พระไตรปิฎกเล่มที่ ๓ ภาษาบาลี อักษรไทย
พระวินัยปิฎกเล่มที่ ๓ วินย. ภิกฺขุนีวิภงฺโค

     [๙๒]   อุทฺทิฏฺฐา   โข  อยฺยาโย  สตฺตรส  สงฺฆาทิเสสา  ธมฺมา
นว    ปฐมาปตฺติกา    อฏฺฐ    ยาวตติยกา   เยสํ   ภิกฺขุนี   อญฺญตรํ
วา   อญฺญตรํ  วา  อาปชฺชติ  ตาย  ภิกฺขุนิยา  อุภโตสงฺเฆ  ปกฺขมานตฺตํ
จริตพฺพํ     จิณฺณมานตฺตาย     ภิกฺขุนิยา    ยตฺถ    สิยา    วีสติคโณ
ภิกฺขุนีสงฺโฆ   ตตฺถ  สา  ภิกฺขุนี  อพฺเภตพฺพา  เอกายปิ  เจ  อูโน  ๒-
วีสติคโณ    ภิกฺขุนีสงฺโฆ    ตํ   ภิกฺขุนึ   อพฺเภยฺย   สา   จ   ภิกฺขุนี
อนพฺภิตา   ตา   จ   ภิกฺขุนิโย   คารยฺหา   ฯ  อยํ  ตตฺถ  สามีจิ  ฯ
ตตฺถยฺยาโย    ปุจฺฉามิ    กจฺจิตฺถ   ปริสุทฺธา   ฯ   ทุติยมฺปิ   ปุจฺฉามิ
กจฺจิตฺถ   ปริสุทฺธา   ฯ   ตติยมฺปิ   ปุจฺฉามิ   กจฺจิตฺถ   ปริสุทฺธา   ฯ
ปริสุทฺเธตฺถยฺยาโย ตสฺมา ตุณฺหี ฯ เอวเมตํ ธารยามีติ ฯ
                              สตฺตรสกณฺฑํ นิฏฺฐิตํ ฯ
                                    ---------
@เชิงอรรถ: ๑ ยุ. จิณฺณมานตฺตา ภิกฺขุนี ฯ ตํ สุโสธิตํ จิณฺณมานตฺโต ภิกฺขูติ ปาลิยา
@๒ ยุ. อูนวีสติคโณ ฯ
                                นิสฺสคฺคิยกณฺฑํ
     อิเม  โข  ปนยฺยาโย  ตึส  นิสฺสคฺคิยา  ปาจิตฺติยา  ธมฺมา อุทฺเทสํ
อาคจฺฉนฺติ ฯ
                          ปตฺตวคฺคสฺส ปฐมสิกฺขาปทํ
     [๙๓]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน   โข   ปน  สมเยน  ฉพฺพคฺคิยา
ภิกฺขุนิโย   พหุปตฺเต   ๑-   สนฺนิจยํ  กโรนฺติ  ฯ  มนุสฺสา  วิหารจาริกํ
อาหิณฺฑนฺตา    ปสฺสิตฺวา    อุชฺฌายนฺติ   ขียนฺติ   วิปาเจนฺติ   กถํ   หิ
นาม   ภิกฺขุนิโย   พหุปตฺเต   สนฺนิจยํ   กริสฺสนฺติ  ปตฺตวณิชฺชํ  ๒-  วา
ภิกฺขุนิโย   กริสฺสนฺติ   อามตฺติกาปณํ   วา   ปสาเรสฺสนฺตีติ  ฯ  อสฺโสสุํ
โข ภิกฺขุนิโย เตสํ มนุสฺสานํ อุชฺฌายนฺตานํ ขียนฺตานํ วิปาเจนฺตานํ ฯ
     {๙๓.๑}   ยา  ตา  ภิกฺขุนิโย อปฺปิจฺฉา ฯเปฯ ตา อุชฺฌายนฺติ ขียนฺติ
วิปาเจนฺติ    กถํ    หิ    นาม   ฉพฺพคฺคิยา   ภิกฺขุนิโย   ปตฺตสนฺนิจยํ
กริสฺสนฺตีติ  ฯเปฯ  สจฺจํ  กิร  ภิกฺขเว  ฉพฺพคฺคิยา  ภิกฺขุนิโย ปตฺตสนฺนิจยํ
กโรนฺตีติ   ฯ   สจฺจํ   ภควาติ   ฯ   วิครหิ   พุทฺโธ  ภควา  กถํ  หิ
