ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑ ภาษาบาลี อักษรไทย พระวินัยปิฎกเล่มที่ ๑ วินย. มหาวิภงฺโค (๑)

                               ปญฺจมสงฺฆาทิเสสํ
     [๔๒๓]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  อายสฺมา
อุทายิ   สาวตฺถิยํ   กุลูปโก   โหติ   พหุกานิ  กุลานิ  อุปสงฺกมติ  ยตฺถ
ปสฺสติ   กุมารกํ   วา   อปชาปติกํ   กุมาริกํ   วา  อปติกํ  กุมารกสฺส
มาตาปิตูนํ    สนฺติเก    กุมาริกาย    วณฺณํ   ภณติ   อมุกสฺส   กุลสฺส
กุมาริกา   อภิรูปา   ทสฺสนียา   ปาสาทิกา  ปณฺฑิตา  พฺยตฺตา  เมธาวินี
ทกฺขา อนลสา ฉนฺนา สา กุมาริกา อิมสฺส กุมารกสฺสาติ ฯ
     {๔๒๓.๑}   เต เอวํ วเทนฺติ ๑- เอเต โข ภนฺเต อเมฺห น ชานนฺติ เก วา
อิเม  กสฺส  วาติ  สเจ  ภนฺเต  อยฺโย  ทาเปยฺย  อาเนยฺยาม  ๒- มยํ
ตํ   กุมาริกํ   อิมสฺส  กุมารกสฺสาติ  ฯ  กุมาริกาย  มาตาปิตูนํ  สนฺติเก
กุมารกสฺส    วณฺณํ    ภณติ    อมุกสฺส    กุลสฺส   กุมารโก   อภิรูโป
ทสฺสนีโย   ปาสาทิโก   ปณฺฑิโต   พฺยตฺโต   เมธาวี   ทกฺโข   อนลโส
ฉนฺโน  โส  กุมารโก  อิมิสฺสา  กุมาริกายาติ  ๓-  ฯ  เต เอวํ วเทนฺติ
เอเต  โข  ภนฺเต  อเมฺห  น  ชานนฺติ  เก  วา  อิเม กสฺส วาติ กสฺมึ
วิย  กุมาริกาย  วตฺถุํ  สเจ  ภนฺเต  อยฺโย  ยาจาเปยฺย ทชฺเชยฺยาม มยํ
อิมํ  กุมาริกํ  ตสฺส  กุมารกสฺสาติ  ฯ  เอเตเนว  อุปาเยน  อาวาหานิปิ
@เชิงอรรถ:  ยุ. ม. วทนฺติ ฯ  ยุ. ม. อาเนม ฯ  ยุ. ม. ฉนฺนายํ
@กุมาริกา ตสฺส กุมารกสฺสาติ ฯ
การาเปติ วิวาหานิปิ การาเปติ วาเรยฺยานิปิ วตฺตาเปติ ฯ
     [๔๒๔]   เตน   โข   ปน   สมเยน  อญฺญตริสฺสา  ปุราณคณกิยา
ธีตา   อภิรูปา   โหติ   ทสฺสนียา   ปาสาทิกา   ฯ   ตีโรคามกา   จ
อาชีวกสาวกา    อาคนฺตฺวา   ตํ   คณกึ   เอตทโวจุํ   เทหยฺเย   อิมํ
กุมาริกํ   อมฺหากํ   กุมารกสฺสาติ   ฯ   สา   เอวมาห   อหํ  ขฺวยฺยา
ตุเมฺห  น  ชานามิ  เก  วา  อิเม  กสฺส  วาติ  อยญฺจ  เม เอกธีติกา
ตีโรคาโม  จ  คนฺตพฺโพ  นาหํ  ทสฺสามีติ  ฯ  มนุสฺสา เต อาชีวกสาวเก
เอตทโวจุํ   กิสฺส   ตุเมฺห   อยฺยา   อาคตตฺถาติ  ฯ  อิธ  มยํ  อยฺยา
อมุกํ   นาม  คณกึ  ธีตรํ  ยาจิมฺหา  อมฺหากํ  กุมารกสฺส  สา  เอวมาห
