Na kathayiṃsu. Kasmā? evaṃ kira nesaṃ ahosi "ayaṃ bhikkhu vādī dukkhalakkhaṇe
paññāpiyamāne rūpaṃ dukkhaṃ .pe. Viññāṇaṃ dukkhaṃ, maggo dukkho, phalaṃ dukkhanti
`tumhe dukkhappattā bhikkhū nāmā'ti gahaṇaṃ gaṇheyya, yathā gahaṇaṃ gahetuṃ na
sakkoti, evaṃ niddosamevassa katvā kathessāmā"ti dveva lakkhaṇāni kathayiṃsu.
Paritassanāupādānaṃ uppajjatīti paritassanā ca upādānañca uppajjati.
Paccudāvattati mānasaṃ, atha ko carahi me attāti yadi rūpādīsu ekopi anattā,
atha ko nāma 1- me attāti evaṃ paṭinivattati "mayhaṃ mānasan"ti. Ayaṃ kira
thero paccaye apariggahetvāva vipassanaṃ paṭṭhapesi, sāssa 2- dubbalavipassanā
attagāhaṃ pariyādātuṃ asakkuṇantī saṅkhāresu suññato upaṭṭhahantesu
"ucchijjissāmi vinassissāmī"ti ucchedadiṭṭhiyā ceva paritassanāya ca 3- paccayo
ahosi. So ca attānaṃ papāte papatantaṃ viya disvā "paritassanā upādānaṃ
uppajjati, paccudāvattati mānasaṃ, atha ko carahi me attā"ti āha. Na kho
panevaṃ dhammaṃ passato hotīti catusaccadhammaṃ passantassa evaṃ na hoti. Tāvatikā
vissaṭṭhīti 4- tattako vissāso. Sammukhā metanti thero tassa vacanaṃ sutvā "kīdisā
nu kho imassa dhammadesanā sappāyā"ti cintento tepiṭakaṃ buddhavacanaṃ vicinitvā
kaccāyanasuttaṃ 5- addasa "idaṃ āditova diṭṭhiviniveṭhanaṃ katvā majjhe buddhabalaṃ
dīpetvā saṇhaṃ sukhumaṃ paccayākāraṃ pakāsayamānaṃ vuttaṃ, 6- idamassa desessāmī"ti
taṃ dassento "sammukhā metan"tiādimāha. Aṭṭhamaṃ.
9-10. Rāhulasuttādivaṇṇanā
[91-92] Navamadasamāni rāhulasaṃyutte 7- vuttatthāneva. Kevalaṃ hetāni
ayaṃ theravaggoti katvā idhāgatānīti. 8- Navamadasamāni.
Theravaggo catuttho.
--------------
@Footnote: 1 Sī. ko nu kho 2 Sī.,Ma. sāyaṃ 3 Ma. paritāsassa ca
@4 ṭīkā. vissatthīti 5 saṃ. ni. 16/15/17 6 cha.Ma. gataṃ
@7 saṃ.ni. 16/188/232 8 Sī. idhānītānīti
The Pali Atthakatha in Roman Character Volume 12 Page 347.
http://84000.org/tipitaka/read/attha_page.php?book=12&page=347&pages=1&edition=roman
ศึกษาพระสูตร (เนื้อความ) นี้แยกตามสารบัญ :-
http://84000.org/tipitaka/pitaka_item/read_rm.php?B=12&A=7661&pagebreak=1
http://84000.org/tipitaka/atthapali/rm_line.php?B=12&A=7661&pagebreak=1#p347
