ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับภาษาไทย   บาลีอักษรไทย   บาลีอักษรโรมัน 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๗ ภาษาบาลี อักษรไทย พระสุตตันตปิฎกเล่มที่ ๙ สุตฺต. สํ. ขนฺธวารวคฺโค
         ขนฺธสํยุตฺตสฺส มูลปณฺณาสเก นตุมฺหากวคฺโค จตุตฺโถ
     [๗๑]   สาวตฺถิยํ  ฯ  ตตฺร  โข  ฯ  ยํ  ภิกฺขเว  น  ตุมฺหากํ  ตํ
ปชหถ   ตํ   โว   ปหีนํ   หิตาย   สุขาย  ภวิสฺสติ  ฯ  กิญฺจ  ภิกฺขเว
น   ตุมฺหากํ   ฯ  รูปํ  ภิกฺขเว  น  ตุมฺหากํ  ตํ  ปชหถ  ตํ  โว  ปหีนํ
หิตาย   สุขาย   ภวิสฺสติ   ฯ   เวทนา   น  ตุมฺหากํ  ตํ  ปชหถ  สา
โว   ปหีนา   หิตาย   สุขาย   ภวิสฺสติ   ฯ   สญฺญา  น  ตุมฺหากํ  ฯ
สงฺขารา   น   ตุมฺหากํ   เต  ปชหถ  เต  โว  ปหีนา  หิตาย  สุขาย
ภวิสฺสนฺติ   ฯ   วิญฺญาณํ   น   ตุมฺหากํ   ตํ   ปชหถ   ตํ   โว  ปหีนํ
หิตาย สุขาย ภวิสฺสติ ฯ
     [๗๒]   เสยฺยถาปิ  ภิกฺขเว  ยํ  อิมสฺมึ  เชตวเน ติณกฏฺฐสาขาปลาสํ
ตํ   ชโน   หเรยฺย   วา  ฑเหยฺย  วา  ยถาปจฺจยํ  วา  กเรยฺย  อปิ
นุ   ตุมฺหากํ  เอวมสฺส  อเมฺห  ชโน  หรติ  วา  ฑหติ  วา  ยถาปจฺจยํ
วา  กโรตีติ  ฯ  โน  เหตํ  ภนฺเต  ฯ  ตํ  กิสฺส เหตุ ฯ น หิ โน เอตํ
ภนฺเต  อตฺตา  วา  อตฺตนิยํ  วาติ  ฯ  เอวเมว  โข  ภิกฺขเว  รูปํ  น
ตุมฺหากํ  ตํ  ปชหถ  ตํ  โว  ปหีนํ  หิตาย  สุขาย  ภวิสฺสติ  ฯ  เวทนา
น   ตุมฺหากํ   ตํ  ปชหถ  สา  โว  ปหีนา  หิตาย  สุขาย  ภวิสฺสติ  ฯ
สญฺญา   น   ตุมฺหากํ   ฯ   สงฺขารา   น   ตุมฺหากํ   ฯ  วิญฺญาณํ  น
ตุมฺหากํ ตํ ปชหถ ตํ โว ปหีนํ หิตาย สุขาย ภวิสฺสตีติ ฯ
     [๗๓]   สาวตฺถิยํ  ฯ  ตตฺร  โข  ฯ  ยํ  ภิกฺขเว  น  ตุมฺหากํ  ตํ
ปชหถ   ตํ   โว   ปหีนํ   หิตาย   สุขาย  ภวิสฺสติ  ฯ  กิญฺจ  ภิกฺขเว
น   ตุมฺหากํ   ฯ  รูปํ  ภิกฺขเว  น  ตุมฺหากํ  ตํ  ปชหถ  ตํ  โว  ปหีนํ
หิตาย    สุขาย   ภวิสฺสติ   ฯ   เวทนา   น   ตุมฺหากํ   ฯ   สญฺญา
น   ตุมฺหากํ   ฯ   สงฺขารา   น   ตุมฺหากํ   ฯ  วิญฺญาณํ  น  ตุมฺหากํ
ตํ   ปชหถ   ตํ   โว   ปหีนํ  หิตาย  สุขาย  ภวิสฺสติ  ฯ  ยํ  ภิกฺขเว
น ตุมฺหากํ ตํ ปชหถ ตํ โว ปหีนํ หิตาย สุขาย ภวิสฺสตีติ ฯ
     [๗๔]   สาวตฺถิยํ  ๑-  ฯ  อถ  โข  อญฺญตโร  ภิกฺขุ  เยน  ภควา
เตนุปสงฺกมิ   อุปสงฺกมิตฺวา   ภควนฺตํ  อภิวาเทตฺวา  เอกมนฺตํ  นิสีทิ  ฯ
