ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๖ ภาษาบาลี อักษรไทย พระสุตตันตปิฎกเล่มที่ ๘ สุตฺต. สํ. นิทานวคฺโค

     [๕๑๘]   เอกํ   สมยํ   อายสฺมา  มหากสฺสโป  ราชคเห  วิหรติ
เวฬุวเน  กลนฺทกนิวาเป  ฯ  เตน  โข  ปน  สมเยน อายสฺมา อานนฺโท
ทกฺขิณาคิริสฺมึ   จาริกํ   จรติ  มหตา  ภิกฺขุสงฺเฆน  สทฺธึ  ฯ  เตน  โข
ปน   สมเยน   อายสฺมโต   อานนฺทสฺส   ตึสมตฺตา  สทฺธิวิหาริโน  ภิกฺขู
สิกฺขํ ปจฺจกฺขาย หีนายาวตฺตา ภวนฺติ เยภุยฺเยน กุมารภูตา ฯ
     [๕๑๙]   อถ  โข  อายสฺมา  อานนฺโท  ทกฺขิณาคิริสฺมึ  ยถาภิรนฺตํ
จาริกํ  จริตฺวา  เยน  ราชคหํ  เวฬุวนํ  กลนฺทกนิวาปํ  ๑-  เยนายสฺมา
มหากสฺสโป    เตนุปสงฺกมิ    อุปสงฺกมิตฺวา    อายสฺมนฺตํ    มหากสฺสปํ
อภิวาเทตฺวา   เอกมนฺตํ   นิสีทิ   ฯ  เอกมนฺตํ  นิสินฺนํ  โข  อายสฺมนฺตํ
อานนฺทํ   อายสฺมา   มหากสฺสโป   เอตทโวจ   กติ   นุ  โข  อาวุโส
อานนฺท อตฺถวเส ปฏิจฺจ ภควตา กุเลสุ ติกโภชนํ ปญฺญตฺตนฺติ ฯ
     [๕๒๐]   ตโย   โข   ภนฺเต  กสฺสป  อตฺถวเส  ปฏิจฺจ  ภควตา
กุเลสุ   ติกโภชนํ   ปญฺญตฺตํ   ทุมฺมงฺกูนํ   ปุคฺคลานํ  นิคฺคหาย  เปสลานํ
ภิกฺขูนํ   ผาสุวิหาราย   มา   ปาปิจฺฉา  ปกฺขํ  นิสฺสาย  สงฺฆํ  ภินฺเทยฺยุํ
กุลานุทยตาย   จ   อิเม   โข  ภนฺเต  กสฺสป  ตโย  อตฺถวเส  ปฏิจฺจ
ภควตา กุเลสุ ติกโภชนํ ปญฺญตฺตนฺติ ฯ
     [๕๒๑]   อถ  กิญฺจรหิ  ตฺวํ  อาวุโส  อานนฺท  อิเมหิ [๒]- ภิกฺขูหิ
อินฺทฺริเยสุ   อคุตฺตทฺวาเรหิ   โภชเน   อมตฺตญฺญูหิ  ชาคริยํ  อนนุยุตฺเตหิ
สทฺธึ   จาริกํ   จรสิ   สสฺสฆาตํ  มญฺเญ  จรสิ  กุลปฺปฆาตํ  ๓-  มญฺเญ
จรสิ    โอลุชฺชติ   โข   เต   อาวุโส   อานนฺท   ปริสา   ปลุชฺชนฺติ
@เชิงอรรถ:  ม. ยุ. กลนฺทกนิวาโป ฯ   ม. ยุ. นเวหิ ฯ   ม. กุลูปฆาตํ ฯ ยุ. กุลุปฆาตํ ฯ
@เอวมุปริปิ ฯ
โข    เต    อาวุโส    อานนฺท   นวปฺปายา   น   วายํ   กุมารโก
มตฺตมญฺญาสีติ   ฯ   อปิ   เม  ภนฺเต  กสฺสป  สิรสฺมึ  ปลิตานิ  ชาตานิ
อถ   จ   ปน   มยํ   อชฺชาปิ  อายสฺมโต  มหากสฺสปสฺส  กุมารกวาทา
น  มุจฺจามาติ  ฯ  ตถา  หิ  ปน  ตฺวํ  อาวุโส  อานนฺท  อิเมหิ  นเวหิ
ภิกฺขูหิ    อินฺทฺริเยสุ    อคุตฺตทฺวาเรหิ   โภชเน   อมตฺตญฺญูหิ   ชาคริยํ
