พระไตรปิฎกเล่มที่ ๘ ภาษาบาลี อักษรไทย
พระวินัยปิฎกเล่มที่ ๘ วินย. ปริวาโร

     [๑๐๙๘]   น   ฉนฺทาคติ   คนฺตพฺพาติ  ฉนฺทาคตึ  คจฺฉนฺโต  กถํ
ฉนฺทาคตึ   คจฺฉติ   ฯ  อิเธกจฺโจ  อยํ  เม  อุปชฺฌาโย  วา  อาจริโย
วา   สทฺธิวิหาริโก   วา   อนฺเตวาสิโก   วา   สมานุปชฺฌายโก   วา
สมานาจริยโก   วา   สนฺทิฏฺโฐ   วา   สมฺภตฺโต   วา  ญาติสาโลหิโต
วาติ    ตสฺสานุกมฺปาย    ตสฺสานุรกฺขาย    อธมฺมํ    ธมฺโมติ   ทีเปติ
ธมฺมํ     อธมฺโมติ     ทีเปติ    อวินยํ    วินโยติ    ทีเปติ    วินยํ
อวินโยติ    ทีเปติ    อภาสิตํ    อลปิตํ    ตถาคเตน   ภาสิตํ   ลปิตํ
@เชิงอรรถ: ๑ ม. วจนมนุปฺปทานํ ฯ ยุ. ธนมนุปฺปทานํ ฯ
ตถาคเตนาติ    ทีเปติ   ภาสิตํ   ลปิตํ   ตถาคเตน   อภาสิตํ   อลปิตํ
ตถาคเตนาติ   ทีเปติ   อนาจิณฺณํ   ตถาคเตน   อาจิณฺณํ   ตถาคเตนาติ
ทีเปติ      อาจิณฺณํ      ตถาคเตน      อนาจิณฺณํ      ตถาคเตนาติ
ทีเปติ    อปฺปญฺญตฺตํ    ตถาคเตน    ปญฺญตฺตํ    ตถาคเตนาติ   ทีเปติ
ปญฺญตฺตํ      ตถาคเตน      อปฺปญฺญตฺตํ      ตถาคเตนาติ     ทีเปติ
อนาปตฺตึ    อาปตฺตีติ    ทีเปติ   อาปตฺตึ   อนาปตฺตีติ   ทีเปติ   ลหุกํ
อาปตฺตึ    ครุกา    อาปตฺตีติ    ทีเปติ    ครุกํ    อาปตฺตึ    ลหุกา
อาปตฺตีติ     ทีเปติ    สาวเสสํ    อาปตฺตึ    อนวเสสา    อาปตฺตีติ
ทีเปติ   อนวเสสํ   อาปตฺตึ   สาวเสสา   อาปตฺตีติ   ทีเปติ   ทุฏฺฐุลฺลํ
อาปตฺตึ     อทุฏฺฐุลฺลา     อาปตฺตีติ    ทีเปติ    อทุฏฺฐุลฺลํ    อาปตฺตึ
ทุฏฺฐุลฺลา   อาปตฺตีติ   ทีเปติ   อิเมหิ   อฏฺฐารสหิ   วตฺถูหิ   ฉนฺทาคตึ
คจฺฉนฺโต    พหุชนาหิตาย    ปฏิปนฺโน    โหติ   พหุชนาสุขาย   พหุโน
ชนสฺส   อนตฺถาย   อหิตาย   ทุกฺขาย  เทวมนุสฺสานํ  อิเมหิ  อฏฺฐารสหิ
วตฺถูหิ    ฉนฺทาคตึ    คจฺฉนฺโต    ขตํ    อุปหตํ    อตฺตานํ   ปริหรติ
สาวชฺโช   จ   โหติ   สานุวชฺโช   จ   ๑-   วิญฺญูนํ   พหุญฺจ  อปุญฺญํ
ปสวติ ฉนฺทาคตึ คจฺฉนฺโต เอวํ ฉนฺทาคตึ คจฺฉติ ฯ
     [๑๐๙๙]   น   โทสาคติ   คนฺตพฺพาติ   โทสาคตึ  คจฺฉนฺโต  กถํ
โทสาคตึ    คจฺฉติ   ฯ   อิเธกจฺโจ   อนตฺถํ   เม   อจรีติ   อาฆาตํ
พนฺธติ    อนตฺถํ    เม    จรตีติ    อาฆาตํ    พนฺธติ   อนตฺถํ   เม
@เชิงอรรถ: ๑ ยุ. อยํ ปาโฐ น ทิสฺสติ ฯ
จริสฺสตีติ   อาฆาตํ   พนฺธติ   ปิยสฺส   เม   มนาปสฺส   อนตฺถํ   อจริ
