ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๓ ภาษาบาลี อักษรไทย พระสุตตันตปิฎกเล่มที่ ๕ สุตฺต. ม. มชฺฌิมปณฺณาสกํ
     [๓๕๖]   เอวมฺเม   สุตํ   เอกํ  สมยํ  ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   เตน   โข   ปน  สมเยน
อุคฺคาหมาโน    ปริพฺพาชโก    สมณมุณฺฑิกาปุตฺโต   ๑-   สมยปฺปวาทเก
ติณฺฑุกาจีเร   ๒-   เอกสาลเก   มลฺลิกาย  อาราเม  ปฏิวสติ  มหติยา
ปริพฺพาชกปริสาย   สทฺธึ   ปญฺจมตฺเตหิ   ปริพฺพาชกสเตหิ   ฯ  อถ  โข
ปญฺจกงฺโค   ถปติ  สาวตฺถิยา  นิกฺขมิ  ทิวาทิวสฺส  ภควนฺตํ  ทสฺสนาย  ฯ
อถ   โข   ปญฺจกงฺคสฺส   ถปติสฺส   เอตทโหสิ   อกาโล   โข   ตาว
ภควนฺตํ    ทสฺสนาย    ปฏิสลฺลีโน   ภควา   มโนภาวนียานมฺปิ   ภิกฺขูนํ
อสมโย    ทสฺสนาย    ปฏิสลฺลีนา    มโนภาวนียา    ภิกฺขู   ยนฺนูนาหํ
เยน   สมยปฺปวาทโก   ติณฺฑุกาจีโร   เอกสาลโก   มลฺลิกาย  อาราโม
เยน      อุคฺคาหมาโน     ปริพฺพาชโก     สมณมุณฺฑิกาปุตฺโต     ๓-
เตนุปสงฺกเมยฺยนฺติ  ฯ  อถ  โข  ปญฺจกงฺโค  ถปติ  เยน  สมยปฺปวาทโก
ติณฺฑุกาจีโร เอกสาลโก มลฺลิกาย อาราโม เตนุปสงฺกมิ ฯ
     [๓๕๗]   เตน   โข   ปน  สมเยน  อุคฺคาหมาโน  ปริพฺพาชโก
สมณมุณฺฑิกาปุตฺโต     มหติยา     ปริพฺพาชกปริสาย    สทฺธึ    นิสินฺโน
โหติ    อุนฺนาทินิยา    อุจฺจาสทฺทมหาสทฺทาย   อเนกวิหิตํ   ติรจฺฉานกถํ
กเถนฺติยา    เสยฺยถีทํ    ราชกถํ    โจรกถํ   มหามตฺตกถํ   เสนากถํ
@เชิงอรรถ: ๑-๓ ยุ. สมณมณฺฑิกาปุตฺโต ฯ     สี. ม. ตินฺทุกาจีเร ฯ
ภยกถํ    ยุทฺธกถํ    อนฺนกถํ   ปานกถํ   วตฺถกถํ   สยนกถํ   มาลากถํ
คนฺธกถํ    ญาติกถํ   ยานกถํ   คามกถํ   นิคมกถํ   นครกถํ   ชนปทกถํ
อิตฺถีกถํ   สูรกถํ   วิสิขากถํ   กุมฺภฏฺฐานกถํ   กุมฺภทาสิกถํ   ปุพฺพเปตกถํ
นานตฺตกถํ โลกกฺขายิกํ สมุทฺทกฺขายิกํ อิติภวาภวกถํ อิติ วา ฯ
     {๓๕๗.๑}   อทฺทสา  โข อุคฺคาหมาโน ปริพฺพาชโก สมณมุณฺฑิกาปุตฺโต
ปญฺจกงฺคํ   ถปตึ   ทูรโต   อาคจฺฉนฺตํ   ทิสฺวาน   สกํ  ปริสํ  สณฺฐเปสิ
อปฺปสทฺทา   โภนฺโต   โหนฺตุ  มา  โภนฺโต  สทฺทมกตฺถ  [๒]-  สมณสฺส
