗.๕๑| สํเวชยิตฺวา ชนตํ ถวิตฺวา โลกนายกํ สมฺพุทฺธํ อภิวาทิตฺวา ปกฺกามึ ปาจินามุโข ฯ |๑๒๗.๕๒| เอกนวุเต อิโต กปฺเป ยํ พุทฺธมภิโถมยึ ทุคฺคตึ นาภิชานามิ โถมนาย อิทํ ผลํ ฯ |๑๒๗.๕๓| อิโต นวุติกปฺปมฺหิ สมฺมุขาถวิกวฺหโย สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๕๔| ปฐวีทุนฺทุภิ นาม เอกูนนวุติมฺหิโต สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๕๕| อฏฺฐาสีติมฺหิโต กปฺเป โอภาโส นาม ขตฺติโย สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๕๖| สตฺตาสีติมฺหิโต กปฺเป สริตจฺเฉทนวฺหโย สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๕๗| อคฺคินิพฺพาปโน นาม กปฺปานํ ฉฬสีติยา สตฺตรตนสมฺปนฺโน จกฺกวตฺติ มหพฺพโล ฯ

--------------------------------------------------------------------------------------------- หน้าที่ ๒๒๙.

|๑๒๗.๕๘| ราชา วาตสโม นาม กปฺปานํ ปญฺจสีติยา สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๕๙| คติปจฺเฉทโน นาม กปฺปานํ จุลฺลสีติยา ^๑- สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๖๐| รตนปฺปชฺชโล นาม กปฺปานํ เต อสีติยา สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๖๑| ปทวิกฺกมโน นาม กปฺปานํ เทฺว อสีติยา สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๖๒| ราชา วิโลกโน นาม กปฺปานํ เอกสีติยา สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๖๓| คิริสาโรติ ^๒- นาเมน กปฺเปสีติมฺหิ ขตฺติโย สตฺตรตนสมฺปนฺโน จกฺกวตฺติ มหพฺพโล ฯ |๑๒๗.๖๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สมฺมุขาถวิโก เถโร อิมา คาถาโย อภาสิตฺถาติ ฯ สมฺมุขาถวิกตฺเถรสฺส อปทานํ สมตฺตํ ฯ @เชิงอรรถ: ^๑ ม. ปญฺจสีติยา ฯ ^๒ ม. คิรสาโรติ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๒ หน้าที่ ๒๒๗-๒๒๙. https://84000.org/tipitaka/read/pali_read.php?B=32&A=4607&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=32&A=4607&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=32&item=127&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=32&siri=127 ศึกษาอรรถกถานี้ได้ที่ :- https://84000.org/tipitaka/attha/attha.php?b=32&i=127 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=50&A=3664 The Pali Atthakatha in Roman :- https://84000.org/tipitaka/atthapali/read_rm.php?B=50&A=3664 สารบัญพระไตรปิฎกเล่มที่ ๓๒ https://84000.org/tipitaka/read/?index_32 https://84000.org/tipitaka/english/?index_32