พระไตรปิฎกเล่มที่ ๒๕ ภาษาบาลี อักษรไทย
พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

     [๑๓๘]   ภูตปุพฺพํ  ภิกฺขเว  อิมิสฺสา  เยว  สาวตฺถิยา ๑- อญฺญตโร
ราชา   อโหสิ   ฯ   อถ   โข   ภิกฺขเว  โส  ราชา  อญฺญตรํ  ปุริสํ
อามนฺเตสิ   เอหิ   ตฺวํ   อมฺโภ  ปุริส  ยาวติกา  สาวตฺถิยา  ชจฺจนฺธา
เต  สพฺเพ  เอกชฺฌํ  สนฺนิปาเตหีติ  ฯ  เอวํ  เทวาติ  โข  ภิกฺขเว โส
ปุริโส   ตสฺส   รญฺโญ   ปฏิสฺสุตฺวา   ยาวติกา   สาวตฺถิยา   ชจฺจนฺธา
@เชิงอรรถ: ๑ ยุ. สาวตฺถิยํ ฯ
เต   สพฺเพ   คเหตฺวา   เยน  โส  ราชา  เตนุปสงฺกมิ  อุปสงฺกมิตฺวา
ตํ  ราชานํ  เอตทโวจ  สนฺนิปาติตา  โข  เต  เทว ยาวติกา สาวตฺถิยา
ชจฺจนฺธาติ   ฯ   เตน  หิ  ภเณ  ชจฺจนฺธานํ  หตฺถึ  ทสฺเสหีติ  ฯ  เอวํ
เทวาติ  โข  ภิกฺขเว  โส  ปุริโส  ตสฺส  รญฺโญ  ปฏิสฺสุตฺวา  ชจฺจนฺธานํ
หตฺถึ   ทสฺเสสิ   เอกจฺจานํ  ชจฺจนฺธานํ  หตฺถิสฺส  สีสํ  ทสฺเสสิ  เอทิโส
ชจฺจนฺธา   หตฺถีติ   ฯ   เอกจฺจานํ   [๑]-   หตฺถิสฺส   กณฺณํ  ทสฺเสสิ
เอทิโส ชจฺจนฺธา หตฺถีติ ฯ
     {๑๓๘.๑}   เอกจฺจานํ  ชจฺจนฺธานํ  หตฺถิสฺส  ทนฺตํ ทสฺเสสิ เอทิโส
ชจฺจนฺธา   หตฺถีติ   ฯ  เอกจฺจานํ  ชจฺจนฺธานํ  หตฺถิสฺส  โสณฺฑํ  ทสฺเสสิ
เอทิโส  ชจฺจนฺธา  หตฺถีติ  ฯ  เอกจฺจานํ ชจฺจนฺธานํ หตฺถิสฺส กายํ ทสฺเสสิ
เอทิโส  ชจฺจนฺธา  หตฺถีติ  ฯ  เอกจฺจานํ  หตฺถิสฺส  ปาทํ ทสฺเสสิ เอทิโส
ชจฺจนฺธา  หตฺถีติ  ฯ  เอกจฺจานํ  ชจฺจนฺธานํ  หตฺถิสฺส  ปิฏฺฐึ  ๒- ทสฺเสสิ
เอทิโส   ชจฺจนฺธา  หตฺถีติ  ฯ  เอกจฺจานํ  ชจฺจนฺธานํ  หตฺถิสฺส  นงฺคุฏฺฐํ
ทสฺเสสิ   เอทิโส  ชจฺจนฺธา  หตฺถีติ  ฯ  เอกจฺจานํ  ชจฺจนฺธานํ  หตฺถิสฺส
วาลธึ ทสฺเสสิ เอทิโส ชจฺจนฺธา หตฺถีติ ฯ
     {๑๓๘.๒}   อถ  โข ภิกฺขเว โส ปุริโส ชจฺจนฺธานํ หตฺถึ ทสฺเสตฺวา
เยน  โส  ราชา  เตนุปสงฺกมิ  อุปสงฺกมิตฺวา ตํ ราชานํ เอตทโวจ ทิฏฺโฐ
โข   เตหิ  เทว  ชจฺจนฺเธหิ  หตฺถี  ยสฺสทานิ  กาลํ  มญฺญถาติ  ๓-  ฯ
อถ   โข   ภิกฺขเว   โส   ราชา   เยน  เต  ชจฺจนฺธา  เตนุปสงฺกมิ
อุปสงฺกมิตฺวา    เต   ชจฺจนฺเธ   เอตทโวจ   ทิฏฺโฐ   โว   ชจฺจนฺธา
@เชิงอรรถ: ๑ โป. ม. ยุ. เอกจฺจานํ ชจฺจนฺธานํ ฯ  ๒ ม. สตฺถึ ฯ  ๓ ม. ยุ. มญฺญสีติ ฯ
หตฺถีติ   ฯ   เอวํ   เทวาติ  ฯ  ทิฏฺโฐ  โน  หตฺถีติ  วเทถ  ชจฺจนฺธา
กีทิโส   หตฺถีติ   ฯ   เยหิ   ภิกฺขเว   ชจฺจนฺเธหิ  หตฺถิสฺส  สีสํ  ทิฏฺฐํ
อโหสิ   เต   เอวมาหํสุ  เอทิโส  เทว  หตฺถี  เสยฺยถาปิ  กุมฺโภติ  ฯ
เยหิ   ภิกฺขเว   ชจฺจนฺเธหิ   หตฺถิสฺส   กณฺโณ   ทิฏฺโฐ   อโหสิ   เต
เอวมาหํสุ  เอทิโส  เทว  หตฺถี  เสยฺยถาปิ  สุปฺโปติ  ฯ  เยหิ  ภิกฺขเว
ชจฺจนฺเธหิ   หตฺถิสฺส   ทนฺโต   ทิฏฺโฐ  อโหสิ  เต  เอวมาหํสุ  เอทิโส
เทว หตฺถี เสยฺยถาปิ ผาโลติ ๑- ฯ
     {๑๓๘.๓}   เยหิ  ภิกฺขเว  ชจฺจนฺเธหิ  หตฺถิสฺส  โสณฺโฑ  ทิฏฺโฐ
อโหสิ  เต  เอวมาหํสุ  เอทิโส  เทว  หตฺถี  เสยฺยถาปิ  นงฺคลีสาติ  ฯ
เยหิ  ภิกฺขเว  ชจฺจนฺเธหิ  หตฺถิสฺส  กาโย  ทิฏฺโฐ  อโหสิ เต เอวมาหํสุ
เอทิโส  เทว  หตฺถี  เสยฺยถาปิ  โกฏฺโฐติ  ฯ  เยหิ  ภิกฺขเว ชจฺจนฺเธหิ
หตฺถิสฺส   ปาโท   ทิฏฺโฐ  อโหสิ  เต  เอวมาหํสุ  เอทิโส  เทว  หตฺถี
เสยฺยถาปิ ถูโณติ ฯ
     {๑๓๘.๔}   เยหิ ภิกฺขเว ชจฺจนฺเธหิ หตฺถิสฺส ปิฏฺฐิ ทิฏฺฐา อโหสิ เต
เอวมาหํสุ  เอทิโส  เทว  หตฺถี  เสยฺยถาปิ  อุทุกฺขโลติ  ฯ เยหิ ภิกฺขเว
ชจฺจนฺเธหิ   หตฺถิสฺส   นงฺคุฏฺฐํ   ทิฏฺฐํ  อโหสิ  เต  เอวมาหํสุ  เอทิโส
เทว  หตฺถี  เสยฺยถาปิ  มุสโลติ  ฯ  เยหิ  ภิกฺขเว  ชจฺจนฺเธหิ  หตฺถิสฺส
วาลธิ  ทิฏฺโฐ  อโหสิ  เต  เอวมาหํสุ  เอทิโส  เทว  หตฺถี  เสยฺยถาปิ
สมฺมชฺชนีติ   ฯ   เต   เอทิโส   หตฺถี   เนทิโส  หตฺถี  เนทิโส  หตฺถี
เอทิโส   หตฺถีติ   อญฺญมญฺญํ   มุฏฺฐีหิ   สํยุชฺชึสุ  ๒-  ฯ  เตน  จ  ปน
ภิกฺขเว   โส   ราชา   อตฺตมโน   อโหสิ  ฯ  เอวเมว  โข  ภิกฺขเว
@เชิงอรรถ: ๑ โป. สลฺโล ฯ ม. ขีโล ฯ  ๒ โป. ม. สํสุมฺภึสุ ฯ
อญฺญติตฺถิยา   ปริพฺพาชกา   อนฺธา  อจกฺขุกา  [๑]-  อตฺถํ  น  ชานนฺติ
อนตฺถํ   น  ชานนฺติ  ธมฺมํ  น  ชานนฺติ  อธมฺมํ  น  ชานนฺติ  เต  อตฺถํ
อชานนฺตา   อนตฺถํ   อชานนฺตา   ธมฺมํ   อชานนฺตา  อธมฺมํ  อชานนฺตา
ภณฺฑนชาตา     กลหชาตา     วิวาทาปนฺนา     อญฺญมญฺญํ    มุชสตฺตีหิ
วิตุทนฺตา    วิหรนฺติ    เอทิโส    ธมฺโม   เนทิโส   ธมฺโม   เนทิโส
ธมฺโม   เอทิโส   ธมฺโมติ   ฯ   อถ   โข  ภควา  เอตมตฺถํ  วิทิตฺวา
ตายํ เวลายํ อิมํ อุทานํ อุทาเนสิ
          อิเมสุ กิร สชฺชนฺติ         เอเก สมณพฺราหฺมณา
          วิคฺคยฺห นํ วิวทนฺติ        ชนา เอกงฺคทสฺสิโนติ ฯ จตุตฺถํ ฯ
     [๑๓๙]   ๕   เอวมฺเม   สุตํ  ฯ  เอกํ  สมยํ  ภควา  สาวตฺถิยํ
วิหรติ  เชตวเน  อนาถปิณฺฑิกสฺส  อาราเม  ฯ  เตน  โข  ปน  สมเยน
สมฺพหุลา    นานาติตฺถิยา    สมณพฺราหฺมณา    ปริพฺพาชกา    สาวตฺถิยํ
ปฏิวสนฺติ        นานาทิฏฺฐิกา        นานาขนฺติกา       นานารุจิกา
นานาทิฏฺฐินิสฺสยนิสฺสิตา    ฯ    สนฺเตเก   สมณพฺราหฺมณา   เอวํวาทิโน
เอวํทิฏฺฐิโน  ๑  สสฺสโต  อตฺตา  จ โลโก จ อิทเมว สจฺจํ โมฆมญฺญนฺติ ฯ
สนฺติ   ปเนเก   สมณพฺราหฺมณา  เอวํวาทิโน  เอวํทิฏฺฐิโน  ๒  อสสฺสโต
อตฺตา จ โลโก จ อิทเมว สจฺจํ โมฆมญฺญนฺติ ฯ
     {๑๓๙.๑}   สนฺเตเก สมณพฺราหฺมณา เอวํวาทิโน เอวํทิฏฺฐิโน ๓ สสฺสโต
จ  อสสฺสโต  จ  อตฺตา  จ  โลโก  จ อิทเมว สจฺจํ โมฆมญฺญนฺติ ฯ สนฺติ
@เชิงอรรถ: ๑ ม. เต ฯ
ปเนเก   สมณพฺราหฺมณา   เอวํวาทิโน   เอวํทิฏฺฐิโน  ๔  เนว  สสฺสโต
นาสสฺสโต อตฺตา จ โลโก จ อิทเมว สจฺจํ โมฆมญฺญนฺติ ฯ
     {๑๓๙.๒}   สนฺเตเก   สมณพฺราหฺมณา  เอวํวาทิโน  เอวํทิฏฺฐิโน
๕  สยงฺกโต  อตฺตา จ โลโก จ อิทเมว สจฺจํ โมฆมญฺญนฺติ ฯ สนฺติ ปเนเก
สมณพฺราหฺมณา  เอวํวาทิโน  เอวํทิฏฺฐิโน  ๖  ปรงฺกโต  อตฺตา  จ โลโก
จ อิทเมว สจฺจํ โมฆมญฺญนฺติ ฯ
     {๑๓๙.๓}   สนฺเตเก  สมณพฺราหฺมณา  เอวํวาทิโน  เอวํทิฏฺฐิโน ๗
สยงฺกโต  จ  ปรงฺกโต  จ อตฺตา จ โลโก จ อิทเมว สจฺจํ โมฆมญฺญนฺติ ฯ
สนฺติ  ปเนเก  สมณพฺราหฺมณา  เอวํวาทิโน  เอวํทิฏฺฐิโน  ๘  อสยงฺกาโร
จ  อปรงฺกาโร  จ  อธิจฺจสมุปฺปนฺโน  อตฺตา  จ  โลโก  จ อิทเมว สจฺจํ
โมฆมญฺญนฺติ ฯ
     {๑๓๙.๔}   สนฺเตเก   สมณพฺราหฺมณา  เอวํวาทิโน  เอวํทิฏฺฐิโน
๙  สสฺสตํ  สุขทุกฺขํ  อตฺตา  จ  โลโก  จ  อิทเมว  สจฺจํ โมฆมญฺญนฺติ ฯ
สนฺติ      ปเนเก     สมณพฺราหฺมณา     เอวํวาทิโน     เอวํทิฏฺฐิโน
๑๐    อสสฺสตํ   สุขทุกฺขํ   อตฺตา   จ   โลโก   จ   อิทเมว   สจฺจํ
โมฆมญฺญนฺติ ฯ
     {๑๓๙.๕}   สนฺเตเก   สมณพฺราหฺมณา  เอวํวาทิโน  เอวํทิฏฺฐิโน
๑๑   สสฺสตญฺจ   อสสฺสตญฺจ   สุขทุกฺขํ   อตฺตา  จ  โลโก  จ  อิทเมว
สจฺจํ   โมฆมญฺญนฺติ   ฯ   สนฺติ   ปเนเก   สมณพฺราหฺมณา  เอวํวาทิโน
เอวํทิฏฺฐิโน  ๑๒  เนว  สสฺสตํ  นาสสฺสตํ  สุขทุกฺขํ  อตฺตา  จ  โลโก จ
อิทเมว สจฺจํ โมฆมญฺญนฺติ ฯ
     {๑๓๙.๖}   สนฺเตเก      สมณพฺราหฺมณา      เอวํวาทิโน
เอวํทิฏฺฐิโน        ๑๓        สยงฺกตํ        สุขทุกฺขํ       อตฺตา
จ   โลโก   จ   อิทเมว   สจฺจํ   โมฆมญฺญนฺติ   ฯ   สนฺติ   ปเนเก
สมณพฺราหฺมณา      เอวํวาทิโน      เอวํทิฏฺฐิโน     ๑๔     ปรงฺกตํ
สุขทุกฺขํ   อตฺตา   จ   โลโก   จ   อิทเมว   สจฺจํ   โมฆมญฺญนฺติ  ฯ
สนฺเตเก        สมณพฺราหฺมณา        เอวํวาทิโน       เอวํทิฏฺฐิโน
๑๕   สยงฺกตญฺจ   ปรงฺกตญฺจ   สุขทุกฺขํ  อตฺตา  จ  โลโก  จ  อิทเมว
สจฺจํ     โมฆมญฺญนฺติ     ฯ     สนฺติ     ปเนเก     สมณพฺราหฺมณา
เอวํวาทิโน    เอวํทิฏฺฐิโน    ๑๖    อสยงฺการํ   จ   อปรงฺการํ   จ
อธิจฺจสมุปฺปนฺนํ    สุขทุกฺขํ   อตฺตา   จ   โลโก   จ   อิทเมว   สจฺจํ
โมฆมญฺญนฺติ ฯ
     {๑๓๙.๗}   เต    ภณฺฑนชาตา    กลหชาตา    วิวาทาปนฺนา
อญฺญมญฺญํ     มุขสตฺตีหิ     วิตุทนฺตา     วิหรนฺติ    เอทิโส    ธมฺโม
เนทิโส ธมฺโม เนทิโส ธมฺโม เอทิโส ธมฺโมติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๕ หน้าที่ ๑๘๒-๑๘๗.
https://84000.org/tipitaka/read/pali_item.php?book=25&item=138&items=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=25&item=138&items=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=25&item=138&items=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=25&item=138&items=2
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=25&i=138
             สารบัญพระไตรปิฎกเล่มที่ ๒๕
https://84000.org/tipitaka/read/?index_25
https://84000.org/tipitaka/english/?index_25