โคตมสฺส   สาวโก   อาคจฺฉติ   ปญฺจกงฺโค   ถปติ   ยาวตา  โข  ปน
สมณสฺส   โคตมสฺส   สาวกา   คิหี   โอทาตวสนา  สาวตฺถิยํ  ปฏิวสนฺติ
อยํ   เตสํ   อญฺญตโร  ปญฺจกงฺโค  ถปติ  อปฺปสทฺทกามา  โข  ปน  เต
อายสฺมนฺโต    อปฺปสทฺทวินีตา   อปฺปสทฺทสฺส   วณฺณวาทิโน   อปฺเปวนาม
อปฺปสทฺทํ   ปริสํ   วิทิตฺวา   อุปสงฺกมิตพฺพํ   มญฺเญยฺยาติ   ฯ  อถ  โข
เต   ปริพฺพาชกา   ตุณฺหี  อเหสุํ  ฯ  อถ  โข  ปญฺจกงฺโค  ถปติ  เยน
อุคฺคาหมาโน      ปริพฺพาชโก      สมณมุณฺฑิกาปุตฺโต      เตนุปสงฺกมิ
อุปสงฺกมิตฺวา     อุคฺคาหมาเนน     ปริพฺพาชเกน    สมณมุณฺฑิกาปุตฺเตน
สทฺธึ สมฺโมทิ สมฺโมทนียํ กถํ สาราณียํ วีติสาเรตฺวา เอกมนฺตํ นิสีทิ ฯ
     [๓๕๘]   เอกมนฺตํ   นิสินฺนํ   โข  ปญฺจกงฺคํ  ถปตึ  อุคฺคาหมาโน
ปริพฺพาชโก     สมณมุณฺฑิกาปุตฺโต    เอตทโวจ    จตูหิ    โข    อหํ
ถปติ    ธมฺเมหิ    สมนฺนาคตํ    ปุริสปุคฺคลํ   ปญฺญาเปมิ   สมฺปนฺนกุสลํ
@เชิงอรรถ:  ยุ. ทูรโตว ฯ  ยุ. เอตฺถนฺตเร อยนฺติ ทิสฺสติ ฯ
ปรมกุสลํ    อุตฺตมปฺปตฺติปตฺตํ    สมณํ   อโยชฺฌํ   กตเมหิ   จตูหิ   อิธ
ถปติ   น   กาเยน   ปาปกํ   กมฺมํ   กโรติ  น  ปาปิกํ  วาจํ  ภาสติ
น   ปาปกํ   สงฺกปฺปํ   สงฺกปฺเปติ   น  ปาปกํ  อาชีวํ  อาชีวติ  อิเมหิ
โข   อหํ   ถปติ   จตูหิ   ธมฺเมหิ   สมนฺนาคตํ  ปริสปุคฺคลํ  ปญฺญาเปมิ
สมฺปนฺนกุสลํ ปรมกุสลํ อุตฺตมปฺปตฺติปตฺตํ สมณํ อโยชฺฌนฺติ ฯ
     {๓๕๘.๑}   อถ  โข  ปญฺจกงฺโค  ถปติ อุคฺคาหมานสฺส ปริพฺพาชกสฺส
สมณมุณฺฑิกาปุตฺตสฺส   ภาสิตํ   เนว   อภินนฺทิ  นปฺปฏิกฺโกสิ  อนภินนฺทิตฺวา
อปฺปฏิกฺโกสิตฺวา   อุฏฺฐายาสนา   ปกฺกามิ   ภควโต   สนฺติเก   เอตสฺส
ภาสิตสฺส   อตฺถํ   อาชานิสฺสามีติ   ฯ   อถ   โข   ปญฺจกงฺโค   ถปติ
เยน    ภควา    เตนุปสงฺกมิ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ  นิสีทิ  ฯ  เอกมนฺตํ  นิสินฺโน  โข  ปญฺจกงฺโค  ถปติ  ยาวตโก
อโหสิ       อุคฺคาหมาเนน      ปริพฺพาชเกน      สมณมุณฺฑิกาปุตฺเตน
สทฺธึ กถาสลฺลาโป ตํ สพฺพํ ภควโต อาโรเจสิ ฯ