อหํ   ขฺวยฺยา  ตุเมฺห  น  ชานามิ  เก  วา  อิเม  กสฺส  วาติ  อยญฺจ
เม   เอกธีติกา   ตีโรคาโม   จ  คนฺตพฺโพ  นาหํ  ทสฺสามีติ  ฯ  กิสฺส
ตุเมฺห    อยฺยา   ตํ   คณกึ   ธีตรํ   ยาจิตฺถ   นนุ   อยฺโย   อุทายิ
วตฺตพฺโพ อยฺโย อุทายิ ทาเปสฺสตีติ ฯ
     {๔๒๔.๑}   อถโข เต อาชีวกสาวกา เยนายสฺมา อุทายิ เตนุปสงฺกมึสุ
อุปสงฺกมิตฺวา  อายสฺมนฺตํ  อุทายึ  เอตทโวจุํ  อิธ  มยํ  ภนฺเต อมุกํ นาม
คณกึ  ธีตรํ  ยาจิมฺหา  อมฺหากํ  กุมารกสฺส  สา  เอวมาห  อหํ  ขฺวยฺยา
ตุเมฺห  น ชานามิ เก วา อิเม กสฺส วาติ อยญฺจ เม เอกธีติกา ตีโรคาโม
จ  คนฺตพฺโพ  นาหํ  ทสฺสามีติ  สาธุ  ภนฺเต  อยฺโย ตํ คณกึ ธีตรํ ทาเปตุ
อมฺหากํ   กุมารกสฺสาติ   ฯ  อถโข  อายสฺมา  อุทายิ  เยน  สา  คณกี
เตนุปสงฺกมิ   อุปสงฺกมิตฺวา   ตํ   คณกึ  เอตทโวจ  กิสฺส  อิเมสํ  ธีตรํ
น  เทสีติ  ฯ  อหํ  ขฺวยฺย  อิเม  น  ชานามิ  เก  วา อิเม กสฺส วาติ
อยญฺจ   เม   เอกธีติกา  ตีโรคาโม  จ  คนฺตพฺโพ  นาหํ  ทสฺสามีติ  ฯ
เทหิ   อิเมสํ   อหํ  อิเม  ชานามีติ  ฯ  สเจ  ภนฺเต  อยฺโย  ชานาติ
ทสฺสามีติ  ฯ  อถโข  สา  คณกึ  เตสํ  อาชีวกสาวกานํ  ธีตรํ  อทาสิ ฯ
อถโข  เต  อาชีวกสาวกา  ตํ  กุมาริกํ  เนตฺวา  มาสํเยว สุณิสาโภเคน
ภุญฺชึสุ ตโต อปเรน ทาสีโภเคน ภุญฺชนฺติ ฯ
     [๔๒๕]   อถโข   สา  กุมาริกา  มาตุยา  สนฺติเก  ทูตํ  ปาเหสิ
อหํ   หิ  ทุคฺคตา  ทุกฺขิตา  น  สุขํ  ลภามิ  มาสํเยว  มํ  สุณิสาโภเคน
ภุญฺชึสุ   ตโต   อปเรน   ทาสีโภเคน   ภุญฺชนฺติ  อาคจฺฉตุ  เม  มาตา
มํ   ๑-   เนสฺสตูติ   ฯ  อถโข  สา  คณกี  เยน  เต  อาชีวกสาวกา
เตนุปสงฺกมิ   อุปสงฺกมิตฺวา  เต  อาชีวกสาวเก  เอตทโวจ  มา  อยฺยา
อิมํ    กุมาริกํ   ทาสีโภเคน   ภุญฺชิตฺถ   สุณิสาโภเคน   อิมํ   กุมาริกํ
ภุญฺชถาติ   ฯ   เต  เอวมาหํสุ  นตฺถมฺหากํ  ตยา  สทฺธึ  อาหารูปหาโร
สมเณน    สทฺธึ   อมฺหากํ   อาหารูปหาโร   คจฺฉ   ตฺวํ   น   มยนฺตํ
ชานามาติ   ฯ   อถโข   สา  คณกี  เตหิ  อาชีวกสาวเกหิ  อปสาทิตา
ปุนเทว   สาวตฺถึ  ปจฺจาคญฺฉิ  ฯ  ทุติยมฺปิ  โข  สา  กุมาริกา  มาตุยา
สนฺติเก   ทูตํ   ปาเหสิ   อหํ   หิ   ทุคฺคตา  ทุกฺขิตา  น  สุขํ  ลภามิ
