ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๒๕ ภาษาบาลี อักษรไทย พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

                       อุทาเน จตุตฺโถ เมฆิยวคฺโค
     [๘๕]   ๑  เอวมฺเม  สุตํ  ฯ เอกํ สมยํ ภควา จาลิกายํ ๑- วิหรติ
จาลิเก  ปพฺพเต  ฯ  เตน  โข  ปน  สมเยน  อายสฺมา เมฆิโย ภควโต
อุปฏฺฐาโก   โหติ   ฯ   อถ   โข   อายสฺมา   เมฆิโย  เยน  ภควา
เตนุปสงฺกมิ     อุปสงฺกมิตฺวา     ภควนฺตํ    อภิวาเทตฺวา    เอกมนฺตํ
อฏฺฐาสิ  ฯ  เอกมนฺตํ  ฐิโต  โข  อายสฺมา  เมฆิโย  ภควนฺตํ เอตทโวจ
อิจฺฉามหํ  ภนฺเต  ชนฺตุคาเม  ๒-  ปิณฺฑาย  ปวิสิตุนฺติ  ฯ  ยสฺสทานิ  ตฺวํ
เมฆิย กาลํ มญฺญสีติ ฯ
     {๘๕.๑}   อถ  โข  อายสฺมา  เมฆิโย  ปุพฺพณฺหสมยํ  นิวาเสตฺวา
ปตฺตจีวรมาทาย     ชนฺตุคามํ    ปิณฺฑาย    ปาวิสิ    ฯ    ชนฺตุคาเม
ปิณฺฑาย   จริตฺวา   ปจฺฉาภตฺตํ   ปิณฺฑปาตปฏิกฺกนฺโต   เยน   กิมิกาฬาย
นทิยา   ตีรํ   เตนุปสงฺกมิ   อุปสงฺกมิตฺวา   กิมิกาฬาย   นทิยา   ตีเร
ชงฺฆาวิหารํ    อนุจงฺกมมาโน   อนุวิจรมาโน   อทฺทสา   โข   อมฺพวนํ
ปาสาทิกํ   รมณียํ  ๓-  ทิสฺวานสฺส  เอตทโหสิ  ปาสาทิกํ  วติทํ  อมฺพวนํ
รมณียํ    อลํ    วติทํ    กุลปุตฺตสฺส   ปธานตฺถิกสฺส   ปธานาย   สเจ
มํ ภควา อนุชาเนยฺย อาคจฺเฉยฺยาหํ อิมํ อมฺพวนํ ปธานายาติ ฯ
     {๘๕.๒}   อถ  โข  อายสฺมา  เมฆิโย  เยน  ภควา เตนุปสงฺกมิ
@เชิงอรรถ:  โป. วาลิกายํ วิหรติ วาลิเก ฯ   ม. ยุ. ชนฺตุคามํ ฯ   ม. มนุญฺญํ ฯ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ   นิสีทิ  ฯ  เอกมนฺตํ
นิสินฺโน   โข   อายสฺมา   เมฆิโย  ภควนฺตํ  เอตทโวจ  อิธาหํ  ภนฺเต
ปุพฺพณฺหสมยํ     นิวาเสตฺวา    ปตฺตจีวรมาทาย    ชนฺตุคามํ    ปิณฺฑาย
ปาวิสึ   ชนฺตุคาเม   ปิณฺฑาย   จริตฺวา   ปจฺฉาภตฺตํ  ปิณฺฑปาตปฏิกฺกนฺโต
เยน   กิมิกาฬาย   นทิยา   ตีรํ  เตนุปสงฺกมิ  อุปสงฺกมิตฺวา  กิมิกาฬาย
นทิยา    ตีเร    ชงฺฆาวิหารํ   อนุจงฺกมมาโน   อนุวิจรมาโน   อทฺทสํ
อมฺพวนํ    ปาสาทิกํ    รมณียํ   ทิสฺวาน   เม   เอตทโหสิ   ปาสาทิกํ