     [๓๕๙]   เอวํ  วุตฺเต  ภควา  ปญฺจกงฺคํ  ถปตึ  เอตทโวจ  เอวํ
สนฺเต  โข  ถปติ  ทหโร  กุมาโร  มนฺโท  อุตฺตานเสยฺยโก สมฺปนฺนกุสโล
ภวิสฺสติ    ปรมกุสโล    อุตฺตมปฺปตฺติปตฺโต    สมโณ   อโยชฺโฌ   ยถา
อุคฺคาหมานสฺส     ปริพฺพาชกสฺส     สมณมุณฺฑิกาปุตฺตสฺส     วจนํ    ฯ
ทหรสฺส   หิ   ถปติ   กุมารสฺส   มนฺทสฺส   อุตฺตานเสยฺยกสฺส  กาโยติปิ
น  โหติ  กุโต  ปน  กาเยน  ปาปกํ กมฺมํ กริสฺสติ อญฺญตฺร ผนฺทิตมตฺตา ฯ
ทหรสฺส     หิ     ถปติ     กุมารสฺส    มนฺทสฺส    อุตฺตานเสยฺยกสฺส
วาจาติปิ   น   โหติ   กุโต   ปน   ปาปิกํ   วาจํ  ภาสิสฺสติ  อญฺญตฺร
โรทิตมตฺตา  ฯ  ทหรสฺส  หิ  ถปติ  กุมารสฺส  มนฺทสฺส  อุตฺตานเสยฺยกสฺส
สงฺกปฺโปติปิ   น   โหติ   กุโต   ปน   ปาปกํ   สงฺกปฺปํ   สงฺกปฺปิสฺสติ
อญฺญตฺร   วิกุชฺชิตมตฺตา   ฯ   ทหรสฺส   หิ   ถปติ   กุมารสฺส  มนฺทสฺส
อุตฺตานเสยฺยกสฺส   อาชีโวติปิ   น   โหติ   กุโต   ปน  ปาปกํ  อาชีวํ
อาชีวิสฺสติ   อญฺญตฺร  มาตุ  ถญฺญา  ฯ  เอวํ  สนฺเต  โข  ถปติ  ทหโร
กุมาโร   มนฺโท   อุตฺตานเสยฺยโก   สมฺปนฺนกุสโล   ภวิสฺสติ  ปรมกุสโล
อุตฺตมปฺปตฺติปตฺโต     สมโณ     อโยชฺโฌ     ยถา     อุคฺคาหมานสฺส
ปริพฺพาชกสฺส สมณมุณฺฑิกาปุตฺตสฺส วจนํ ฯ
     [๓๖๐]   จตูหิ  โข  อหํ  ถปติ  ธมฺเมหิ  สมนฺนาคตํ  ปุริสปุคฺคลํ
ปญฺญาเปมิ   น   เจว   สมฺปนฺนกุสลํ   น   ปรมกุสลํ  น  อุตฺตมปฺปตฺติ-
ปตฺตํ   สมณํ   อโยชฺฌํ   อปิจิมํ   ทหรํ   กุมารํ  มนฺทํ  อุตฺตานเสยฺยกํ
สมธิคฺคยฺห   ติฏฺฐติ   กตเมหิ   จตูหิ   อิธ  ถปติ  กาเยน  ๑-  ปาปกํ
กมฺมํ   กโรติ  น  ปาปิกํ  วาจํ  ภาสติ  น  ปาปกํ  สงฺกปฺปํ  สงฺกปฺเปติ
น   ปาปกํ   อาชีวํ   อาชีวติ   อิเมหิ  โข  อหํ  ถปติ  จตูหิ  ธมฺเมหิ
สมนฺนาคตํ    ปุริสปุคฺคลํ    ปญฺญาเปมิ    น   เจว   สมฺปนฺนกุสลํ   น
ปรมกุสลํ    น    อุตฺตมปฺปตฺติปตฺตํ    สมณํ    อโยชฺฌํ   อปิจิมํ   ทหรํ
กุมารํ มนฺทํ อุตฺตานเสยฺยกํ สมธิคฺคยฺห ติฏฺฐติ ฯ
@เชิงอรรถ:  ยุ. เอตฺถนฺตเร นสทฺโท ทิสฺสติ ฯ
     [๓๖๑]   ทสหิ   โข  อหํ  ถปติ  ธมฺเมหิ  สมนฺนาคตํ  ปุริสปุคฺคลํ
