romanATTHA book 3 Page 194.

Āpattiyā na kāretabbo. {282} Ekakoti natthi me dutiyoti attho. Pahūtaṃ yāguñca madhugoḷikañca paṭiyādāpetvāti so kira satasahassaṃ vayaṃ katvā paṭiyādāpesi. Anumodanagāthāya pariyosāne patthayataṃ icchatanti padānaṃ alameva dātunti iminā sambandho. Sace pana patthayatā icchatāti pāṭho atthi soyeva gahetabbo. {283} Bhojjayāgunti yā pavāraṇaṃ janeti. Yadaggenāti yaṃ ādiṃ katvā. Saggā te āraddhāti sagganibbattanakaṃ puññaṃ upacitanti attho. Yathādhammo kāretabboti paramparabhojanena kāretabbo bhojjayāguyā hi pavāraṇā hotīti. {284} Nāhantaṃ kaccānāti tasmiṃ kira avasiṭṭhaguḷe devatā sukhumojaṃ pakkhipiṃsu. So aññesaṃ pariṇāmaṃ na gacchati tasmā evamāha. Gilānassa guḷanti tathārūpena byādhinā gilānassa pacchābhattaṃ guḷaṃ anujānāmīti attho. {285} Sabbasantharinti yathā sabbattha santhataṃ hoti evaṃ santharitvā. {286} Sunīdhavassakārāti sunīdho ca vassakāro ca dve brāhmaṇā magadharañño mahāmaccā. Vajjīnaṃ paṭibāhāyāti vajjīrājakulānaṃ āyamukhānaṃ pacchindanatthāya. Vatthūnīti gharavatthūni. Cittāni namanti nivesanāni māpetunti tā kira devatā vatthuvijjāpāṭhakānaṃ sarīre adhimuccitvā evaṃ cittāni nāmenti. Kasmā. Amhākaṃ yathānurūpaṃ sakkāraṃ karissantīti attho. Tāvatiṃsehīti loke kira sakkaṃ devarājānaṃ vissukammañca upādāya tāvatiṃsā paṇḍitāti

The Pali Atthakatha in Roman Character Volume 3 Page 194. http://84000.org/tipitaka/read/attha_page.php?book=3&page=194&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=3&A=3992&pagebreak=1 http://84000.org/tipitaka/atthapali/rm_line.php?B=3&A=3992&pagebreak=1#p194