วติทํ    อมฺพวนํ    รมณียํ    อลํ    วติทํ   กุลปุตฺตสฺส   ปธานตฺถิกสฺส
ปธานาย    สเจ    มํ    ภควา   อนุชาเนยฺย   อาคจฺเฉยฺยาหํ   อิมํ
อมฺพวนํ    ปธานายาติ    สเจ    มํ    ภนฺเต    ภควา   อนุชานาติ
คจฺเฉยฺยาหํ [๑]- อมฺพวนํ ปธานายาติ ฯ
     [๘๖]   เอวํ  วุตฺเต  ภควา  อายสฺมนฺตํ เมฆิยํ เอตทโวจ อาคเมหิ
ตาว   เมฆิย   เอกโกมฺหิ   ๒-   ตาว   ยาว   อญฺโญปิ  โกจิ  ภิกฺขุ
อาคจฺฉตีติ   ฯ   ทุติยมฺปิ   โข  อายสฺมา  เมฆิโย  ภควนฺตํ  เอตทโวจ
ภควโต   ภนฺเต   นตฺถิ   กิญฺจิ  อุตฺตรึ  กรณียํ  ๓-  นตฺถิ  กตสฺส  วา
ปฏิจโย    มยฺหํ   โข   ปน   ภนฺเต   อตฺถิ   อุตฺตรึ   กรณียํ   อตฺถิ
กตสฺส   ปฏิจโย   สเจ   มํ   ภนฺเต   ภควา  อนุชานาติ  คจฺเฉยฺยาหํ
ตํ    อมฺพวนํ   ปธานายาติ   ฯ   ทุติยมฺปิ   โข   ภควา   อายสฺมนฺตํ
เมฆิยํ   เอตทโวจ   อาคเมหิ   ตาว   เมฆิย  เอกโกมฺหิ  ตาว  ยาว
อญฺโญปิ   โกจิ   ภิกฺขุ  อาคจฺฉตีติ  ฯ  ตติยมฺปิ  โข  อายสฺมา  เมฆิโย
@เชิงอรรถ:  ม. ยุ. ตํ ฯ   โป. ยุ. เอกกมฺหา ฯ ม. เอกกมฺหิ ฯ   ม. อุตฺตริกรณียํ ฯ
ภควนฺตํ   เอตทโวจ   ภควโต   ภนฺเต   นตฺถิ   กิญฺจิ   อุตฺตรึ  กรณียํ
นตฺถิกตสฺส   วา  ปฏิจโย  มยฺหํ  โข  ปน  ภนฺเต  อตฺถิ  อุตฺตรึ  กรณียํ
อตฺถิ   กตสฺส   วา  ปฏิจโย  สเจ  มํ  ภควา  อนุชานาติ  คจฺเฉยฺยาหํ
ตํ    อมฺพวนํ    ปธานายาติ   ฯ   ปธานนฺติ   โข   เมฆิย   วทมานํ
กินฺติวเทยฺยาม ยสฺสทานิ ตฺวํ เมฆิย กาลํ มญฺญสีติ ฯ
     [๘๗]   อถ   โข   อายสฺมา   เมฆิโย   อุฏฺฐายาสนา  ภควนฺตํ
อภิวาเทตฺวา    ปทกฺขิณํ    กตฺวา   เยน   ตํ   อมฺพวนํ   เตนุปสงฺกมิ
อุปสงฺกมิตฺวา   ตํ   อมฺพวนํ   อชฺโฌคเหตฺวา  ๑-  อญฺญตรสฺมึ  รุกฺขมูเล
ทิวาวิหารํ   นิสีทิ   ฯ  อถ  โข  อายสฺมโต  เมฆิยสฺส  ตสฺมึ  อมฺพวเน
วิหรนฺตสฺส   เยภุยฺเยน   ตโย   ปาปกา  อกุสลา  วิตกฺกา  สมุทาจรนฺติ
เสยฺยถีทํ    กามวิตกฺโก    พฺยาปาทวิตกฺโก    วิหึสาวิตกฺโก   ฯ   อถ
โข   อายสฺมโต   เมฆิยสฺส   เอตทโหสิ   อจฺฉริยํ   วต   โภ  อพฺภูตํ
วต  โภ  สทฺธา  จ  วตมฺหิ  อคารสฺมา  อนคาริยํ  ปพฺพชิโต อถ โข ๒-