อนตฺถํ   จรติ   อนตฺถํ   จริสฺสตีติ   อาฆาตํ   พนฺธติ   อปฺปิยสฺส   เม
อมนาปสฺส    อตฺถํ   อจริ   อตฺถํ   จรติ   อตฺถํ   จริสฺสตีติ   อาฆาตํ
พนฺธติ    อิเมหิ   นวหิ   อาฆาตวตฺถูหิ   อาฆาโต   ปฏิฆาโต   กุทฺโธ
โกธาภิภูโต    อธมฺมํ    ธมฺโมติ    ทีเปติ   ธมฺมํ   อธมฺโมติ   ทีเปติ
ฯเปฯ   ทุฏฺฐุลฺลํ   อาปตฺตึ   อทุฏฺฐุลฺลา   อาปตฺตีติ   ทีเปติ   อทุฏฺฐุลฺลํ
อาปตฺตึ    ทุฏฺฐุลฺลา   อาปตฺตีติ   ทีเปติ   อิเมหิ   อฏฺฐารสหิ   วตฺถูหิ
โทสาคตึ    คจฺฉนฺโต   พหุชนาหิตาย   ปฏิปนฺโน   โหติ   พหุชนาสุขาย
พหุโน     ชนสฺส     อนตฺถาย    อหิตาย    ทุกฺขาย    เทวมนุสฺสานํ
อิเมหิ   อฏฺฐารสหิ   วตฺถูหิ   โทสาคตึ  คจฺฉนฺโต  ขตํ  อุปหตํ  อตฺตานํ
ปริหรติ    สาวชฺโช    จ    โหติ   สานุวชฺโช   จ   วิญฺญูนํ   พหุญฺจ
อปุญฺญํ ปสวติ โทสาคตึ คจฺฉนฺโต เอวํ โทสาคตึ คจฺฉติ ฯ
     [๑๑๐๐]   น   โมหาคติ   คนฺตพฺพาติ   โมหาคตึ  คจฺฉนฺโต  กถํ
โมหาคตึ   คจฺฉติ   ฯ   รตฺโต   ราควเสน  คจฺฉติ  ทุฏฺโฐ  โทสวเสน
คจฺฉติ     มูโฬฺห     โมหวเสน    คจฺฉติ    ปรามฏฺโฐ    ทิฏฺฐิวเสน
คจฺฉติ    มูโฬฺห    สมฺมูโฬฺห   โมหาภิภูโต   อธมฺมํ   ธมฺโมติ   ทีเปติ
ธมฺมํ    อธมฺโมติ    ทีเปติ    ฯเปฯ   ทุฏฺฐุลฺลํ   อาปตฺตึ   อทุฏฺฐุลฺลา
อาปตฺตีติ     ทีเปติ     อทุฏฺฐุลฺลํ    อาปตฺตึ    ทุฏฺฐุลฺลา    อาปตฺตีติ
ทีเปติ   อิเมหิ   อฏฺฐารสหิ   วตฺถูหิ  โมหาคตึ  คจฺฉนฺโต  พหุชนาหิตาย
ปฏิปนฺโน     โหติ     พหุชนาสุขาย     พหุโน    ชนสฺส    อนตฺถาย
อหิตาย   ทุกฺขาย   เทวมนุสฺสานํ   อิเมหิ  อฏฺฐารสหิ  วตฺถูหิ  โมหาคตึ
คจฺฉนฺโต    ขตํ    อุปหตํ   อตฺตานํ   ปริหรติ   สาวชฺโช   จ   โหติ
สานุวชฺโช     จ    วิญฺญูนํ    พหุญฺจ    อปุญฺญํ    ปสวติ    โมหาคตึ
คจฺฉนฺโต เอวํ โมหาคตึ คจฺฉติ ฯ
     [๑๑๐๑]   น   ภยาคติ   คนฺตพฺพาติ   ภยาคตึ   คจฺฉนฺโต   กถํ
ภยาคตึ   คจฺฉติ   ฯ   อิเธกจฺโจ   อยํ  วิสมนิสฺสิโต  วา  คหนนิสฺสิโต
วา  พลวนิสฺสิโต  วา  กกฺขโฬ  ผรุโส  ชีวิตนฺตรายํ วา พฺรหฺมจริยนฺตรายํ
วา  กริสฺสตีติ  ตสฺส  ภยา  ภีโต  อธมฺมํ  ธมฺโมติ  ทีเปติ ธมฺมํ อธมฺโมติ
ทีเปติ  ฯเปฯ  ทุฏฺฐุลฺลํ  อาปตฺตึ  อทุฏฺฐุลฺลา  อาปตฺตีติ  ทีเปติ  อทุฏฺฐุลฺลํ
อาปตฺตึ  ทุฏฺฐุลฺลา  อาปตฺตีติ  ทีเปติ  อิเมหิ  อฏฺฐารสหิ  วตฺถูหิ  ภยาคตึ
