ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๕ ภาษาบาลี อักษรไทย พระสุตตันตปิฎกเล่มที่ ๗ สุตฺต. สํ. สคาถวคฺโค

                            ทุติยํ ปญฺจราชสุตฺตํ
     [๓๕๙]   สาวตฺถิยํ  วิหรติ  ...  เตน  โข  ปน  สมเยน ปญฺจนฺนํ
ราชูนํ   ปเสนทิปมุขานํ   ปญฺจหิ   กามคุเณหิ   สมปฺปิตานํ   สมงฺคิภูตานํ
ปริจารยมานานํ    อยมนฺตรากถา    อุทปาทิ   กึ   นุ   โข   กามานํ
อคฺคนฺติ   ฯ   ตเตฺรกจฺเจ   เอวมาหํสุ   รูปา   กามานํ   อคฺคนฺติ  ฯ
เอกจฺเจ  เอวมาหํสุ  สทฺทา  กามานํ  อคฺคนฺติ  ฯ  เอกจฺเจ  เอวมาหํสุ
คนฺธา   กามานํ   อคฺคนฺติ   ฯ   เอกจฺเจ   เอวมาหํสุ  รสา  กามานํ
อคฺคนฺติ   ฯ   เอกจฺเจ   เอวมาหํสุ   โผฏฺฐพฺพา  กามานํ  อคฺคนฺติ  ฯ
ยโต   โข   เต   ราชาโน   นาสกฺขึสุ   อญฺญมญฺญํ   สญฺญาเปตุํ   อถ
โข    ราชา   ปเสนทิโกสโล   เต   ราชาโน   เอตทโวจ   อายาม
มาริสา    เยน    ภควา   เตนุปสงฺกมิสฺสาม   อุปสงฺกมิตฺวา   ภควนฺตํ
เอตมตฺถํ   ปฏิปุจฺฉิสฺสาม   ยถา   โน   ภควา   พฺยากริสฺสติ  ตถา  นํ
ธาเรยฺยามาติ   ๒-   ฯ   เอวํ  มาริสาติ  โข  เต  ราชาโน  รญฺโญ
ปเสนทิโกสลสฺส ปจฺจสฺโสสุํ ฯ
     [๓๖๐]   อถ  โข  เต  ปญฺจ  ราชาโน  ปเสนทิปมุขา เยน ภควา
เตนุปสงฺกมึสุ     อุปสงฺกมิตฺวา    ภควนฺตํ    อภิวาเทตฺวา    เอกมนฺตํ
นิสีทึสุ   ฯ   เอกมนฺตํ   นิสินฺโน   โข  ราชา  ปเสนทิโกสโล  ภควนฺตํ
@เชิงอรรถ:  สี. ยุ. เอเก ฯ   ม. ธาเรสฺสนฺตีติ ฯ
เอตทโวจ   อิธ   ภนฺเต   อมฺหากํ  ปญฺจนฺนํ  ราชูนํ  ปญฺจหิ  กามคุเณหิ
สมปฺปิตานํ       สมงฺคิภูตานํ      ปริจารยมานานํ      อยมนฺตรากถา
อุทปาทิ    กึ    นุ   โข   กามานํ   อคฺคนฺติ   เอกจฺเจ   เอวมาหํสุ
รูปา    กามานํ    อคฺคนฺติ   เอกจฺเจ   เอวมาหํสุ   สทฺทา   กามานํ
อคฺคนฺติ   เอกจฺเจ   เอวมาหํสุ   คนฺธา   กามานํ   อคฺคนฺติ  เอกจฺเจ
เอวมาหํสุ   รสา   กามานํ   อคฺคนฺติ  เอกจฺเจ  เอวมาหํสุ  โผฏฺฐพฺพา
กามานํ อคฺคนฺติ กึ นุ โข ภนฺเต กามานํ อคฺคนฺติ ฯ
     [๓๖๑]   มนาปปริยนฺตํ   ขฺวาหํ   มหาราช   ปญฺจสุ   กามคุเณสุ
อคฺคนฺติ   วทามิ   เย   จ   ๑-  มหาราช  รูปา  เอกจฺจสฺส  มนาปา
โหนฺติ   เต   จ   ๒-   รูปา  เอกจฺจสฺส  อมนาปา  โหนฺติ  เยหิ  จ
โส    รูเปหิ    อตฺตมโน    โหติ    ปริปุณฺณสงฺกปฺโป    โส    เตหิ
รูเปหิ    อญฺญํ   รูปํ   อุตฺตริตรํ   วา   ปณีตตรํ   วา   น   ปตฺเถติ
เต    ตสฺส   รูปา   ปรมา   โหนฺติ   เต   ตสฺส   รูปา   อนุตฺตรา
โหนฺติ  ฯ  เย  จ  มหาราช  สทฺทา  ...  เย จ มหาราช คนฺธา ...