ปนิเมหิ   ตีหิ  ปาปเกหิ  อกุสเลหิ  วิตกฺเกหิ  อนฺวาสโต  ๓-  เสยฺยถีทํ
กามวิตกฺเกน    พฺยาปาทวิตกฺเกน    วิหึสาวิตกฺเกนาติ   ฯ   อถ   โข
อายสฺมา   เมฆิโย   สายณฺหสมยํ   ปฏิสลฺลานา   วุฏฺฐิโต  เยน  ภควา
เตนุปสงฺกมิ     อุปสงฺกมิตฺวา     ภควนฺตํ    อภิวาเทตฺวา    เอกมนฺตํ
นิสีทิ    ฯ   เอกมนฺตํ   นิสินฺโน   โข   อายสฺมา   เมฆิโย   ภควนฺตํ
เอตทโวจ   อิธ  [๔]-  ภนฺเต  ตสฺมึ  อมฺพวเน  วิหรนฺตสฺส  เยภุยฺเยน
@เชิงอรรถ:  ม. อชฺโฌคาเหตฺวา ฯ   ม. ยุ. อถ จ ฯ   โป. อนุสนฺตา ฯ ม. อนฺวาสตฺตา ฯ
@ยุ. อนฺวาสนฺโน ฯ   ม. ยุ. มยฺหํ ฯ
ตโย   ปาปกา   อกุสลา   วิตกฺกา  สมุทาจรนฺติ  เสยฺยถีทํ  กามวิตกฺโก
พฺยาปาทวิตกฺโก    วิหึสาวิตกฺโก    ตสฺส    มยฺหํ   ภนฺเต   เอตทโหสิ
อจฺฉริยํ   วต   โภ   อพฺภูตํ   วต  โภ  สทฺธา  จ  วตมฺหิ  อคารสฺมา
อนคาริยํ   ปพฺพชิโต   อถ   โข   ปนิเมหิ   ตีหิ   ปาปเกหิ  อกุสเลหิ
วิตกฺเกหิ    อนฺวาสโต    เสยฺยถีทํ    กามวิตกฺเกน   พฺยาปาทวิตกฺเกน
วิหึสาวิตกฺเกนาติ ฯ
     [๘๘]   อปริปกฺกาย    เมฆิย    เจโตวิมุตฺติยา   ปญฺจ   ธมฺมา
ปริปากาย  สํวตฺตนฺติ  กตเม  ปญฺจ  ๑  อิธ  เมฆิย  ภิกฺขุ  กลฺยาณมิตฺโต
โหติ    กลฺยาณสมฺปวงฺโก   อปริปกฺกาย   เมฆิย   เจโตวิมุตฺติยา   อยํ
ปฐโม   ธมฺโม  ปริปากาย  สํวตฺตติ  ฯ  ๒  ปุน  จ  ปรํ  เมฆิย  ภิกฺขุ
สีลวา    โหติ    ปาติโมกฺขสํวรสํวุโต    วิหรติ   อาจารโคจรสมฺปนฺโน
อณุมตฺเตสุ  วชฺเชสุ  ภยทสฺสาวี  สมาทาย  สิกฺขติ สิกฺขาปเทสุ อปริปกฺกาย
เมฆิย เจโตวิมุตฺติยา อยํ ทุติโย ธมฺโม ปริปากาย สํวตฺตติ ฯ
     {๘๘.๑}   ๓  ปุน  จ  ปรํ  เมฆิย  ภิกฺขุ ยายํ กถา อภิสลฺเลขิกา
เจโตวิวรณสปฺปายา   เอกนฺตนิพฺพิทาย   วิราคาย   นิโรธาย   อุปสมาย
อภิญฺญาย    สมฺโพธาย   นิพฺพานาย   สํวตฺตติ   เสยฺยถีทํ   อปฺปิจฺฉกถา
สนฺตุฏฺฐิกถา    ปวิเวกกถา    อสํสคฺคกถา    วิริยารมฺภกถา    สีลกถา
สมาธิกถา    ปญฺญากถา   วิมุตฺติกถา   วิมุตฺติญาณทสฺสนกถา   เอวรูปิยา
กถาย   นิกามลาภี   โหติ   อกิจฺฉลาภี  อกสิรลาภี  อปริปกฺกาย  เมฆิย
