บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 16 : PALI ROMAN Aṅ.A. (manoratha.3) Page 26.
Ujubhūtesūti kāyavācācittehi ujukesu. Chandasāti pemena. Cattantiādīsu pariccāgavasena cattaṃ. Muttacāgatāya muttaṃ. Anapekkhacittatāya cittena na aggahitanti anaggitaṃ. 1- Khettūpameti viruhanaṭṭhena khettasadise. Aññataraṃ manomayanti suddhāvāsesu ekajjhānamanena 2- nibbattaṃ devakāyaṃ. Yathādhippāyoti yathājjhāsayo. Iminā kiṃ pucchati? tassa kira manussakāle arahattatthāya Ajjhāsayo ahosi, taṃ pucchāmīti pucchati. Devaputtopi arahattappattatāya taggha me bhagavā yathādhippāyoti āha. Yattha yatthūpapajjatīti tīsu vā kulasampattīsu chasu vā kāmasaggesu yattha yattha uppajjati, tattha tattheva 3- dīghāyu yasavā hotīti. Pañcamaṃ catukkanipāte vuttanayeneva veditabbaṃ. Chaṭṭhasattamāni uttānatthāneva. 8. Alabbhanīyaṭhānasuttavaṇṇanā [48] Aṭṭhame alabbhanīyānīti aladdhabbāni, na sakkā labhituṃ. Ṭhānānīti kāraṇāni. Jarādhammaṃ mā jīrīti yaṃ mayhaṃ jarāsabhāvaṃ, taṃ mā jīratu. Sesapadesupi eseva nayo. Nacchādeyyāti na rucceyya. Abbuhīti 4- nīhari. Yatoti yasmiṃ kāle. Āpadāsūti upaddavesu. Na vedhatīti na kampati nānusocati. Atthavinicchayaññūti kāraṇatthavinicchaye kusalo. Purāṇanti nibbikāratāya porāṇakameva. Jappenāti vaṇṇabhaṇanena. Mantenāti mahānubhāvamantaparivattanena. Subhāsitenāti subhāsitakathanena. Anuppadānenāti satassa vā sahassassa vā dānena. Paveṇiyā vāti kulavaṃsena vā, "idaṃ amhākaṃ paveṇiyā āciṇṇaṃ, idaṃ anāciṇṇan"ti evaṃ paveṇikathanenāti 5- attho. Yathā yathā yattha labhetha atthanti etesu jappādīsu yena yena yattha yattha ṭhāne jarādhammādīnaṃ ajīraṇādiatthaṃ @Footnote: 1 cha.Ma. na uggahitanti anuggahitaṃ 2 cha.Ma. ekaṃ jhānamanena 3 cha.Ma. tattha tattha @4 Sī. abbahīti 5 Sī. paveṇidīpanenātiThe Pali Atthakatha in Roman Character Volume 16 Page 26. http://84000.org/tipitaka/read/attha_page.php?book=16&page=26&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=16&A=583&pagebreak=1 http://84000.org/tipitaka/atthapali/rm_line.php?B=16&A=583&pagebreak=1#p26
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]