เอกมนฺตํ   นิสินฺโน   โข   โส   ภิกฺขุ  ภควนฺตํ  เอตทโวจ  สาธุ  เม
ภนฺเต   ภควา   สงฺขิตฺเตน   ธมฺมํ   เทเสตุ   ยมหํ   ภควโต   ธมฺมํ
สุตฺวา  เอโก  วูปกฏฺโฐ  อปฺปมตฺโต  อาตาปี  ปหิตตฺโต  วิหเรยฺยนฺติ  ฯ
ยํ  โข  ภิกฺขุ  ๒-  อนุเสติ  เตน  สงฺขํ  คจฺฉติ  ยํ  นานุเสติ  น เตน
สงฺขํ คจฺฉตีติ ฯ อญฺญาตํ ภควา อญฺญาตํ สุคตาติ ฯ
     {๗๔.๑}   ยถากถํ   ปน  ตฺวํ  ภิกฺขุ  มยา  สงฺขิตฺเตน  ภาสิตสฺส
วิตฺถาเรน   อตฺถํ   อาชานาสีติ   ฯ   รูปญฺเจ   ภนฺเต  อนุเสติ  เตน
สงฺขํ   คจฺฉติ   ฯ   เวทนญฺเจ   อนุเสติ   ฯ   สญฺญญฺเจ  อนุเสติ  ฯ
สงฺขาเร  เจ  อนุเสติ  ฯ  วิญฺญาณญฺเจ  อนุเสติ  เตน  สงฺขํ  คจฺฉติ ฯ
รูปญฺเจ  ภนฺเต  นานุเสติ  น  เตน  สงฺขํ  คจฺฉติ ฯ เวทนญฺเจ นานุเสติ
น  เตน  สงฺขํ  คจฺฉติ  ฯ  สญฺญญฺเจ  ฯ  สงฺขาเร  เจ  ฯ วิญฺญาณญฺเจ
@เชิงอรรถ:  โป. สาวตฺถิยํ อาราเม ฯ ยุ. สาวตฺถิอาราเม ฯ   โป. ภิกฺขเว ฯ
นานุเสติ   น   เตน  สงฺขํ  คจฺฉติ  ฯ  อิมสฺส  ขฺวาหํ  ภนฺเต  ภควตา
สงฺขิตฺเตน ภาสิตสฺส เอวํ วิตฺถาเรน อตฺถํ อาชานามีติ ฯ
     [๗๕]   สาธุ  สาธุ  ภิกฺขุ  สาธุ  โข  ตฺวํ  ภิกฺขุ  มยา  สงฺขิตฺเตน
ภาสิตสฺส   วิตฺถาเรน   อตฺถํ   อาชานาสิ   ฯ  รูปญฺเจ  ภิกฺขุ  อนุเสติ
เตน  สงฺขํ  คจฺฉติ  ฯ  เวทนญฺเจ  ฯ  สญฺญญฺเจ  ฯ  สงฺขาเร  เจ  ฯ
วิญฺญาณญฺเจ    อนุเสติ    เตน   สงฺขํ   คจฺฉติ   ฯ   รูปญฺเจ   ภิกฺขุ
นานุเสติ   น   เตน   สงฺขํ   คจฺฉติ  ฯ  เวทนญฺเจ  ฯ  สญฺญญฺเจ  ฯ
สงฺขาเร   เจ   ฯ  วิญฺญาณญฺเจ  นานุเสติ  น  เตน  สงฺขํ  คจฺฉติ  ฯ
อิมสฺส   โข   ภิกฺขุ   มยา   สงฺขิตฺเตน   ภาสิตสฺส   เอวํ  วิตฺถาเรน
อตฺโถ ทฏฺฐพฺโพติ ฯ
     [๗๖]   อถ  โข  โส  ภิกฺขุ  ภควโต ภาสิตํ อภินนฺทิตฺวา อนุโมทิตฺวา
อุฏฺฐายาสนา   ภควนฺตํ   อภิวาเทตฺวา   ปทกฺขิณํ   กตฺวา   ปกฺกามิ  ฯ
อถ   โข   โส  ภิกฺขุ  เอโก  วูปกฏฺโฐ  อปฺปมตฺโต  อาตาปี  ปหิตตฺโต
วิหรนฺโต    นจิรสฺเสว   ยสฺสตฺถาย   กุลปุตฺตา   สมฺมเทว   อคารสฺมา
อนคาริยํ     ปพฺพชนฺติ     ตทนุตฺตรํ    พฺรหฺมจริยปริโยสานํ    ทิฏฺเฐว
ธมฺเม   สยํ   อภิญฺญา   สจฺฉิกตฺวา   อุปสมฺปชฺช   วิหาสิ   ขีณา  ชาติ
วุสิตํ   พฺรหฺมจริยํ   กตํ   กรณียํ   นาปรํ  อิตฺถตฺตายาติ  อพฺภญฺญาสิ  ฯ
