ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๘ ภาษาบาลี อักษรไทย พระสุตตันตปิฎกเล่มที่ ๑๐ สังยุตตนิกาย สฬายตนวรรค

                  อสงฺขตสํยุตฺตสฺส ทุติยวคฺโค
     [๖๘๕]   อสงฺขตญฺจ   โว   ภิกฺขเว   เทสิสฺสามิ  อสงฺขตคามิญฺจ
มคฺคํ   ตํ   สุณาถ   ฯ   กตมญฺจ   ภิกฺขเว  อสงฺขตํ  ฯ  โย  ภิกฺขเว
ราคกฺขโย  โทสกฺขโย  โมหกฺขโย  ฯ  อิทํ  วุจฺจติ  ภิกฺขเว  อสงฺขตํ  ฯ
กตโม  จ  ภิกฺขเว  อสงฺขตคามิมคฺโค  ฯ  สมโถ  ฯ  อยํ วุจฺจติ ภิกฺขเว
อสงฺขตคามิมคฺโค   ฯ   อิติ   โข  ภิกฺขเว  เทสิตํ  โว  มยา  อสงฺขตํ
เทสิโต   อสงฺขตคามิมคฺโค  ฯ  ยํ  ภิกฺขเว  สตฺถารา  กรณียํ  สาวกานํ
หิเตสินา   อนุกมฺปเกน   อนุกมฺปํ   อุปาทาย   กตํ   โว  ตํ  มยา  ฯ
เอตานิ    ภิกฺขเว   รุกฺขมูลานิ   เอตานิ   สุญฺญาคารานิ   ฯ   ฌายถ
ภิกฺขเว   มา   ปมาทตฺถ   มา   ปจฺฉา   วิปฺปฏิสาริโน   อหุวตฺถ   ฯ
อยํ โว อมฺหากํ อนุสาสนีติ ฯ
     [๖๘๖]   อสงฺขตญฺจ   โว   ภิกฺขเว   เทสิสฺสามิ  อสงฺขตคามิญฺจ
มคฺคํ   ตํ   สุณาถ   ฯ   กตมญฺจ   ภิกฺขเว  อสงฺขตํ  ฯ  โย  ภิกฺขเว
ราคกฺขโย  โทสกฺขโย  โมหกฺขโย  ฯ  อิทํ  วุจฺจติ  ภิกฺขเว  อสงฺขตํ  ฯ
กตโม   จ   ภิกฺขเว   อสงฺขตคามิมคฺโค  ฯ  วิปสฺสนา  ฯ  อยํ  วุจฺจติ
ภิกฺขเว   อสงฺขตคามิมคฺโค   ฯ   อิติ  โข  ภิกฺขเว  เทสิตํ  โว  มยา
อสงฺขตํ ฯเปฯ อยํ โว อมฺหากํ อนุสาสนีติ ฯเปฯ
     [๖๘๗]   กตโม   จ   ภิกฺขเว   อสงฺขตคามิมคฺโค  ฯ  สวิตกฺโก
สวิจาโร สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๖๘๘]   กตโม   จ   ภิกฺขเว   อสงฺขตคามิมคฺโค  ฯ  อวิตกฺโก
วิจารมตฺโต สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯเปฯ
     [๖๘๙]   กตโม   จ   ภิกฺขเว   อสงฺขตคามิมคฺโค  ฯ  อวิตกฺโก
อวิจาโร สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๖๙๐]   กตโม   จ   ภิกฺขเว   อสงฺขตคามิมคฺโค   ฯ  สุญฺญโต
สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๖๙๑]   กตโม   จ   ภิกฺขเว   อสงฺขตคามิมคฺโค  ฯ  อนิมิตฺโต
สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๖๙๒]   กตโม   จ   ภิกฺขเว  อสงฺขตคามิมคฺโค  ฯ  อปฺปณิหิโต
สมาธิ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๖๙๓]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    กาเย    กายานุปสฺสี   วิหรติ   อาตาปี   สมฺปชาโน   สติมา
วิเนยฺย    โลเก    อภิชฺฌาโทมนสฺสํ    ฯ    อยํ    วุจฺจติ   ภิกฺขเว
อสงฺขตคามิมคฺโค ฯเปฯ
