ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๔ ภาษาบาลี อักษรไทย ที.อ. (สุมงฺคล.๑)

หน้าที่ ๑๐๓-๑๐๔.

หน้าที่ ๑๐๓.

นาม. อิธ ปน ตณฺหาตสฺสนาปิ ทิฏฺฐิตสฺสนาปิ วฏฺฏติ. พฺรหฺมวิมานนฺติ อิธ ปน ปฐมาภินิพฺพตฺตสฺส อตฺถิตาย สุญฺญนฺติ น วุตฺตํ. อุปปชฺชนฺตีติ อุปฺปตฺติวเสน อุปคจฺฉนฺติ. สหพฺยตนฺติ สหภาวํ. [๔๒] อภิภูติ อภิภวิตฺวา ฐิโต "เชฏฺฐโกหมสฺมี"ติ. อนภิภูโตติ อญฺเญหิ อนภิภูโต. อญฺญทตฺถุนฺติ เอกํสวจเน นิปาโต. ทสฺสนวเสน ทโส, สพฺพํ ปสฺสามีติ อตฺโถ. วสวตฺตีติ สพฺพํ ชนํ วเส วตฺเตมิ. อิสฺสโร กตฺตา นิมฺมาตาติ อหํ โลเก อิสฺสโร, อหํ โลกสฺส กตฺตา จ นิมฺมาตา จ, ปฐวีหิมวนฺตสิเนรุจกฺกวาฬมหาสมุทฺทจนฺทิมสุริยา มยา นิมฺมิตาติ. เสฏฺโฐ สชฺชิตาติ อหํ โลกสฺส อุตฺตโม จ สชฺชิตา จ "ตวํ ขตฺติโย นาม โหหิ, ตฺวํ พฺราหฺมโณ, เวสฺโส, สุทฺโท, คหฏฺโฐ, ปพฺพชิโต นาม. อนฺตมโส ตฺวํ โอฏฺโฐ โหหิ, โคโณ โหหี"ติ เอวํ "สตฺตานํ สํวิภชิตา ๑- อหนฺ"ติ มญฺญติ. วสี ปิตา ภูตภพฺยานนฺติ "อหมสฺมิ จิณฺณวสิตาย วสี, อหมฺปิตา ภูตานญฺจ ภพฺยานญฺจา"ติ มญฺญติ. ตตฺถ อณฺฑชชลาพุชา สตฺตา อนฺโตอณฺฑโกเสเจว อนฺโตวตฺถิมฺหิ จ ภพฺยา นาม, พหิ นิกฺขนฺตกาลโต ปฏฺฐาย ภูตา นาม. สํเสทชา ปฐมจิตฺตกฺขเณ ภพฺยา, ทุติยโต ปฏฺฐาย ภูตา. โอปปาติกา ปฐมอิริยาปเถ ภพฺยา, ทุติยโต ปฏฺฐาย ภูตาติ เวทิตพฺพา. เต สพฺเพปิ มยฺหํ ปุตฺตาติ สญฺญาย "อหมฺปิตา ภูตภพฺยานนฺ"ติ มญฺญติ. อิทานิ การณโต สาเธตุกาโม "มยา อิเม สตฺตา นิมฺมิตา"ติ ปฏิญฺญํ กตฺวา "ตํ กิสฺส เหตู"ติ อาทิมาห. อิตฺถตฺตนฺติ อิตฺถภาวํ, พฺรหฺมภาวนฺติ อตฺโถ. อิมินา มยนฺติ อตฺตโน กมฺมวเสน จุตาปิ อุปปนฺนาปิ จ เกวลํ มญฺญนามตฺเตเนว "อิมินา นิมฺมิตตา"ติ มญฺญมานา วงฺกจฺฉิทฺเทน ๒- วงฺกอาณิ วิย โอนมิตฺวา ตสฺเสว ปาทมูลํ คจฺฉนฺติ. [๔๓] วณฺณวนฺตตโร จาติ วณฺณวนฺตตโร จ อภิรูโป ปาสาทิโกติ อตฺโถ. มเหสกฺขตโรติ อิสฺสริยปริวารวเสน มหายสตโร. [๔๔] ฐานํ โข ปเนตนฺติ การณํ โข ปเนตํ. โส ตโต จวิตฺวา อญฺญตฺร น คจฺฉติ, อิเธว อาคจฺฉติ, ตํ สนฺธาเยตํ วุตฺตํ. อคารสฺมาติ เคหา. อนคาริยนฺติ @เชิงอรรถ: ฉ.ม, สํวิสเชตา อิ. วงฺกจฺฉิทฺเท

--------------------------------------------------------------------------------------------- หน้าที่ ๑๐๔.