อญฺญตโร จ ปน โส ภิกฺขุ อรหตํ อโหสีติ ฯ
     [๗๗]   สาวตฺถิยํ  ฯ  อถ  โข  อญฺญตโร  ภิกฺขุ  เยน ภควา ฯเปฯ
เอกมนฺตํ   นิสินฺโน   โข   โส   ภิกฺขุ  ภควนฺตํ  เอตทโวจ  สาธุ  เม
ภนฺเต   ภควา   สงฺขิตฺเตน   ธมฺมํ   เทเสตุ   ยมหํ   ภควโต   ธมฺมํ
สุตฺวา  เอโก  วูปกฏฺโฐ  อปฺปมตฺโต  อาตาปี  ปหิตตฺโต  วิหเรยฺยนฺติ  ฯ
ยํ   โข   ภิกฺขุ  อนุเสติ  ตํ  อนุมิยฺยติ  ๑-  ยํ  อนุมิยฺยติ  เตน  สงฺขํ
คจฺฉติ   ยํ   นานุเสติ   น   ตํ   อนุมิยฺยติ   ยํ  นานุมิยฺยติ  น  เตน
สงฺขํ คจฺฉตีติ ฯ อญฺญาตํ ภควา อญฺญาตํ สุคตาติ ฯ
     {๗๗.๑}   ยถากถํ   ปน  ตฺวํ  ภิกฺขุ  มยา  สงฺขิตฺเตน  ภาสิตสฺส
วิตฺถาเรน  อตฺถํ  อาชานาสีติ  ฯ  รูปญฺเจ  ภนฺเต  อนุเสติ  ตํ อนุมิยฺยติ
ยํ  อนุมิยฺยติ  เตน  สงฺขํ  คจฺฉติ  ฯ  เวทนญฺเจ  อนุเสติ  ฯ  สญฺญญฺเจ
อนุเสติ  ฯ  สงฺขาเร  เจ  อนุเสติ  ฯ  วิญฺญาณญฺเจ อนุเสติ ตํ อนุมิยฺยติ
ยํ  อนุมิยฺยติ  เตน  สงฺขํ  คจฺฉติ  ฯ  รูปญฺเจ  ภนฺเต  นานุเสติ  น  ตํ
อนุมิยฺยติ   ยํ   นานุมิยฺยติ   น   เตน   สงฺขํ   คจฺฉติ  ฯ  เวทนญฺเจ
นานุเสติ   ฯ   สญฺญญฺเจ   นานุเสติ   ฯ  สงฺขาเร  เจ  นานุเสติ  ฯ
วิญฺญาณญฺเจ   นานุเสติ   น   ตํ   อนุมิยฺยติ   ยํ  นานุมิยฺยติ  น  เตน
สงฺขํ   คจฺฉติ  ฯ  อิมสฺส  ขฺวาหํ  ภนฺเต  ภควตา  สงฺขิตฺเตน  ภาสิตสฺส
เอวํ วิตฺถาเรน อตฺถํ อาชานามีติ ฯ
     [๗๘]   สาธุ  สาธุ  ภิกฺขุ  สาธุ  โข  ตฺวํ  ภิกฺขุ  มยา  สงฺขิตฺเตน
ภาสิตสฺส   วิตฺถาเรน   อตฺถํ   อาชานาสิ   ฯ  รูปญฺเจ  ภิกฺขุ  อนุเสติ
ตํ   อนุมิยฺยติ   ยํ   อนุมิยฺยติ   เตน  สงฺขํ  คจฺฉติ  ฯ  เวทนญฺเจ  ฯ
สญฺญญฺเจ   ฯ   สงฺขาเร   เจ  ฯ  วิญฺญาณญฺเจ  อนุเสติ  ตํ  อนุมิยฺยติ
ยํ   อนุมิยฺยติ   เตน   สงฺขํ   คจฺฉติ  ฯ  รูปญฺเจ  ภิกฺขุ  นานุเสติ  น
@เชิงอรรถ:  ม. ยุ. อนุมียติ ฯ สพฺพตฺถ อีทิสเมว ฯ
ตํ   อนุมิยฺยติ   ยํ   นานุมิยฺยติ  น  เตน  สงฺขํ  คจฺฉติ  ฯ  เวทนญฺเจ
นานุเสติ   ฯ   สญฺญญฺเจ   นานุเสติ   ฯ  สงฺขาเร  เจ  นานุเสติ  ฯ
วิญฺญาณญฺเจ   นานุเสติ   น   ตํ   อนุมิยฺยติ  ยํ  นานุมิยฺยติ   น  เตน
สงฺขํ   คจฺฉติ   ฯ   อิมสฺส   โข   ภิกฺขุ   มยา  สงฺขิตฺเตน  ภาสิตสฺส
เอวํ   วิตฺถาเรน   อตฺโถ   ทฏฺฐพฺโพติ  ฯเปฯ  อญฺญตโร  จ  ปน  โส
