บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |||
ATTHAKATHA Book 15 : PALI ROMAN Aṅ.A. (manoratha.2) Page 279.
Catukkanipātavaṇṇanā 1. Paṭhamapaṇṇāsaka 1. Bhaṇḍagāmavagga 1. Anubuddhasuttavaṇṇanā [1] Catukkanipātassa paṭhame ananubodhāti abujjhanena ajānanena. Appaṭivedhāti appaṭivijjhanena appaccakkhakiriyāya. Dīghamaddhānanti cirakālaṃ. Sandhāvitanti bhavato bhavaṃ gamanavasena sandhāvitaṃ. Saṃsaritanti punappunaṃ gamanāgamana- vasena 1- saṃsaritaṃ. Mamañceva tumhākañcāti mayā ca tumhehi ca. Athavā sandhāvitaṃ saṃsaritanti sandhāvanaṃ saṃsaraṇaṃ mama ceva tumhākañca ahosīti evamettha attho veditabbo. Ariyassāti niddosassa. Sīlasamādhipaññāti ime pana tayopi 2- dhammā maggaphalasampayuttāva veditabbā, vimuttināmena phalameva niddiṭṭhaṃ. Bhavataṇhāti bhavesu taṇhā. Bhavanettīti bhavarajju. Taṇhāyaeva etaṃ nāmaṃ. Tāya hi sattā goṇā viya gīvāyaṃ bandhitvā taṃ taṃ bhavaṃ niyyanti. 3- Tasmā bhavanettīti vuccati. Anuttarāti lokuttaRā. Dukkhassantakaroti vaṭṭadukkhassa antakaro. Cakkhumāti pañcahi cakkhūhi cakkhumā. Parinibbutoti kilesaparinibbānena parinibbuto. Idamassa bodhimaṇḍe paṭhamaparinibbānaṃ, pacchā pana yamakasālānamantare anupādisesāya nibbānadhātuyā parinibbuto yathānusandhinā desanaṃ niṭṭhapesi. 2. Papatitasuttavaṇṇanā [2] Dutiye papatitoti cuto. Appapatitoti patiṭṭhito. 4- Tattha lokiyamahājano patitoyeva nāma, sotāpannādayo kilesuppattikkhaṇe patitā nāma. Khīṇāsavo ekantapatiṭṭhito nāma. @Footnote: 1 Ma. bhavagamanavasena 2 cha.Ma. tayo @3 cha.Ma. nīyanti 4 cha.Ma. apatito patiṭṭhitoThe Pali Atthakatha in Roman Character Volume 15 Page 279. http://84000.org/tipitaka/read/attha_page.php?book=15&page=279&pages=1&edition=roman ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_rm.php?B=15&A=6449&pagebreak=1 http://84000.org/tipitaka/atthapali/rm_line.php?B=15&A=6449&pagebreak=1#p279
บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถา อักษรโรมัน. หากพบข้อผิดพลาด กรุณาแจ้งได้ที่ [email protected]