มาสํเยว    มํ   สุณิสาโภเคน   ภุญฺชึสุ   ตโต   อปเรน   ทาสีโภเคน
ภุญฺชนฺติ   อาคจฺฉตุ   เม   มาตา  มํ  เนสฺสตูติ  ฯ  อถโข  สา  คณกี
@เชิงอรรถ:  ยุ. ม. โปตฺถเกสุ อยํ ปาโฐ น โหติ ฯ
เยนายสฺมา   อุทายิ   เตนุปสงฺกมิ   อุปสงฺกมิตฺวา   อายสฺมนฺตํ   อุทายึ
เอตทโวจ   สา   กิร   ภนฺเต   กุมาริกา   ทุคฺคตา  ทุกฺขิตา  น  สุขํ
ลภติ   มาสํเยว   นํ  สุณิสาโภเคน  ภุญฺชึสุ  ตโต  อปเรน  ทาสีโภเคน
ภุญฺชนฺติ   วเทยฺยาถ   ภนฺเต   มา   อยฺยา  อิมํ  กุมาริกํ  ทาสีโภเคน
ภุญฺชิตฺถ สุณิสาโภเคน อิมํ กุมาริกํ ภุญฺชถาติ ฯ
     {๔๒๕.๑}   อถโข อายสฺมา อุทายิ เยน เต อาชีวกสาวกา เตนุปสงฺกมิ
อุปสงฺกมิตฺวา  เต  อาชีวกสาวเก  เอตทโวจ  มา  อยฺยา  อิมํ  กุมาริกํ
ทาสีโภเคน   ภุญฺชิตฺถ   สุณิสาโภเคน   อิมํ  กุมาริกํ  ภุญฺชถาติ  ฯ  เต
เอวมาหํสุ   นตฺถมฺหากํ   ตยา   สทฺธึ   อาหารูปหาโร   คณกิยา  สทฺธึ
อมฺหากํ    อาหารูปหาโร    สมเณน    ภวิตพฺพํ   อพฺยาวเฏน   สมโณ
อสฺส สุสฺสมโณ คจฺฉ ตฺวํ น มยนฺตํ ชานามาติ ฯ
     {๔๒๕.๒}   อถโข  อายสฺมา อุทายิ เตหิ อาชีวกสาวเกหิ อปสาทิโต
ปุนเทว  สาวตฺถึ  ปจฺจาคญฺฉิ  ฯ ตติยมฺปิ โข สา กุมาริกา มาตุยา สนฺติเก
ทูตํ  ปาเหสิ อหํ หิ ทุคฺคตา ทุกฺขิตา น สุขํ ลภามิ มาสํเยว มํ สุณิสาโภเคน
ภุญฺชึสุ   ตโต  อปเรน  ทาสีโภเคน  ภุญฺชนฺติ  อาคจฺฉตุ  เม  มาตา  มํ
เนสฺสตูติ  ฯ  ทุติยมฺปิ  โข  สา  คณกี  เยนายสฺมา  อุทายิ  เตนุปสงฺกมิ
อุปสงฺกมิตฺวา  อายสฺมนฺตํ  อุทายึ  เอตทโวจ  สา  กิร  ภนฺเต  กุมาริกา
ทุคฺคตา    ทุกฺขิตา    น   สุขํ   ลภติ   มาสํเยว   นํ   สุณิสาโภเคน
ภุญฺชึสุ     ตโต     อปเรน     ทาสีโภเคน    ภุญฺชนฺติ    วเทยฺยาถ
ภนฺเต   มา   อยฺยา  อิมํ  กุมาริกํ  ทาสีโภเคน  ภุญฺชิตฺถ  สุณิสาโภเคน
อิมํ   กุมาริกํ   ภุญฺชถาติ   ฯ   ปฐมํ   จาหํ   เตหิ   อาชีวกสาวเกหิ
อปสาทิโต คจฺฉ ตฺวํ นาหํ คมิสฺสามีติ ฯ
     [๔๒๖]   อถโข   สา   คณกี   อุชฺฌายติ  ขียติ  วิปาเจติ  เอวํ
ทุคฺคโต   โหตุ   อยฺโย   อุทายิ   เอวํ  ทุกฺขิโต  โหตุ  อยฺโย  อุทายิ
เอวํ   มา   สุขํ   ลภตุ  อยฺโย  อุทายิ  ยถา  เม  กุมาริกา  ทุคฺคตา