อนนุยุตฺเตหิ   สทฺธึ   จาริกํ   จรสิ  สสฺสฆาตํ  มญฺเญ  จรสิ  กุลปฺปฆาตํ
มญฺเญ   จรสิ   โอลุชฺชติ  โข  เต  อาวุโส  อานนฺท  ปริสา  ปลุชฺชนฺติ
โข เต อาวุโส นวปฺปายา น วายํ กุมารโก มตฺตมญฺญาสีติ ฯ
     [๕๒๒]   อสฺโสสิ    โข   ถุลฺลนนฺทา   ภิกฺขุนี   อยฺเยน   กิร
มหากสฺสเปน  อยฺโย  อานนฺโท  เวเทหมุนิ  กุมารกวาเทน อปสาทิโตติ ฯ
อถ   โข   ถุลฺลนนฺทา   ภิกฺขุนี   อนตฺตมนา   อนตฺตมนวาจํ  นิจฺฉาเรสิ
กึ    ปน    อยฺโย    มหากสฺสโป   อญฺญติตฺถิยปุพฺโพ   สมาโน   อยฺยํ
อานนฺทํ    เวเทหมุนึ    กุมารกวาเทน    อปสาเทตพฺพํ   มญฺญตีติ   ฯ
อสฺโสสิ   โข   อายสฺมา   มหากสฺสโป   ถุลฺลนนฺทาย   ภิกฺขุนิยา   อิมํ
วาจํ ภาสมานาย ฯ
     [๕๒๓]   อถ   โข   อายสฺมา  มหากสฺสโป  อายสฺมนฺตํ  อานนฺทํ
เอตทโวจ    ตคฺฆาวุโส    อานนฺท    ถุลฺลนนฺทาย   ภิกฺขุนิยา   สหสา
อปฺปฏิสงฺขา   วาจา   ภาสิตา  ยโตหํ  อาวุโส  เกสมสฺสุํ  โอหาเรตฺวา
กาสายานิ   วตฺถานิ   อจฺฉาเทตฺวา   อคารสฺมา   อนคาริยํ   ปพฺพชิโต
นาภิชานามิ   อญฺญํ   สตฺถารํ   อุทฺทิสิตา   ๑-  อญฺญตฺร  เตน  ภควตา
@เชิงอรรถ:  ยุ. อุทฺทิสิตุํ ฯ
อรหตา   สมฺมาสมฺพุทฺเธน   ฯ   ปุพฺเพ   เม   อาวุโส  อาคาริกภูตสฺส
สโต    เอตทโหสิ    สมฺพาโธ    ฆราวาโส   รชาปโถ   อชฺโฌกาโส
ปพฺพชฺชา     นยิทํ    สุกรํ    อคารํ    อชฺฌาวสตา    เอกนฺตปริปุณฺณํ
เอกนฺตปริสุทฺธํ    สงฺขลิขิตํ    พฺรหฺมจริยํ   จริตุํ   ยนฺนูนาหํ   เกสมสฺสุํ
โอหาเรตฺวา   กาสายานิ   วตฺถานิ  อจฺฉาเทตฺวา  อคารสฺมา  อนคาริยํ
ปพฺพเชยฺยนฺติ   ฯ  โส  ขฺวาหํ  อาวุโส  อปเรน  สมเยน  ปฏปิโลติกานํ
สงฺฆาฏึ   กริตฺวา   ๑-  เย  โลเก  อรหนฺโต  เต  อุทฺทิสฺส  เกสมสฺสุํ
โอหาเรตฺวา   กาสายานิ   วตฺถานิ  อจฺฉาเทตฺวา  อคารสฺมา  อนคาริยํ
ปพฺพชึ    โส    เอวํ    ปพฺพชิโต   สมาโน   อทฺธานมคฺคํ   ปฏิปนฺโน
อทฺทสํ    ภควนฺตํ    อนฺตรา    จ   ราชคหํ   อนฺตรา   จ   นาฬนฺทํ
พหุปุตฺตเจติเย   นิสินฺนํ   ทิสฺวาน   เม   เอตทโหสิ  สตฺถารญฺจ  วตาหํ
ปสฺเสยฺยํ    ภควนฺตเมว    ปสฺเสยฺยํ    สุคตญฺจ    วตาหํ    ปสฺเสยฺยํ
ภควนฺตเมว   ปสฺเสยฺยํ   สมฺมาสมฺพุทฺธญฺจ  วตาหํ  ปสฺเสยฺยํ  ภควนฺตเมว
ปสฺเสยฺยนฺติ   ฯ   โส   ขฺวาหํ   อาวุโส   ตตฺเถว   ภควโต  ปาเทสุ
