บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

                                         ๑๑ สาธินราชชาตกํ
     [๑๙๙๔]      อพฺภูโต วต โลกสฺมึ          อุปฺปชฺชิ โลมหํสโน
                       ทิพฺโพ รโถ ปาตุรหุ          เวเทหสฺส ยสสฺสิโน ฯ
     [๑๙๙๕]      เทวปุตฺโต มหิทฺธิโก          มาตลิ เทวสารถิ
                       นิมนฺตยิตฺถ ราชานํ          เวเทหํ มิถิลคฺคหํ
                       เอหิมํ รถมารุยฺห              ราช เสฏฺฐ ทิสมฺปติ
                       เทวา ทสฺสนกามา เต        ตาวตึสา สอินฺทกา
                       สรมานา หิ เต เทวา         สุธมฺมายํ สมจฺฉเร ฯ
                       ตโต จ ราชา สาธิโน         เวเทโห มิถิลคฺคโห ^๑-
                       สหสฺสยุตฺตํ อภิรุยฺห ^๒-     อคา เทวาน สนฺติเก
                       (สหสฺสยุตฺตํ หยวาหึ         ทิพฺพยานมธิฏฺฐิโต
                       ยายมาโน มหาราชา        อทฺทส เทวสภํ อิทํ ^๓-)
                       ตํ เทวา ปฏินนฺทึสุ            ทิสฺวา ราชานมาคตํ
                       สฺวาคตนฺเต มหาราช        อโถ เต อทุราคตํ
                       นิสีททานิ ราชิสิ               เทวราชสฺส สนฺติเก ฯ
                       สกฺโกปิ ปฏินนฺทิตฺถ          เวเทหํ มิถิลคฺคหํ
                       นิมนฺตยิตฺถ ^๔- กาเมหิ      อาสเนน จ วาสโว
                       สาธุ โขสิ อนุปฺปตฺโต         อาวาสํ วสวตฺตินํ
@เชิงอรรถ: ^๑ สี. ยุ. ปมุโข รถมารุหิ ฯ   ^๒ ม. สหสฺสยุตฺตมารุยฺห ฯ  ^๓ อยํ คาถา
@สพฺพโปตฺถเกสุ น ทิสฺสติ อฏฺฐกถายํ ปน ทิสฺสติ ฯ   ^๔ สี. ยุ. นิมนฺตยี จ ฯ
                       วส เทเวสุ ราชิสิ              สพฺพกามสมิทฺธิสุ
                       ตาวตึเสสุ เทเวสุ             ภุญฺช กาเม อมานุเส ฯ
     [๑๙๙๖]      อหํ ปุเร สคฺคคโต รมามิ
                       นจฺเจหิ คีเตหิ จ วาทิเตหิ
                       โสทานิ อชฺช น รมามิ สคฺเค
                       อายุนฺนุ ขีณํ ^๑- มรณนฺนุ ^๒- สนฺติเก
                       อุทาหุ มุโฬฺหสฺมิ ชนินฺทเสฏฺฐ ฯ
     [๑๙๙๗]      น ตายุ ขีณํ มรณญฺจ ^๓- ทูเร
                       น จาปิ มุโฬฺห นรวีร เสฏฺฐ
                       ตุยฺหญฺจ ปุญฺญานิ ปริตฺตกานิ
                       เยสํ วิปากํ อิธ เวทยิตฺโถ ^๔-
                       วส เทวานุภาเวน              ราช เสฏฺฐ ทิสมฺปติ
                       ตาวตึเสสุ เทเวสุ              ภุญฺช กาเม อมานุเส ฯ
     [๑๙๙๘]      ยถา ยาจิตกํ ยานํ            ยถา ยาจิตกํ ธนํ
                       เอวํ สมฺปทเมเวตํ              ยํ ปรโต ทานปจฺจยา
                       น จาหเมตมิจฺฉามิ            ยํ ปรโต ทานปจฺจยา
                       สยํ กตานิ ปุญฺญานิ          ตํ เม อาเวณิยํ ธนํ
                       โสหํ คนฺตฺวา มนุสฺเสสุ       กาหามิ กุสลํ พหุํ
                       ทาเนน สมจริยาย            สํยเมน ทเมน จ
                       ยํ กตฺวา สุขิโต โหติ           น จ ปจฺฉานุตปฺปติ ฯ
@เชิงอรรถ: ^๑ ม. ขีโณ ฯ ^๒ มรณสฺสาติปิ ปาโฐ ฯ ^๓ สี. ยุ. น จายุ ขีณํ มรณํ เต ฯ
@^๔ ยุ. เวทยโต ฯ
     [๑๙๙๙]      อิมานิ ตานิ เขตฺตานิ          อิมํ นิกฺขํ สกุณฺฑลํ
                       อิมา ตา หริตานุปา            อิมา นชฺโช สวนฺติโย
                       อิมา ตา โปกฺขรณิโย ^๑- รมฺมา จากวากูปกุชฺชิตา ^๒-
                       มณฺฑาลเกหิ สญฺฉนฺนา      ปทุมุปฺปลเกหิ จ
                       ยสฺสิมานิ มมายึสุ              กึ นุ เต ทิสตํ คตา ฯ
                       ตานิ จ เขตฺตานิ โส ภูมิภาโค
                       เตเยว อารามวนูปจารา ^๓-
                       ตเมว มยฺหํ ชนตํ อปสฺสโต
                       สุญฺญญฺจ เม นารท ขายเต ทิสา ฯ
     [๒๐๐๐]      ทิฏฺฐา มยา วิมานานิ        โอภาสนฺตา จตุทฺทิสา
                       สมฺมุขา เทวราชสฺส           ติทสานญฺจ สมฺมุขา ฯ
                       วุตฺถํ เม ภวนํ ทิพฺยํ           ภุตฺตา กามา อมานุสา
                       ตาวตึเสสุ เทเวสุ              สพฺพกามสมิทฺธิสุ ฯ
                       โสหํ เอตาทิสํ หิตฺวา         ปุญฺญายมฺหิ อิธาคโต
                       ธมฺมเมว จริสฺสามิ            นาหํ รชฺเชน อตฺถิโก ฯ
                       อทณฺฑาวจรํ มคฺคํ            สมฺมาสมฺพุทฺธเทสิตํ
                       ตํ มคฺคํ ปฏิปชฺชิสฺสํ           เยน คจฺฉนฺติ สุพฺพตาติ ฯ
                                    สาธินราชชาตกํ เอกาทสมํ ฯ
                                                ---------
@เชิงอรรถ: ^๑ ม. โปกฺขรณี ฯ   ^๒ ม. จกฺกวากปกูชิตา ฯ สี. ยุ. จกฺกวากูปกูชิตา ฯ
@^๓ สี. ยุ. เต อารามา เต วนเมปจารา ฯ

เนื้อความพระไตรปิฎกฉบับภาษาบาลี อักษรไทย เล่มที่ ๒๗ หน้าที่ ๓๙๗-๓๙๙. https://84000.org/tipitaka/read/pali_read.php?B=27&A=8152&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=27&A=8152&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=27&item=1994&items=7 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=27&siri=494 ศึกษาอรรถกถาชาดกนี้ได้ที่ :- https://84000.org/tipitaka/attha/attha.php?b=27&i=1994 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=40&A=7226 The Pali Atthakatha in Roman :- https://84000.org/tipitaka/atthapali/read_rm.php?B=40&A=7226 สารบัญพระไตรปิฎกเล่มที่ ๒๗ https://84000.org/tipitaka/read/?index_27 https://84000.org/tipitaka/english/?index_27