     [๖๙๔]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   เวทนาสุ   เวทนานุปสฺสี   วิหรติ   ฯเปฯ  อยํ  วุจฺจติ  ภิกฺขเว
อสงฺขตคามิมคฺโค ฯ
     [๖๙๕]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   จิตฺเต   จิตฺตานุปสฺสี   วิหรติ   ฯเปฯ   อยํ   วุจฺจติ   ภิกฺขเว
อสงฺขตคามิมคฺโค ฯ
     [๖๙๖]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   ธมฺเมสุ   ธมฺมานุปสฺสี   วิหรติ   ฯเปฯ   อยํ   วุจฺจติ  ภิกฺขเว
อสงฺขตคามิมคฺโค ฯ
     [๖๙๗]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    อนุปฺปนฺนานํ    ปาปกานํ    อกุสลานํ    ธมฺมานํ   อนุปฺปาทาย
ฉนฺทํ   ชเนติ   วายมติ   วิริยํ   อารภติ  จิตฺตํ  ปคฺคณฺหาติ  ปทหติ  ฯ
อยํ วุจฺจติ ภิกฺขเว อสงฺขตคามิมคฺโค ฯ
     [๖๙๘]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    อุปฺปนฺนานํ   ปาปกานํ   อกุสลานํ   ธมฺมานํ   ปหานาย   ฉนฺทํ
ชเนติ    วายมติ    วิริยํ   อารภติ   จิตฺตํ   ปคฺคณฺหาติ   ปทหติ   ฯ
อยํ วุจฺจติ ภิกฺขเว อสงฺขตคามิมคฺโค ฯ
     [๖๙๙]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    อนุปฺปนฺนานํ    กุสลานํ   ธมฺมานํ   อุปฺปาทาย   ฉนฺทํ   ชเนติ
วายมติ   วิริยํ   อารภติ   จิตฺตํ   ปคฺคณฺหาติ   ปทหติ  ฯ  อยํ  วุจฺจติ
ภิกฺขเว อสงฺขตคามิมคฺโค ฯ
     [๗๐๐]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   อุปฺปนฺนานํ   กุสลานํ  ธมฺมานํ  ฐิติยา  อสมฺโมสาย  ภิยฺโยภาวาย
เวปุลฺลาย   ภาวนาย  ปาริปูริยา  ฉนฺทํ  ชเนติ  วายมติ  วิริยํ  อารภติ
จิตฺตํ ปคฺคณฺหาติ ปทหติ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๐๑]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   ฉนฺทสมาธิปธานสงฺขารสมนฺนาคตํ   อิทฺธิปาทํ   ภาเวติ   ฯ   อยํ
วุจฺจติ ภิกฺขเว อสงฺขตคามิมคฺโค ฯ
     [๗๐๒]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ     วิริยสมาธิปธานสงฺขารสมนฺนาคตํ    อิทฺธิปาทํ    ภาเวติ    ฯ
อยํ วุจฺจติ ภิกฺขเว อสงฺขตคามิมคฺโค ฯ
     [๗๐๓]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ     จิตฺตสมาธิปธานสงฺขารสมนฺนาคตํ    อิทฺธิปาทํ    ภาเวติ    ฯ
อยํ วุจฺจติ ภิกฺขเว อสงฺขตคามิมคฺโค ฯ
     [๗๐๔]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    วีมํสาสมาธิปธานสงฺขารสมนฺนาคตํ    อิทฺธิปาทํ    ภาเวติ    ฯ
อยํ วุจฺจติ ภิกฺขเว อสงฺขตคามิมคฺโค ฯ