เจโตวิมุตฺติยา อยํ ตติโย ธมฺโม ปริปากาย สํวตฺตติ ฯ
     {๘๘.๒}   ๔  ปุน จ ปรํ เมฆิย ภิกฺขุ อารทฺธวิริโย วิหรติ อกุสลานํ
ธมฺมานํ    ปหานาย    กุสลานํ   ธมฺมานํ   อุปฺปาทาย   ๑-   ถามวา
ทฬฺหปรกฺกโม   อนิกฺขิตฺตธุโร   กุสเลสุ   ธมฺเมสุ   อปริปกฺกาย   เมฆิย
เจโตวิมุตฺติยา อยํ จตุตฺโถ ธมฺโม ปริปากาย สํวตฺตติ ฯ
     {๘๘.๓}   ๕  ปุน จ ปรํ เมฆิย ภิกฺขุ ปญฺญวา โหติ อุทยตฺถคามินิยา
ปญฺญาย    สมนฺนาคโต   อริยาย   นิพฺเพธิกาย   สมฺมาทุกฺขกฺขยคามินิยา
อปริปกฺกาย   เมฆิย   เจโตวิมุตฺติยา   อยํ  ปญฺจโม  ธมฺโม  ปริปากาย
สํวตฺตติ    ฯ    อปริปกฺกาย    เมฆิย   เจโตวิมุตฺติยา   อิเม   ปญฺจ
ธมฺมา     ปริปากาย    สํวตฺตนฺติ    ฯ    กลฺยาณมิตฺตสฺเสตํ    เมฆิย
ภิกฺขุโน     ปาฏิกงฺขํ     กลฺยาณสหายสฺส     กลฺยาณสมฺปวงฺกสฺส    ยํ
สีลวา   ภวิสฺสติ   ปาติโมกฺขสํวรสํวุโต   วิหริสฺสติ  อาจารโคจรสมฺปนฺโน
อณุมตฺเตสุ วชฺเชสุ ภยทสฺสาวี สมาทาย สิกขิสฺสติ สิกฺขาปเทสุ ฯ
     {๘๘.๔}   กลฺยาณมิตฺตสฺเสตํ เมฆิย ภิกฺขุโน ปาฏิกงฺขํ กลฺยาณสหายสฺส
กลฺยาณสมฺปวงฺกสฺส   ยํ   ยายํ  กถา  อภิสลฺเลขิกา  เจโตวิวรณสปฺปายา
เอกนฺตนิพฺพิทาย   วิราคาย   นิโรธาย   อุปสมาย  อภิญฺญาย  สมฺโพธาย
นิพฺพานาย   สํวตฺติสฺสติ  เสยฺยถีทํ  อปฺปิจฺฉกถา  สนฺตุฏฺฐิกถา  ปวิเวกกถา
อสํสคฺคกถา   วิริยารมฺภกถา  สีลกถา  สมาธิกถา  ปญฺญากถา  วิมุตฺติกถา
วิมุตฺติญาณทสฺสนกถา    เอวรูปิยา   กถาย   นิกามลาภี   ภวิสฺสติ   ๒-
อกิจฺฉลาภี    อกสิรลาภี    ฯ    กลฺยาณมิตฺตสฺเสตํ    เมฆิย   ภิกฺขุโน
ปาฏิกงฺขํ    กลฺยาณสหายสฺส    กลฺยาณสมฺปวงฺกสฺส    ยํ   อารทฺธวิริโย
@เชิงอรรถ:  ม. ยุ. อุปสมฺปทาย ฯ   ยุ. โหติ ฯ
วิหริสฺสติ     อกุสลานํ     ธมฺมานํ    ปหานาย    กุสลานํ    ธมฺมานํ
อุปฺปาทาย   ถามวา   ทฬฺหปรกฺกโม  อนิกฺขิตฺตธุโร  กุสเลสุ  ธมฺเมสุ  ฯ
กลฺยาณมิตฺตสฺเสตํ     เมฆิย    ภิกฺขุโน    ปาฏิกงฺขํ    กลฺยาณสหายสฺส
กลฺยาณสมฺปวงฺกสฺส     ยํ     ปญฺญวา     ภวิสฺสติ     อุทยตฺถคามินิยา