สิรสา   นิปติตฺวา   ภควนฺตํ   เอตทโวจํ   สตฺถา   เม  ภนฺเต  ภควา
สาวโกหมสฺมิ สตฺถา เม ภนฺเต ภควา สาวโกหมสฺมีติ ฯ
     [๕๒๔]   เอวํ  วุตฺเต  มํ  อาวุโส  ภควา  เอตทโวจ  โย  โข
กสฺสป    เอวํ   สพฺพเจตโส   สมนฺนาหตํ   ๒-   สาวกํ   อชานญฺเญว
วเทยฺย   ชานามีติ   อปสฺสญฺเญว   วเทยฺย   ปสฺสามีติ   มุทฺธาปิ  ตสฺส
วิปเตยฺย   ฯ   อหํ   โข   ปน   กสฺสป  ชานญฺเญว  วทามิ  ชานามีติ
@เชิงอรรถ:  ม. กาเรตฺวา ฯ   ม. สพฺพเจตสา สมนาคตํ ฯ ยุ. สพฺพํ เจตสา สมนาคตํ ฯ
ปสฺสญฺเญว วทามิ ปสฺสามีติ ฯ
     {๕๒๔.๑}   ตสฺมาติห   เต   กสฺสป  เอวํ  สิกฺขิตพฺพํ  ติพฺพํ  เม
หิโรตฺตปฺปํ   ปจฺจุปฏฺฐิตํ   ภวิสฺสติ   เถเรสุ  นเวสุ  มชฺฌิเมสูติ  เอวญฺหิ
เต  กสฺสป  สิกฺขิตพฺพํ  ฯ  ตสฺมาติห  เต  กสฺสป  เอวํ สิกฺขิตพฺพํ ยงฺกญฺจิ
ธมฺมํ    สุณิสฺสามิ    กุสลูปสญฺหิตํ    สพฺพนฺตํ   อฏฺฐิกตฺวา   มนสิกริตฺวา
สพฺพเจตโส   สมนฺนาหริตฺวา   โอหิตโสโต   ธมฺมํ   สุณิสฺสามีติ  เอวญฺหิ
เต กสฺสป สิกฺขิตพฺพํ ฯ
     {๕๒๔.๒}   ตสฺมาติห   เต  กสฺสป  เอวํ  สิกฺขิตพฺพํ  สาตสหคตา
จ    เม    กายคตาสติ    น    วิชหิสฺสตีติ   เอวญฺหิ   เต   กสฺสป
สิกฺขิตพฺพนฺติ   ฯ   อถ   โข   มํ   อาวุโส  ภควา  อิมินา  โอวาเทน
โอวทิตฺวา   อุฏฺฐายาสนา   ปกฺกามิ   ฯ   สตฺตาหเมว   โขหํ  อาวุโส
สาโณ   ๑-   รฏฺฐปิณฺฑํ   ภุญฺชึ   อถ   อฏฺฐมิยา   อญฺญา  อุทปาทิ  ฯ
อถ   โข   อาวุโส   ภควา  มคฺคา  โอกฺกมฺม  เยน  อญฺญตรํ  รุกฺขมูลํ
เตนุปสงฺกมิ    ฯ    อถ    ขฺวาหํ   อาวุโส   ปฏปิโลติกานํ   สงฺฆาฏึ
จตุคฺคุณํ    ปญฺญเปตฺวา    ภควนฺตํ   เอตทโวจํ   อิธ   ภนฺเต   ภควา
นิสีทตุ   ยํ   มมสฺส  ทีฆรตฺตํ  หิตาย  สุขายาติ  ฯ  นิสีทิ  โข  อาวุโส
ภควา  ปญฺญตฺเต  อาสเน  ฯ  นิสชฺช  โข  มํ  อาวุโส ภควา เอตทโวจ
มุทุกา   โข   ตฺยายํ   กสฺสป  ปฏปิโลติกานํ  สงฺฆาฏีติ  ฯ  ปฏิคฺคณฺหาตุ
เม   ภนฺเต   ภควา   ปฏปิโลติกานํ  สงฺฆาฏึ  อนุกมฺปํ  อุปาทายาติ  ฯ
ธาเรสฺสสิ   ปน   เม  ตฺวํ  กสฺสป  สาณานิ  ปํสุกูลานิ  นิพฺพสนานีติ  ฯ
ธาเรสฺสามหํ ภนฺเต ภควโต สาณานิ ปํสุกูลานิ นิพฺพสนานีติ ฯ
@เชิงอรรถ:  ม. สรโณ ฯ
     [๕๒๕]   โส   ขฺวาหํ   อาวุโส  ปฏปิโลติกานํ  สงฺฆาฏึ  ภควโต