     [๗๐๕]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   สทฺธินฺทฺริยํ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๐๖]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   วิริยินฺทฺริยํ   ภาเวติ   วิเวกนิสฺสิตํ  ฯเปฯ  อยํ  วุจฺจติ  ภิกฺขเว
อสงฺขตคามิมคฺโค ฯ
     [๗๐๗]   กตโม  จ  ภิกฺขเว  อสงฺขตคามิมคฺโค ฯ อิธ ภิกฺขเว ภิกฺขุ
สตินฺทฺริยํ ภาเวติ ฯเปฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๐๘]   กตโม  จ  ภิกฺขเว  อสงฺขตคามิมคฺโค ฯ อิธ ภิกฺขเว ภิกฺขุ
สมาธินฺทฺริยํ ภาเวติ ฯเปฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๐๙]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   ปญฺญินฺทฺริยํ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๐]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   สทฺธาพลํ   ภาเวติ   วิเวกนิสฺสิตํ   ฯเปฯ  อยํ  วุจฺจติ  ภิกฺขเว
อสงฺขตคามิมคฺโค ฯ
     [๗๑๑]   กตโม  จ  ภิกฺขเว  อสงฺขตคามิมคฺโค ฯ อิธ ภิกฺขเว ภิกฺขุ
วิริยพลํ ภาเวติ ฯเปฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๒]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ สติพลํ ภาเวติ ฯเปฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๓]   กตโม  จ  ภิกฺขเว  อสงฺขตคามิมคฺโค ฯ อิธ ภิกฺขเว ภิกฺขุ
สมาธิพลํ ภาเวติ ฯเปฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๔]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    ปญฺญาพลํ    ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๕]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   สติสมฺโพชฺฌงฺคํ   ภาเวติ   วิเวกนิสฺสิตํ  วิราคนิสฺสิตํ  นิโรธนิสฺสิตํ
โวสฺสคฺคปริณามึ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๖]   กตโม  จ  ภิกฺขเว  อสงฺขตคามิมคฺโค ฯ อิธ ภิกฺขเว ภิกฺขุ
ธมฺมวิจยสมฺโพชฺฌงฺคํ   ภาเวติ   ฯเปฯ  วิริยสมฺโพชฺฌงฺคํ  ภาเวติ  ฯเปฯ
ปีติสมฺโพชฺฌงฺคํ   ภาเวติ   ฯเปฯ   ปสฺสทฺธิสมฺโพชฺฌงฺคํ   ภาเวติ  ฯเปฯ
สมาธิสมฺโพชฺฌงฺคํ    ภาเวติ    ฯเปฯ    อุเปกฺขาสมฺโพชฺฌงฺคํ   ภาเวติ
วิเวกนิสฺสิตํ    วิราคนิสฺสิตํ    นิโรธนิสฺสิตํ   โวสฺสคฺคปริณามึ   ฯ   อยํ
วุจฺจติ ภิกฺขเว อสงฺขตคามิมคฺโค ฯ
     [๗๑๗]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ    สมฺมาทิฏฺฐึ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ ฯ อยํ วุจฺจติ ภิกฺขเว อสงฺขตคามิมคฺโค ฯ
     [๗๑๘]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   สมฺมาสงฺกปฺปํ  ภาเวติ  ฯ  สมฺมาวาจํ  ภาเวติ  ฯ  สมฺมากมฺมนฺตํ
