ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๙ ภาษาบาลี อักษรไทย ม.อ. (ปปญฺจ.๓)

หน้าที่ ๒๔๙.

ชาโต, น ทุกฺขเวทนาย อนโณ. ภุญฺชามีติ เจตฺถ เถยฺยปริโภโค อิณปริโภโค
ทายชฺชปริโภโค สามิปริโภโคติ จตฺตาโร ปริโภคา เวทิตพฺพา. ตตฺถ ทุสฺสีลสฺส
ปริโภโค เถยฺยปริโภโค นาม. โส หิ จตฺตาโร ปจฺจเย เถเนตฺวา ภุญฺชติ.
วุตฺตมฺปิ เจตํ "เถยฺยาย โว ภิกฺขเว รฏฺฐปิณฺโฑ ภุตฺโต"ติ ๑- สีลวโต ปน
อปจฺจเวกฺขณปริโภโค อิณปริโภโค นาม. สตฺตนฺนํ เสกฺขานํ ปริโภโค
ทายชฺชปริโภโค นาม. ขีณาสวสฺส ปริโภโค สามิปริโภโค นาม. อิธ กิเลสอิณานํ
อภาวํ สนฺธาย "อนโณ"ติ วุตฺตํ, "อนิโณ"ติปิ ปาโฐ. สามิปริโภคํ สนฺธาย
"ภุญฺชามิ โภชนนฺ"ติ วุตฺตํ.
      กามรติสนฺถวนฺติ ทุวิเธสุปิ กาเมสุ ตณฺหารติสนฺถวํ มา อนุยุญฺชถ มา
กริตฺถ. นยิทํ ทุมฺมนฺติตํ มมาติ ยํ มยา สมฺมาสมฺพุทฺธํ ทิสฺวา ปพฺพชิสฺสามีติ
มนฺติตํ, ตํ มม มนฺติตํ น ทุมฺมนฺติตํ. สํวิภตฺเตสุ ๒- ธมฺเมสูติ อหํ สตฺถาติ
เอวํ โลเก อุปฺปนฺเนหิ เย ธมฺมา สุวิภตฺตา, เตสุ ธมฺเมสุ ยํ เสฏฺฐํ
นิพฺพานํ, ตเทว อหํ อุปคมํ อุปคโต สมฺปตฺโต, ตสฺมา มยฺหํ อิทํ อาคมนํ
สฺวาคตํ นาม คตนฺติ. ติสฺโส วิชฺชาติ ปุพฺเพนิวาสทิพฺพจกฺขุอาสวกฺขยปญฺญา. กตํ
พุทฺธสฺส สาสนนฺติ ยํ พุทฺธสฺส สาสเน กตฺตพฺพกิจฺจํ อตฺถิ, ตํ สพฺพํ มยา
กตํ. ตีหิ วิชฺชาหิ นวหิ จ โลกุตฺตรธมฺเมหิ เทสนํ มตฺถกํ ปาเปสีติ.
                    ปปญฺจสูทนิยา มชฺฌิมนิกายฏฺฐกถาย
                     องฺคุลิมาลสุตฺตวณฺณนา นิฏฺฐิตา.
                          -------------
                        ๗. ปิยชาติกสุตฺตวณฺณนา
      [๓๕๓] เอวมฺเม สุตนฺติ ปิยชาติกสุตฺตํ. ตตฺถ เนว กมฺมนฺตา ปฏิภนฺตีติ
น สพฺเพน สพฺพํ ปฏิภนฺติ, ปกตินิยาเมน ปน น ปฏิภนฺติ. ทุติยปเทปิ
เอเสว นโย. เอตฺถ จ น ปฏิภาตีติ น รุจฺจติ. อาฬหนนฺติ สุสานํ. อญฺญถตฺตนฺติ
@เชิงอรรถ:  วิ. มหาวิ. ๑/๑๙๕/๑๒๖                      สี. สวิภตฺเตสุ, อิ. ปฏิภตฺเตสุ



เนื้อความอรรถกถาฉบับภาษาบาลี อักษรไทย เล่มที่ ๙ หน้าที่ ๒๔๙. http://84000.org/tipitaka/read/attha_page.php?book=9&page=249&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=9&A=6275&modeTY=2&pagebreak=1 http://84000.org/tipitaka/atthapali/th_line.php?B=9&A=6275&modeTY=2&pagebreak=1#p249


จบการแสดงผล หน้าที่ ๒๔๙.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]