นาม   ภิกฺขเว   ฉพฺพคฺคิยา   ภิกฺขุนิโย   ปตฺตสนฺนิจยํ   กริสฺสนฺติ  เนตํ
ภิกฺขเว   อปฺปสนฺนานํ   วา   ปสาทาย   ฯเปฯ  เอวญฺจ  ปน  ภิกฺขเว
ภิกฺขุนิโย อิมํ สิกฺขาปทํ อุทฺทิสนฺตุ
     {๙๓.๒}   ยา       ปน       ภิกฺขุนี       ปตฺตสนฺนิจยํ
@เชิงอรรถ: ๑ ม. พหูปตฺเต  ๒ ม. ปตฺตวาณิชฺชํ ฯ
กเรยฺย นิสฺสคฺคิยํ ปาจิตฺติยนฺติ ฯ
     [๙๔]   ยา   ปนาติ  ยา  ยาทิสา  ฯเปฯ  ภิกฺขุนีติ  ฯเปฯ  อยํ
อิมสฺมึ   อตฺเถ   อธิปฺเปตา   ภิกฺขุนีติ   ฯ  ปตฺโต  นาม  เทฺว  ปตฺตา
อโยปตฺโต    มตฺติกาปตฺโต    ฯ   ตโย   ปตฺตสฺส   วณฺณา   อุกฺกฏฺโฐ
ปตฺโต   มชฺฌิโม   ปตฺโต   โอมโก  ปตฺโต  ฯ  อุกฺกฏฺโฐ  นาม  ปตฺโต
อฑฺฒาฬฺหโกทนํ   คณฺหาติ   จตุภาคํ   ขาทนียํ   ๑-  ตทูปิยํ  พฺยญฺชนํ  ฯ
มชฺฌิโม    นาม    ปตฺโต    นาฬิโกทนํ   คณฺหาติ   จตุภาคํ   ขาทนียํ
ตทูปิยํ    พฺยญฺชนํ   ฯ   โอมโก   นาม   ปตฺโต   ปตฺโถทนํ   คณฺหาติ
จตุภาคํ   ขาทนียํ   ตทูปิยํ   พฺยญฺชนํ   ฯ   ตโต   อุกฺกฏฺโฐ   อปตฺโต
โอมโก   อปตฺโต   ฯ   สนฺนิจยํ  กเรยฺยาติ  อนธิฏฺฐิโต  อวิกปฺปิโต  ฯ
นิสฺสคฺคิโย  โหติ  ๒-  สห  อรุณุคฺคมนา  นิสฺสคฺคิโย  โหติ  นิสฺสชฺชิตพฺโพ
สงฺฆสฺส  วา  คณสฺส  วา  เอกภิกฺขุนิยา  วา  ฯ  เอวญฺจ  ปน  ภิกฺขเว
นิสฺสชฺชิตพฺโพ ฯ
     [๙๕]   ตาย  ภิกฺขุนิยา  สงฺฆํ  อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ   ภิกฺขุนีนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ   ปคฺคเหตฺวา   เอวมสฺส   วจนีโย   อยํ   เม   อยฺเย  ปตฺโต
รตฺตาติกฺกนฺโต    นิสฺสคฺคิโย    อิมาหํ    สงฺฆสฺส    นิสฺสชฺชามีติ    ฯ
@เชิงอรรถ: ๑ ม. ยุ. ขาทนํ ฯ ๒ อิโต ปรํ สพฺพตฺถ อิติสทฺโท ทิสฺสติ โส อติเรโกติ เวทิตพฺโพ
@อีทิสานํ ปาฐานํ มาติกายํ อนาคตตฺตา ฯ
นิสฺสชฺชิตฺวา   อาปตฺติ   เทเสตพฺพา   ฯ  พฺยตฺตาย  ภิกฺขุนิยา  ปฏิพลาย
อาปตฺติ ปฏิคฺคเหตพฺพา ฯ นิสฺสฏฺฐปตฺโต ทาตพฺโพ
     {๙๕.๑}   สุณาตุ  เม  อยฺเย  สงฺโฆ  อยํ  ปตฺโต  อิตฺถนฺนามาย
ภิกฺขุนิยา   นิสฺสคฺคิโย   สงฺฆสฺส   นิสฺสฏฺโฐ  ฯ  ยทิ  สงฺฆสฺส  ปตฺตกลฺลํ
สงฺโฆ อิมํ ปตฺตํ อิตฺถนฺนามาย ภิกฺขุนิยา ทเทยฺยาติ ฯ
     [๙๖]   ตาย   ภิกฺขุนิยา   สมฺพหุลา   ภิกฺขุนิโย   อุปสงฺกมิตฺวา
เอกํสํ   อุตฺตราสงฺคํ   กริตฺวา   วุฑฺฒานํ   ภิกฺขุนีนํ   ปาเท   วนฺทิตฺวา