คจฺฉนฺโต   พหุชนาหิตาย   ปฏิปนฺโน  โหติ  พหุชนาสุขาย  พหุโน  ชนสฺส
อนตฺถาย   อหิตาย   ทุกฺขาย   เทวมนุสฺสานํ  อิเมหิ  อฏฺฐารสหิ  วตฺถูหิ
ภยาคตึ   คจฺฉนฺโต   ขตํ  อุปหตํ  อตฺตานํ  ปริหรติ  สาวชฺโช  จ  โหติ
สานุวชฺโช     จ     วิญฺญูนํ    พหุญฺจ    อปุญฺญํ    ปสวติ    ภยาคตึ
คจฺฉนฺโต เอวํ ภยาคตึ คจฺฉติ ฯ
     [๑๑๐๒]   ฉนฺทา โทสา ภยา โมหา   โย ธมฺมํ อติวตฺตติ
         นิหียติ ตสฺส ยโส                    กาฬปกฺเขว จนฺทิมาติ ฯ
     [๑๑๐๓]   กถํ   น   ฉนฺทาคตึ   คจฺฉติ   ฯ   อธมฺมํ  อธมฺโมติ
ทีเปนฺโต    น    ฉนฺทาคตึ   คจฺฉติ   ธมฺมํ   ธมฺโมติ   ทีเปนฺโต   น
ฉนฺทาคตึ    คจฺฉติ    อวินยํ    อวินโยติ    ทีเปนฺโต   น   ฉนฺทาคตึ
คจฺฉติ     วินยํ     วินโยติ    ทีเปนฺโต    น    ฉนฺทาคตึ    คจฺฉติ
อภาสิตํ   อลปิตํ   ตถาคเตน   อภาสิตํ  อลปิตํ  ตถาคเตนาติ  ทีเปนฺโต
น    ฉนฺทาคตึ    คจฺฉติ   ภาสิตํ   ลปิตํ   ตถาคเตน   ภาสิตํ   ลปิตํ
ตถาคเตนาติ     ทีเปนฺโต     น     ฉนฺทาคตึ    คจฺฉติ    อนาจิณฺณํ
ตถาคเตน   อนาจิณฺณํ   ตถาคเตนาติ   ทีเปนฺโต   น  ฉนฺทาคตึ  คจฺฉติ
อาจิณฺณํ   ตถาคเตน   อาจิณฺณํ   ตถาคเตนาติ   ทีเปนฺโต  น  ฉนฺทาคตึ
คจฺฉติ      อปฺปญฺญตฺตํ     ตถาคเตน     อปฺปญฺญตฺตํ     ตถาคเตนาติ
ทีเปนฺโต    น    ฉนฺทาคตึ    คจฺฉติ   ปญฺญตฺตํ   ตถาคเตน   ปญฺญตฺตํ
ตถาคเตนาติ   ทีเปนฺโต   น   ฉนฺทาคตึ   คจฺฉติ  อนาปตฺตึ  อนาปตฺตีติ
ทีเปนฺโต    น    ฉนฺทาคตึ    คจฺฉติ   อาปตฺตึ   อาปตฺตีติ   ทีเปนฺโต
น     ฉนฺทาคตึ     คจฺฉติ    ลหุกํ    อาปตฺตึ    ลหุกา    อาปตฺตีติ
ทีเปนฺโต   น   ฉนฺทาคตึ   คจฺฉติ   ครุกํ   อาปตฺตึ   ครุกา  อาปตฺตีติ
ทีเปนฺโต    น    ฉนฺทาคตึ   คจฺฉติ   สาวเสสํ   อาปตฺตึ   สาวเสสา
อาปตฺตีติ      ทีเปนฺโต     น     ฉนฺทาคตึ     คจฺฉติ     อนวเสสํ
อาปตฺตึ    อนวเสสา    อาปตฺตีติ   ทีเปนฺโต   น   ฉนฺทาคตึ   คจฺฉติ
ทุฏฺฐุลฺลํ    อาปตฺตึ    ทุฏฺฐุลฺลา   อาปตฺตีติ   ทีเปนฺโต   น   ฉนฺทาคตึ
คจฺฉติ     อทุฏฺฐุลฺลํ    อาปตฺตึ    อทุฏฺฐุลฺลา    อาปตฺตีติ    ทีเปนฺโต
น ฉนฺทาคตึ คจฺฉติ เอวํ น ฉนฺทาคตึ คจฺฉติ ฯ
     [๑๑๐๔]   กถํ   น   โทสาคตึ   คจฺฉติ   ฯ   อธมฺมํ  อธมฺโมติ
ทีเปนฺโต    น    โทสาคตึ   คจฺฉติ   ธมฺมํ   ธมฺโมติ   ทีเปนฺโต   น