ปญฺญาย สมนฺนาคโต อริยาย นิพฺเพธิกาย สมฺมาทุกฺขกฺขยคามินิยา ฯ
     [๘๙]   เตน  จ  ปน  เมฆิย  ภิกฺขุนา  อิเมสุ ปญฺจสุ ๑- ปติฏฺฐาย
จตฺตาโร  ธมฺมา  อุตฺตรึ  ๒-  ภาเวตพฺพา  อสุภา  ภาเวตพฺพา  ราคสฺส
ปหานาย   เมตฺตา   ภาเวตพฺพา  พฺยาปาทสฺส  ปหานาย  อานาปานสฺสติ
ภาเวตพฺพา       วิตกฺกุปจฺเฉทาย       อนิจฺจสญฺญา      ภาเวตพฺพา
อสฺมิมานสมุคฺฆาตาย    ฯ    อนิจฺจสญฺญิโน    หิ   เมฆิย   อนตฺตสญฺญา
สณฺฐาติ     อนตฺตสญฺญี     อสฺมิมานสมุคฺฆาตํ     ปาปุณาติ     ทิฏฺเฐว
ธมฺเม นิพฺพานนฺติ ฯ
     {๘๙.๑}   อถ  โข  ภควา  เอตมตฺถํ  วิทิตฺวา  ตายํ เวลายํ อิมํ
อุทานํ อุทาเนสิ
               ขุทฺทา ๓- วิตกฺกา สุขุมา วิตกฺกา
               อนุคตา มนโส อุพฺพิลาปา
               เอเต อวิทฺวา มนโส วิตกฺเก
               หุราหุรํ ธาวติ ภนฺตจิตฺโต ฯ
               เอเต จ วิทฺวา มนโส วิตกฺเก
               อาตาปิโย สํวรติ สติมา
@เชิงอรรถ:  ม. ยุ. ปญฺจสุ ธมฺเมสุ ฯ   ม. ยุ. อุตฺตริ ฯ   โป. โอฬารา ฯ
               อนุคเต มนโส อุพฺพิลาเป
               อเสสเมเต ปชหาติ พุทฺโธติ ฯ สุตฺตํ ปฐมํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๒๕ หน้าที่ ๑๒๓-๑๒๙. https://84000.org/tipitaka/read/pali_read.php?B=25&A=2502&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=25&A=2502&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=25&item=85&items=5              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=25&siri=66              ศึกษาอรรถกถานี้ได้ที่ :- https://84000.org/tipitaka/attha/attha.php?b=25&i=85              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=26&A=5138              The Pali Atthakatha in Roman :- https://84000.org/tipitaka/atthapali/read_rm.php?B=26&A=5138              สารบัญพระไตรปิฎกเล่มที่ ๒๕ https://84000.org/tipitaka/read/?index_25 https://84000.org/tipitaka/english/?index_25

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]