ปญฺญาเปมิ     สมฺปนฺนกุสลํ     ปรมกุสลํ     อุตฺตมปฺปตฺติปตฺตํ     สมณํ
อโยชฺฌํ   ฯ   อิเม  อกุสลา  สีลา  ๑-  ตมหํ  ๑-  ถปติ  เวทิตพฺพนฺติ
วทามิ   ฯ   อิโตสมุฏฺฐานา   อกุสลา   สีลา  ตมหํ  ถปติ  เวทิตพฺพนฺติ
วทามิ   ฯ   อิธ   อกุสลา   สีลา   อปริเสสา  นิรุชฺฌนฺติ  ตมหํ  ถปติ
เวทิตพฺพนฺติ   วทามิ   ฯ   เอวํ  ปฏิปนฺโน  อกุสลานํ  สีลานํ  นิโรธาย
ปฏิปนฺโน โหติ ตมหํ ถปติ เวทิตพฺพนฺติ วทามิ ฯ
     {๓๖๑.๑}   อิเม  กุสลา  สีลา  ตมหํ  ถปติ  เวทิตพฺพนฺติ วทามิ ฯ
อิโตสมุฏฺฐานา   กุสลา   สีลา   ตมหํ   ถปติ   เวทิตพฺพนฺติ  วทามิ  ฯ
อิธ   กุสลา   สีลา   อปริเสสา   นิรุชฺฌนฺติ   ตมหํ  ถปติ  เวทิตพฺพนฺติ
วทามิ   ฯ  เอวํ  ปฏิปนฺโน  กุสลานํ  สีลานํ  นิโรธาย  ปฏิปนฺโน  โหติ
ตมหํ ถปติ เวทิตพฺพนฺติ วทามิ ฯ
     {๓๖๑.๒}   อิเม   อกุสลา   สงฺกปฺปา  ตมหํ  ถปติ  เวทิตพฺพนฺติ
วทามิ   ฯ  อิโตสมุฏฺฐานา  อกุสลา  สงฺกปฺปา  ตมหํ  ถปติ  เวทิตพฺพนฺติ
วทามิ   ฯ   อิธ  อกุสลา  สงฺกปฺปา  อปริเสสา  นิรุชฺฌนฺติ  ตมหํ  ถปติ
เวทิตพฺพนฺติ  วทามิ  ฯ  เอวํ  ปฏิปนฺโน  อกุสลานํ  สงฺกปฺปานํ  นิโรธาย
ปฏิปนฺโน โหติ ตมหํ ถปติ เวทิตพฺพนฺติ วทามิ ฯ
     {๓๖๑.๓}   อิเม   กุสลา   สงฺกปฺปา   ตมหํ  ถปติ  เวทิตพฺพนฺติ
วทามิ      ฯ      อิโตสมุฏฺฐานา     กุสลา     สงฺกปฺปา     ตมหํ
@เชิงอรรถ:  สี อเนกวาเรสุ ตหนฺติ ปาโฐ ทิสฺสติ ฯ  ยุ. อิเม อกุสลสีลา ตหนฺติ ทิสฺสนฺติ ฯ
ถปติ   เวทิตพฺพนฺติ   วทามิ   ฯ   อิธ   กุสลา   สงฺกปฺปา  อปริเสสา
นิรุชฺฌนฺติ   ตมหํ   ถปติ   เวทิตพฺพนฺติ   วทามิ   ฯ   เอวํ   ปฏิปนฺโน
กุสลานํ    สงฺกปฺปานํ    นิโรธาย    ปฏิปนฺโน    โหติ   ตมหํ   ถปติ
เวทิตพฺพนฺติ วทามิ ฯ
     [๓๖๒]   กตเม   จ  ถปติ  อกุสลา  สีลา  ฯ  อกุสลํ  กายกมฺมํ
อกุสลํ วจีกมฺมํ ปาปโก อาชีโว อิเม วุจฺจนฺติ ถปติ อกุสลา สีลา ฯ
     {๓๖๒.๑}   อิเม  จ  ถปติ อกุสลา สีลา กึสมุฏฺฐานา ฯ สมุฏฺฐานมฺปิ
เนสํ  วุตฺตํ  ฯ  จิตฺตสมุฏฺฐานาติสฺส  วจนียํ  ฯ  กตมํ  จิตฺตํ ฯ จิตฺตมฺปิ หิ