ภาเวติ   ฯ   สมฺมาอาชีวํ   ภาเวติ   ฯ   สมฺมาวายามํ   ภาเวติ  ฯ
สมฺมาสตึ ภาเวติ ฯ
     [๗๑๙]   กตโม  จ  ภิกฺขเว  อสงฺขตคามิมคฺโค  ฯ  อิธ  ภิกฺขเว
ภิกฺขุ   สมฺมาสมาธึ   ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ
โวสฺสคฺคปริณามึ   ฯ   อยํ   วุจฺจติ  ภิกฺขเว  อสงฺขตคามิมคฺโค  ฯ  อิติ
โข  ภิกฺขเว  เทสิตํ  โว  มยา  อสงฺขตํ  เทสิโต  อสงฺขตคามิมคฺโค  ฯ
ยํ    ภิกฺขเว   สตฺถารา   กรณียํ   สาวกานํ   หิเตสินา   อนุกมฺปเกน
อนุกมฺปํ  อุปาทาย  กตํ  โว  ตํ  มยา  ฯ  เอตานิ  ภิกฺขเว  รุกฺขมูลานิ
เอตานิ   สุญฺญาคารานิ   ฯ   ฌายถ   ภิกฺขเว   มา   ปมาทตฺถ   มา
ปจฺฉา วิปฺปฏิสาริโน อหุวตฺถ ฯ อยํ โว อมฺหากํ อนุสาสนีติ ฯ
     [๗๒๐]   อนตญฺจ   โว   ภิกฺขเว  เทสิสฺสามิ  อนตคามิญฺจ  มคฺคํ
ตํ   สุณาถ   ฯ   กตมญฺจ   ภิกฺขเว   อนตํ   ฯเปฯ   (ยถา  อสงฺขตํ
วิตฺถาริตํ ตถา วิตฺถาเรตพฺพํ) ฯ
     [๗๒๑]   อนาสวญฺจ   โว   ภิกฺขเว   เทสิสฺสามิ  อนาสวคามิญฺจ
มคฺคํ ตํ สุณาถ ฯ กตมญฺจ ภิกฺขเว อนาสวํ ฯเปฯ
     [๗๒๒]   สจฺจญฺจ   โว   ภิกฺขเว  เทสิสฺสามิ  สจฺจคามิญฺจ  มคฺคํ
ตํ สุณาถ ฯ กตมญฺจ ภิกฺขเว สจฺจํ ฯเปฯ
     [๗๒๓]   ปารญฺจ   โว   ภิกฺขเว  เทสิสฺสามิ  ปารคามิญฺจ  มคฺคํ
ตํ สุณาถ ฯ กตมญฺจ ภิกฺขเว ปารํ ฯเปฯ
     [๗๒๔]   นิปุณญฺจ   โว   ภิกฺขเว  เทสิสฺสามิ  นิปุณคามิญฺจ  มคฺคํ
ตํ สุณาถ ฯ กตมญฺจ ภิกฺขเว นิปุณํ ฯเปฯ
     [๗๒๕]   สุทุทฺทสญฺจ   โว   ภิกฺขเว   เทสิสฺสามิ  สุทุทฺทสคามิญฺจ
มคฺคํ ตํ สุณาถ ฯ กตมญฺจ ภิกฺขเว สุทุทฺทสํ ฯเปฯ
     [๗๒๖]   อชชฺชรญฺจ   โว   ภิกฺขเว   เทสิสฺสามิ  อชชฺชรคามิญฺจ
มคฺคํ ตํ สุณาถ ฯ กตมญฺจ ภิกฺขเว อชชฺชรํ ฯเปฯ
     [๗๒๗]   ธุวญฺจ   โว   ภิกฺขเว   เทสิสฺสามิ   ธุวคามิญฺจ  มคฺคํ
ตํ สุณาถ ฯ กตมญฺจ ภิกฺขเว ธุวํ ฯเปฯ
     [๗๒๘]   อปโลกินญฺจ ๑- โว ภิกฺขเว เทสิสฺสามิ อปโลกินคามิญฺจ ๒-
มคฺคํ ตํ สุณาถ ฯ กตมญฺจ ภิกฺขเว อปโลกินํ ฯเปฯ
@เชิงอรรถ:  ม. ยุ. อปโลกิตญฺจ ฯ   ม. ยุ. อปโลกิตคามิญฺจ ฯ เอวมุปริปิ ฯ
     [๗๒๙]   อนิทสฺสนญฺจ   โว  ภิกฺขเว  เทสิสฺสามิ  อนิทสฺสนคามิญฺจ
มคฺคํ ตํ สุณาถ ฯ กตมญฺจ ภิกฺขเว อนิทสฺสนํ ฯเปฯ
     [๗๓๐]   นิปฺปปญฺจํ  จ  โว  ภิกฺขเว  เทสิสฺสามิ  นิปฺปปญฺจคามิญฺจ
มคฺคํ ตํ สุณาถ ฯ กตมญฺจ ภิกฺขเว นิปฺปปญฺจํ ฯเปฯ
     [๗๓๑]   สนฺตญฺจ   โว   ภิกฺขเว  เทสิสฺสามิ  สนฺตคามิญฺจ  มคฺคํ
ตํ สุณาถ ฯ กตมญฺจ ภิกฺขเว สนฺตํ ฯเปฯ