ทุกฺขิตา   น   สุขํ   ลภติ   ปาปิกาย   สสฺสุยา   ปาปเกน   สสฺสุเรน
ปาปเกน   สามิเกนาติ   ฯ   สาปิ   โข   กุมาริกา   อุชฺฌายติ  ขียติ
วิปาเจติ   เอวํ   ทุคฺคโต   โหตุ  อยฺโย  อุทายิ  เอวํ  ทุกฺขิโต  โหตุ
อยฺโย   อุทายิ   เอวํ  มา  สุขํ  ลภตุ  อยฺโย  อุทายิ  ยถาหํ  ทุคฺคตา
ทุกฺขิตา   น   สุขํ   ลภามิ   ปาปิกาย   สสฺสุยา   ปาปเกน  สสฺสุเรน
ปาปเกน สามิเกนาติ ฯ
     {๔๒๖.๑}   อญฺญาปิ  อิตฺถิโย  อสนฺตุฏฺฐา  สสฺสูหิ  วา สสฺสุเรหิ วา
สามิเกหิ วา ตา เอวํ โอยาจนฺติ เอวํ ทุคฺคโต โหตุ อยฺโย อุทายิ เอวํ ทุกฺขิโต
โหตุ  อยฺโย  อุทายิ  เอวํ  มา  สุขํ ลภตุ อยฺโย อุทายิ ยถา มยํ ทุคฺคตา
ทุกฺขิตา  น  สุขํ  ลภาม  ปาปิกาหิ  สสฺสูหิ  ปาปเกหิ  สสฺสุเรหิ ปาปเกหิ
สามิเกหีติ  ฯ  ยา  ปน  ตา  อิตฺถิโย  สนฺตุฏฺฐา สสฺสูหิ วา สสฺสุเรหิ วา
สามิเกหิ  วา  ตา  เอวํ  อายาจนฺติ  เอวํ  สุขิโต  โหตุ  อยฺโย อุทายิ
เอวํ  สชฺชิโต  โหตุ  อยฺโย  อุทายิ  เอวํ  สุขเมธตุ  อยฺโย อุทายิ ยถา
มยํ   สุขิตา  สชฺชิตา  สุขเมธาม  ภทฺทกาหิ  สสฺสูหิ  ภทฺทเกหิ  สสฺสุเรหิ
ภทฺทเกหิ สามิเกหีติ ฯ
     [๔๒๗]   อสฺโสสุํ   โข   ภิกฺขู   เอกจฺจานํ  อิตฺถีนํ  โอยาจนฺตีนํ
เอกจฺจานํ  อิตฺถีนํ  อายาจนฺตีนํ  ฯ  เย  เต  ภิกฺขู  อปฺปิจฺฉา  สนฺตุฏฺฐา
ฯเปฯ   เต   อุชฺฌายนฺติ   ขียนฺติ  วิปาเจนฺติ  กถํ  หิ  นาม  อายสฺมา
อุทายิ   สญฺจริตฺตํ   สมาปชฺชิสฺสตีติ   ฯ   อถโข   เต   ภิกฺขู  ภควโต
เอตมตฺถํ   อาโรเจสุํ   ฯ   อถโข   ภควา  เอตสฺมึ  นิทาเน  เอตสฺมึ
ปกรเณ    ภิกฺขุสงฺฆํ   สนฺนิปาตาเปตฺวา   อายสฺมนฺตํ   อุทายึ   ปฏิปุจฺฉิ
สจฺจํ   กิร   ตฺวํ  อุทายิ  สญฺจริตฺตํ  สมาปชฺชสีติ  ฯ  สจฺจํ  ภควาติ  ฯ
วิครหิ   พุทฺโธ   ภควา   อนนุจฺฉวิกํ   โมฆปุริส   อนนุโลมิกํ  อปฺปฏิรูปํ
อสฺสามณกํ    อกปฺปิยํ    อกรณียํ    กถํ   หิ   นาม   ตฺวํ   โมฆปุริส
สญฺจริตฺตํ   สมาปชฺชิสฺสสิ   เนตํ   โมฆปุริส  อปฺปสนฺนานํ  วา  ปสาทาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๔๒๗.๑}   โย ปน ภิกฺขุ สญฺจริตฺตํ สมาปชฺเชยฺย อิตฺถิยา วา ปุริสมตึ
ปุริสสฺส วา อิตฺถีมตึ ชายตฺตเน วา ชารตฺตเน วา สงฺฆาทิเสโสติ ฯ