พหุ   อเนกวิธํ   นานปฺปการกํ   ยํ   จิตฺตํ  ๑-  สราคํ  สโทสํ  สโมหํ
อิโตสมุฏฺฐานา อกุสลา สีลา ฯ
     {๓๖๒.๒}   อิเม  จ  ถปติ อกุสลา สีลา กุหึ อปริเสสา นิรุชฺฌนฺติ ฯ
นิโรโธปิ   เนสํ   วุตฺโต   ฯ   อิธ   ถปติ  ภิกฺขุ  กายทุจฺจริตํ  ปหาย
กายสุจริตํ   ภาเวติ  วจีทุจฺจริตํ  ปหาย  วจีสุจริตํ  ภาเวติ  มโนทุจฺจริตํ
ปหาย   มโนสุจริตํ   ภาเวติ  มิจฺฉาชีวํ  ปหาย  สมฺมาชีเวน  ชีวิตํ  ๒-
กปฺเปติ เอตฺเถเต อกุสลา สีลา อปริเสสา นิรุชฺฌนฺติ ฯ
     {๓๖๒.๓}  กถํ  ปฏิปนฺโน  ๓-  ถปติ  อกุสลานํ  สีลานํ  นิโรธาย
ปฏิปนฺโน   โหติ  ฯ  อิธ  ถปติ  ภิกฺขุ  อนุปฺปนฺนานํ  ปาปกานํ  อกุสลานํ
ธมฺมานํ  อนุปฺปาทาย  ฉนฺทํ  ชเนติ  วายมติ วิริยํ อารภติ จิตฺตํ ปคฺคณฺหาติ
ปทหติ   อุปฺปนฺนานํ   ปาปกานํ   อกุสลานํ   ธมฺมานํ   ปหานาย   ฉนฺทํ
ชเนติ   วายมติ   วิริยํ  อารภติ  จิตฺตํ  ปคฺคณฺหาติ  ปทหติ  อนุปฺปนฺนานํ
@เชิงอรรถ:  ยุ. สจิตฺตํ ฯ    ยุ. ชีวิกํ ฯ     ยุ. เอตฺถนฺตเร จาติ ทิสฺสติ ฯ
กุสลานํ   ธมฺมานํ   อุปฺปาทาย   ฉนฺทํ   ชเนติ  วายมติ  วิริยํ  อารภติ
จิตฺตํ    ปคฺคณฺหาติ    ปทหติ   อุปฺปนฺนานํ   กุสลานํ   ธมฺมานํ   ฐิติยา
อสมฺโมสาย   ภิยฺโยภาวาย   เวปุลฺลาย   ภาวนาย   ปาริปูริยา   ฉนฺทํ
ชเนติ   วายมติ   วิริยํ   อารภติ   จิตฺตํ  ปคฺคณฺหาติ  ปทหติ  ฯ  เอวํ
ปฏิปนฺโน โข ถปติ อกุสลานํ สีลานํ นิโรธาย ปฏิปนฺโน โหติ ฯ
     [๓๖๓]   กตเม   จ   ถปติ  กุสลา  สีลา   ฯ  กุสลํ  กายกมฺมํ
กุสลํ   วจีกมฺมํ   อาชีวปาริสุทฺธึปิ   โข   อหํ   ถปติ   สีลสฺมึ   วทามิ
อิเม   วุจฺจนฺติ   ถปติ  กุสลา  สีลา  ฯ  อิเม  จ  ถปติ  กุสลา  สีลา
กึสมุฏฺฐานา   ฯ   สมุฏฺฐานมฺปิ   เนสํ   วุตฺตํ   ฯ   จิตฺตสมุฏฺฐานาติสฺส
วจนียํ   ฯ   กตมํ  จิตฺตํ  ฯ  จิตฺตมฺปิ  หิ  พหุ  อเนกวิธํ  นานปฺปการกํ
ยํ    จิตฺตํ    วีตราคํ    วีตโทสํ    วีตโมหํ   อิโตสมุฏฺฐานา   กุสลา
สีลา   ฯ  อิเม  จ  ถปติ  กุสลา  สีลา  กุหึ  อปริเสสา  นิรุชฺฌนฺติ  ฯ
นิโรโธปิ   เนสํ   วุตฺโต   ฯ  อิธ  ถปติ  ภิกฺขุ  สีลวา  โหติ  โน  จ
