ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ  พระวินัยปิฎก  พระสุตตันตปิฎก  พระอภิธรรมปิฎก  ค้นพระไตรปิฎก  ชาดก  หนังสือธรรมะ 
หน้า
แสดง
หน้า
คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๑๕ ภาษาบาลี อักษรไทย องฺ.อ. (มโนรถ.๒)

หน้าที่ ๒๒๕.

                        ๒. อาชีวกสุตฺตวณฺณนา
     [๗๓] ทุติเย เตนหิ คหปตีติ เถโร กิร จินฺเตสิ "อยํ อิธาคจฺฉนฺโต
น อญฺญาตุกาโม หุตฺวา อาคมิ, ๑- ปริคฺคณฺหนตฺถํ ปน อาคโต. อิมินา ปุจฺฉิตํ
ปญฺหํ อิมินาว กถาเปสฺสามี"ติ. อิติ ตํเยว กถํ กถาเปตุกาโม เตนหีติอาทิมาห.
ตตฺถ เตนหีติ การณาปเทโส. ยสฺมา ตฺวํ เอวํ ปุจฺฉสิ, ตสฺมา ตญฺเญเวตฺถ
ปฏิปุจฺฉามีติ. เกสนฺโนติ กตเมสํ นุ. สธมฺมุกฺกํสนาติ อตฺตโน ลทฺธิยา
อุกฺขิปิตฺวา ฐปนา. ปรธมฺมาปสาทนาติ ปเรสํ ลทฺธิยา ฆฏฺฏนา วมฺภนา อวกฺขิปนา.
อายตเนว ๒- ธมฺมเทสนาติ การณสฺมึเยว ธมฺมเทสนา. อตฺโถ จ วุตฺโตติ มยา
ปุจฺฉิตปญฺหสฺส ๓- อตฺโถ จ ปกาสิโต. อตฺตา จ อนุปนีโตติ อเมฺห เอวรูปาติ
เอวํ อตฺตา จ น อุปนีโต. นุปนีโตติปิ ๔- ปาโฐ.
                      ๓. มหานามสกฺกสุตฺตวณฺณนา
     [๗๔] ตติเย คิลานา วุฏฺฐิโตติ ๕- คิลาโน หุตฺวา วุฏฺฐิโต. เคลญฺญาติ
คิลานภาวโต. อุปสงฺกมีติ ภุตฺตปาตราโส มาลาคนฺธาทีนิ อาทาย มหาปริวารปริวุโต
อุปสงฺกมิ. พาหายํ คเหตฺวาติ น พาหายํ คเหตฺวา อากฑฺฒิ, นิสินฺนาสนโต อุฏฺฐาย ๖-
ตสฺส สนฺติกํ คนฺตฺวา ทกฺขิณพาหายํ องฺคุฏฺฐเกน สญฺญํ ทตฺวา เอกมนฺตํ อปเนสีติ
เวทิตพฺโพ. อถสฺส "เสขํปิ โข มหานาม สีลนฺ"ติอาทินา นเยน สตฺตนฺนํ เสขานํ
สีลญฺจ สมาธิญฺจ ปญฺญญฺจ กเถตฺวา อุปริ อรหตฺตผลวเสน อเสขสีลสมาธิปญฺญาโย
กเถนฺโต "เสขสมาธิโต เสขํ วิปสฺสนาญาณํ อเสขญฺจ ผลญาณํ ปจฺฉา,
เสขวิปสฺสนาญาณโต จ อเสขผลสมาธิ ปจฺฉา อุปฺปชฺชตี"ติ ทีเปติ. ยานิ ปน
สมฺปยุตฺตานิ สมาธิญาณานิ, เตสํ อปจฺฉา อปุเร อุปฺปตฺติ เวทิตพฺพาติ.
@เชิงอรรถ:  ม. อาคมิสฺสติ    สี. อายตเน จ   ฉ.ม. ปุจฺฉิตปญฺหาย
@ สี. นูปนีโตติปิ, ม. นุปริโตติปิ   ฉ. คิลานวุฏฺฐิโตติ   ฉ.ม. วุฏฺฐาย



เนื้อความอรรถกถาฉบับภาษาบาลี อักษรไทย เล่มที่ ๑๕ หน้าที่ ๒๒๕. http://84000.org/tipitaka/read/attha_page.php?book=15&page=225&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=15&A=5211&modeTY=2&pagebreak=1 http://84000.org/tipitaka/atthapali/th_line.php?B=15&A=5211&modeTY=2&pagebreak=1#p225


จบการแสดงผล หน้าที่ ๒๒๕.

บันทึก ๔ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาบาลี อักษรไทย. หากพบข้อผิดพลาด กรุณาแจ้งได้ที่ [email protected]