ปาทาสึ    อหํ    ปนสฺส    ภควโต   สาณานิ   ปํสุกูลานิ   นิพฺพสนานิ
ปฏิปชฺชึ   ฯ   ยญฺหิ   ตํ   อาวุโส  สมฺมา  วทมาโน  วเทยฺย  ภควโต
ปุตฺโต   โอรโส   มุขโต   ชาโต   ธมฺมโช  ธมฺมนิมฺมิโต  ธมฺมทายาโท
ปฏิคฺคหิตานิ    สาณานิ    ปํสุกูลานิ    นิพฺพสนานีติ   มมํ   ตํ   สมฺมา
วทมาโน   วเทยฺย   ภควโต   ปุตฺโต  โอรโส  มุขโต  ชาโต  ธมฺมโช
ธมฺมนิมฺมิโต     ธมฺมทายาโท     ปฏิคฺคหิตานิ     สาณานิ    ปํสุกูลานิ
นิพฺพสนานีติ ฯ
     [๕๒๖]   อหํ  โข  อาวุโส  ยาวเทว  อากงฺขามิ วิวิจฺเจว กาเมหิ
วิวิจฺจ   อกุสเลหิ   ธมฺเมหิ   สวิตกฺกํ   สวิจารํ  วิเวกชํ  ปีติสุขํ  ปฐมํ
ฌานํ   อุปสมฺปชฺช  วิหรามิ  ฯ  อหํ  โข  อาวุโส  ยาวเทว  อากงฺขามิ
ฯเปฯ     [นวนฺนํ    อนุปุพฺพวิหารสมาปตฺตีนํ    ปญฺจนฺนญฺจ    อภิญฺญานํ
เอวํ เปยฺยาโล] ฯ
     [๕๒๗]   อหํ  โข  อาวุโส  อาสวานํ  ขยา  อนาสวํ  เจโตวิมุตฺตึ
ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา   สจฺฉิกตฺวา  อุปสมฺปชฺช
วิหรามิ   ฯ   สตฺตรตนํ   วา   โส  อาวุโส  นาคํ  อฑฺฒฏฺฐมรตนํ  วา
ตาลปตฺติกาย    ฉาเทตพฺพํ    มญฺเญยฺย    โย    มํ   ฉหิ   อภิญฺญาหิ
ฉาเทตพฺพํ   มญฺเญยฺยาติ   ฯ   จวิตฺถ   จ   ปน   ถุลฺลนนฺทา   ภิกฺขุนี
พฺรหฺมจริยมฺหาติ ฯ เอกาทสมํ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๖ หน้าที่ ๒๕๗-๒๖๑. https://84000.org/tipitaka/read/pali_read.php?B=16&A=5184&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=16&A=5184&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=16&item=518&items=10              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=16&siri=149              ศึกษาอรรถกถานี้ได้ที่ :- https://84000.org/tipitaka/attha/attha.php?b=16&i=518              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=12&A=4415              The Pali Atthakatha in Roman :- https://84000.org/tipitaka/atthapali/read_rm.php?B=12&A=4415              สารบัญพระไตรปิฎกเล่มที่ ๑๖ https://84000.org/tipitaka/read/?index_16 https://84000.org/tipitaka/english/?index_16

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]