     {๔๒๗.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๔๒๘]   เตน โข ปน สมเยน สมฺพหุลา ธุตฺตา อุยฺยาเน ปริจาเรนฺตา
อญฺญตริสฺสา   เวสิยา   สนฺติเก   ทูตํ   ปาเหสุํ   อาคจฺฉตุ   อุยฺยาเน
ปริจาเรสฺสามาติ  ฯ  สา  เอวมาห  อหํ  ขฺวยฺยา  ตุเมฺห น ชานามิ เก
วา    อิเม    กสฺส    วาติ    อหญฺจมฺหิ    พหุภณฺฑา   พหุปริกฺขารา
พหินครญฺจ    คนฺตพฺพํ    นาหํ   คมิสฺสามีติ   ฯ   อถโข   โส   ทูโต
เตสํ   ธุตฺตานํ   เอตมตฺถํ   อาโรเจสิ   ฯ   เอวํ   วุตฺเต  อญฺญตโร
ปุริโส  เต  ธุตฺเต  เอตทโวจ  กิสฺส  ตุเมฺห  อยฺยา  ตํ  เวสึ  ยาจิตฺถ
นนุ   อยฺโย  อุทายิ  วตฺตพฺโพ  อยฺโย  อุทายิ  อุยฺโยเชสฺสตีติ  ฯ  เอวํ
วุตฺเต   อญฺญตโร   อุปาสโก   ตํ  ปุริสํ  เอตทโวจ  มา  อยฺโย  เอวํ
อวจ   น   กปฺปติ   สมณานํ   สกฺยปุตฺติยานํ   เอวรูปํ   กาตุํ  นายฺโย
อุทายิ   เอวรูปํ   กริสฺสตีติ   ฯ   เอวํ  วุตฺเต  กริสฺสติ  น  กริสฺสตีติ
อพฺภุตํ  อกํสุ  ฯ  อถโข  เต  ธุตฺตา  เยนายสฺมา  อุทายิ  เตนุปสงฺกมึสุ
อุปสงฺกมิตฺวา    อายสฺมนฺตํ    อุทายึ   เอตทโวจุํ   อิธ   มยํ   ภนฺเต
อุยฺยาเน  ปริจาเรนฺตา  อมุกาย  นาม  เวสิยา  สนฺติเก  ทูตํ  ปหิณิมฺหา
อาคจฺฉตุ   อุยฺยาเน   ปริจาเรสฺสามาติ   สา   เอวมาห  อหํ  ขฺวยฺยา
ตุเมฺห   น   ชานามิ  เก  วา  อิเม  กสฺส  วาติ  อหญฺจมฺหิ  พหุภณฺฑา
พหุปริกฺขารา     พหินครญฺจ    คนฺตพฺพํ    นาหํ    คมิสฺสามีติ    สาธุ
ภนฺเต อยฺโย ตํ เวสึ อุยฺโยเชตูติ ฯ
     {๔๒๘.๑}   อถโข  อายสฺมา  อุทายิ  เยน  สา  เวสี เตนุปสงฺกมิ
อุปสงฺกมิตฺวา  ตํ  เวสึ  เอตทโวจ  กิสฺส  อิเมสํ น คจฺฉสีติ ฯ อหํ ขฺวยฺย
อิเม  น  ชานามิ เก วา อิเม กสฺส วาติ อหญฺจมฺหิ พหุภณฺฑา พหุปริกฺขารา
พหินครญฺจ  คนฺตพฺพํ  นาหํ  คมิสฺสามีติ ฯ คจฺฉ อิเมสํ อหํ อิเม ชานามีติ ฯ
สเจ   ภนฺเต   อยฺโย  ชานาติ  คมิสฺสามีติ  ฯ  อถโข  เต  ธุตฺตา  ตํ
เวสึ   อาทาย   อุยฺยานํ   อคมํสุ  ฯ  อถโข  โส  อุปาสโก  อุชฺฌายติ
ขียติ   วิปาเจติ   กถํ   หิ   นาม   อยฺโย   อุทายิ  ตํขณิกํ  สญฺจริตฺตํ
สมาปชฺชิสฺสตีติ   ฯ  อสฺโสสุํ  โข  ภิกฺขู  ตสฺส  อุปาสกสฺส  อุชฺฌายนฺตสฺส