โทสาคตึ    คจฺฉติ   ฯเปฯ   ทุฏฺฐุลฺลํ   อาปตฺตึ   ทุฏฺฐุลฺลา   อาปตฺตีติ
ทีเปนฺโต    น    โทสาคตึ   คจฺฉติ   อทุฏฺฐุลฺลํ   อาปตฺตึ   อทุฏฺฐุลฺลา
อาปตฺตีติ    ทีเปนฺโต   น   โทสาคตึ   คจฺฉติ   เอวํ   น   โทสาคตึ
คจฺฉติ ฯ
     [๑๑๐๕]   กถํ   น   โมหาคตึ   คจฺฉติ   ฯ   อธมฺมํ  อธมฺโมติ
ทีเปนฺโต    น    โมหาคตึ   คจฺฉติ   ธมฺมํ   ธมฺโมติ   ทีเปนฺโต   น
โมหาคตึ    คจฺฉติ   ฯเปฯ   ทุฏฺฐุลฺลํ   อาปตฺตึ   ทุฏฺฐุลฺลา   อาปตฺตีติ
ทีเปนฺโต    น    โมหาคตึ   คจฺฉติ   อทุฏฺฐุลฺลํ   อาปตฺตึ   อทุฏฺฐุลฺลา
อาปตฺตีติ    ทีเปนฺโต   น   โมหาคตึ   คจฺฉติ   เอวํ   น   โมหาคตึ
คจฺฉติ ฯ
     [๑๑๐๖]   กถํ   น   ภยาคตึ   คจฺฉติ   ฯ   อธมฺมํ   อธมฺโมติ
ทีเปนฺโต    น    ภยาคตึ    คจฺฉติ   ธมฺมํ   ธมฺโมติ   ทีเปนฺโต   น
ภยาคตึ    คจฺฉติ    ฯเปฯ   ทุฏฺฐุลฺลํ   อาปตฺตึ   ทุฏฺฐุลฺลา   อาปตฺตีติ
ทีเปนฺโต    น    ภยาคตึ    คจฺฉติ   อทุฏฺฐุลฺลํ   อาปตฺตึ   อทุฏฺฐุลฺลา
อาปตฺตีติ ทีเปนฺโต น ภยาคตึ คจฺฉติ เอวํ น ภยาคตึ คจฺฉติ ฯ
     [๑๑๐๗]   ฉนฺทา โทสา ภยา โมหา   โย ธมฺมํ นาติวตฺตติ
         อาปูรติ ตสฺส ยโส                   สุกฺกปกฺเขว จนฺทิมาติ ฯ
     [๑๑๐๘]   กถํ   สญฺญาปนีเย   ฐาเน   สญฺญาเปติ   ฯ   อธมฺมํ
อธมฺโมติ   ทีเปนฺโต   สญฺญาปนีเย   ฐาเน   สญฺญาเปติ  ธมฺมํ  ธมฺโมติ
ทีเปนฺโต   สญฺญาปนีเย   ฐาเน   สญฺญาเปติ   ฯเปฯ  ทุฏฺฐุลฺลํ  อาปตฺตึ
ทุฏฺฐุลฺลา    อาปตฺตีติ    ทีเปนฺโต    สญฺญาปนีเย   ฐาเน   สญฺญาเปติ
อทุฏฺฐุลฺลํ    อาปตฺตึ    อทุฏฺฐุลฺลา   อาปตฺตีติ   ทีเปนฺโต   สญฺญาปนีเย
ฐาเน สญฺญาเปติ เอวํ สญฺญาปนีเย ฐาเน สญฺญาเปติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๔๑๒-๔๑๘.
https://84000.org/tipitaka/read/pali_item.php?book=8&item=1098&items=11
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=8&item=1098&items=11&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=8&item=1098&items=11
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=8&item=1098&items=11
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=8&i=1098
             สารบัญพระไตรปิฎกเล่มที่ ๘
https://84000.org/tipitaka/read/?index_8
https://84000.org/tipitaka/english/?index_8