อรรถกถาเล่มที่ ๑๓ หน้าที่ ๒๑๒.

วา กิเลสนิทฺทาโต ปพุชฺฌนตฺถาย, ผเลน ปพุชฺฌนภาวตฺถายาติปิ วุตฺตํ โหติ. เตเนเวตฺถ นิพฺพานสจฺฉิกิริยา กิเลสปฺปหานํ ปจฺจเวกฺขณาติ สพฺพํ ทสฺสิตํ. ๖-๗. กุณฺฑลิยสุตฺตาทิวณฺณนา [๑๘๗-๑๘๘] ฉฏฺเฐ อารามนิสาทีติ ^๑- อารามํ นิสฺสาย วสนภาเวน อารามนิสาที. ^๒- ปริสาวจโรติ ปริสาย อวจโร. ปริสํ นาม พาลาปิ ปณฺฑิตาปิ โอสรนฺติ, โย ปน ปรปฺปวาทํ มทฺทิตฺวา อตฺตโน วาทํ ทีเปตุํ สกฺโกติ, อยํ ปริสาวจโร นาม. อาราเมน อารามนฺติ อาราเมเนว อารามํ อนุจงฺกมามิ, น พาหิเรนาติ อตฺโถ. อุยฺยาเนน อุยฺยานนฺติ เอตฺถาปิ เอเสว นโย. ^๓- อญฺเญน วา อาราเมน ปวิสิตฺวา อญฺญํ อารามํ, อญฺเญนุยฺยาเนน อญฺญํ อุยฺยานนฺติ อยเมตฺถ อตฺโถ. อิติวาทปฺปโมกฺขานิสํสนฺติ "เอวํ ปุจฺฉา โหติ, เอวํ วิสฺสชฺชนํ, เอวํ คหณํ, เอวํ นิพฺเพฐนนฺ"ติ อิมินา นเยน อิติ วาโท โหติ อิติวาทปฺปโมกฺโขติ เอตํ อานิสํสํ. อุปารมฺภานิสํสนฺติ "อยํ ปุจฺฉาย โทโส, อยํ วิสฺสชฺชเน"ติ เอวํ วาทโทสานิสํสํ. กถํ ภาวิโต จ กุนฺฑลิย อินฺทฺริยสํวโรติ สตฺถา "เอตฺตกํ ฐานํ ปริพฺพาชเกน ปุจฺฉิตํ, อิทานิ ปุจฺฉิตุํ น สกฺโกตี"ติ ญตฺวา "น ตาว อยํ เทสนา ยถานุสนฺธึ คตา, อิทานิ นํ ยถานุสนฺธึ ปาเปสฺสามี"ติ สยเมว ปุจฺฉนฺโต อิมํ เทสนํ อารภิ. ตตฺถ มนาปํ นาภิชฺชตีติ อิฏฺฐารมฺมณํ น อภิชฺฌายติ. นาภิหํสตีติ น สามิสาย ตุฏฺฐิยา อภิหํสติ. ^๔- ตสฺส ฐิโต จ กาโย โหติ, ฐิตํ จิตฺตํ อชฺฌตฺตนฺติ ตสฺส นามกาโย จ จิตฺตญฺจ โคจรชฺฌตฺเต ฐิตํ โหติ. สุสณฺฐิตนฺติ กมฺมฏฺฐานวเสน สุฏฺฐุ สณฺฐิตํ. สุวิมุตฺตนฺติ กมฺมฏฺฐานวิมุตฺติยา สุวิมุตฺตํ. อมนาปนฺติ อนิฏฺฐารมฺมณํ. น มงฺกุ โหตีติ ตสฺมึ น มงฺกุ โหติ. @เชิงอรรถ: ^๑ ฉ. อารามนิสฺสยีติ ^๒ ฉ. อารามนิสฺสยี @^๓ ก. อุยฺยาเนปิ เอเสว นโย ^๔ ก. อวิหึสติ

เนื้อความอรรถกถาฉบับภาษาบาลี อักษรไทย เล่มที่ ๑๓ หน้าที่ ๒๑๒. http://84000.org/tipitaka/read/attha_page.php?book=13&page=212&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=13&A=4604&modeTY=2&pagebreak=1 http://84000.org/tipitaka/atthapali/th_line.php?B=13&A=4604&modeTY=2&pagebreak=1#p212