สีลมโย    ตญฺจ    เจโตวิมุตฺตึ    ปญฺญาวิมุตฺตึ    ยถาภูตํ    ปชานาติ
ยตฺถสฺส เต กุสลา สีลา อปริเสสา นิรุชฺฌนฺติ ฯ
     {๓๖๓.๑}   กถํ   ปฏิปนฺโน  จ  ถปติ  กุสลานํ  สีลานํ  นิโรธาย
ปฏิปนฺโน   โหติ  ฯ  อิธ  ถปติ  ภิกฺขุ  อนุปฺปนฺนานํ  ปาปกานํ  อกุสลานํ
ธมฺมานํ  อนุปฺปาทาย  ฉนฺทํ  ชเนติ  วายมติ วิริยํ อารภติ จิตฺตํ ปคฺคณฺหาติ
ปทหติ   อุปฺปนฺนานํ   ปาปกานํ   อกุสลานํ   ธมฺมานํ   ปหานาย  ฯเปฯ
อนุปฺปนฺนานํ   กุสลานํ   ธมฺมานํ  อุปฺปาทาย  ฯเปฯ  อุปฺปนฺนานํ  กุสลานํ
ธมฺมานํ    ฐิติยา   อสมฺโมสาย   ภิยฺโยภาวาย   เวปุลฺลาย   ภาวนาย
ปาริปูริยา   ฉนฺทํ   ชเนติ   วายมติ   วิริยํ  อารภติ  จิตฺตํ  ปคฺคณฺหาติ
ปทหติ   ฯ   เอวํ   ปฏิปนฺโน   โข   ถปติ  กุสลานํ  สีลานํ  นิโรธาย
ปฏิปนฺโน โหติ ฯ
     [๓๖๔]   กตเม   จ  ถปติ  อกุสลา  สงฺกปฺปา  ฯ  กามสงฺกปฺโป
พฺยาปาทสงฺกปฺโป    วิหึสาสงฺกปฺโป    อิเม   วุจฺจนฺติ   ถปติ   อกุสลา
สงฺกปฺปา ฯ
     {๓๖๔.๑}   อิเม   จ  ถปติ  อกุสลา  สงฺกปฺปา  กึสมุฏฺฐานา  ฯ
สมุฏฺฐานมฺปิ   เนสํ   วุตฺตํ   ฯ  สญฺญาสมุฏฺฐานาติสฺส  วจนียํ  ฯ  กตมา
สญฺญา  ฯ  สญฺญาปิ  หิ  พหุ  อเนกวิธา  นานปฺปการกา  ยา  กามสญฺญา
พฺยาปาทสญฺญา วิหึสาสญฺญา อิโตสมุฏฺฐานา อกุสลา สงฺกปฺปา ฯ
     {๓๖๔.๒}   อิเม   จ  ถปติ  อกุสลา  สงฺกปฺปา  กุหึ  อปริเสสา
นิรุชฺฌนฺติ   ฯ   นิโรโธปิ  เนสํ  วุตฺโต  ฯ  อิธ  ถปติ  ภิกฺขุ  วิวิจฺเจว
กาเมหิ   วิวิจฺจ   อกุสเลหิ  ธมฺเมหิ  สวิตกฺกํ  สวิจารํ  วิเวกชํ  ปีติสุขํ
ปฐมํ    ฌานํ    อุปสมฺปชฺช   วิหรติ   เอตฺเถเต   อกุสลา   สงฺกปฺปา
อปริเสสา นิรุชฺฌนฺติ ฯ
     {๓๖๔.๓}   กถํ  ปฏิปนฺโน  จ  ถปติ  อกุสลานํ สงฺกปฺปานํ นิโรธาย
ปฏิปนฺโน  โหติ  ฯ  อิธ ถปติ ภิกฺขุ อนุปฺปนฺนานํ ปาปกานํ อกุสลานํ ธมฺมานํ
อนุปฺปาทาย  ฉนฺทํ  ชเนติ  วายมติ  วิริยํ  อารภติ จิตฺตํ ปคฺคณฺหาติ ปทหติ
อุปฺปนฺนานํ   ปาปกานํ  อกุสลานํ  ธมฺมานํ  ปหานาย  ฯเปฯ  อนุปฺปนฺนานํ
กุสลานํ  ธมฺมานํ  อุปฺปาทาย  ฯเปฯ  อุปฺปนฺนานํ  กุสลานํ  ธมฺมานํ ฐิติยา