ขียนฺตสฺส   วิปาเจนฺตสฺส   ฯ   เย   เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ   ขียนฺติ   วิปาเจนฺติ   กถํ   หิ   นาม   อายสฺมา   อุทายิ
ตํขณิกํ   สญฺจริตฺตํ   สมาปชฺชิสฺสตีติ   ฯ   อถโข   เต   ภิกฺขู  ภควโต
เอตมตฺถํ   อาโรเจสุํ   ฯ   อถโข   ภควา  เอตสฺมึ  นิทาเน  เอตสฺมึ
ปกรเณ    ภิกฺขุสงฺฆํ   สนฺนิปาตาเปตฺวา   อายสฺมนฺตํ   อุทายึ   ปฏิปุจฺฉิ
สจฺจํ   กิร   ตฺวํ  อุทายิ  ตํขณิกํ  สญฺจริตฺตํ  สมาปชฺชสีติ  ๑-  ฯ  สจฺจํ
ภควาติ   ฯ   วิครหิ   พุทฺโธ  ภควา  อนนุจฺฉวิกํ  โมฆปุริส  อนนุโลมิกํ
ฯเปฯ   กถํ   หิ  นาม  ตฺวํ  โมฆปุริส  ตํขณิกํ  สญฺจริตฺตํ  สมาปชฺชิสฺสสิ
เนตํ   โมฆปุริส   อปฺปสนฺนานํ   วา   ปสาทาย   ฯเปฯ  เอวญฺจ  ปน
ภิกฺขเว อิมํ สิกฺขาปทํ อุทฺทิเสยฺยาถ
     {๔๒๘.๒}   โย  ปน  ภิกฺขุ  สญฺจริตฺตํ  สมาปชฺเชยฺย  อิตฺถิยา  วา
ปุริสมตึ  ปุริสสฺส  วา  อิตฺถีมตึ  ชายตฺตเน  วา  ชารตฺตเน วา อนฺตมโส
ตํขณิกายปิ สงฺฆาทิเสโสติ ฯ
     [๔๒๙]   โย   ปนาติ  โย  ยาทิโส  ฯเปฯ  ภิกฺขูติ  ฯเปฯ  อยํ
อิมสฺมึ   อตฺเถ   อธิปฺเปโต   ภิกฺขูติ   ฯ   สญฺจริตฺตํ   สมาปชฺเชยฺยาติ
อิตฺถิยา   วา   ปหิโต   ปุริสสฺส  สนฺติเก  คจฺฉติ  ปุริเสน  วา  ปหิโต
อิตฺถิยา   สนฺติเก   คจฺฉติ   ฯ   อิตฺถิยา   วา   ปุริสมตินฺติ   ปุริสสฺส
มตึ   อิตฺถิยา   วา   อาโรเจติ  ฯ  ปุริสสฺส  วา  อิตฺถีมตินฺติ  อิตฺถิยา
มตึ  ปุริสสฺส  วา  อาโรเจติ  ฯ  ชายตฺตเน  วาติ  ชายา  ภวิสฺสสิ  ฯ
ชารตฺตเน   วาติ   ชารี  ภวิสฺสสิ  ฯ  อนฺตมโส  ตํขณิกายปีติ  มุหุตฺติกา
@เชิงอรรถ:  ยุ. ม. สมาปชฺชีติ ฯ
ภวิสฺสสิ ฯ สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๔๓๐]   ทส   อิตฺถิโย  มาตุรกฺขิตา  ปิตุรกฺขิตา  มาตาปิตุรกฺขิตา
ภาตุรกฺขิตา    ภคินีรกฺขิตา    ญาติรกฺขิตา   โคตฺตรกฺขิตา   ธมฺมรกฺขิตา
สารกฺขา สปริทณฺฑา ฯ
     [๔๓๑]   ทส  ภริยาโย  ธนกฺกีตา  ฉนฺทวาสินี  โภควาสินี ปฏวาสินี
โอทปตฺตกินี   โอภตจุมฺพฏา   ทาสี  จ  ภริยา  จ  กมฺมการี  จ  ภริยา
จ ธชาหฏา มุหุตฺติกา ฯ
     [๔๓๒]   มาตุรกฺขิตา   นาม   มาตา   รกฺขติ  โคเปติ  อิสฺสริยํ
กาเรติ   วสํ   วตฺเตติ   ฯ   ปิตุรกฺขิตา  นาม  ปิตา  รกฺขติ  โคเปติ
