อรรถกถาเล่มที่ ๑๔ ภาษาบาลี อักษรไทย
องฺ.อ. (มโนรถ.๑)
หน้าที่ ๑๘๘.

     อุยฺยานปาโล ตํ เถรํ ๑- ทิสฺวา รญฺโญ สนฺติกํ คนฺตฺวา "เทว เม อยฺโย
ปุโรหิตกจฺจายโน ปพฺพชิตฺวา อุยฺยานํ อาคโต"ติ อาห. ราชา จณฺฑปชฺโชโต ๒-
อุยฺยานํ คนฺตฺวา กตภตฺตกิจฺจํ เถรํ ปญฺจปติฏฺฐิเตน วนฺทิตฺวา เอกมนฺตํ นิสินฺโน
"กหํ ภนฺเต ภควา"ติ ปุจฺฉิ. สยํ สตฺถา อนาคนฺตฺวา มํ เปเสสิ มหาราชาติ.
กหํ ภนฺเต อชฺช ภิกฺขํ อลตฺถาติ. เถโร รญฺโญ ปุจฺฉาสภาเคน สพฺพํ เสฏฺฐิธีตาย
กตํ ทุกฺกรํ อาโรเจสิ. ราชา เถรสฺส วสนฏฺฐานํ ปฏิยาเทตฺวา เถรํ นิมนฺเตตฺวา
นิเวสนํ คนฺตฺวา เสฏฺฐิธีตรํ อาหราเปตฺวา ๓- อคฺคมเหสิฏฺฐาเน ฐเปสิ. อิมิสฺสา
อิตฺถิยา ทิฏฺฐธมฺมิโก จ ยสปฏิลาโภ อโหสิ.
     ตโต ปฏฺฐาย ราชา เถรสฺส มหาสกฺการํ กโรติ. เถรสฺส ธมฺมกถาย ปสีทิตฺวา
มหาชโน เถรสฺส สนฺติเก ปพฺพชิ. ตโต ปฏฺฐาย สกลนครํ เอกกาสาวปชฺโชตํ
อิสิวาตปฏิวาตํ ๔- อโหสิ. สาปิ เทวี คพฺภํ ลภิตฺวา ทสมาสจฺจเยน ปุตฺตํ
วิชายิ. ตสฺส นามคหณทิวเส โคปาลกุมาโรติ ปิตามหเสฏฺฐิโน ๕- นามํ อกํสุ. สา
ปุตฺตสฺส นามวเสน โคปาลมาตา นาม เทวี ชาตา. สา เทวี เถเร อติวิย
ปสีทิตฺวา ราชานํ สมฺปฏิจฺฉาเปตฺวา กาญฺจนวนุยฺยาเน เถรสฺส วิหารํ กาเรสิ.
เถโร อุชฺเชนินครํ ปสาเทตฺวา ปุน สตฺถุ สนฺติกํ คโต. อถ สตฺถา อปรภาเค เชตวเน
วิหรนฺโต มธุปิณฺฑิกสุตฺตนฺตํ ๖- กจฺจายนเปยฺยาลํ ๗- ปารายนสุตฺตนฺติ อิเม ตโย
สุตฺตนฺเต อตฺถุปฺปตฺตึ กตฺวา เถรํ สงฺขิตฺเตน ภาสิตสฺส วิตฺถาเรน อตฺถํ
วิภชนฺตานํ อคฺคฏฺฐาเน ฐเปสีติ.
                       ปฐมวคฺควณฺณนา นิฏฺฐิตา.
                        ----------------
@เชิงอรรถ: ๑ สี. เถเร  ๒ สี. ฉนฺทชาโต  ๓ ฉ.ม. อาณาเปตฺวา  ๔ สี.....ปริวาตํ
@๕ ฉ.ม. มาตามหเสฏฺฐิโน  ๖ ฉ.ม. มธุปิณฺฑิกสุตฺตํ,
@ม.มู. ๑๒/๑๙๙/๑๖๘  ๗ ปาลิ. มหากจฺจายนภทฺเทกรตฺตสุตฺต, ม.อุ. ๑๔/๒๗๙/๒๔๘


เนื้อความอรรถกถาฉบับภาษาบาลี อักษรไทย เล่มที่ ๑๔ หน้าที่ ๑๘๘.
http://84000.org/tipitaka/read/attha_page.php?book=14&page=188&pages=1&modeTY=2&edition=pali
ศึกษาพระสูตร (เนื้อความ) นี้แยกตามสารบัญ  :-
http://84000.org/tipitaka/pitaka_item/read_th.php?B=14&A=4456&modeTY=2&pagebreak=1
http://84000.org/tipitaka/atthapali/th_line.php?B=14&A=4456&modeTY=2&pagebreak=1#p188