อสมฺโมสาย   ภิยฺโยภาวาย   เวปุลฺลาย   ภาวนาย   ปาริปูริยา   ฉนฺทํ
ชเนติ  วายมติ  วิริยํ  อารภติ  จิตฺตํ  ปคฺคณฺหาติ ปทหติ ฯ เอวํ ปฏิปนฺโน
โข ถปติ อกุสลานํ สงฺกปฺปานํ นิโรธาย ปฏิปนฺโน โหติ ฯ
     [๓๖๕]   กตเม  จ  ถปติ  กุสลา  สงฺกปฺปา  ฯ  เนกฺขมฺมสงฺกปฺโป
อพฺยาปาทสงฺกปฺโป    อวิหึสาสงฺกปฺโป   อิเม   วุจฺจนฺติ   ถปติ   กุสลา
สงฺกปฺปา ฯ
     {๓๖๕.๑}   อิเม   จ   ถปติ  กุสลา  สงฺกปฺปา  กึสมุฏฺฐานา  ฯ
สมุฏฺฐานมฺปิ    เนสํ    วุตฺตํ    ฯ   สญฺญาสมุฏฺฐานาติสฺส   วจนียํ   ฯ
กตมา   สญฺญา   ฯ   สญฺญาปิ  หิ  พหุ  อเนกวิธา  นานปฺปการกา  ๑-
ยา     ๒-     เนกฺขมฺมสญฺญา     อพฺยาปาทสญฺญา      อวิหึสาสญฺญา
อิโตสมุฏฺฐานา กุสลา สงฺกปฺปา ฯ
     {๓๖๕.๒}   อิเม   จ   ถปติ  กุสลา  สงฺกปฺปา  กุหึ  อปริเสสา
นิรุชฺฌนฺติ  ฯ  นิโรโธปิ  เนสํ  วุตฺโต  ฯ  อิธ  ถปติ ภิกฺขุ วิตกฺกวิจารานํ
วูปสมา   ฯเปฯ   ทุติยํ   ฌานํ   อุปสมฺปชฺช  วิหรติ  เอตฺเถเต  กุสลา
สงฺกปฺปา อปริเสสา นิรุชฺฌนฺติ ฯ
     {๓๖๕.๓}   กถํ  ปฏิปนฺโน  จ  ถปติ  กุสลานํ  สงฺกปฺปานํ นิโรธาย
ปฏิปนฺโน   โหติ  ฯ  อิธ  ถปติ  ภิกฺขุ  อนุปฺปนฺนานํ  ปาปกานํ  อกุสลานํ
ธมฺมานํ   อนุปฺปาทาย   ฉนฺทํ   ชเนติ   วายมติ   วิริยํ  อารภติ  จิตฺตํ
ปคฺคณฺหาติ    ปทหติ    อุปฺปนฺนานํ    ปาปกานํ    อกุสลานํ    ธมฺมานํ
ปหานาย    ฯเปฯ    อนุปฺปนฺนานํ    กุสลานํ    ธมฺมานํ    อุปฺปาทาย
ฯเปฯ   อุปฺปนฺนานํ  กุสลานํ  ธมฺมานํ  ฐิติยา  อสมฺโมสาย  ภิยฺโยภาวาย
เวปุลฺลาย    ภาวนาย    ปาริปูริยา   ฉนฺทํ   ชเนติ   วายมติ   วิริยํ
@เชิงอรรถ:  ยุ. นานปฺปการิกา ฯ    ยุ. ยา อิติ ปาโฐ น ทิสฺสติ ฯ
อารภติ   จิตฺตํ   ปคฺคณฺหาติ   ปทหติ   ฯ   เอวํ  ปฏิปนฺโน  โข  ถปติ
กุสลานํ สงฺกปฺปานํ นิโรธาย ปฏิปนฺโน โหติ ฯ
     [๓๖๖]   กตเมหิ  [๑]-  ถปติ  ทสหิ ธมฺเมหิ สมนฺนาคตํ ปุริสปุคฺคลํ
ปญฺญาเปมิ     สมฺปนฺนกุสลํ     ปรมกุสลํ     อุตฺตมปฺปตฺติปตฺตํ     สมณํ
อโยชฺฌํ   ฯ   อิธ   ถปติ   ภิกฺขุ  อเสขาย  สมฺมาทิฏฺฐิยา  สมนฺนาคโต
โหติ    อเสเขน    สมฺมาสงฺกปฺเปน    สมนฺนาคโต   โหติ   อเสขาย