ภิกฺขุ อรหตํ อโหสีติ ฯ
     [๗๙]   สาวตฺถิยํ   ฯ  อถ  โข  อายสฺมา  อานนฺโท  สายณฺหสมยํ
ปฏิสลฺลานา    วุฏฺฐิโต    เยน    ภควา   เตนุปสงฺกมิ   อุปสงฺกมิตฺวา
ภควนฺตํ   อภิวาเทตฺวา   เอกมนฺตํ   นิสีทิ   ฯ   เอกมนฺตํ  นิสินฺนํ  โข
อายสฺมนฺตํ   อานนฺทํ   ภควา   เอตทโวจ   สเจ   ตํ   อานนฺท  เอวํ
ปุจฺเฉยฺยุํ   กตเมสํ   อาวุโส   อานนฺท   ธมฺมานํ   อุปฺปาโท  ปญฺญายติ
วโย   ปญฺญายติ   ฐิตานํ   อญฺญถตฺตํ   ปญฺญายตีติ   ฯ   เอวํ   ปุฏฺโฐ
ตฺวํ   อานนฺท   กินฺติ   พฺยากเรยฺยาสีติ   ฯ   สเจ   มํ  ภนฺเต  เอวํ
ปุจฺเฉยฺยุํ   กตเมสํ   อาวุโส   อานนฺท   ธมฺมานํ   อุปฺปาโท  ปญฺญายติ
วโย   ปญฺญายติ   ฐิตานํ   อญฺญถตฺตํ   ปญฺญายตีติ   ฯ   เอวํ   ปุฏฺโฐ
อหํ   ภนฺเต   เอวํ   พฺยากเรยฺยํ   รูปสฺส   โข   อาวุโส   อุปฺปาโท
ปญฺญายติ    วโย    ปญฺญายติ    ฐิตสฺส    อญฺญถตฺตํ    ปญฺญายติ   ฯ
เวทนาย   ฯ   สญฺญาย   ฯ   สงฺขารานํ   ฯ   วิญฺญาณสฺส   อุปฺปาโท
ปญฺญายติ    วโย    ปญฺญายติ    ฐิตสฺส    อญฺญถตฺตํ    ปญฺญายติ   ฯ
อิเมสํ   โข   อาวุโส   ธมฺมานํ   อุปฺปาโท  ปญฺญายติ  วโย  ปญฺญายติ
ฐิตานํ   อญฺญถตฺตํ   ปญฺญายตีติ   ฯ   เอวํ   ปุฏฺโฐ  อหํ  ภนฺเต  เอวํ
พฺยากเรยฺยนฺติ ฯ
     [๘๐]   สาธุ   สาธุ   อานนฺท   รูปสฺส   โข  อานนฺท  อุปฺปาโท
ปญฺญายติ    วโย    ปญฺญายติ    ฐิตสฺส    อญฺญถตฺตํ    ปญฺญายติ   ฯ
เวทนาย   ฯ   สญฺญาย   ฯ   สงฺขารานํ   ฯ   วิญฺญาณสฺส   อุปฺปาโท
อิเมสํ   โข   อานนฺท   ธมฺมานํ   อุปฺปาโท  ปญฺญายติ  วโย  ปญฺญายติ
ฐิตานํ   อญฺญถตฺตํ   ปญฺญายตีติ   ฯ   เอวํ  ปุฏฺโฐ  ตฺวํ  อานนฺท  เอวํ
พฺยากเรยฺยาสีติ ฯ
     [๘๑]   สาวตฺถิยํ   ฯ  เอกมนฺตํ  นิสินฺนํ  โข  อายสฺมนฺตํ  อานนฺทํ
ภควา  เอตทโวจ  สเจ  ตํ  อานนฺท  เอวํ  ปุจฺเฉยฺยุํ  กตเมสํ  อาวุโส
อานนฺท     ธมฺมานํ     อุปฺปาโท    ปญฺญายิตฺถ    วโย    ปญฺญายิตฺถ
ฐิตานํ   ๑-   อญฺญถตฺตํ   ปญฺญายิตฺถ   ฯ   กตเมสํ  ธมฺมานํ  อุปฺปาโท
ปญฺญายิสฺสติ   วโย   ปญฺญายิสฺสติ   ฐิตานํ   อญฺญถตฺตํ   ปญฺญายิสฺสติ  ฯ
กตเมสํ    ธมฺมานํ    อุปฺปาโท   ปญฺญายติ   วโย   ปญฺญายติ   ฐิตานํ
อญฺญถตฺตํ    ปญฺญายตีติ    ฯ    เอวํ   ปุฏฺโฐ   ตฺวํ   อานนฺท   กินฺติ