     [๗๓๒]   อมตญฺจ   โว   ภิกฺขเว  เทสิสฺสามิ  อมตคามิญฺจ  มคฺคํ
ตํ สุณาถ ฯ กตมญฺจ ภิกฺขเว อมตํ ฯเปฯ
     [๗๓๓]   ปณีตญฺจ   โว   ภิกฺขเว  เทสิสฺสามิ  ปณีตคามิญฺจ  มคฺคํ
ตํ สุณาถ ฯ กตมญฺจ ภิกฺขเว ปณีตํ ฯเปฯ
     [๗๓๔]   สิวญฺจ   โว   ภิกฺขเว   เทสิสฺสามิ   สิวคามิญฺจ  มคฺคํ
ตํ สุณาถ ฯ กตมญฺจ ภิกฺขเว สิวํ ฯเปฯ
     [๗๓๕]   เขมญฺจ   โว   ภิกฺขเว  เทสิสฺสามิ  เขมคามิญฺจ  มคฺคํ
ตํ สุณาถ ฯ กตมญฺจ ภิกฺขเว เขมํ ฯเปฯ
     [๗๓๖]   ตณฺหกฺขยญฺจ   โว  ภิกฺขเว  เทสิสฺสามิ  ตณฺหกฺขยคามิญฺจ
มคฺคํ ตํ สุณาถ ฯ กตมญฺจ ภิกฺขเว ตณฺหกฺขยํ ฯเปฯ
     [๗๓๗]   อจฺฉริยญฺจ   โว   ภิกฺขเว   เทสิสฺสามิ  อจฺฉริยคามิญฺจ
มคฺคํ ตํ สุณาถ ฯ กตมญฺจ ภิกฺขเว อจฺฉริยํ ฯเปฯ
     [๗๓๘]   อพฺภุตญฺจ   โว   ภิกฺขเว   เทสิสฺสามิ   อพฺภุตคามิญฺจ
มคฺคํ ตํ สุณาถ ฯ กตมญฺจ ภิกฺขเว อพฺภุตํ ฯเปฯ
     [๗๓๙]   อนีติกญฺจ   โว   ภิกฺขเว   เทสิสฺสามิ   อนีติกคามิญฺจ
มคฺคํ ตํ สุณาถ ฯ กตมญฺจ ภิกฺขเว อนีติกํ ฯเปฯ
     [๗๔๐]   อนีติกธมฺมญฺจ  โว  ภิกฺขเว  เทสิสฺสามิ  อนีติกธมฺมคามิญฺจ
มคฺคํ ตํ สุณาถ ฯ กตมญฺจ ภิกฺขเว อนีติกธมฺมํ ฯเปฯ
     [๗๔๑]   นิพฺพานญฺจ   โว   ภิกฺขเว   เทสิสฺสามิ  นิพฺพานคามิญฺจ
มคฺคํ ตํ สุณาถ ฯ กตมญฺจ ภิกฺขเว นิพฺพานํ ฯเปฯ
     [๗๔๒]    อพฺยาปชฺฌญฺจ    ๑-    โว    ภิกฺขเว    เทสิสฺสามิ
อพฺยาปชฺฌคามิญฺจ    ๒-   มคฺคํ   ตํ   สุณาถ   ฯ   กตมญฺจ   ภิกฺขเว
อพฺยาปชฺฌํ ฯเปฯ
     [๗๔๓]   วิราคญฺจ  โว  ภิกฺขเว  เทสิสฺสามิ  วิราคคามิญฺจ  มคฺคํ
ตํ สุณาถ ฯ กตโม จ ภิกฺขเว วิราโค ฯเปฯ
     [๗๔๔]   สุทฺธิญฺจ  โว  ภิกฺขเว  เทสิสฺสามิ  สุทฺธิคามิญฺจ  มคฺคํ  ตํ
สุณาถ ฯ กตมา จ ภิกฺขเว สุทฺธิ ฯเปฯ
     [๗๔๕]   มุตฺติญฺจ   โว   ภิกฺขเว  เทสิสฺสามิ  มุตฺติคามิญฺจ  มคฺคํ
ตํ สุณาถ ฯ กตมา จ ภิกฺขเว มุตฺติ ฯเปฯ
     [๗๔๖]   อนาลยญฺจ   โว   ภิกฺขเว   เทสิสฺสามิ  อนาลยคามิญฺจ
มคฺคํ ตํ สุณาถ ฯ กตโม จ ภิกฺขเว อนาลโย ฯเปฯ
     [๗๔๗]   ทีปญฺจ   โว   ภิกฺขเว   เทสิสฺสามิ   ทีปคามิญฺจ  มคฺคํ
ตํ สุณาถ ฯ กตมญฺจ ภิกฺขเว ทีปํ ฯเปฯ
     [๗๔๘]   เลณญฺจ   โว   ภิกฺขเว  เทสิสฺสามิ  เลณคามิญฺจ  มคฺคํ
ตํ สุณาถ ฯ กตมญฺจ ภิกฺขเว เลณํ ฯเปฯ
@เชิงอรรถ:  ม. อพฺยาพชฺฌญฺจ ฯ   ม. อพฺยาพชฺฌคามิญฺจ ฯ เอวมุปริปิ ฯ
     [๗๔๙]   ตาณญฺจ   โว   ภิกฺขเว  เทสิสฺสามิ  ตาณคามิญฺจ  มคฺคํ
ตํ สุณาถ ฯ กตมญฺจ ภิกฺขเว ตาณํ ฯเปฯ
     [๗๕๐]   สรณญฺจ   โว   ภิกฺขเว  เทสิสฺสามิ  สรณคามิญฺจ  มคฺคํ