อิสฺสริยํ   กาเรติ  วสํ  วตฺเตติ  ฯ  มาตาปิตุรกฺขิตา  นาม  มาตาปิตโร
รกฺขนฺติ    โคเปนฺติ    อิสฺสริยํ    กาเรนฺติ    วสํ    วตฺเตนฺติ    ฯ
ภาตุรกฺขิตา   นาม   ภาตา   รกฺขติ   โคเปติ   อิสฺสริยํ  กาเรติ  วสํ
วตฺเตติ   ฯ   ภคินีรกฺขิตา   นาม   ภคินี   รกฺขติ   โคเปติ   อิสฺสริยํ
กาเรติ   วสํ   วตฺเตติ   ฯ   ญาติรกฺขิตา   นาม   ญาตกา   รกฺขนฺติ
โคเปนฺติ   อิสฺสริยํ   กาเรนฺติ   วสํ  วตฺเตนฺติ  ฯ  โคตฺตรกฺขิตา  นาม
สโคตฺตา  รกฺขนฺติ  โคเปนฺติ อิสฺสริยํ กาเรนฺติ วสํ วตฺเตนฺติ ฯ ธมฺมรกฺขิตา
นาม    สหธมฺมิกา    รกฺขนฺติ    โคเปนฺติ   อิสฺสริยํ   กาเรนฺติ   วสํ
วตฺเตนฺติ  ฯ  สารกฺขา  นาม  คพฺเภปิ  ปริคฺคหิตา  โหติ  มยฺหํ  เอสาติ
อนฺตมโส   มาลาคุลปริกฺขิตฺตาปิ   ฯ   สปริทณฺฑา   นาม  เกนจิ  ทณฺโฑ
ฐปิโต โหติ โย อิตฺถนฺนามํ อิตฺถึ คจฺฉติ เอตฺตโก ทณฺโฑติ ฯ
     [๔๓๓]   ธนกฺกีตา  นาม  ธเนน  กีณิตฺวา  วาเสติ  ฯ  ฉนฺทวาสินี
นาม   ปิโย   ปิยํ   วาเสติ   ฯ   โภควาสินี   นาม   โภคํ   ทตฺวา
วาเสติ   ฯ   ปฏวาสินี   นาม   ปฏํ  ทตฺวา  วาเสติ  ฯ  โอทปตฺตกินี
นาม   อุทกปตฺตํ   อามสิตฺวา   วาเสติ  ฯ  โอภตจุมฺพฏา  นาม  จุมฺพฏํ
โอโรเปตฺวา  วาเสติ  ฯ  ทาสี  นาม  ทาสี  เจว  โหติ  ภริยา  จ ฯ
กมฺมการี   นาม  กมฺมการี  เจว  โหติ  ภริยา  จ  ฯ  ธชาหฏา  นาม
กรมรานีตา วุจฺจติ ฯ มุหุตฺติกา นาม ตํขณิกา วุจฺจติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๑ หน้าที่ ๒๙๕-๓๐๔. https://84000.org/tipitaka/read/pali_read.php?B=1&A=5835&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=1&A=5835&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=1&item=423&items=11              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=1&siri=42              ศึกษาอรรถกถานี้ได้ที่ :- https://84000.org/tipitaka/attha/attha.php?b=1&i=421              สารบัญพระไตรปิฎกเล่มที่ ๑ https://84000.org/tipitaka/read/?index_1 https://84000.org/tipitaka/english/?index_1

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]