อรรถกถาเล่มที่ ๔ หน้าที่ ๙๕.

ชรามรณํ ปจฺจยสมุปฺปนฺนํ, อุโภเปเต ธมฺมา ปจฺจยสมุปฺปนฺนาติ ปจฺจยปริคฺคเห ปญฺญา ธมฺมฏฺฐิติญาณนฺ"ติ. ^๑- เอวมิมํ ตสฺส ตสฺส ธมฺมสฺส ตถา ตถา ปจฺจยภาเวน ปวตฺตํ ติวฏฺฏํ ติยทฺธํ ติสนฺธึ จตุสงฺเขปํ วีสตาการํ ปฏิจฺจสมุปฺปาทํ วิภชิตฺวา กเถตุํ อญฺเญสํ ถาโม วา พลํ วา นตฺถิ, อวิสโย เอส อญฺเญสํ, ตถาคตสฺเสว วิสโย. อิติ ปจฺจยาการํ ปตฺวา พุทฺธานํ คชฺชิตํ มหนฺตํ โหติ, ญาณํ อนุปวิสติ ฯเปฯ สุญฺญตาปฏิสํยุตฺตาติ. ตถา จตฺตาโร ชนา สสฺสตวาทา นาม, จตฺตาโร เอกจฺจสสฺสตวาทา, จตฺตาโร อนฺตานนฺติกา, จตฺตาโร อมราวิกฺเขปิกา, เทฺว อธิจฺจสมุปฺปนฺนิกา, โสฬส สญฺญีวาทา, อฏฺฐ อสญฺญีวาทา, อฏฺฐ เนวสญฺญีนาสญฺญีวาทา, สตฺต อุจฺเฉทวาทา, ปญฺจ ทิฏฺฐธมฺมนิพฺพานวาทา นาม, เต อิทํ นิสฺสาย อิทํ คณฺหนฺตีติ ทฺวาสฏฺฐิทิฏฺฐิคตานิ ภินฺทิตฺวา นิชฺชฏํ นิคฺคุมฺพํ กตฺวา กเถตุํ อญฺเญสํ ถาโม วา พลํ วา นตฺถิ, อวิสโย เอส อญฺเญสํ, ตถาคตสฺเสว วิสโย. อิติ สมยนฺตรํ ปตฺวา พุทฺธานํ คชฺชิตํ มหนฺตํ โหติ, ญาณํ อนุปวิสติ, พุทฺธญาณสฺส มหนฺตตา ปญฺญายติ, เทสนา คมฺภีรา โหติ ติลกฺขณาหตา สุญฺญตาปฏิสํยุตฺตาติ. อิมสฺมึ ปน ฐาเน สมยนฺตรํ ลพฺภติ, ตสฺมา สพฺพญฺญุตญาณสฺส มหนฺตภาวสฺส ทสฺสนตฺถํ, เทสนาย จ สุญฺญตาปกาสนวิภาวนตฺถํ ^๒- สมยนฺตรํ อนุปวิสนฺโต ธมฺมราชา "สนฺติ ภิกฺขเว เอเก สมณพฺราหฺมณา"ติ เอวํ ปุจฺฉาวิสฺสชฺชนํ อารภิ. [๒๙] ตตฺถ สนฺตีติ อตฺถิ สํวิชฺชนฺติ อุปลพฺภนฺติ. ภิกฺขเวติ อาลปนวจนํ. เอเกติ เอกจฺเจ. สมณพฺราหฺมณาติ ปพฺพชฺชูปคตภาเวน สมณา, ชาติยา พฺราหฺมณา. โลเกน วา "สมณา"ติ จ "พฺราหฺมณา"ติ จ เอวํ สมฺมตา. ปุพฺพนฺตํ กปฺปิตฺวา วิกปฺเปตฺวา คณฺหนฺตีติ ปุพฺพนฺตกปฺปิกา, ปุพฺพนฺตกปฺโป วา เอเตสํ อตฺถีติ ปุพฺพนฺตกปฺปิกา. ตตฺถ อนฺโตติ อยํ สทฺโท อนฺตอพฺภนฺตรมริยาทลามกปรภาค- โกฏฺฐาเสสุ ทิสฺสติ. "อนฺตปูโร อุทรปูโร"ติ ^๓- อาทีสุ หิ อนฺเต อนฺตสทฺโท. @เชิงอรรถ: ^๑ ขุ. ปฏิ. ๓๑/๙๔/๗๒ ธมฺมฏฺฐิติญาณนิทฺเทส ^๒ ก. สุญฺญตาปกาสนภาวตฺถํ, @สี. สุญฺญตาปกาสนตฺถํ ^๓ ขุ.สุ. ๒๕/๑๙๗/๓๗๑ วิชยสุตฺต

เนื้อความอรรถกถาฉบับภาษาบาลี อักษรไทย เล่มที่ ๔ หน้าที่ ๙๕. http://84000.org/tipitaka/read/attha_page.php?book=4&page=95&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=4&A=2493&modeTY=2&pagebreak=1 http://84000.org/tipitaka/atthapali/th_line.php?B=4&A=2493&modeTY=2&pagebreak=1#p95