สมฺมาวาจาย     สมนฺนาคโต     โหติ    อเสเขน    สมฺมากมฺมนฺเตน
สมนฺนาคโต    โหติ    อเสเขน   สมฺมาอาชีเวน   สมนฺนาคโต   โหติ
อเสเขน   สมฺมาวายาเมน   สมนฺนาคโต   โหติ  อเสขาย  สมฺมาสติยา
สมนฺนาคโต     โหติ     อเสเขน     สมฺมาสมาธินา     สมนฺนาคโต
โหติ    อเสเขน    สมฺมาญาเณน    สมนฺนาคโต    โหติ    อเสขาย
สมฺมาวิมุตฺติยา    สมนฺนาคโต   โหติ   ฯ   อิเมหิ   โข   อหํ   ถปติ
ทสหิ    ธมฺเมหิ    สมนฺนาคตํ    ปุริสปุคฺคลํ   ปญฺญาเปมิ   สมฺปนฺนกุสลํ
ปรมกุสลํ อุตฺตมปฺปตฺติปตฺตํ สมณํ อโยชฺฌนฺติ ฯ
     อิทมโวจ    ภควา    อตฺตมโน    ปญฺจกงฺโค    ถปติ   ภควโต
ภาสิตํ อภินนฺทีติ ฯ
                สมณมุณฺฑิกสุตฺตํ ๒- นิฏฺฐิตํ อฏฺฐมํ
                     ------------
@เชิงอรรถ:  ยุ. เอตฺถนฺตเร จาหนฺติ ทิสฺสติ ฯ     ยุ. สมณมณฺฑิกสุตฺตํ ฯ
                      จูฬสกุลุทายิสุตฺตํ



             เนื้อความพระไตรปิฎกฉบับภาษาบาลีอักษรไทย เล่มที่ ๑๓ หน้าที่ ๓๔๒-๓๕๒. http://84000.org/tipitaka/read/pali_item_s.php?book=13&item=356&items=11&modeTY=2&mode=bracket              อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/read/pali_item_s.php?book=13&item=356&items=11&modeTY=2              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=13&item=356&items=11&modeTY=2&mode=bracket              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=13&item=356&items=11&modeTY=2&mode=bracket              ศึกษาอรรถกถานี้ได้ที่ :- http://84000.org/tipitaka/attha/attha.php?b=13&i=356              The Pali Atthakatha in Thai :- http://84000.org/tipitaka/atthapali/read_th.php?B=9&A=4876              The Pali Atthakatha in Roman :- http://84000.org/tipitaka/atthapali/read_rm.php?B=9&A=4876              สารบัญพระไตรปิฎกเล่มที่ ๑๓ http://84000.org/tipitaka/read/?index_13

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :