พระไตรปิฎกเล่มที่ ๑๖ ภาษาบาลี อักษรไทย
พระสุตตันตปิฎกเล่มที่ ๘ สุตฺต. สํ. นิทานวคฺโค

     [๓๕๑]   กตมญฺจ    ภิกฺขเว   ธาตุนานตฺตํ   ปฏิจฺจ   อุปฺปชฺชติ
สญฺญานานตฺตํ     สญฺญานานตฺตํ    ปฏิจฺจ    อุปฺปชฺชติ    สงฺกปฺปนานตฺตํ
ผสฺส ... เวทนา ... ฉนฺท ... ปริฬาห ... ปริเยสนา ... ลาภนานตฺตํ
โน   ลาภนานตฺตํ   ปฏิจฺจ   อุปฺปชฺชติ  ปริเยสนานานตฺตํ  ปริฬาห  ...
ฉนฺท   ...   เวทนา   ...  ผสฺสนานตฺตํ  โน  สงฺกปฺปนานตฺตํ  ปฏิจฺจ
อุปฺปชฺชติ    สญฺญานานตฺตํ    โน    สญฺญานานตฺตํ    ปฏิจฺจ   อุปฺปชฺชติ
ธาตุนานตฺตํ   ฯ   รูปธาตุํ  ภิกฺขเว  ปฏิจฺจ  อุปฺปชฺชติ  รูปสญฺญา  ฯเปฯ
ธมฺมธาตุํ     ปฏิจฺจ     อุปฺปชฺชติ    ธมฺมสญฺญา    ธมฺมสญฺญํ    ปฏิจฺจ
อุปฺปชฺชติ    ฯเปฯ   ธมฺมปริเยสนา   ธมฺมปริเยสนํ   ปฏิจฺจ   อุปฺปชฺชติ
ธมฺมลาโภ   โน   ธมฺมลาภํ   ปฏิจฺจ   อุปฺปชฺชติ   ธมฺมปริเยสนา   โน
ธมฺมปริเยสนํ    ปฏิจฺจ    อุปฺปชฺชติ   ธมฺมปริฬาโห   โน   ธมฺมปริฬาหํ
ปฏิจฺจ   อุปฺปชฺชติ   ธมฺมจฺฉนฺโท   โน   ธมฺมจฺฉนฺทํ   ปฏิจฺจ   อุปฺปชฺชติ
ธมฺมสมฺผสฺสชา   เวทนา   โน   ธมฺมสมฺผสฺสชํ  เวทนํ  ปฏิจฺจ  อุปฺปชฺชติ
ธมฺมสมฺผสฺโส    โน    ธมฺมสมฺผสฺสํ   ปฏิจฺจ   อุปฺปชฺชติ   ธมฺมสงฺกปฺโป
โน    ธมฺมสงฺกปฺปํ    ปฏิจฺจ   อุปฺปชฺชติ   ธมฺมสญฺญา   โน   ธมฺมสญฺญํ
ปฏิจฺจ อุปฺปชฺชติ ธมฺมธาตุ ฯ
     {๓๕๑.๑}   เอวํ   โข   ภิกฺขเว  ธาตุนานตฺตํ  ปฏิจฺจ  อุปฺปชฺชติ
สญฺญานานตฺตํ     สญฺญานานตฺตํ    ปฏิจฺจ    อุปฺปชฺชติ    สงฺกปฺปนานตฺตํ
ผสฺส ... เวทนา ... ฉนฺท ... ปริฬาห ... ปริเยสนา ... ลาภนานตฺตํ
โน     ลาภนานตฺตํ    ปฏิจฺจ    อุปฺปชฺชติ    ปริเยสนานานตฺตํ    โน
ปริเยสนานานตฺตํ      ปฏิจฺจ     อุปฺปชฺชติ     ปริฬาหนานตฺตํ     โน
ปริฬาหนานตฺตํ    ปฏิจฺจ    อุปฺปชฺชติ   ฉนฺทนานตฺตํ   โน   ฉนฺทนานตฺตํ
ปฏิจฺจ    อุปฺปชฺชติ    เวทนานานตฺตํ    โน    เวทนานานตฺตํ   ปฏิจฺจ
อุปฺปชฺชติ     ผสฺสนานตฺตํ    โน    ผสฺสนานตฺตํ    ปฏิจฺจ    อุปฺปชฺชติ
สงฺกปฺปนานตฺตํ      โน      สงฺกปฺปนานตฺตํ      ปฏิจฺจ     อุปฺปชฺชติ
สญฺญานานตฺตํ       โน      สญฺญานานตฺตํ      ปฏิจฺจ      อุปฺปชฺชติ
ธาตุนานตฺตนฺติ ฯ ทสมํ ฯ
                   นานตฺตวคฺโค ปฐโม ฯ
                       ตสฺส อุทฺทานํ
         ธาตุ สมฺผสฺสญฺจ ๑-             โน เจตํ  เวทนา อปเร ทุเว
         เอตํ อชฺฌตฺตปญฺจกํ             ธาตุสญฺญา จ ๒- โน เจตํ
         ผสฺสสฺส ๓- อปเร ทุเว          เอตํ พาหิรปญฺจกํ ๔- ฯ
                       ---------
@เชิงอรรถ: ๑ ม. ผสฺสญฺจ ฯ  ๒ ยุ. จสทฺโท นตฺถิ ฯ  ๓ ยุ. ผสฺเสน ฯ  ๔ ม. ยุ.
@พาหิรปญฺจกนฺติ ฯ
                     ทุติยวคฺโค ทุติโย
     [๓๕๒]   สาวตฺถิยํ  วิหรติ  ...  ตตฺร  โข  ภควา  ... สตฺติมา
ภิกฺขเว    ธาตุโย    กตมา    สตฺต    อาภาธาตุ    สุภาธาตุ   ๑-
อากาสานญฺจายตนธาตุ วิญฺญาณญฺจายตนธาตุ
อากิญฺจญฺญายตนธาตุ เนวสญฺญานาสญฺญายตนธาตุ
สญฺญาเวทยิตนิโรธธาตุ    อิมา   โข   ภิกฺขเว   สตฺต   ธาตุโยติ   ฯ
เอวํ   วุตฺเต   อญฺญตโร  ภิกฺขุ  ภควนฺตํ  เอตทโวจ  ยา  จายํ  ภนฺเต
อาภาธาตุ   ยา  จ  สุภาธาตุ  ยา  จ  อากาสานญฺจายตนธาตุ  ยา  จ
วิญฺญาณญฺจายตนธาตุ     ยา    จ    อากิญฺจญฺญายตนธาตุ    ยา    จ
เนวสญฺญานาสญฺญายตนธาตุ      ยา      จ     สญฺญาเวทยิตนิโรธธาตุ
อิมา นุ โข ภนฺเต ธาตุโย กึ ปฏิจฺจ ปญฺญายนฺตีติ ฯ
     [๓๕๓]   ยายํ   ภิกฺขุ   อาภาธาตุ  อยํ  ธาตุ  อนฺธการํ  ปฏิจฺจ
ปญฺญายติ   ฯ   ยายํ   ภิกฺขุ   สุภาธาตุ   อยํ   ธาตุ   อสุภํ   ปฏิจฺจ
ปญฺญายติ   ฯ   ยายํ   ภิกฺขุ   อากาสานญฺจายตนธาตุ   อยํ  ธาตุ  รูปํ
ปฏิจฺจ    ปญฺญายติ    ฯ    ยายํ    ภิกฺขุ   วิญฺญาณญฺจายตนธาตุ   อยํ
ธาตุ    อากาสานญฺจายตนํ    ปฏิจฺจ    ปญฺญายติ    ฯ   ยายํ   ภิกฺขุ
อากิญฺจญฺญายตนธาตุ      อยํ     ธาตุ     วิญฺญาณญฺจายตนํ     ปฏิจฺจ
ปญฺญายติ     ฯ    ยายํ    ภิกฺขุ    เนวสญฺญานาสญฺญายตนธาตุ    อยํ
ธาตุ    อากิญฺจญฺญายตนํ    ปฏิจฺจ    ปญฺญายติ    ฯ    ยายํ    ภิกฺขุ
สญฺญาเวทยิตนิโรธธาตุ   อยํ   ธาตุ  นิโรธํ  ปฏิจฺจ  ปญฺญายตีติ  ฯ  ยา
@เชิงอรรถ: ๑ ม. ยุ. สุภธาตุ ฯ เอวมุปริปิ ฯ
จายํ  ภนฺเต  อาภาธาตุ  ยา  จ  สุภาธาตุ ยา จ อากาสานญฺจายตนธาตุ
ยา     จ    วิญฺญาณญฺจายตนธาตุ    ยา    จ    อากิญฺจญฺญายตนธาตุ
ยา   จ   เนวสญฺญานาสญฺญายตนธาตุ   ยา   จ  สญฺญาเวทยิตนิโรธธาตุ
อิมา นุ โข ภนฺเต ธาตุโย กถํ สมาปตฺติ ปตฺตพฺพาติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๖ หน้าที่ ๑๗๗-๑๘๑.
https://84000.org/tipitaka/read/pali_item.php?book=16&item=351&items=3
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=16&item=351&items=3&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=16&item=351&items=3
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=16&item=351&items=3
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=16&i=351
             สารบัญพระไตรปิฎกเล่มที่ ๑๖
https://84000.org/tipitaka/read/?index_16
https://84000.org/tipitaka/english/?index_16