เย  จ  มหาราช  รสา  ...  เย  จ  มหาราช  โผฏฺฐพฺพา เอกจฺจสฺส
มนาปา   โหนฺติ   เต   จ   โผฏฺฐพฺพา   เอกจฺจสฺส  อมนาปา  โหนฺติ
เยหิ    จ    โส    โผฏฺฐพฺเพหิ   อตฺตมโน   โหติ   ปริปุณฺณสงฺกปฺโป
โส   เตหิ   โผฏฺฐพฺเพหิ   อญฺญํ   โผฏฺฐพฺพํ   อุตฺตริตรํ   วา  ปณีตตรํ
วา    น   ปตฺเถติ   เต   ตสฺส   โผฏฺฐพฺพา   ปรมา   โหนฺติ   เต
@เชิงอรรถ:  สี. ตญฺเจ ฯ ม. ยุ. เต จ ฯ   สี. ว. ฯ   ม. ยุ. โย ฯ
ตสฺส โผฏฺฐพฺพา อนุตฺตรา โหนฺตีติ ฯ
     [๓๖๒]   เตน  โข  ปน  สมเยน  จนฺทนงฺคลิโก ๑- อุปาสโก ตสฺสํ
ปริสายํ    นิสินฺโน   โหติ   ฯ   อถ   โข   จนฺทนงฺคลิโก   อุปาสโก
อุฏฺฐายาสนา   เอกํสํ   อุตฺตราสงฺคํ   กริตฺวา   เยน  ภควา  เตนญฺชลึ
ปณาเมตฺวา   ภควนฺตํ   เอตทโวจ   ปฏิภาติ   มํ   ภควา  ปฏิภาติ  มํ
สุคตาติ   ฯ   ปฏิภาตุ  ตํ  จนฺทนงฺคลิกาติ  ภควา  อโวจ  ฯ  อถ  โข
จนฺทนงฺคลิโก   อุปาสโก   ภควนฺตํ   ๒-   สมฺมุขา  ตทนุรูปาย  คาถาย
อภิตฺถวิ
                ปทุมํ ยถา โกกนทํ สุคนฺธํ
                ปาโต สิยา ผุลฺลมวีตคนฺธํ
                องฺคีรสํ ปสฺส วิโรจมานํ
                ตปนฺตมาทิจฺจมิวนฺตลิกฺเขติ ฯ
     [๓๖๓]   อถ   โข   เต  ปญฺจ  ราชาโน  จนฺทนงฺคลิกํ  อุปาสกํ
ปญฺจหิ  อุตฺตราสงฺเคหิ  อจฺฉาเทสุํ  ฯ  อถ  โข  จนฺทนงฺคลิโก  อุปาสโก
เตหิ ปญฺจหิ อุตฺตราสงฺเคหิ ภควนฺตํ อจฺฉาเทสีติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑๕ หน้าที่ ๑๑๖-๑๑๘. https://84000.org/tipitaka/read/pali_read.php?B=15&A=2223&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=15&A=2223&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=15&item=359&items=5              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=15&siri=123              ศึกษาอรรถกถานี้ได้ที่ :- https://84000.org/tipitaka/attha/attha.php?b=15&i=359              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=11&A=3744              The Pali Atthakatha in Roman :- https://84000.org/tipitaka/atthapali/read_rm.php?B=11&A=3744              สารบัญพระไตรปิฎกเล่มที่ ๑๕ https://84000.org/tipitaka/read/?index_15 https://84000.org/tipitaka/english/?index_15

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]