พฺยากเรยฺยาสีติ  ฯ  สเจ  มํ  ภนฺเต  เอวํ  ปจฺเฉยฺยุํ  กตเมสํ  อาวุโส
อานนฺท   ธมฺมานํ   อุปฺปาโท   ปญฺญายิตฺถ   วโย   ปญฺญายิตฺถ   ฐิตานํ
อญฺญถตฺตํ ปญฺญายิตฺถ ฯ
     {๘๑.๑}   กตเมสํ    ธมฺมานํ   อุปฺปาโท   ปญฺญายิสฺสติ   วโย
ปญฺญายิสฺสติ       ฐิตานํ       อญฺญถตฺตํ       ปญฺญายิสฺสติ       ฯ
@เชิงอรรถ:  ม. ฐิตสฺส ฯ สพฺพตฺถ อีทิสเมว ฯ
กตเมสํ     ธมฺมานํ     อุปฺปาโท     ปญฺญายติ     วโย    ปญฺญายติ
ฐิตานํ   อญฺญถตฺตํ   ปญฺญายตีติ   ฯ   เอวํ   ปุฏฺโฐ  อหํ  ภนฺเต  เอวํ
พฺยากเรยฺยํ   ยํ   โข   อาวุโส   รูปํ   อตีตํ   นิรุทฺธํ  วิปริณตํ  ตสฺส
อุปฺปาโท     ปญฺญายิตฺถ     วโย    ปญฺญายิตฺถ    ฐิตสฺส    อญฺญถตฺตํ
ปญฺญายิตฺถ   ฯ   ยา   เวทนา   อตีตา   นิรุทฺธา   วิปริณตา   ตสฺสา
อุปฺปาโท     ปญฺญายิตฺถ     วโย    ปญฺญายิตฺถ    ฐิตาย    อญฺญถตฺตํ
ปญฺญายิตฺถ  ฯ  ยา  สญฺญา  ฯ  เย  สงฺขารา  อตีตา  นิรุทฺธา วิปริณตา
เตสํ    อุปฺปาโท   ปญฺญายิตฺถ   วโย   ปญฺญายิตฺถ   ฐิตานํ   อญฺญถตฺตํ
ปญฺญายิตฺถ    ฯ    ยํ    วิญฺญาณํ    อตีตํ    นิรุทฺธํ   วิปริณตํ   ตสฺส
อุปฺปาโท     ปญฺญายิตฺถ     วโย    ปญฺญายิตฺถ    ฐิตสฺส    อญฺญถตฺตํ
ปญฺญายิตฺถ   ฯ   อิเมสํ   โข   อาวุโส  ธมฺมานํ  อุปฺปาโท  ปญฺญายิตฺถ
วโย ปญฺญายิตฺถ ฐิตานํ อญฺญถตฺตํ ปญฺญายิตฺถ ฯ
     {๘๑.๒}   ยํ  โข  อาวุโส  รูปํ  อชาตํ  อปาตุภูตํ  ตสฺส อุปฺปาโท
ปญฺญายิสฺสติ   วโย   ปญฺญายิสฺสติ   ฐิตสฺส   อญฺญถตฺตํ   ปญฺญายิสฺสติ  ฯ
ยา   เวทนา  อชาตา  อปาตุภูตา  ตสฺสา  อุปฺปาโท  ปญฺญายิสฺสติ  วโย
ปญฺญายิสฺสติ   ฐิตาย   อญฺญถตฺตํ   ปญฺญายิสฺสติ   ฯ   ยา   สญฺญา   ฯ
เย   สงฺขารา   อชาตา   อปาตุภูตา   เตสํ   อุปฺปาโท   ปญฺญายิสฺสติ
วโย    ปญฺญายิสฺสติ    ฐิตานํ    อญฺญถตฺตํ    ปญฺญายิสฺสติ    ฯ    ยํ
วิญฺญาณํ    อชาตํ    อปาตุภูตํ   ตสฺส   อุปฺปาโท   ปญฺญายิสฺสติ   วโย
ปญฺญายิสฺสติ    ฐิตสฺส    อญฺญถตฺตํ    ปญฺญายิสฺสติ    ฯ   อิเมสํ   โข
อาวุโส    ธมฺมานํ    อุปฺปาโท    ปญฺญายิสฺสติ    วโย    ปญฺญายิสฺสติ
ฐิตานํ อญฺญถตฺตํ ปญฺญายิสฺสติ ฯ
     {๘๑.๓}   ยํ  โข อาวุโส รูปํ ชาตํ ปาตุภูตํ ตสฺส อุปฺปาโท ปญฺญายติ
วโย   ปญฺญายติ   ฐิตสฺส  อญฺญถตฺตํ  ปญฺญายติ  ฯ  ยา  เวทนา  ชาตา
