อรรถกถาเล่มที่ ๓ หน้าที่ ๙๘.

ปพฺพชฺชา จสฺส วาริตา ฯ อมนุสฺสชาติกมฺปน อรหนฺตํ มนุสฺสชาติยํ วา อวเสสํ อริยปุคฺคลํ ฆาเตตฺวา อานนฺตริโย น โหติ ปพฺพชฺชาปิสฺส น วาริตา ฯ กมฺมมฺปน พลวํ โหติ ฯ ติรจฺฉาโน มนุสฺสอรหนฺตมฺปิ ฆาเตตฺวา อานนฺตริโย น โหติ ฯ กมฺมมฺปน ภาริยนฺติ อยเมตฺถ วินิจฺฉโย ฯ เต วธาย โอนียนฺตีติ วธตฺถาย โอนียนฺติ ฯ มาเรตุํ นียนฺตีติ อตฺโถ ฯ ยมฺปน ปาลิยํ สจา จ มยนฺติ วุตฺตํ ตสฺส สเจ มยนฺติ อยเมวตฺโถ ฯ สเจติ หิ วตฺตพฺเพ เอตฺถ สจา จ อิติ อยํ นิปาโต วุตฺโต ฯ สเจ จ อิจฺเจว วา ปาโฐ ฯ ตตฺถ สเจติ สมฺภาวนตฺเถ นิปาโต ฯ จ อิติ ปทปูรณมตฺเต ฯ สจชฺช มยนฺติปิ ปาโฐ ฯ ตสฺส สเจ อชฺช มยนฺติ อตฺโถ ฯ {๑๑๕} ภิกฺขุนีทูสโก ภิกฺขเวติ เอตฺถ โย ปกตตฺตํ ภิกฺขุนึ ติณฺณํ มคฺคานํ อญฺญตรสฺมึ ทูเสติ อยํ ภิกฺขุนีทูสโก นาม ฯ เอตสฺส ปพฺพชฺชา จ อุปสมฺปทา จ วาริตา ฯ โย ปน กายสํสคฺเคน สีลวินาสํ ปาเปติ ตสฺส ปพฺพชฺชา จ อุปสมฺปทา จ น วาริตา ฯ พลกฺกาเรน โอทาตวตฺถวสนํ กตฺวา อนิจฺฉมานํเยว ทูเสนฺโตปิ ภิกฺขุนีทูสโกเยว ฯ พลกฺกาเรน ปน โอทาตวตฺถวสนํ กตฺวา อิจฺฉมานํ ทูเสนฺโต ภิกฺขุนีทูสโก น โหติ ฯ กสฺมา ฯ ยสฺมา คิหิภาเว สมฺปฏิจฺฉิตมตฺเตเยว สา อภิกฺขุนี โหติ ฯ สกึ สีลวิปนฺนมฺปน ปจฺฉา ทูเสนฺโต สิกฺขมานสามเณรีสุ จ วิปฺปฏิปชฺชนฺโต เนว ภิกฺขุนีทูสโก โหติ ปพฺพชฺชมฺปิ อุปสมฺปทมฺปิ ลภติ ฯ สงฺฆเภทโก ภิกฺขเวติ เอตฺถ โย เทวทตฺโต วิย

เนื้อความอรรถกถาฉบับภาษาบาลี อักษรไทย เล่มที่ ๓ หน้าที่ ๙๘. http://84000.org/tipitaka/read/attha_page.php?book=3&page=98&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=3&A=2039&modeTY=2&pagebreak=1 http://84000.org/tipitaka/atthapali/th_line.php?B=3&A=2039&modeTY=2&pagebreak=1#p98