ตํ สุณาถ ฯ กตมญฺจ ภิกฺขเว สรณํ ฯเปฯ
     [๗๕๑]   ปรายนญฺจ  โว  ภิกฺขเว  เทสิสฺสามิ  ปรายนคามิญฺจ มคฺคํ
ตํ   สุณาถ  ฯ  กตมญฺจ  ภิกฺขเว  ปรายนํ  ฯ  โย  ภิกฺขเว  ราคกฺขโย
โทสกฺขโย   โมหกฺขโย   ฯ   อิทํ  วุจฺจติ  ภิกฺขเว  ปรายนํ  ฯ  กตโม
จ  ภิกฺขเว  ปรายนคามิมคฺโค  ฯ  กายคตาสติ  ฯ  อยํ  วุจฺจติ  ภิกฺขเว
ปรายนคามิมคฺโค   ฯ   อิติ   โข  ภิกฺขเว  เทสิตํ  โว  มยา  ปรายนํ
เทสิโต   ปรายนคามิมคฺโค  ฯ  ยํ  ภิกฺขเว  สตฺถารา  กรณียํ  สาวกานํ
หิเตสินา   อนุกมฺปเกน   อนุกมฺปํ   อุปาทาย   กตํ   โว  ตํ  มยา  ฯ
เอตานิ  ภิกฺขเว  รุกฺขมูลานิ  เอตานิ  สุญฺญาคารานิ  ฯ  ฌายถ  ภิกฺขเว
มา   ปมาทตฺถ   มา   ปจฺฉา   วิปฺปฏิสาริโน   อหุวตฺถ   ฯ  อยํ  โว
อมฺหากํ อนุสาสนีติ ฯ (ยถา อสงฺขตํ วิตฺถาริตํ ตถา วิตฺถาเรตพฺพํ) ฯ
                   ทุติโย วคฺโค สมตฺโต ฯ
                        ตสฺสุทฺทานํ
        อสงฺขตํ อนตํ อนาสวํ              สจฺจญฺจ ปารํ นิปุณํ สุทุทฺทสํ
        อชชฺชรนฺตํ ๑- ธุวํ อปโลกินํ    อนิทสฺสนํ นิปฺปปญฺจสนฺตํ ฯ
        อมตํ ปณีตญฺจ สิวญฺจ เขมํ       ตณฺหกฺขโย อจฺฉริยญฺจ อพฺภุตํ
        อนีติกํ อนีติกธมฺมํ                   นิพฺพานเมตํ สุคเตน เทสิตํ ฯ
@เชิงอรรถ:  ม. อชชฺชรํ ฯ
         อพฺยาปชฺโฌ วิราโค จ            สุทฺธิ มุตฺติ อนาลโย
         ทีปํ เลณญฺจ ตาณญฺจ             สรณญฺจ ปรายนนฺติ ฯ
                   อสงฺขตสํยุตฺตํ สมตฺตํ ฯ
                        ------


             เนื้อความพระไตรปิฎกฉบับภาษาบาลี อักษรไทย เล่มที่ ๑๘ หน้าที่ ๔๔๔-๔๕๔. https://84000.org/tipitaka/read/pali_read.php?B=18&A=9017&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=18&A=9017&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=18&item=685&items=67              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=18&siri=281              ศึกษาอรรถกถานี้ได้ที่ :- https://84000.org/tipitaka/attha/attha.php?b=18&i=685              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=13&A=3794              The Pali Atthakatha in Roman :- https://84000.org/tipitaka/atthapali/read_rm.php?B=13&A=3794              สารบัญพระไตรปิฎกเล่มที่ ๑๘ https://84000.org/tipitaka/read/?index_18 https://84000.org/tipitaka/english/?index_18

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]