อุกฺกุฏิกํ    นิสีทิตฺวา   อญฺชลึ   ปคฺคเหตฺวา   เอวมสฺสุ   วจนียา   อยํ
เม   อยฺยาโย   ปตฺโต   รตฺตาติกฺกนฺโต   นิสฺสคฺคิโย   อิมาหํ  อยฺยานํ
นิสฺสชฺชามีติ   ฯ   นิสฺสชฺชิตฺวา   อาปตฺติ   เทเสตพฺพา   ฯ   พฺยตฺตาย
ภิกฺขุนิยา    ปฏิพลาย    อาปตฺติ    ปฏิคฺคเหตพฺพา   ฯ   นิสฺสฏฺฐปตฺโต
ทาตพฺโพ
     {๙๖.๑}   สุณนฺตุ  เม  อยฺยาโย  อยํ ปตฺโต อิตฺถนฺนามาย ภิกฺขุนิยา
นิสฺสคฺคิโย   อยฺยานํ   นิสฺสฏฺโฐ   ฯ  ยทิ  อยฺยานํ  ปตฺตกลฺลํ  อยฺยาโย
อิมํ ปตฺตํ อิตฺถนฺนามาย ภิกฺขุนิยา ทเทยฺยุนฺติ ฯ
     [๙๗]   ตาย  ภิกฺขุนิยา เอกํ ภิกฺขุนึ อุปสงฺกมิตฺวา เอกํสํ อุตฺตราสงฺคํ
กริตฺวา   อุกฺกุฏิกํ   นิสีทิตฺวา   อญฺชลึ   ปคฺคเหตฺวา  เอวมสฺส  วจนียา
อยํ   เม   อยฺเย   ปตฺโต  รตฺตาติกฺกนฺโต  นิสฺสคฺคิโย  อิมาหํ  อยฺยาย
นิสฺสชฺชามีติ   ฯ  นิสฺสชฺชิตฺวา  อาปตฺติ  เทเสตพฺพา  ฯ  ตาย  ภิกฺขุนิยา
อาปตฺติ    ปฏิคฺคเหตพฺพา   ฯ   นิสฺสฏฺฐปตฺโต   ทาตพฺโพ   อิมํ   ปตฺตํ
อยฺยาย ทมฺมีติ ฯ
     [๙๘]   รตฺตาติกฺกนฺเต   อติกฺกนฺตสญฺญา   นิสฺสคฺคิยํ  ปาจิตฺติยํ  ฯ
รตฺตาติกฺกนฺเต    เวมติกา   นิสฺสคฺคิยํ   ปาจิตฺติยํ   ฯ   รตฺตาติกฺกนฺเต
อนติกฺกนฺตสญฺญา   นิสฺสคฺคิยํ   ปาจิตฺติยํ   ฯ   อนธิฏฺฐิเต   อธิฏฺฐิตสญฺญา
นิสฺสคฺคิยํ       ปาจิตฺติยํ       ฯ      อวิกปฺปิเต      วิกปฺปิตสญฺญา
นิสฺสคฺคิยํ    ปาจิตฺติยํ    ฯ    อวิสฺสชฺชิเต   วิสฺสชฺชิตสญฺญา   นิสฺสคฺคิยํ
ปาจิตฺติยํ   ฯ   อนฏฺเฐ  นฏฺฐสญฺญา  ...  อวินฏฺเฐ  วินฏฺฐสญฺญา  ...
อภินฺเน    ภินฺนสญฺญา    ...    อวิลุตฺเต    วิลุตฺตสญฺญา    นิสฺสคฺคิยํ
ปาจิตฺติยํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓ หน้าที่ ๖๓-๖๗.
https://84000.org/tipitaka/read/pali_item.php?book=3&item=92&items=7
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=3&item=92&items=7&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=3&item=92&items=7
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=3&item=92&items=7
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=3&i=92
             สารบัญพระไตรปิฎกเล่มที่ ๓
https://84000.org/tipitaka/read/?index_3
https://84000.org/tipitaka/english/?index_3