ปาตุภูตา  ฯเปฯ  ยา  สญฺญา  ฯ  เย  สงฺขารา  ชาตา  ปาตุภูตา เตสํ
อุปฺปาโท   ปญฺญายติ   วโย   ปญฺญายติ  ฐิตานํ  อญฺญถตฺตํ  ปญฺญายติ  ฯ
ยํ    วิญฺญาณํ    ชาตํ   ปาตุภูตํ   ตสฺส   อุปฺปาโท   ปญฺญายติ   วโย
ปญฺญายติ   ฐิตสฺส   อญฺญถตฺตํ   ปญฺญายติ   ฯ   อิเมสํ   โข   อาวุโส
ธมฺมานํ    อุปฺปาโท   ปญฺญายติ   วโย   ปญฺญายติ   ฐิตานํ   อญฺญถตฺตํ
ปญฺญายตีติ ฯ เอวํ ปุฏฺโฐ อหํ ภนฺเต เอวํ พฺยากเรยฺยนฺติ ฯ
     [๘๒]   สาธุ  สาธุ  อานนฺท  ยํ  โข  อานนฺท  รูปํ  อตีตํ  นิรุทฺธํ
วิปริณตํ    ตสฺส    อุปฺปาโท   ปญฺญายิตฺถ   วโย   ปญฺญายิตฺถ   ฐิตสฺส
อญฺญถตฺตํ   ปญฺญายิตฺถ   ฯ   ยา   เวทนา   ฯ   ยา  สญฺญา  ฯ  เย
สงฺขารา   ฯ   ยํ   วิญฺญาณํ   อตีตํ   นิรุทฺธํ  วิปริณตํ  ตสฺส  อุปฺปาโท
ปญฺญายิตฺถ     วโย    ปญฺญายิตฺถ    ฐิตสฺส    อญฺญถตฺตํ    ปญฺญายิตฺถ
อิเมสํ    โข    อานนฺท    ธมฺมานํ    อุปฺปาโท    ปญฺญายิตฺถ   วโย
ปญฺญายิตฺถ ฐิตานํ อญฺญถตฺตํ ปญฺญายิตฺถ ฯ
     {๘๒.๑}   ยํ   โข   อานนฺท   รูปํ   อชาตํ   อปาตุภูตํ   ตสฺส
อุปฺปาโท       ปญฺญายิสฺสติ       วโย      ปญฺญายิสฺสติ      ฐิตสฺส
อญฺญถตฺตํ    ปญฺญายิสฺสติ   ฯ   ยา   เวทนา   ฯ   ยา   สญฺญา   ฯ
เย   สงฺขารา   ฯ   ยํ   วิญฺญาณํ   อชาตํ  อปาตุภูตํ  ตสฺส  อุปฺปาโท
ปญฺญายิสฺสติ       วโย       ปญฺญายิสฺสติ      ฐิตสฺส      อญฺญถตฺตํ
ปญฺญายิสฺสติ    ฯ    อิเมสํ    โข    อานนฺท    ธมฺมานํ    อุปฺปาโท
ปญฺญายิสฺสติ       วโย       ปญฺญายิสฺสติ      ฐิตานํ      อญฺญถตฺตํ
ปญฺญายิสฺสติ ฯ
     {๘๒.๒}   ยํ  โข  อานนฺท  รูปํ  ชาตํ  ปาตุภูตํ  ตสฺส  อุปฺปาโท
ปญฺญายติ   วโย   ปญฺญายติ   ฐิตสฺส   อญฺญถตฺตํ   ปญฺญายติ   ฯ   ยา
เวทนา  ชาตา  ปาตุภูตา  ฯเปฯ  ยา  สญฺญา  ฯ  เย  สงฺขารา  ฯ ยํ
วิญฺญาณํ   ชาตํ   ปาตุภูตํ   ตสฺส   อุปฺปาโท  ปญฺญายติ  วโย  ปญฺญายติ
ฐิตสฺส    อญฺญถตฺตํ   ปญฺญายติ   ฯ   อิเมสํ   โข   อานนฺท   ธมฺมานํ
อุปฺปาโท     ปญฺญายติ     วโย     ปญฺญายติ     ฐิตานํ    อญฺญถตฺตํ
ปญฺญายตีติ ฯ เอวํ ปุฏฺโฐ ตฺวํ อานนฺท เอวํ พฺยากเรยฺยาสีติ ฯ
     [๘๓]   สาวตฺถิยํ  ฯ  ตตฺร  โข  ฯ  ธมฺมานุธมฺมปฏิปนฺนสฺส  ภิกฺขเว
ภิกฺขุโน   อยมนุธมฺโม   โหติ   ยํ   รูเป  นิพฺพิทาพหุโล  ๑-  วิหเรยฺย
