อรรถกถาเล่มที่ ๓๓ หน้าที่ ๑๐๘.

ภญฺชิ ปุนปฺปุนนฺติ ตุเมฺห นทีตีเร ชาตํ นฬํ มหาเวเคน อาคโต นทีโสโต วิย กิเลสมาโร มจฺจุมาโร เทวปุตฺตมาโร จ ปุนปฺปุนํ มา ภญฺชีติ อตฺโถ. ตสฺมา กโรถ พุทฺธวจนํ "ฌายถ ภิกฺขเว มา ปมาทตฺถา"ติอาทินา ^๑- วุตฺตํ พุทฺธสฺส ภควโต วจนํ กโรถ, ยถานุสิฏฺฐํ ปฏิปตฺติยา สมฺปาเทถ. ขโณ โว มา อุปจฺจคาติ โย หิ พุทฺธวจนํ น กโรติ, ตํ ปุคฺคลํ อยํ พุทฺธุปฺปาทกฺขโณ ปฏิรูปเทสวาเส อุปฺปตฺติกฺขโณ สมฺมาทิฏฺฐิยา ปฏิลทฺธกฺขโณ ฉนฺนํ อายตนานํ อเวกลฺลกฺขโณติ สพฺโพปิ ขโณ อติกฺกมติ, โส ขโณ มา ตุเมฺห อติกฺกมตุ, ขณาตีตาติ เย หิ ตํ ขณํ อตีตา, เย วา ปุคฺคเล โส ขโณ อตีโต, เต นิรยมฺหิ สมปฺปิตา ตตฺถ นิพฺพตฺตา จิรกาลํ โสจนฺติ. ปมาโท รโชติ รูปาทีสุ อารมฺมเณสุ สติโวสฺสคฺคลกฺขโณ ปมาโท, สงฺกิเลส- สภาวตฺตา ราครชาทิมิสฺสตาย จ รโช. ปมาทานุปติโต รโชติ โย หิ โกจิ รโช นาม ราคาทิโก, โส สพฺโพ ปมาทานุปติโต ปมาทวเสเนว อุปฺปชฺชติ. อปฺปมาเทนาติ อปฺปมชฺชเนน อปฺปมาทปฏิปตฺติยา. วิชฺชายาติ อคฺคมคฺควิชฺชาย. อพฺพุเห สลฺลมตฺตโนติ อตฺตโน หทยนิสฺสิตํ ราคาทิสลฺลํ อุทฺธเรยฺย สมูหเนยฺยาติ. มาลุงฺกฺยปุตฺตตฺเถรคาถาวณฺณนา นิฏฺฐิตา. --------------------- ๓๕๒. ๖. สปฺปทาสตฺเถรคาถาวณฺณนา ปณฺณวีสตีติอาทิกา อายสฺมโต สปฺปทาสตฺเถรสฺส ^๒- คาถา. กา อุปฺปตฺติ? อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยํ กุสลํ อุปจินิตฺวา อิมสฺมึ พุทฺธุปฺปาเท กปิลวตฺถุสฺมึ สุทฺโธทนมหาราชสฺส ปุโรหิตปุตฺโต @เชิงอรรถ: ^๑ ม.มู. ๑๒/๒๑๕/๑๘๑ เทฺวธาวิตกฺกสุตฺต ^๒ ม. สพฺพทาสตฺเถรสฺส

เนื้อความอรรถกถาฉบับภาษาบาลี อักษรไทย เล่มที่ ๓๓ หน้าที่ ๑๐๘. http://84000.org/tipitaka/read/attha_page.php?book=33&page=108&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=33&A=2458&modeTY=2&pagebreak=1 http://84000.org/tipitaka/atthapali/th_line.php?B=33&A=2458&modeTY=2&pagebreak=1#p108