ปพฺพชฺชํ. ปพฺพชฺชา หิ ยสฺมา อคารสุส หิตํ กสิโครกฺขาทิกมฺมํ ตตฺถ นตฺถิ, ตสฺมา อนคาริยนฺติ วุจฺจติ. ปพฺพชตีติ อุปคจฺฉติ. ตโต ปรํ นานุสฺสรตีติ ตโต ปุพฺเพนิวาสา ปรํ น สรติ, สริตุํ อสกฺโกนฺโต ตตฺถ ฐตฺวา ทิฏฺฐึ คณฺหาติ. นิจฺโจติ อาทีสุ ตสฺส อุปปตฺตึ อปสฺสนฺโต "นิจฺโจ"ติ วทติ, มรณํ อปสฺสนฺโต "ธุโว"ติ, สทาภาวโต "สสฺสโต"ติ, ชราวเสนาปิ วิปริณามสฺส อภาวโต "อวิปริณามธมฺโม"ติ. เสสเมตฺถ วาเร อุตฺตานเมวาติ. [๔๕-๔๖] ทุติยวาเร: ขิฑฺฑาย ปทุสฺสนฺติ วินสฺสนฺตีติ ขิฑฺฑาปโทสิกา, "ปทูสิกา"ติปิ ปาลึ ลิขนฺติ, สา อฏฺฐกถายํ นตฺถิ. อติเวลนฺติ อติกาลํ, อติจิรนฺติ อตฺโถ. หสฺสขิฑฺฑารติธมฺมสมาปนฺนาติ หสฺสรติธมฺมญฺเจว ขิฑฺฑารติธมฺมญฺจ สมาปนฺนา อนุยุตฺตา, เกฬิหสฺสสุขญฺเจว กายิกวาจสิกกีฬาสุขญฺจ อนุยุตฺตา, วุตฺตปฺปการรติธมฺมสมงฺคิโน หุตฺวา วิหรนฺตีติ อตฺโถ. สติ ปมุสฺสตีติ ขาทนียโภชนีเยสุ สติ ปมุสฺสติ. เต กิร ปุญฺญวิเสสาธิคเตน มหนฺเตน อตฺตโน สิริวิภเวน นกฺขตฺตํ กีฬนฺตา ตาย สมฺปตฺติมหนฺตตาย ๑- "อาหารํ ปริภุญฺชิมฺหา, น ปริภุญฺชิมฺหา"ติปิ น ชานนฺติ. อถ เอกาหาราติกฺกมนโต ปฏฺฐาย นิรนฺตรํ ขาทนฺตาปิ ปิวนฺตาปิ จวนฺติเยว, น ติฏฺฐนฺติ. กสฺมา? กมฺมชเตชสฺส พลวตาย กรชกายสฺส มนฺทตาย. มนุสฺสานํ หิ กมฺมชเตโช มนฺโท, กรชกาโย พลวา. เตสํ กมฺมชเตชสฺส มนฺทตาย กรชกายสฺส พลวตาย สตฺตาหมฺปิ อติกฺกมิตฺวา อุโณฺหทกอจฺฉยาคุอาทีหิ สกฺกา วตฺถุํ อุปตฺถมฺเภตุํ. เทวานํ ปน เตโช พลวา โหติ, กรชํ มนฺทํ. เต เอกํ อาหารเวลํ อติกฺกมิตฺวาว สณฺฐาตุํ น สกฺโกนฺติ. ยถา นาม คิมฺหานํ มชฺฌนฺหิเก ตตฺตปาสาเณ ฐปิตํ ปทุมํ วา อุปฺปลํ วา สายณฺหสมเย ฆฏสเตนาปิ สิญฺจิยมานํ ปากติกํ น โหติ, วินสฺสติเยว. เอวเมว ปจฺฉา นิรนฺตรํ ขาทนฺตาปิ ปิวนฺตาปิ จวนฺติเยว, น ติฏฺฐนฺติ. เตนาห "สติยา สมฺโมสา เต เทวา ตมฺหา กายา จวนฺตี"ติ. กตเม ปน เต เทวาติ? "อิเม เทวา"ติ ๒- อฏฺฐกถายํ วิจารณา นตฺถิ, "เทวานํ กมฺมชเตโช พลวา โหติ, กรชํ มนฺทนฺ"ติ อวิเสเสน วุตฺตตฺตา ปน เย เกจิ กวฬิงฺการาหารูปชีวิโน เทวา @เชิงอรรถ: ม. สมฺปตฺติยา มหนฺตตาย. ก.สี. นามาติ


เนื้อความอรรถกถาฉบับภาษาบาลี อักษรไทย เล่มที่ ๔ หน้าที่ ๑๐๓-๑๐๔. http://84000.org/tipitaka/read/attha_page.php?book=4&page=103&pages=2&modeTY=2&pagebreak=1&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=4&A=2704&modeTY=2&pagebreak=1 http://84000.org/tipitaka/atthapali/th_line.php?B=4&A=2704&modeTY=2&pagebreak=1#p103


จบการแสดงผล หน้าที่ ๑๐๓-๑๐๔.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]