เวทนาย   นิพฺพิทาพหุโล   วิหเรยฺย   สญฺญาย   นิพฺพิทาพหุโล  วิหเรยฺย
สงฺขาเรสุ     นิพฺพิทาพหุโล     วิหเรยฺย    วิญฺญาเณ    นิพฺพิทาพหุโล
วิหเรยฺย   ฯ   โส   รูเป   นิพฺพิทาพหุโล  วิหรนฺโต  ฯ  เวทนาย  ฯ
สญฺญาย   ฯ   สงฺขาเรสุ   ฯ   วิญฺญาเณ  นิพฺพิทาพหุโล  วิหรนฺโต  รูปํ
ปริชานาติ  ฯ  เวทนํ  ฯ  สญฺญํ  ฯ  สงฺขาเร  ฯ  วิญฺญาณํ ปริชานาติ ฯ
โส   รูปํ   ปริชานํ   ฯ   เวทนํ  ฯ  สญฺญํ  ฯ  สงฺขาเร  ฯ  วิญฺญาณํ
ปริชานํ     ปริมุจฺจติ    รูปมฺหา    ปริมุจฺจติ    เวทนาย    ปริมุจฺจติ
สญฺญาย      ปริมุจฺจติ      สงฺขาเรหิ      ปริมุจฺจติ     วิญฺญาณมฺหา
@เชิงอรรถ:  ยุ. สพฺพตฺถ นิพฺพิทาพหุลนฺติ ทิสฺสติ ฯ
ปริมุจฺจติ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ อุปายาเสหิ ปริมุจฺจติ ทุกฺขสฺมาติ วทามีติ ฯ
     [๘๔]   สาวตฺถิยํ  ฯ  ตตฺร  โข  ฯ  ธมฺมานุธมฺมปฏิปนฺนสฺส  ภิกฺขเว
ภิกฺขุโน   อยมนุธมฺโม   โหติ   ยํ   รูเป   อนิจฺจานุปสฺสี  วิหเรยฺย  ฯ
เวทนาย   ฯ   สญฺญาย   ฯ   สงฺขาเรสุ   ฯ  วิญฺญาเณ  อนิจฺจานุปสฺสี
วิหเรยฺย   ฯ   โส   รูเป   อนิจฺจานุปสฺสี  วิหรนฺโต  ฯ  เวทนาย  ฯ
สญฺญาย    ฯ    สงฺขาเรสุ   ฯ   วิญฺญาเณ   อนิจฺจานุปสฺสี   วิหรนฺโต
รูปํ   ปริชานาติ   ฯ   เวทนํ   ฯ   สญฺญํ   ฯ  สงฺขาเร  ฯ  วิญฺญาณํ
ปริชานาติ  ฯ  โส  รูปํ  ปริชานํ  ฯ  เวทนํ  ฯ  สญฺญํ  ฯ  สงฺขาเร ฯ
วิญฺญาณํ     ปริชานํ     ปริมุจฺจติ    รูปมฺหา    ปริมุจฺจติ    เวทนาย
ปริมุจฺจติ    สญฺญาย    ปริมุจฺจติ   สงฺขาเรหิ   ปริมุจฺจติ   วิญฺญาณมฺหา
ปริมุจฺจติ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ อุปายาเสหิ ปริมุจฺจติ ทุกฺขสฺมาติ วทามีติ ฯ
     [๘๕]   สาวตฺถิยํ  ฯ  ตตฺร  โข  ฯ  ธมฺมานุธมฺมปฏิปนฺนสฺส  ภิกฺขเว
ภิกฺขุโน   อยมนุธมฺโม   โหติ   ยํ   รูเป   ทุกฺขานุปสฺสี   วิหเรยฺย  ฯ
เวทนาย   ฯ   สญฺญาย   ฯ   สงฺขาเรสุ   ฯ   วิญฺญาเณ  ทุกฺขานุปสฺสี
วิหเรยฺย   ฯ   โส   รูเป   ทุกฺขานุปสฺสี  วิหรนฺโต   ฯ  เวทนาย  ฯ
สญฺญาย    ฯ    สงฺขาเรสุ    ฯ   วิญฺญาเณ   ทุกฺขานุปสฺสี   วิหรนฺโต
รูปํ   ปริชานาติ   ฯ   เวทนํ   ฯ   สญฺญํ   ฯ  สงฺขาเร  ฯ  วิญฺญาณํ
ปริชานาติ  ฯ  โส  รูปํ  ปริชานํ  ฯ  เวทนํ  ฯ  สญฺญํ  ฯ  สงฺขาเร ฯ
วิญฺญาณํ     ปริชานํ     ปริมุจฺจติ    รูปมฺหา    ปริมุจฺจติ    เวทนาย
ปริมุจฺจติ    สญฺญาย    ปริมุจฺจติ   สงฺขาเรหิ   ปริมุจฺจติ   วิญฺญาณมฺหา
ปริมุจฺจติ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ อุปายาเสหิ ปริมุจฺจติ ทุกฺขสฺมาติ วทามีติ ฯ
     [๘๖]   สาวตฺถิยํ  ฯ  ตตฺร  โข  ฯ  ธมฺมานุธมฺมปฏิปนฺนสฺส  ภิกฺขเว
ภิกฺขุโน   อยมนุธมฺโม   โหติ   ยํ   รูเป   อนตฺตานุปสฺสี  วิหเรยฺย  ฯ
เวทนาย   ฯ   สญฺญาย   ฯ   สงฺขาเรสุ   ฯ  วิญฺญาเณ  อนตฺตานุปสฺสี
วิหเรยฺย  ฯ  โส  ๑-  รูเป  อนตฺตานุปสฺสี  วิหรนฺโต  ฯ  เวทนาย  ฯ
สญฺญาย    ฯ    สงฺขาเรสุ   ฯ   วิญฺญาเณ   อนตฺตานุปสฺสี   วิหรนฺโต
รูปํ   ปริชานาติ   ฯ   เวทนํ   ฯ   สญฺญํ   ฯ  สงฺขาเร  ฯ  วิญฺญาณํ
ปริชานาติ  ฯ  โส  รูปํ  ปริชานํ  ฯ  เวทนํ  ฯ  สญฺญํ  ฯ  สงฺขาเร ฯ
วิญฺญาณํ     ปริชานํ     ปริมุจฺจติ    รูปมฺหา    ปริมุจฺจติ    เวทนาย
ปริมุจฺจติ    สญฺญาย    ปริมุจฺจติ   สงฺขาเรหิ   ปริมุจฺจติ   วิญฺญาณมฺหา
ปริมุจฺจติ   ชาติยา   ชราย   มรเณน   โสเกหิ   ปริเทเวหิ   ทุกฺเขหิ
โทมนสฺเสหิ อุปายาเสหิ ปริมุจฺจติ ทุกฺขสฺมาติ วทามีติ ฯ
                    นตุมฺหากวคฺโค จตุตฺโถ ฯ
                         ตสฺสุทฺทานํ
         นตุมฺหาเกน เทฺว วุตฺตา      ภิกฺขูหิ อปเร ทุเว
         อานนฺเทน จ เทฺว วุตฺตา     อนุธมฺเมหิ เทฺว ทุกาติ ฯ
                      ------------
@เชิงอรรถ:  ม. โย ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๑๗ หน้าที่ ๔๒-๕๒. https://84000.org/tipitaka/read/pali_item.php?book=17&item=71&items=16              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=17&item=71&items=16&mode=bracket              อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=17&item=71&items=16              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=17&item=71&items=16              ศึกษาอรรถกถานี้ได้ที่ :- https://84000.org/tipitaka/attha/attha.php?b=17&i=71              สารบัญพระไตรปิฎกเล่มที่ ๑๗ https://84000.org/tipitaka/read/?index_17 https://84000.org/tipitaka/english/?index_17

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]